Sunday, December 31, 2017

2018 දේශපාලන අනාවැකි



                  


        ඉකුත් ජනාධිපතිවරණයට සති කීපයක්  තිබියදී Colombo Telegraph පත්තරයට  ලිපියක් ලියමින්  ජනාධිපතිවරණයෙන්  මෛත්‍රි   දිනන බව  මා කිවේ  නැකත් බලා නොවේ.   දේශපාලන  පක්ෂවල  හැසිරීම සහ  ජන විඥානය හැදෑරීමෙනි . මා   මේ ලිපියෙන් 2018 වසරේ දේශපාලන අනාවැකි  කියන්නේද  එලෙසමය .

    

  ගිය අවුරුද්ද අවසන් වීමට  පෙර ආණ්ඩුව  පෙරලීමට  මහින්ද රාජපක්ෂ මහතා අසමත් වීම නිසා  ඔහුගේ  අනුගාමිකයන්  2018 වසරට  පා තබන්නේ අතෘප්තියෙන්  බවට සැකයක් නැත . එබැවින් ඔවුන් තව දුරටත් රඳවා  තබා  ගැනීමට  නම් 2018 අවසන් වීමට  පෙර ආණ්ඩුව  පෙරලන බව කිව යුතුව තිබේ. දැනටමත් ප්‍රසන්න රණතුංග  මහතා ඒ  ගැන ප්‍රකාශයක් කර තිබේ.හොඳින් හෝ නරකෙන් 2018 දී  ආණ්ඩුව  පෙරලන බවකීම  එම ප්‍රකාශයයි .


Related image



මහින්ද+මෛත්‍රී ආණ්ඩුවක් ?


කෙසේ වෙතත්  2018 දී ආණ්ඩුව  පෙරලන්නට  හැකිවෙන ලකුණක්  නම් දකින්නට නැත  එයට හේතුව  නම් මහින්ද  පාර්ශවයෙත්  මෛත්‍රී පාර්ශවයෙත්  මන්ත්‍රීවරු එකතු වුවද  113  ක් නැති නිසාය.  දෙපැත්තටම සිටින්නේ  මන්ත්‍රීවරු  95 දෙනෙකු පමණි  ආණ්ඩුවක් පිහිටුවීමට අවශ්‍ය  ඉතිරි 18  ලබා  ගැනීමට නම්  දෙමල ජාතික සන්ධානයේ මන්ත්‍රීවරුන් 16 දෙනාගේ ද, ඩග්ලස් දේවානන්දගේ EPDP සහයද  මුස්ලිම් කොංග්‍රසයේ සහයද  ලබා  ගැනීමට සිදුවේ. එහෙත්  හදාගෙන  යන නව ව්‍යවස්ථාවෙන්  රට  බෙදෙන බව  මහින්ද  පාර්ශ්වය දිගින් දිගටම  ප්‍රකාශ  කර තිබෙන බැවින් දෙමල  ජාතික සන්ධානය  මහින්දට ආණ්ඩුවක්  පිහිටුවීමට   සහය දෙතැයි කිසිසේත් අපේක්ෂා  කළ  නොහැක .


2017 දෙසැම්බර්  මාසයේ සිදුවීම් විග්‍රහ  කළවිට පැහැදිලි වන්නේ  මහින්ද රාජපක්ෂ  මහතාගේ  පාර්ශවය  ක්‍රමක්‍රමයෙන් දුර්වල වෙමින් පවතින  බවය .  පළාත් පාලන චන්දය ආසන්න වන්නට වන්නට තව  තවත් මහින්ද  පාර්ශ්වයේ  පිරිස්  මෛත්‍රී පාර්ශවයට එකතු විය  හැකිය . එබැවින් 2018  වසර  තුලදී මහින්ද  පාර්ශ්වය  දුර්වල වී  මෛත්‍රීපාල   මහතා ගේ  පාර්ශ්වය  ශක්තිමත්  වීමට බෙහෙවින් ඉඩ  තිබේ.


මෛත්‍රිපාල  පාර්ශවය දිගින් දිගට ශක්තිමත් ලෙස තබා  ගැනීම හෝ නොගැනීම තීරණය වන්නේ  ඔහු විසින් ගන්නා  ක්‍රියා  මාර්ග අනුවය. ඔහු  බලයට  පැමිණ ජනවාරි 8 දිනට අවුරුදු තුනක් සම්පුර්ණ වේ. ඔහුගේ  පසුගිය  අවුරුදු තුන තුලදී ගත් ක්‍රියාමාර්ග  ගැන  ඔහු  බලයට ගෙන ඒමට  සහය දුන් බලවේග සිටින්නේ එතරම් සතුටකින් නොවේ. .එයට හේතුව වන්නේ     හොරුන්ට සහ අපරාධකරුවන්ට එරෙහිව තීරණාත්මක ලෙස  කටයුතු කිරීමට ඔහු අසමත් වීමත් , දෙමල ජනයාගේ දැවෙන  ප්‍රශ්ණ විසඳීමට එතරම් උනන්දුවක්  නොදැක්වීමත්  , පොදු අපේක්ෂකයාගේ/ජනධිපතිවරයාගේ  ස්ථාවරයෙන් ඈත්වී ශ්‍රීලංකා  නිදහස්  පක්ෂයේ  නායකයා  ලෙස  කටයුතු කරන්නට  යාමත් නිසාය .එහෙත්   එය හිතු තරමින් සාර්ථක නොවී මහින්ද වටා  පිරිසක් ගොඩ නැගුනේ  මෛත්‍රී විසින් මහින්ද පිලේ අයගේ ඔලුව අතගා තමන් වෙත  කැඳවා  ගැනීමට  හැකිවෙනු ඇතැයි උපකල්පනය  කළ නිසාය.  එබැවින් 2018 වසරේ සිට ඔහු ගන්නා   බව  කියන  කඩුව  නිකම් එහාට මෙහාට වනා බලවත් නායකයෙක් බවට  පත් විමට නොහැකි වනු ඇත . සමහර විට ඔහු මෙය අවබෝධ  කරගෙන සිටිනවා  විය  හැක .මෙතෙක් පවත්වාගෙන  ආ  වැනෙන  ප්‍රතිපත්තිය අතහැර දමා  තීරණාත්මක  ලෙස කටයුතු  කළහොත් මහින්ද  පිළ 2018 අවසන් වන විට  බොහෝ දුරට දුර්වල වී  තිබෙනු ඇත .


UNP තනි ආණ්ඩුවක් පිහිටවයිද?


ජාතික  ආණ්ඩුව  ලෙස  හඳුන්වන  ශ්‍රීලංකා+ යුඑන්පි ආණ්ඩුව  වෙනුවට එක්සත් ජාතික  පක්ෂයේ  තනි ආණ්ඩුවක්  පිහිටුවීමේ  ඉඩකඩක්  තවමත් දැකීමට නුපුළුවන. එසේ වීමට  නම් මෛත්‍රී සහ එක්සත් ජාතික  පක්ෂය අතර  බලවත් ගැටුමක් ඇතිවය යුතුය . මහින්ද වටා  බලවේගයක් තිබෙනතුරු  මෛත්රිද එක්සත් ජාතික  පක්ෂය සමග ලොකු  හැප්පිල්ලකට යාමට ඉඩ  කඩ  නැත  .එහෙත්  බැඳුම්කර කොමිසම් වාර්තාව මගින්  විසින්  එක්සත් ජාතික  පක්ෂයේ නායකයන් වැරදි කරුවන් බව  කියා  තිබුනහොත් මෛත්‍රීට නිහඬව සිටීමට නොහැක . එහිදී පසුබිමක් තුළ මෛත්‍රී රනිල් ආණ්ඩුව  කිසියම් දෙදෙරිමකට  භාජනය වීම වැළක්විය නොහැකි වුවද   මෛත්‍රී  +රනිල් ආණ්ඩුව 2018 වසර අවසානයක්  තෙක් පවතින බවට සැකයක් නැත .

Related image

පළාත් පාලන චන්දයෙන් කවුරු දිනාවිද?

  පවත්වන  පළාත්පාලන චන්දයේ  ප්‍රතිඵල තීරණාත්මකය  . උතුර  හැර අන් ප්‍රදේශවල මහ නගර සභා  බලය බොහෝ විට එක්සත් ජාතික  පක්ෂය  අත්පත් කරගැනීමට  ඉඩ තිබේ. නැගෙනහිර ඇතැම් තැනක මුස්ලිම් කොන්ග්‍රසය  බලය අත් කරගනු ඇත  . බොහෝ නගර  නගර සභාවල  සහ ප්‍රාදේශීය සභාවල බලය   එක්සත්  ජාතික පක්ෂයේ සහ  මෛත්රිගේ ශ්‍රීලනිපය  සන්ධාන ගතවී අත්කරගනු ඇතැයි සිතිය හැක . මහින්ද පිළට ඇතැම්  විටෙක ප්‍රාදේශීය සභා ඉතා සුළු ගණනක  බලය අත්පත්  කරගැනීමට  ඉඩ නැත්තේ  නැත . ශ්‍රී ලංකා නිදහස්  පක්ෂය  බෙදී තිබියදී එහි වාසිය අත්වන්නේ එක්සත් ජාතික  පක්ෂයට නිසාය .


ජනතා විමුක්ති පෙරමුණට වාසිද?


ජනතා විමුක්ති පෙරමුණට  එකම ප්‍රාදේශීය සභාවකවත්  බලය ලැබෙතැයි  සිතීමට  හේතු නැත. එහෙත් 2015 මහා මැතිවරණයේදී ජනතා විමුක්ති පෙරමුණ ලබා  ගත චන්ද  ප්‍රමාණයට වඩා  චන්ද ප්‍රමාණයක්  ලබා   ගැනීමට  එම පක්ෂයට හැකිවනු ඇතැයි විශ්වාස  කළ හැක. එයට  හේතු දෙකක්  තිබේ. එක හේතුවක්   වන්නේ  ජවිපෙ නොවන  අපේක්ෂයකන් රැසක්   සීනුවෙන් තරඟ  බිමට බස්සවා  තිබීමය. දෙවන  හේතුව වන්නේ   තරුණ තරුණියන්ගේ විරැකියා ප්‍රශ්නය  තරමක් දුරටවත්   විසඳීමට ආණ්ඩුව අපොහොසත් වීම නිසාය. එබැවින් බලාපොරොත්තු කඩවූ  තරුණ තරුණියන්ගෙන්  කිසියම් ප්‍රතිශතයක් ජවිපෙට  චන්දය දීමට  ඉඩ තිබේ.  


පී.බර්ටි රණවීරගේ 


ලිපිය  පිලිබඳ  ඔබේ අදහස් සහ අනාවැකි  පහත  කොමෙන්ටු තීරයේ  ලිවිය  හැක .

Thursday, December 28, 2017

පොහොට්ටුවෙන් චන්දෙ ඉල්ලන නාමල්ගේ මිතුරිය



     

      

          ඇය  නාමල් රාජපක්ෂ මහතාගේ මිතුරියක් වුවද  , කොළඹට චන්දය  ඉල්ලුවද ඇය  ගැන ලිපියක්  ලියන්නට   මේ මොහොත වෙන තුරු  මා සිතා  සිටියේ  නැත. ඊයේ මුහුණු පොතේ  පෝස්ටුවක් පළකලේ එය ප්‍රමාණවත් වෙතැයි සිතු   නිසාය . එහෙත් එහි පලකල පෝස්ටුවට  පළවූ ඇතැම් ප්‍රතිචාර සලකා බැලු විට ඇය  ගැන වැඩි දුර  යමක් ලිවීම අවශ්‍ය  බව  පෙනුණි. එය කොළඹ  චන්ද දායකයනට ඇය ගැන තීරණයක්  ගැනීමට දායක වනු ඇත .


 මේ  ආණ්ඩුව  බලයට  පැමිණි පසු  පත් කරනු ලැබූ  වරාය  , නාවික සහ සිවිල් ගුවන් සේවා ඇමති අර්ජුන රණතුංග වරයා  විසින් ශ්‍රී  ලංකන් ගුවන් සේවයේ දුෂණ සෙවීම සඳහා වැලිඅමුණ  කමිටුව  පත් කළ අතර එහිදී හෙළිවූ කරුණු  ඉතා  බරපතලය එම වාර්තාව අන්තර්  ජාලයේ තිබෙන අතර අවශ්‍ය අයෙකුට  කියවිය  හැක .  එබැවින්  මා  මේ ලිපියෙන් බලාපොරොත්තු වෙන්නේ  කොළඹ නගර සභාවට  පොදු ජන පෙරමුණේ පොහොට්ටුවෙන් තරඟ  කරන  මෙම අපේක්ෂිකාව  ගැන පමණක් ලිවීමටය 



ඇගේ  නම නිත්‍යා සේනානි සමරනායකය . ඇය කලක් ශ්‍රී ලංකන් ගුවන් සේවයේ  ගුවන් සේවිකාවක් ලෙස  සේවය  කළාය. ඇගෙන් අමතර වැඩ   ගැනීමට  සිතු   නාමල් රාජපක්ෂ  මහතා , ජනධිපති ලේකම් කාර්යාලයට අනුයුක්ත  කර ගැනීමට අවශ්‍ය  පියවර  ගත්තේය  . ඒ අනුව   ජනාධිපති ලේකම් ලලිත් වීරතුංග මහතා  ,  ජනධිපතිවරයාගේ  පුද්ගලික  ලේකම්ගේ  කාර්යාලයේ  විශේෂ ව්‍යාපෘති සම්බන්ධිකාරක ලෙස  2010 ජුනි 23 දින ඇයට පත්වීමක්  ලබාදුන්නේය . නියම කළ  මාසික වැටුප රු.35000.00 කි . ඊට අමතරව  ඉන්ධන දීමනාව  ලෙස රු. 22680.00 ක්ද ප්‍රවාහන දීමනාව  ලෙස රු. 30000.00ක්ද ඇයට මසකට ගෙවනු ලැබිණ .  අලුත් රැකියාවෙන් සමරනායක  මෙනෙවිය මසකට  ලැබූ  මුළු මුදල රු.87680.00 කි.


 ශ්‍රී ලන්කන් ගුවන් සේවය  ගැන සෙවීමට  පත් කරනු ලැබූ වැලිඅමුණ කමිටුව මේ සම්බන්ධයෙන් සේනානි සමරනායකගෙන් ප්‍රශ්න කරනු ලැබිණ . අසන ලද ඇතැම් ප්‍රශ්න වලට දුන්  පිළිතුරු මෙසේය .


ඇය  අරලියගහ  මන්දිරයේ සිට  කළ ව්‍යාපෘති මොනවාදැයි  ඇය නොදනී.


ඇයව ශ්‍රී ලන්කන් ගුවන් සේවයේ සිට  අරලියගහ මන්දිරයට  නිදහස්  කෙරුනේ  නාමල්  රාජපක්ෂ මහතාගේ  උවමනාවටය


අරලියගහ මන්දිරයේ හෝ  ජනාධිපති ලේකම් කාර්යාලයේ ඇය  සමග සේවය  කළ අනෙත් අයගේ නම් ඇයට මතක් කර  ගත  නොහැක . මතක තිබෙන්නේ දීපා  ලියනගේ  මිය  පමණි.


ඇය සේවය කරේ  ජනාධිපති ලේකම් කාර්යාලයේ නොවේ. අරලියගහ  මන්දිරයේය .එහෙත් ඇය සේවය  කළ කාර්යාලය    තිබුනේ අරලියගහ මන්දිරයේ හරියටම  කොතනදැයි කීමට  ඇයට නොහැකි විය . ඇය  කිවේ අරලියගහ  මන්දිරයේ කිසියම් තැනක එය තිබුණු බවය  .


 කාර්යාලයට පැමිණීම  සහ පිටවීම තහවුරු  කිරීම සඳහා  අත්සන් කිරීමට පොතක් තිබුනේ  නැත .


ඇයට ඉන්ධන දීමනාවක් සහ  ප්‍රවාහන  දීමනාවක්  සැපයු නමුත්  නාමල් විසින් ප්‍රවාහනය සැපයු බැවින් එම  මුදල් ඇය වැය  කලේ ඇගේ පුද්ගලික  උවමනාඑපා කම් සඳහාය.


ශ්‍රී ලංකන් ගුවන් සේවයෙන් ඇය  නිදහස්  කරනු ලැබුවද  ශ්‍රී ලංකන් ගුවන් සේවය විසින් නොකඩවා ඇයට සම්පුර්ණ වැටුප සහ පලදායිතා දීමනාවෙන් 50% ක් ද   ගෙවනු ලැබිණ . ඒ අනුව  ඇය මසකට ගුවන් සේවයෙන් ලැබූ මාසික වැටුප දල වශයෙන්  රු.70500.00 විය . දෙපැත්තෙන්ම ඇය ලැබූ මාසික ආදායම 158000.00 ක් විය.



අරලිය ගහ මන්දිරයේ ඇය පුර්ණ  කාලීනව  සේවය  කර  අතර තුර  2014 මාර්තු 27 දින ගුවන් සේවිකා තනතුරේ  උසස් වීමක්ද ඇයට  ලබා දී  තිබේ.



 2015 ජනවාරි 9 දින  මහින්ද රාජපක්ෂට  තනතුර  අහිමි වන තුරුම අරලියගහ මන්දිරයේ  ඇය සේවය  කර තිබේ. ඊට දින  තුනකට  පසු ඇය  යලිත් පරණ රැකියාවට  ගියාය. 


වැලි අමුණ වාර්තාව  කියු සිටින්නේ    ජනධිපති ලේකම් කාර්යාලයේ සේවයට  නොව   නාමල් රාජපක්ෂගේ  වැඩට  ඇය  යොදවා  ගෙන තිබෙන  බැවින් ඇයට වැටුප් ගෙවීම වැරදි  බවය. එබැවින් එමගින්  රජයට  සිදු කර තිබෙන  පාඩුව  රු 4,284,460 .00  කි. . 


ඇය  අරලිය ගහ මන්දිරයේ  සේවය  කරන  කාලය  තුලදී  ශ්‍රී ලංකන්  ගුවන් සේවය  ඇයට වැටුප් සහ දීමනා  ලෙස  ගෙවා  තිබෙන  මුළු මුදල රු.4,133, 622 .00 කි. එය  රජයට අයත් සමාගම් වලට අදාළ චක්‍ර ලේඛ අංක 33  උල්ලංඝනය කිරීමක් ලෙස වැලිඅමුණ වාර්තාව සඳහන්  කර තිබේ. එබැවින් මෙය සාපරාධි  ක්‍රියාවක් බව  සඳහන්  කරන කමිටුව මේ සම්බන්ධයෙන්  පරීක්ෂණයක්  පැවැත්වීය  යුතු යැයි කියා තිබේ.


සේනානායක මෙනෙවියගේ  කතාන්දරය  එතනින් අවසන් වන්නේ  නැත . වැලි අමුණ වාර්තාවෙන්  අවුරුද්දකට  පසු ඇය අත් අඩංගුවට  ගනු ලැබුවාය. ඒ පෙර සඳහන්  හේතු  උඩ  නොවේ. නාමල් රාජපක්ෂ මහතාට අයත් සමාගම් දෙක වූ N.R. consultation Pvt Ltd   සහ  Gowers Corporation Pvt Ltd හී  අධ්‍යක්ෂිකාවක ලෙස  කටයුතු කරමින් රු මිලියන 45 ක කළු සල්ලි සුදු සල්ලි කිරීමට ඇය සම්බන්ධ වූ බවට චෝදනා  කරමිනි .




Related image


එහෙත් ඒ  පිළිබඳව  කෙරුණු පරීක්ෂණයක් ගැන දැනගන්නට නැත  . එසේ  පරීක්ෂණයක්  පැවැත්වීමට හිටපු අධිකරණ අමාත්‍යවරයා වන  විජේදාස රාජපක්ෂ උනන්දු නොවීද? එසේත් නොවීනම්  නීතිපති දෙපාර්තමේන්තුව එය  යට ගැසුවාද?


ශ්‍රී ලංකන් ගුවන් සේවයේ දුෂණ සෙවීමට  ජනාධිපතිවරයා 2018 වසරේ  පළමු සතියේදී  කොමිසමක්  පත් කරන  බව දින  කීපයට  පෙර සඳහන්  කළ අතර  දඬුවම්  කෙසේ වෙතත්  හොඳ හොඳ සෙල්ලම් නම්  හෙලිවෙනු නොඅනුමානය .


පොහොට්ටුවෙන් කොළඹ  නගර සභාවට  ඉදිරිපත් වී සිටින සුජානි සමරනායක  මෙනෙවිය ඇගේ මුහුණු පොතේ  මෙසේ  ලියා තිබේ 


" රටට ලෝකයට ගැලපෙන නගරයක් ලෙස කොළබ නගරය ලෝකයේ ඉදිරියෙන් තැබීමට කොළඹ නගරය සංවර්ධනය කළ මහින්ද රාජපක්ෂ මැතිතුමන්ගේ නායකත්වයෙන් යුත් ශ්‍රී ලංකා පොදුජන පෙරමුණේ කණ්ඩායමට කොළඹ නගරය බාර දීමටත් ඔවුන් හරහා අභිමානවත් නගරයක් නිර්මාණය කර ගැනීම සදහා කැප වීමටත් අප සුදානම් බව මතක් කර සිටින්නෙමි..

ලස්සන කොළඹක්‌ තනන්නට ඔබත් අප සමග එක් වන්න."

සේනානි සමරනායක
කොළඹ මහා නගර සභා අපේක්ෂිකා
ශ්‍රී ලංකා පොදු ජන පෙරමුණ..




ඇයට චන්දයදී  කොළඹ නගර සභාවට පත් කර ගන්නවාද  නැද්ද  යන්න එහි චන්ද දායකයන්ට  භාරය 




Sunday, December 24, 2017

පොහොට්ටු සහ යක්කු




  Related image


     මේ  පළාත් පාලන චන්දය  ගැන ඊයේ වෙනතුරු   මගේ  කිසි උනන්දුව  තිබුණේ නැත .එහෙත් මහින්ද රාජපක්ෂ  ඊයේ  කළ  ප්‍රකාශයක් ඇසු  විට මොහු  පරණ රාජපක්ෂ  මිස අබ මල් රේණුවක් වත් වෙනස් වී  නොමැති බව  පෙණුනේය. මොහු නියෝජනය  කරන අන්ත  ප්‍රතිගාමී  මතය නැවත වරක්  පරාජය කිරීම ට යලිත් අවස්ථාවක් එළඹ ඇති බැවින්  ඔහු ස්ථිර  ලෙසම විශ්‍රාම  ගැන්වීම  සඳහා ,  හැකි පමණ දායකත්වයක්  දීම කළ යුතුමය  යන අදහස මා සිත තුල බලවත්  ලෙස දැන් මතුවී  තිබේ.


එයින් අදහස් වෙන්නේ  මා  එක්සත්  ජාතික  පක්ෂයට  කඩේ  යන බව   නොවේ. එක්සත් ජාතික  පක්ෂයට  කඩේ  යන්නට  මට මෙතෙක් අදහසක්  ඇතිවී  නැත .රනිල් වික්‍රමසිංහ මහතාද ඇමති ධුරයක් දරු  ජේ.ආර්. ජයවර්ධන ආණ්ඩුව  1980 දී මා ඇතුළු ජුලි වැඩ වර්ජකයන් 40000 ක්  ගෙදර  යැවූ  බව මට අමතක  වන්නේ  නැත. 1983 දී එක්සත් ජාතික  පක්ෂය කළු ජුලිය දියත් කොට එවකට  100   ටත් අඩු  තුවක්කු කරුවන් සිටි කොටි  සංවිධානය යෝධයෙක් කළ  හැටි  මට අමතක නැත .චන්දය  බලු පොරයක් බවට  පත් කළ  අනුපාත චන්ද  ක්‍රමය  හඳුන්වා දුන්නේ එක්සත් ජාතික  පක්ෂය  බව මට අමතක වන්නේ  නැත . මන්තිරි  කම හම්බු කිරීමේ  ජොබ් එකක්  බවට පත් කළේ එක්සත් ජාතික පක්ෂය බව  මට අමතක වන්නේ  නැත .


එහෙත් මහින්ද රාජපක්ෂ  මහතා  බලයට  පත් වීමෙන් පසු විශේෂයෙන්ම  දෙවන වරට  ජනාධිපති  වීමෙන්   පසු  ඔහු හැසිරුනේ  තවත් ජේ. ආර්. කෙනෙක් ලෙස  නොව  එයිටත් වඩා  භයානක ඒකාධිපතියෙකු ලෙසය . එකාධිපතියන් බිහි කරන ජේ.ආර්.  ව්‍යවස්ථාව  තව දුරටත්  ඔහු ඔප මට්ටම  කළේය. ජනාධිපති තනතුර  පවුලේ බුදලයක් බවට  පත් කිරීම සඳහා අවශ්‍ය පදනම දැමුවේය . ඔහුට  කීකරු නොවූ  ශිරාණි බණ්ඩාරනායක අග විනිසුරුවරිය  රාජපක්ෂගේ  කැකිල්ලේ උසාවියට  කැඳවා චෝදනාවලට  පිළිතුරු දෙන්නටවත්  ඉඩ නොදී  ගෙදර  යැව්වේය . ඉන්පසු   රූකඩයක් අග විනිසුරු ලෙස  පත් කරනු ලැබුවේය .  කොටින්ම  කියතොත් නරක  පාලකයෙක් වූ  ජේ ආර් ජයවර්ධන  මහතා පවා   ජනාධිපතිවරකුට තේරී පත් විය හැක්කේ  දෙවරක් පමණකැයි   1978 ව්‍යවස්ථාවේ ලියා සම්මත  කොට  තිබුන මුත්   මහින්ද  රාජපක්ෂ  මහතා  ඔහුට ඇති  කියා  හිතෙන  තුරුම  ජනාධිපති පුටුවේ  බින්න  බැහිමට හැකිවන  පරිදි  18 වන ව්‍යවස්ථා සංශෝධනය  මගින් ඉඩ සලසා  ගත්තේය . ඒ මගින්ම කොමිෂන් සභා අහෝසි කළේය.  ඔහුට කීකරු විසිසුරුවන් පත් කිරීමේ  බලය  ඔහු අතට  ගත්තේය .


එසේ  නම්  ඔහු ජේ. ආර්ටද වඩා  භයානක  පුද්ගලයෙකු  නොවේද?


    2015 ජනවාරි 8 වෙනිදා  බහුතරයක් මිනිස්සු  හොඳින් හිතා  මතා  චන්දය  භාවිතා කළ බැවින්  රොබට් මුගාබේ  කෙනෙක්  ලංකාවේ  බිහිවීම වැලකුනේය.


නව ව්‍යවස්ථාවක්  සම්මත  කර  ගැනීම සඳහා අගනා අවස්ථාවක්  උදා වූවද එය  සම්මත  කර ගැනීමට ආණ්ඩුව  අවුරුදු දෙකකට අධික  කාලයක් තිස්සේ උනන්දු නොවීම    නිසා එය ඉදිරියේදී සම්මත වීමට  තිබෙන  ඉඩකඩ  සැක සහිතය  .   එය සම්මත නොවුනහොත්  ඊළඟ  ජනාධිපතිවරනයේදී සුදු වැන් ලොක්කා  ජනාධිපතිවරණයට  ඉදිරිපත් වීමට  සියයට සීයක්   ඉඩ තිබේ. ඒ සඳහා අවශ්‍ය වට පිටාව ඔහුගේ  ගෝලබාලයන් මේ දිනවල සකස්  කරමින් සිටිති. "නව  නායකයෙක් සොයා  ගැනීමට සිදුවී  තිබෙන  බව "   ඊයේ  ඇල්ලේ  ගුණවංශ   කිවේ  නිකම්ම නොවේ. ඒ අතර  සුදු වැන් ලොක්කගේ  තවත් ගජ මිත්‍රයෙකු වන  ඥානසාර   "මන් හොඳ මුනියා  " චරිතය  රඟ පාන්නට  පටන් ගෙන  තිබෙන්නේ සුදු වැන් ලොක්කා හෙවත් ගෝටාගේ  උපදෙස් අනුව  බව  මට නම් සැකයක් නැත .කෙසේ  හෝ මීලඟ  ජනාධිපති වරණයේදී  ගෝටා  බලයට  පත්වුවහොත් අගමැති කමට මහින්දව  පත් කර ගැනීම ස්ථිරය . රීරි යකාත් ,මහසෝනාත්  රටපාලනය  කරන්නට  පටන් ගත  හොත්  බිලි  පුජා කොපමණ ගනීදැයි අනුමාන කිරීමට ඕනෑ නම් ඔවුන්ගේ පරණ  කැරැට්ටු මතක්  කර ගැනීම  ප්‍රමාණවත්ය .


ඩිංගිත්තක් මතක් කරතොත් ,  ප්‍රගීත් එක්නැලිගොඩ ආපසු ආවේ  නැත .කොළඹින් අල්ලාගෙන  ත්‍රිකුණාමලේ අරන් ගිය ගැටවු 11 දෙනා ආපසු ආවේ  නැත .ත්‍රිකුණාමලේ වෙරළේ වාඩිවී  මුහුදු   සිංදු කියමින්  සිටි දෙමල  ළමුන් 5 දෙනා  ආපසු ගෙදර ආවේ  නැත  රතුපස්වල  තරුණ  ළමුන් 3 දෙනා ආපසු  ගෙදර   ආවේ  නැත . වැලිකඩ හිර ගෙදර  ගිය අය අතුරින් 27 දෙනෙකු ආපසු ආවේ  නැත . තාජුඩින්  ගෙදර ආවේ  නැත .ලසන්ත වික්‍රමතුංග ආපසු ආවේ  නැත .



 ඒ  ඔක්කොම ඇත්ත  උනත්මේ  ආණ්ඩුවේ එවුන්  හොරුන් බැවින්  ඔවුන්ට චන්දය දී  වැඩක් නැතැයි ඔබට  හිතෙනවා විය  හැක. ඇත්තය .ඔක්කොම  හොරු නොවුනත් සමහරුන් හොරු බව  බැඳුම්කර සෙල්ලම සනාථ  කර තිබේ. හොරු රකින්නට අපිට  උවමනාවක් නැත . හොරු  හැකි ඉක්මනින් හිරේ  හෝ එතනින් එහා  තැනක් තිබේ  නම් එතනට  හෝ  යැවිය  යුතුය . ජනවාරි  8 වෙනිදාත්  ඉන්පසුව අගෝස්තු 17 වෙනිදත්   අපි චන්දය  දුන්නේ  අපේ සල්ලි සාක්කුවේ  දාගන්නේ  නැති ආණ්ඩුවක් හදන්නට  මිස සල්ලි හොරකම් කොට තට්ටු නිවාස  ගන්නට නොවේ.


එහෙත්  මුන් හොඳ  නැත  කියා  රාජපක්ෂලා දෙසට  හැරෙන්නට  අපිට බැරිය.  මන්ද  ඔවුන් අවුරුදු  10 ක් තිස්සෙම  හොරකම් කළ බැවිණි  .නැත.  එයිටත්  කලින් සිටය. 2004 සුනාමිය  ආ දවසේ  සිටය .  ඒ  බව  අපි හරියටම දන්නේ    සුනාමි සල්ලි  පිල්ලි ගැසූ බවත් , "හිරේ  යවන්නට  තිබුණු  නමුත්  හැදෙයි  කියා  සිතා  නිදහස්  කළ බව "  හිටපු අග විනිසුරු සරත් එන් සිල්වාම කිව්  නිසාය .


මේ ආණ්ඩුවේ  පංගු  කාරයන්ට  චන්දය දෙන්නට  කියා  මා යෝජනා  කරන්නේ  නැත  . නමුත් මේ ආණ්ඩුව  බලයට ඇවිත් කරන ලද  යහපත් දේ  තිබේ. 19 වන ව්‍යවස්ථා සංශෝධනය  මගින් ජනධිපති බලතල සීමා  කිරීම,  කොමිසන් සභා  පිහිටුවීම, සුදු වැන් ගැන  බයක් නැතිව  ලියන්නට,   කතා  කරන්නට  හැකි පරිසරයක්  නිර්මාණය  කිරීම , සුදු වැන් නතර කිරීම , මනාප  පොරය  නවත්වන චන්ද  ක්‍රමයක් හදුන්වා දීම , ගිනි ගණන්  දී  මිලදී  ගන්නට සිදුවූ ඖෂධ මිල විශාල ලෙස අඩු කිරීම , රාජ්‍ය සේවක වැටුප් විශාල ලෙස වැඩි කිරීම   පමණක් නොව විරෝධතා දක්වන්නන්ට  උන්ඩ වලින් පිළිතුරු නොදීම ආදිය  ,  වැඩක් ඇති දේ  නොවේ  යයි  කිව  හැක්කේ    කුඩුකේඩු වන්ට පමණි .



     මේ  මැතිවරණයෙන්  රාජපක්ෂලාට මතුවෙන්නට ඉඩ  හැරියොත්   අනාගතය  අතිශයින් භයංකර බව ඉර  හඳ  සේම  පැහැදිලිය . ගෝටා ජනාධිපති වී  මහින්ද  අගමැති  වූ විට  රටේ  පාලනය  භාර වන්නේ  යක්කුන්ටය . යක්කුන්ට බිලිපුජා  උවමනාය  . බිලිපුජා  ගැනීම සඳහා  පළමුවෙන්ම  බැල්ම  හෙලනු ඇත්තේ අන්තරේ සහ  ජවිපෙ වෙතය. ඉන්පසු යක්කුන්ට විරුද්ධ  ලියන  මාධ්‍යවේදීන්  වෙත හැරෙනු ඇත. ඔවුන් කා  ඉවර වූ පසු ඔබ දෙසට  හැරෙනු  ඇත .


  බර්ටි රණවීරගේ 


  ලිපිය  පිළිබඳව  මට  ගල් මුල්  ගැසීමට  උවමනානම් පහත  තිබෙන  කොමෙන්ටු තීරයේ  එයට  ඉඩ  කඩ තිබේ.




Wednesday, December 20, 2017

විල්පත්තුව , ඇස්බැස්ටෝස් තේ , රුසියාව සහ ලංකාවේ රතු විප්ලවය


   


         දිග මාතෘකාවක්  යොදන්නට  සිදුවුයේ මගේ මේ  ඇත්ත  කතන්දරයට විල්පත්තුවත් , ඇස්බැස්ටෝස් තහඩුත් , තේ කොලත්,  රුසියාවත් , ජනතා විමුක්ති පෙරමුණේ සමාජවාදී විප්ලවයත්  දම්වැලක් සේ   ගැටගැසී  තිබෙන නිසාය . අපේ තේ කොලත් රුසියවේ ඇස්බැස්ටෝසුත් අතර තිබෙන සම්බන්ධය  ගැන දැන් කවුරුත් වාගේ දන්නා  බැවින් ඒ  ගැන මාගලක් වියන්නට  මා සුදානම් නැත .කෙසේ වෙතත්  අප  යැවූ තේ  බහාලුමක  කුරුමිණියෙක් සිටීම නිසා තාවකාලිකව  තේ  ගැනීම රුසියාව  නැවැත්වූ බව රුසියාවේ සිටින  ලංකාවේ තානාපතිවරයා  කියා  තිබෙන නමුත් ඇස්බැස්ටෝස් ද්‍රව්‍ය ආනයනය අත්හිටුවීමට  යාම නිසා  රුසියාව  මේ පියවර ගන්නට ඇතැයි ආණ්ඩුව අනුමාන  කරන  බවක්  පෙනේ.    මා මෙහි වැඩි අවධානයකින් ලියන්නට  යන්නේ ඇස්බැස්ටෝස් ඇත්තටම  අපව  ඉක්මනින් පරලොව  ගෙනියන්නට  ලක ලෑස්තිවී  සිටීද  නැද්ද  යන්න  ගැනත්  , චීස්  බටර් , ඇපල් , රෝස් කළ  කළුකුන්  එහෙම  පිටින්ම අපේ  කෑම  මේසයට  ගෙනත් දෙන බව   කියන  සමාජවාදයට   එරෙහිව ඇස්බැස්ටෝස් ප්‍රහාරයක් එල්ලවේද  යන්න ගැනත්ය  .


ඇස්බැස්ටෝස් නිෂ්පාදනයට අවශ්‍ය අමු ද්‍රව්‍යය  ලංකාවට  ගෙන්වීම  2018  ජනවාරි පළමුදා සිට  නවත්වන  බව  සිරිසේන  ජනාධිපතිවරයා  කිවේ  2015  අගෝස්තු  මාසයේය .එයට  විරුද්ධව එදා කතා  කරේ  කොම්පැනි  කාරයෝ  පමණය. අන් සියල්ලෝම වාගේ  ජනාධිපතිගේ  තීරණය  ගැන  ස්තෝත්‍ර  ගී  ගායනා  කළහ .


පුටින් උන්නැහේ  ලංකා තේ ආනයනයට පොල්ලක් දැමු විගසම   ඇස්බැස්ටෝස්  තහනම් කරන්නට  ගොස් සිරිසේන පුටින්ගෙන් සල්ලම් වූ බව  කියමින්  පණ්ඩිතයන්   සැලකිය යුතු පිරිසක්  බක බක  ගාන්නට  පටන් ගෙන තිබේ. විල්පත්තුව  බේරා ගන්නට දිවි පුදන්නට  තරම් කැක්කුමක් තිබෙන  බව  ප්‍රදර්ශනය  කරන අය ඇස්බැස්ටෝස්  ආරවුලේදී පුටින්ග්ගේ  කරට අත දමාගෙන  සිරිසේන ජනාධ්පතිවරයට හු කියන්නට  පටන් ගැනීම  හාස්‍ය ජනක එකම විකාරයක් මිස වෙන කුමක්ද?


                        පෙනහලිවලට ඇස්බැස්ටෝස්  දුවිලි  ගොස් ඇති අයුරු 

ඇස්බැස්ටෝස් භාවිතාව පරිසරයට මෙන්ම  මිනිසුන්ගේ සෞඛ්‍යට සැහෙන  තර්ජනයක්  බව   එම විෂය පිලිබඳ විශාරදයෝ පිළිගෙන  තිබේ. ඇස්බැස්ටෝස්  භාවිතාව අත හරින ලෙස එක්සත් ජාතීන්ගේ සංවිධානය ඉල්ලා සිටියේ  2006 තරම් ඈත  කාලයකදීය .එය  තහවරු  කිරීම සඳහා  ලෝක සෞඛ්‍ය සංවිධානය ඇස්බැස්ටෝස් භාවිතාව ලොව්  පුරා  තහනම් කරන ලෙස  ඉල්ලමින්  නිකුත් කළ  නිවේදනය  පහත දක්වමි .



WHO Support for Global Asbestos Ban 

by Laurie Kazan-Allen


In October 2006, the World Health Organization (WHO) published a policy statement on the Elimination of Asbestos-Related Diseases which echoed the ILO's 2006 Resolution on Asbestos. Recognizing the health hazard posed by continued asbestos use, the WHO is calling for a worldwide ban:

“Bearing in mind there is no evidence for a threshold for the carcinogenic effect of asbestos and that increased cancer risks have been observed in populations exposed to very low levels, the most efficient way to eliminate asbestos-related diseases is to stop using all types of asbestos. Continued use of asbestos cement in the construction industry is a particular concern because the workforce is large, it is difficult to control exposure, and in-place materials have the potential; to deteriorate and pose a risk to those carrying out alterations, maintenance and demolition. In its various applications, asbestos can be replaced by some fibre materials and by other products which pose less or no risk to health.”1

October 17, 2006


සංවර්ධිත  රටවල් බොහොමයක ඇස්බැස්ටෝස්  භාවිතාව  තහනම්  කිරීමෙන් පසු  ඇස්බැස්ටෝස්  නිෂ්පාදක සමාගම් විසින් එයට විරුද්ධව නැගු  හඬ  කොතරම් බලවත් වීද  කියතොත් එක්සත් ජාතීන්ගේ සංවිධානයේ අදාළ ආයතනද  අක්‍රිය වූ බව එක්සත් ජාතීන්ගේ සංවිධානයම  කියා  තිබේ. 


( Long after regional and national asbestos bans were implemented in much of the developed world, the United Nations' agencies responsible for safeguarding global occupational and public health remained paralyzed in the face of a massive propaganda campaign by the asbestos industry.) 

එක්සත් ජාතීන්ගේ සංවිධානයටත් එසේ වී  නම්  සිරිසේන ජනාධිපතිවරයා  රුසියාවේ  තේ පොල්ල ඉදිරියේ පසු බසින්නට වීම පුදුමයක්ද?


මා මෙහිදී  තවත්  කාරණාවක්  මතු කරන්නට  කැමතිය. ඒ විල්පත්තුව  ගැනය. වරින් වර  විල්පත්තු  ප්‍රශ්නය මතු කරන්නට  පෙළපාලි යන්නට සැහෙන  පිරිසක්  සිටිති. ඊයේ පෙරේදාද  පරිසක් කොළඹට රැස්වී විල්පත්තුව සුරැකිමට බෝඩ් උසාගෙන සිටියහ.ගස්කොලන් , වනාන්තර වෙනුවෙන් මිනිස්සු ඉදිරියට ඒම මිනිසුන් දියුණුවී ඇති බවට  හොඳ නිදසුනකි. එහෙත්  මත්තල අක්කර 2000 ක  වනාන්තරයක්  කපා එහි සිටි සතුන් චීනුන්ගේ  කොරියන් කාරයන්ගේ කෑම මේසය  මතට ආ නමුත් එයට විරුද්ධව කතා  කරපු අය  නැති තරම්ය. මාධ්‍ය වේදීන් නම් ඒ ගැන  ටිකක් හෝ  පත්තරවලට  ලිවුහ .සිංහරාජය ඇතුලේ  හෝටල් ඉදිකිරීමට  සිංහරාජය එලි පෙහෙළි කරන විට  ඒවාට එරෙහිව  කට අරින්නට අය සිටියේම  නැත. නාමල් රාජපක්ෂ සිංහරාජයේ හෝටලයක් ඉදි කළ  බවත් දක්ෂිණ අධි වේගී  මාර්ගයේ වැලිපැන්න  පිවිසුමේ සිට ඒ  හෝටලය දක්වා කාපට්  පාරක් දැමු බවත්  කියනු ලැබේ. එහි සත්‍ය අසත්‍ය තාවය  මා  නොදන්නා  නමුත් සිංහරාජය අසල සහ ඇතුලේ  හෝටල් 12 ක්  තිබෙන බව අන්තර්ජාලය පිරිස්සු විට  පෙනේ. ඒවාට  එරෙහිව  කවුරුත්  කතා  කලේ නැත .


විල්පත්තුව  කපා  මුස්ලිම් ගම්මාන  තනන  බවත් එමගින් තමන්ගේ මුලික අයිතිවාසිකම් අහිමි වෙන බවත්  කියමින් පරිසර සංවිධාන දෙකක්  ශ්‍රේෂ්ඨාධිකරණයේ නඩුවක් පැවරු නමුත්  මේ වසරේ අගෝස්තු මාසයේ උසාවිය එම  නඩුව විසිකර දැම්මේ නඩුව අසන්නට තරම් වත් එහි කරුණු නැති  බව කියමිනි  .එයට  හේතුව ලෙස  උසාවිය  කිවේ හෙළි පෙහෙළි කරන්නේ විල්පත්තුව නොව විල්පත්තුව අවට  යුද්ධයට  පෙර  තිබුණු මුස්ලිම් ගම්මාන  තිබු ප්‍රදේශ  බවය.  උසාවිය  ඉංග්‍රීසි  බසින් එය කිවේ මෙසේය.


 However, it was observed by the court that the resettlement had taken place according to the law and civilians were resettled on the original lands of the settlers which they had inhabited before the evacuations took place during the 30-year war against the LTTE.


  එවැනි තීන්දුවක් දී  තිබියදී  නැවත  නැවත විල්පත්තුව අවට  ගම්මාන  තැනීමට එරෙහිව  උද්ඝෝෂණය  කරන්නේ  අවංක චේතනාවකින් නොවන  බව   පැහැදිලිය .


.

කෙසේ වෙතත්  පරිසරය සුරකින්නට  තිබෙන උවමනාව ඇස්බැස්ටෝස් විරෝධයක් දක්වා දික් කරන්නට පරිසරය  ගැන උනන්දු වන අයට  නැත. . ඇස්බැස්ටෝස් මුළු ලෝකයේම  තහනම් කරන  ලෙස  එක්සත් ජාතීන්ගේ සංවිධානය  ඉල්ලා සිටියත් අපට ඒ ගැන වගේ වගක් නැත .බ්‍රසීලය  ඇස්බැස්ටෝස් නිපදවන රටක් වුවත් , ඇස්බැස්ටෝස් නිධි හැරිම , ඇස්බැස්ටෝස්  භාවිතය සහ  අලෙවිය  තහනම්   කරමින් එරට  ශ්‍රේෂ්ටාධිකරණය ගිය  මාසයේ තීන්දුවක් දුන්නේ එය මිනිසුන්ගේ සෞඛ්‍යයට බලවත් හානියක්  නිසාය .  ඇස්බැස්ටෝස් අපේ රටේ තහනම් කරන  ලෙස අපේ  පරිසරවේදීන්  මා දන්නා තරමින් ඉල්ලා  නැත . ජනාධිපතිවරයාට රුසියාවේ  බලපෑම  හමුවේ  තහනම  ඉවත් කරගන්නට  පහසු වුවේද අපි ඒ ගැන  උනදුවක් නැති නිසාය .




 රුසියාව  ලංකවෙන්  තේ  මිලදී  ගැනීම අඩු කර  තිබෙන්නේ මේ ආණ්ඩුව  බලයට  පත් වීමෙන්  පසුව නොවේ. 2014 වර්ෂයේ සිට රුසියාව  ලංකාවෙන් තේ මිලදී  ගැනීම  ක්‍රමනුකුලව් අඩු කර තිබේ. Daily Mirror පත්‍රයේ පලවූ වාර්තාවකට අනුව   2013 වර්ෂයේ ඇමරිකානු ඩොලර් මිලියන  240.32 ක් වටිනා තේ  ලංකාවෙන්  මිලදී  ගත් නමුත් ඉන්පසු ක්‍රමානුකුලව එය අඩු කර තිබේ. ඒ මෙසේය .

2014  ඇ.ඩො. මිලියන 228.27

2015  ඇ.ඩො. මිලියන 156.65

2016 ඇ.ඩො. මිලියන් 142.55 


රුසියාව අපේ ප්‍රධානතම තේ ගැනුම් කරුවා නොවේ. 2014 වර්ෂයේදී ඔවුන් අපගේ තේ අපනයනයන්ගෙන්  14.18% ක් මිලදී ගත නමුත් මේ වන මිලදී  ගන්නේ 11% ක් පමණි . අපෙන් වැඩියෙන්ම  තේ මිලදී  ගන්නේ මැද පෙරදිග අරාබි රටවල්ය . එය 33.62 % ක් පමණ වේ .


කෙසේ වෙතත් රුසියාව  අපේ තේ මිලදී  ගැනීම අත් හිටුවීම නිසා අපේ ආර්ථිකයට වැදුනේ බඩ අල්ලාගෙන  කෙඳිරි  ගෑවෙන තරමට සැර  පහරකි.  තේ  කම්හල්කු හිමියන්ඩා විසින් කුඩා  තේ වතු හිමියන්ගෙන් මිලදී  ගන්නා අමු තේ  කිලෝවකට  මුදල  රු 12 කින් වහා අඩු කර තිමෙන්  එහි බලපෑම  කොතරම් දැයි  වටහා  ගත  හැකිය .



රුසියාව විසින් අපේ  රිදෙන්නට  ගැසීම  ගැන අපේ සමාජවාදී සහෝදරවරුද  කල්පනාවට  ගත  යුත්තකි. විශේෂයෙන්ම  ජනතා විමුක්ති පෙරමුණේ සහෝදරවරුය .මන්ද  ඔවුන් 2020 දී මැතිවරණයෙන් බලය  ලබාගෙන සමාජවාදී ආණ්ඩුවක්  පිහිටවන  බව  කියන  නිසාය .


2020  මහා  මැතිවරණයේදී බහුතර ආසන සංඛ්‍යාවක් දිනා  ජවිපෙ පිහිටුවන්නේ සමාජවාදී ආණ්ඩුවක් නම් උතුර කොරියාව , සහ  කියුබාව  හැර අන් සියලුම රටවල් එම ආණ්ඩුව පෙරලා දැමීමට   පියවර  ගන්නා බවට  කිසිදු සැකයක් නැත .   ලංකාවේ තේ වලට  පමණක් නොව ඇඟලුම් ඇතුළු සියලු අපනයන  භාණ්ඩවලට ඔවුන්  තහංචි  පනවනු ඇත.. එවිට රටතුල ඇතිවෙන  තත්වය කුමක්දැයි අපට  නම් අනුමාන  කළ හැක. සියලු ඇඟලුම්  හල් වැසි  ලක්ෂගනනකගේ  රැකියා අහිමිවනු ඇත  .පිටරටින්  පරිප්පු ටිකක් තබා   තෙල්  ටිකක් ගෙන්වා   ගැනීමටද විනිමය  නැතිවෙනු ඇත . තෙල් වලටද  තහංන්චි පැනවීම ස්ථිර  බැවින් අපට  සිද්ධ වන්නේ  කැකුණ  ගස් වවා කැකුණ තෙල් වලින් පාන් පත්තු  කරන්නටය .ඇල්වතුරෙන් වාහන දුවන්නටය 

.( රටට  කන්නටවත්  පොල් නැති බැවින් පොල් තෙල්  ගැන  කතා කල යුතු නැත )




                                                                  කියුබාව 

එබැවින්  ජනතා විමුක්ති පෙරමුණ ආණ්ඩුවක්  පිහිටෙව්වද  ඔවුන්ට සිද්ධ වන්නේද සමාජවාදය දර මඩුවේ තැන්පත් කර  ධනපති ආණ්ඩුවක්  පිහිටුවන්නටය . දුෂණයට එරෙහිව ඔවුන් දැඩි  පියවර  ගන්නා  බවට සැකයක් නැතත් රටේ ආර්ථිකය  ගොඩ නගන්නට ඔවුන්ට  පුළුවන් වන්නේ  නැත . ධනපති  ක්‍රමය  ලෝකයට  ණය වී  හෝ  පවත්වාගෙන  යන්නට ජවිපෙට වඩා  හොඳට  රනිල් ලා ,සිරිසේනලා  සහ රාජපක්ෂලා දනිති.


බර්ටි රණවීරගේ 




           
          

Monday, November 27, 2017

ආණ්ඩුව පෙරලන්නේ මෛත්රිද ? රනිල්ද? මහින්දද?




    

යහපාලන ආණ්ඩුවට චන්දය  දුන් කවුරුත් පාහේ   මේ දවස්වල  ඉන්නේ  තිගැස්සීමෙනි. කම්මුල් දෙකේ අත් තබාගෙනය .  කුමන වින්නැහියක්  වෙන්නට  යන්නේදැයි  හිතා  ගැනීමටත්  නොහැකිවය .


මෛත්‍රී  +UNP  ආණ්ඩුව වෙනුවට  මෛත්‍රී+මහින්ද ආණ්ඩුවක් ඒවිද? 


නැතහොත්  UNP+ TNA  ආණ්ඩුවක් පැමිණේද? 


ජනවාරි 8  පොරොන්දු  මෛත්‍රී  පොළොවේ  ගසා  කුඩුපට්ටම් කරාවිද ? 


නව ව්‍යවස්ථාව  ඉපදීමටත්  පෙර අවසන් ගමන් යාවිද? 


හොරු ඇල්ලීමේ  පොරොන්දු  අපි පුංචිකාලයේ  සුන්දර  ලෝකයකට  ගෙන  ගිය   සුරංගනා  කතාවක්  බවට  පමණක්  පත්වේද ? 


කොටින්ම  62 ලක්ෂයක්  ජනතාවට  මෛත්‍රී  කොකා  පෙන්නාවිද?




යහපාලනයට  චන්දය  දුන් බහුතරයක්  මිනිස්සුන්ට  මේ දිනවල සිතන්නට බළකොට  තිබෙන්නේ එවැනි ප්‍රශ්න  ගැනය . ජනවාරි  8  දා  හැට දෙලක්ෂයක්  මිනිස්සු මෛත්‍රීට   චන්දය  දුන්නේ  මහත් බලාපොරොත්තු ඇතිව  බව  අමුතුවෙන් කිව  යුතු නොවේ.  එහෙත් දුන් පොරොන්දු වලින්  ආණ්ඩුව  තවමත්  ඉටු කර  ඇත්තේ කීපයක් පමණි. ඇතැම් ඒවා  ඉටු කළේ එතරම්ම  උනන්දුවකින්ද  නොවේ.


මයිත්‍රී +UNP  හවුල හෙල්ලෙන්නට  පටන් ගත්තේ බැඳුම්කර  කොමිසම  ඉදිරියේ  හොරකම එළිවෙන්නට වූ විටය .රවී  කරුණානායක මහා  පරිමාණ  ගැහිල්ලක් කරන්නට  ඉහලින්ම සම්මාදම් වී  තිබෙන  බව කියන්නට ආර්ථික  විශේෂඥ දැනුමක් අවශ්‍ය  නැත.  බැඳුම්කර මිලදී  ගැනීම  සඳහා  අඩු ලන්සු තබන්නට  කියා ආණ්ඩුවේ  බැංකුවලට රවී විසින්  උපදෙස් දී  තිබීම  පමණක් ප්‍රමාණවත්ය  . රනිල්  විසින් තව දුරටත් රවී කරුණානායක  UNP යේ  තබා  ගනිමින්  ඔහුට වගකීම්  පවරා  තිබීම  පැහැදිලි කරන්නේ බැඳුම්කර  ගැහිල්ලට එක්සත් ජාතික  පක්ෂයේ  නොමඳ ආශිර්වාදය  ලැබුණු  බව  මිස  වෙන  කුමක්ද?


එක්සත් ජාතික  පක්ෂයේ  ලොක්කන් අවංක  නම්   කළයුතුව  තිබුණේ  රවී  කරුණානායක සහ  හිටපු මහබැංකු ලොක්කාව  තව දුරටත්  හුරතල් කිරීම නොවේ. රවී  පක්ෂයෙන් දොට්ට  දැමීම සහ රනිල් දුන් උපදේශක   තනතුරෙන්  මහේන්ද්‍රන්ව අස් කර දැමීමය .එය නොකර  මෛත්‍රීට  බැන වැදීමෙන් සිද්ධ වන්නේ   හොරකම  ඔප්පු වීමත්  විරසකය  තව  දුරටත් උග්‍ර වීමය. එහි කෙලවර  කුමක් වේ දැයි  කීම  පහසු නැත .එහෙත් එකක් පැහැදිලිය.  මණ්ඩලේ කචල් කරගෙන  පොරොන්දු ඉටු කරන්නට  හැකි වන්නේ  නැත එවිට  මහජනයා  ඉදිරියේ  වැඩියෙන් පච වන්නේ එක්සත් ජාතික  පක්ෂයය . යලිත් බොහෝ කාලයකට  මැතිවරණයක් දිනා  ගැනීමට එයට  හැකි වන්නේ  නැත .


මෛත්‍රී විසින් වෙනදාට වැඩියෙන්  සද්දය  දාන්නේ  නිකම්ම නිකම්  නොවේ.එය  තේරුම් ගැනීමට එක්සත් ජාතික  පක්ෂයේ අඳබාලයන්ට  නොහැකි  වී  තිබේ . ඉදිරියේ  පැවැත්වෙන  පලාත්පාලන  මැතිවරණයේදී තමන්ගේ  ශක්තිය වැඩි කරගැනීම  මෛත්‍රීට අත්‍යවශ්‍යය . මැතිවරණයෙන්  ඔහුගේ අපේක්ෂකයන් විශාල වශයෙන් පරාජයට  පත්වුවහොත් මේ මොහොතේ ඔහුට   සහය  දෙන  ශිලංකා  ඇමතිවරු   ආණ්ඩුවෙන් ඉල්ලා  අස්වී මහින්ද සමග එකතු වීමට  බෙහෙවින් ඉඩ තිබේ.  එබැවින්  එක්සත් ජාතික  පක්ෂයට දිගින්  දිගට  බැන වැදීමෙන් ශ්‍රී ලංකා  කාරයන්  තමන් වෙත  ඇද ගැනීමට   ඔහුට අත්‍යවශ්‍යය .  යුඑන්පි  කාරයන්ට   කනේ ඇඟිලි  ගසා  ගැනීමට  හොඳවායින්  හත  අටක්  කිව්  ශ්‍රීලංකා  කාරයන් චුන් වී  ඔහුගේ  අපේක්ෂයකයන්ට  චන්ද දෙනු ඇතැයි    ඔහු ගණන්  බලා ඇති බවට සැකයක් නැත. මෛත්‍රීට  පක්ෂය තුල ශක්තිමත්  අධිකාරිත්වයක්    තබා  ගැනීමට  නම් එක්කෝ  මහින්ද  පිල සමග  චන්දයේදී  හවුලක් හදා ගෙන  තමන්ට  පක්ෂපාත  මන්ත්‍රීවරු  සෑහෙන  ප්‍රමාණයක්  ජයග්‍රහණය  කරවා  ගත  යුතුය  එය  ඉටු නොවෙන්නේ  නම්  UNP යට පස් පඩංගුවේ   බැන වදිමින් ශ්‍රී ලංකා  චන්ද  තමන්ගේ අපේක්ෂයන්ට  ලබා  ගැනීමට  උත්සාහ  කළ යුතුය . මහින්ද  ඇතුළු  ඔහුගේ  පිලේ  බොහෝ අය  ජනාධිපතිවරයා  වර්ණනා  කිරීමට දැන් සිටම අරඹා  තිබීම  මෛත්රිගේ  උපක්‍රමයේ  සාර්ථකත්වය  පෙන්නීමක්  ලෙස  සැලකිය  හැක 


කෙසේ වෙතත්  මෛත්රිගේ  දේශපාලන   උපක්‍රම  රනිල් තේරුම් ගෙන තිබෙනවාට සැකයක් නැත. එබැවින් ඇතිවී තිබෙන  නොහොඳ  නෝක්කාඩුව  උග්‍ර වීමට  ඔහු ඉඩ  නොදෙනු ඇත. මෛත්රිගේ සහය  නොමැතිව  රනිල්ට ආණ්ඩුවක් පවත්වාගැනීම  පහසු නැත .TNA සහය  ලබාගෙන  ආණ්ඩුවක්  හදන  බවට ඇතැම් UNP  කාරයන්  කරන  ප්‍රකාශ  කරන්නේ  එක්කෝ ගොන් කමටය . එක්කෝ  තමන්ගේ  මිනිසුන් රඳවා  ගැනීමට සහ  පාක්ෂිකයන්ගේ  මොරාල් එක  ඉහලින් තබා  ගැනීමටය. 


 දෙමල  ජාතික සන්ධානය ආණ්ඩුවක  කොටස්  කාරයන් වීමට  මේ අවස්ථාවේ  සුදානම් යයි සිතීමට  කිසිදු කාරනාවක් නොමැත . එය  විවිධ  මත දරන  පක්ෂවල සන්ධානයකි . ඔවුන් අතර විවිධ ආරවුල්  තිබේ.  ආණ්ඩු කරන්නට  ගොස්  ඉගෙනගත්  කටුක  පාඩම්  ඔවුන් අමතක  කර  ඇතැයි සිතිය  නොහැක .  1965 බලයට  පත්  ඩඩ්ලි සේනානායකගේ ආණ්ඩුවට ෆෙඩරල් පක්ෂය  හවුල් වුයේ   තමන්ගේ  ඉල්ලීම් ලබා දෙන  බවට   ඩඩ්ලි සේනානායක  මහතා  පොරොන්දු වීම නිසාය. එහෙත් ඩඩ්ලි ඒ  පොරොන්දුව  කඩා  දැමීම නිසා ෆෙඩරල් පක්ෂය ආණ්ඩුවෙන් ඉවත් විය . ආණ්ඩුවකට  හවුල් වීමෙන් සිදුවන්නේ  දෙමල  ජනයා අතර  TNA  සංවිධානය අප්‍රසාදයට  පත්වීම  පමණක් නොව සම්බන්ධන්ලාට එරෙහිව උතුරු නැගෙනහිර  රැඩිකල්  බලවේග ශක්තිමත් වීම  බව   අපට වඩා දන්නේ  ඔවුන්ය .


TNA විපක්ෂයේ  සිටිමින් මේ ආණ්ඩුවට සහය දෙන්නේ  ප්‍රධාන වශයෙන්ම  නව ආණ්ඩුක්‍රම ව්‍යවස්ථාවක්  හරහා දෙමල  ජනයට  බියෙන් සැකෙන්  තොරව  ජීවත්වීමට අවශ්‍ය  පසුබිම  නිර්මාණය  කර  ගැනීමටය . UNP+ TNA ආණ්ඩුවක්  හරහා  නව ව්‍යවස්ථාවක් හදා  ගන්නට  පුළුවන් කමක් නැත. ඒ සඳහා  මෛත්රිගේ  ශ්‍රීලනිපයේ මෙන්ම  මහින්දගේ  කණ්ඩායමේද  සහය අවශ්‍ය වේ. UNP+ TNA ආණ්ඩුවක් හදාගැනීමට දායක වීම තුලින් වෙන්නේ  ඔවුන්ගේ අපේක්ෂා  සුනු විසුනු වීම  පමණි.  එබැවින් ආණ්ඩුවක කොටස්  කාරයන් වීමට TNA   ඉදිරිපත් වේයැයි  සිතීමට  තරම් කාරණා  නැත  .


UNP  කාරයන්  ස්ථිර  ලෙස විරසක  කරගැනීමෙන් සිදුවන්නේ තමන් දේශපාලන  කාන්තාරයක  හුදෙකලා වීම  බව  වටහා  ගැනීමට  නොහැකි  තරමට  මෛත්‍රී මන්ධ  බුද්ධිකයෙකු බව  සිතීමට   හේතු නැත . මෛත්‍රී නොමැතිව  UNP යටද අනාගතයක් නැති බව නොදැනීමට  තරම්ම  රනිල්   දේශපාලන  මෝඩයෙක් නොවේ. එබැවින් රනිල් සහ මෛත්‍රී  යහපාලන ආණ්ඩුව  කඩා වැටීම වැලක්වීමට අවශ්‍ය සියල්ල  කරන  බවට  සැකයක් නැත .


  එහෙත්  පළාත් පාලන චන්දය  අවසන්වන  තුරු   මේ දෙගොල්ලන්  එකිනෙකාට  චීන  පටස්  පමණක් නොව දුම්  බෝම්බද  දමා  ගසනු ඇත 


Sunday, November 19, 2017

සවුදි අරාබියේ මාලිගා විප්ලවයක් -500 ක් අත් අඩංගුවට



                                              ඔටුන්න  හිමි  මොහමඩ් බින් සල්මාන්  කුමරු 


                      තවමත්  නවීන  ලෝකයට  පිවිස  නැති සවුදි අරාබියේ   රජපවුලේ  අඬු  කැඩීමේ    ප්‍රහාරයක් එහි ඔටුන්න  හිමි කුමාරයා විසින් අරඹා  තිබේ.


     කලින් සිටි  සවුදි රජු වූ අබ්දුල්ලාට  හිතවත්  රජ කුමාරවරු , සව්දි ආණ්ඩුවේ ඇමතිවරු  සහ  ප්‍රාදේශීය  නායකයන්  සහ ව්‍යාපාරිකයන්  අත්අඩංගුවට   ගෙන තිබේ .ඇතැම් රජ  කුමාරවරුන්ට  අත් අඩංගුවේ  සිටියදී වද  හිංසා  කොට කට  උත්තර  ලබාගෙන  තිබේ . ඔවුන්ට  වද  හිංසා  පමුණුවා ඇත්තේ  ඔවුන්ගේ  බැංකු  ගිණුම් පිලිබඳ  විස්තර  ලබා  ගැනීමටය .


සවුදි  රජපවුලේ බලකණු හතරේ දරුවන්  දුර්වල කිරීමේ අරමුණෙන්  මෙම අත් අඩංගුවට ගැනීම අරඹා ඇතැයි විචාරකයෝ කියති .1964 දී  හිටපු සවුදි රජෙකු  බලයෙන් පහකිරීම සඳහා  ඔහුගේ සහෝදරයෙකු  ආරක්ෂක හමුදා  යෙදවීමේ  සිද්ධියෙන්  පසු  සවුදි  රජපවුලේ  මෙවැනි  ඉහල මට්ටමේ  අත්අඩංගුවට ගැනීම් සිදුවූ  පළමු වතාවය .


 පළමු වටයේදී ලේඛකයන් , පුජකයන්   ආර්ථික විද්‍යාඥයන් සහ  ප්‍රසිද්ධ  පුද්ගලයන් අත් අඩංගුවට  ගනු ලැබිය . 


දිනපතාම  අත් අඩංගුවට  ගැනීම සිදුවන  අතර  මේ වන විට  500  කට අධික  පිරිසක් අත් අඩංගුවට  ගෙන තිබේ. ඇතැමෙකු  නිවාස  අඩස්සියට  පත් කොට  තිබේ.



                     අත්අඩංගුවට  ගත් සවුදි කුමාරවරුන්ට  පුටු උඩ සහ  බිම  නිදාගැනීමට සිදුවිය     


මෙසේ  අත්අඩංගුවට  ගනු ලබන්නේ ඔටුන්න   හිමි කුමාරයා වන මොහමඩ් බින් සල්මාන් විසින් දියත්කොට ඇති දුෂණ විරෝධී ක්‍රියාන්විතයක්  යටතේය . ඔහු වත්මන් සවුදි  රජා වන සල්මාන් ගේ  පුතාය .


ඔටුන්න  හිමි කුමාරයාගේ  ඥාති  සහෝදරයා ද නිවාස අඩස්සියට  පත් කොට තිබෙන අතර  ඔහුගේ දේපොළ අයිතිය අත්හිටවා  තිබේ.  දහසක  පමණ  පිරිසකගේ  බැංකු ගිණුම්  සව්දි  රජය විසින්  තහනම්  කර  තිබේ.


සව්දි අරාබියට ආවි ආයුධ  මිලදී ගැනීම් වලදී අතයටින් කුමාවරුන්ට ඩොලර්  ලක්ෂ  ගණනින් ආයුධ සමාගම් විසින්  ලබා දී  තිබීම සොයා  ගැනීම් සඳහා  මෙන්ම වෙනත් අයථා මාර්ග වලින්  මුදල්  යටිමඩි  ගැසීම  පිළිබඳව  සොයා  බැලීම සඳහා මෙම  අත්අඩංගුවට  ගැනීම් ඇරඹි තිබේ.  ඇමරිකාවේ  හිටපු සවුදි තානාපති වරයෙකු වන  බන්ඩාර්  කුමාරයා  බ්‍රිතාන්‍යයේ  අක්කර 2000ක ගම්මානයක් කලකට  පෙර  මිලදී  ගෙන තිබුණු   අතර ඒ ගැන සෙවීමේදී ආයුධ  සමාගමක් විසින්  ඔහුගේ ඇමරිකාවේ  බැංකු ගිණුමකට ඩොලර්  මිලියන  30 ක්  දමා  තිබු  බව  හෙළිවිය .


වත්මන්  සවුදි රජුගෙන් පසු රජකම  ලැබීමට  නියමිත  සල්මාන් කුමාරු විසින්  රජපවුලට එරෙහිව අරඹා ඇති මේ දැවැන්ත  ප්‍රහාරය අනතුරු දායක  මෙහෙයුමක් බව විචාරකයන්ගේ  මතයයි. මෙය  සවුදි රජ  පවුලේ අත්තිවාරමට එරෙහිව  එල්ල  කරන  ලද  ප්‍රහාරයකි . මෙය වැරදි  ගියහොත් අල්ලාගෙන  නැති  රාජකුමාරවරු මොහුගේ සහ  පවුලේ  ඥාතීන්ගේ  බෙලි  කැපීමෙන්   මාලිගා විප්ලවය  ආපසු හරවනු ඇත.


රටේ  ජනගහනයෙන්  බහුතරයක් වන  තරුණයන්ගේ ආකර්ෂණය දිනා   ගැනීම  සඳහා  ඔහු කටයුතු කරමින්  සිටින්නේ  ඒ නිසාය . සවුදි අරාබිය  නවීන ඉස්ලාම්ල  රාජ්‍යයක්  බවට  පරිවර්තනය  කරන  බව ඔහු දැනටමත්  කියා  තිබේ.  ලබන වසරේ  මැද භාගයේ සිට සවුදි  කතුනට  වාහන පැදවීමට  අවසර දීමට  දී  තිබෙන අතර කාන්තාවනට  ක්‍රීඩා තරඟ වලට සහභාගී වීමේ  නිදහසද  ලබා දීමටද තීරනය  කර තිබේ.


සවුදි අරාබිය  කොතරම් දුරකට  වෙනස්  කම් කරනු ඇති  තවමත් කිව  නොහැක  තෙල්  විකිණීමෙන් ලබන  ධනය  හැමදාම  ලැබෙන්නේ  නැත. එබැවින්  වෙනත් ආයෝජනවලට  යාමෙන් මිස  සවුදියට  කලාපයේ බලවතෙකු ලෙස  දිගින් දිගටම  පැවතීමට  නොහැකිය. 


සවුදියේ ඇරඹි ඇති මේ විප්ලවය  එහි පවතින රදල සමාජ  ක්‍රමය අවසන් කොට ධනපති සමාජ  ක්‍රමය වෙත පිවිසීමේ ආරම්භයක්  ලෙස  සැලකිය  හැක .




                                                            සවුදි අරාබියේ රියාද්  නගරය 

Tuesday, November 14, 2017

විජේවීර පරාජය වුයේ ඇයි?

 



         රෝහණ විජේවීර මහතා  මා  පළමුවෙන් දුටුවේ  1971 පෙබරවාරි  මස අග  දිනකදීය . ඒ  හයිඩ්  පිටියේ  ජවිපෙ  රැළියේදීය. 71  කැරැල්ලට  පෙර  ජවිපෙ පැවැත්වූ අවසාන රැළිය එය  විය  යුතුය . රැළියට පැමිණි පිරිසගෙන්  හයිඩ්  පිටිය මුලුමනිනුත්  අවට  මාවත්  යම් තරමිකිනුත්  පිරි තිබිණි . බහුතරය  තරුණ  තරුණියෝ වුහ. හවස     හතර වන  විට ඇරඹුණු රැස්වීම රාත්‍රී  හත අට වන  තුරු ම වාගේ  පැවතින. එම රැස්වීමේදී ජවිපෙ වෘත්තීය සමිතියක් වෙනුවෙන්  කවුරුදෝ පන  නැති  කතාවක්  කළේය.  ඒ ,ගුණසේකර  නම් පුද්ගලයෙක් විය  යුතුය.   ශිෂ්‍යයන්  නියෝජනය  කරමින් විද්‍යෝදය (ජයවර්ධනපුර ) විශ්ව විද්‍යාලයේ  ශිෂ්‍ය  නායකයා වූ   මහින්ද විජේසේකර  සිත්  වශිකරන කතාවක් කළ  බව  මට  ඉතා  හොඳින් මතකය .ඔහු එකළ කෙසඟ  සිරුරකින්  යුක්ත විය .( පසු කාලයේ  ඔහු ඇමතිවරයෙක් වූ  කළ  කෙසඟ  කම ආගිය අතක් නැති විය ). විජේවීර  කතාව ආරම්භ  කළේ  සවස  5 ට  විතරය . මා සිටියේ වේදිකාවට  ආසන්නවය.එබැවින් විජේවීරගේ සැම ඉරියව්වක් වාගේම දැක  ගැනීමට  මට  හැකි විය .  එකල  පැවතී ශ්‍රීලංකා + සමසමාජ+ කොමියුනිස්ට්  ආණ්ඩුවට  බනිමින් පැයක්  පමණ  රැස්වීම  ඇමතු ඔහු පක්ෂයට  මුදල් අවශ්‍ය බැවින් මුදල්  හෝ මුදල් කරගත  හැකි ද්‍රව්‍ය වලින් ආධාර  ලබා දෙන  ඉල්ලු ඔහු තමා දැන් වේදිකාව  ඉදිරිපසට එන බවත්  ඔහු අතට ආධාර  ගෙනවුත්  දෙන  ලෙසත්  ඉල්ලා සිටියේය. එසේ   කි විජේවීර වේදිකාව ඉදිරියට පැමිණ දෙපා  පහලට  සිටින සේ වේදිකාව මත වාඩිවිය.   තරුණ  තරුණියන්  පනහක් හැටක්  පමණ  පිරිසක්  පැමිණ මුදල්  , අත්ඔරලෝසු (එකල අත් ඔරලෝසු දුලබ වූ අතර  මිල අධික සුඛෝපභෝගී  භාණ්ඩයක් විය ) කරාබු , මාල  ආදිය    විජේවීර  අතට  දුන්නෝය . ඉන් පසු නැවතත්   රැස්වීම ඇමතු ඔහු  රාත්‍රී  හත  පනින  තුරුද  කතා  කළේය . ඔහුගේ වචන  තරුණ අප  තුල ඇති කළේ  බලවත් විප්ලවාදී  හැඟීම්ය . විජේවීර  කී  ඇතැම්  වදන් තවමත් මට  මතකය . 



" සමහරු අහනවා  කවදද අපි විප්ලවය  කරන්නේ  කියල. අපි ධනපති  පන්තියට  කියනව , උඹල  අපිව  කවදද  මහා  පරිමාණයෙන්  අපිව  මර්ධනය  කරන්නේ . අන්න එදාට  මේ රටේ විප්ලවය  සිද්ධ වෙනවා  කියල ."


 ඔහු  කි කරුණු  බොහොමයක්  දැන් මට අමතකය .ඔහු   කතාව අවසන්  කළේ  'කම්කරුවන්ගේද  , ගොවියන්ගේද , ශිෂ්‍යන්ගේද, සෙබලුන්ගේද  විප්ලවයට   ජයවේවා . ලංකාවේ  විජයබා  නැව අවුරෝරා  නැවක් වේවා ." කියමිනි .


( ඔහුගේ  කතාවෙන්  පසු  රහස්  පොලිසිය විජයබා  නැවට ගොස්  ප්‍රශ්න කිරීමෙන් අනතුරුව නාවික  භටයන් කීප දෙනෙකු අත් අඩංගුවට  ගත්  බව 71  මහ  නඩුව අතර  තුර  හෙලිදරව්  විය .)


ඉන්පසු  යලි  මා විජේවීර  දුටුවේ   1977 දිය . ඒ  77  මහා  මැතිවරණයෙන් ජය ලැබූ ජේ .ආර් ආණ්ඩුව  ඔහු ඇතුළු පිරිස   නිදහස්  කිරීමෙන්  පසු කොළඹ  නගර  සභා  පිටියේ පැවතී  ජවිපෙ රැළියේදීය. එම රැළියට  50 දහසක්  පැමිණ සිටි බව මට මතකය  එතක මෙතක් කලක්  මා  දුටු විශාලතම ජන ගංගාව එය විය  .රැලිය සංවිධානය  කර  තිබුනේ  කෙලි සේනානායකගේ මුලිකත්වයෙනි. රැස්වීමේ මෙහෙයවූවේ  ලයනල්  බෝපගේ විසිනි .කල්  යල් ඇතුව  ගිය  බැවින්    වේදිකාව ආසන්නයේ සිට  කථිකයන්ට සවන්දීමට මට  හැකි විය .


හොඳටම  රැවුල වවාගෙන සිටි විජේවීර හිර ගෙදරදී  හොඳටම   කෙට්ටු වී  තිබිණි . රැලිය අතර තුරදී වේදිකාවට නගින පඩිපෙළ අසලට  ගිය  මවක් සමග  තරුණියක්  කිසිවෙකු අත  පණිවිඩයක්  යැවූ විට වේදිකාවේ වාඩිවී  සිටි විජේවීර වේදිකා  පඩිපෙළ  මතට    පැමිණ තරුණිය  සමග කතා  කරන්නට  පටන් ගත්තේය. එතනට  දුවගෙන ආ  පත්තර  චායාරුප ශිල්පියෙකු වහා ඔවුන්ගේ  පින්තුරයක්  ගත්තේය .විජේවීර  චායාරුප ශිල්පියා  දෙස  බැලුවේ  චායාරුප  ශිල්පියා දැවී අළුවී  යන තරම් සැර  බැල්මකිනි.  මහත් අපහසු තාවයට   පත්  චායාරුප ශිල්පියා වහා  පසු බැස්සේය .


විජේවීර  පැය දෙකකට අධික  කාලයක් කතා  කළේය.  ශ්‍රී ලංකා  නිදහස්   පක්ෂයටත්  සමසමාජ  පක්ෂයටත්  කොමියුනිස්ට්  පක්ෂයටත් පලු පැලෙන්න  බැන්නේය.. ජේ.ආර්ගේ ආණ්ඩුව  ගැන  කළ එකම විවේචනය යුඑන්පි කාරයන් දැන් කසාය  බීපු ගොළුවන් බවට  පත්ව ඇත  යන්න  පමණය . ලයනල්  බෝපගේ  හිරගෙදර සිටියදී දාස්  කැපිටාල් ග්‍රන්ථය  නිදිමරමින් සිංහලට  පරිවර්තනය  කළබවද  එය ඉක්මනින් මුද්‍රණය  කරන බවද  වීජේවීර ඔහුගේ  කතාවේදී  කිවේය. එමෙන්ම  71  කැරලි කරුවන් නිදහස්  කරන  ලෙස  ඉල්ලා දිගින් දිගටම  උද්ඝෝෂණය කළ සංවිධාන වලටද  ඔහු ස්තුති කළේය  ස්තුති කළඅය අතර බාල  තම්පෝ , ලංකා  ගුරු සංගමය සහ ඇම්නස්ටි ඉන්ටනැෂනල්  නමැති ජාත්‍යන්තර රාජ්‍ය  නොවන සංවිධානයද විය


ඉන්පසු  මා ජවිපෙ  හිතවතෙකු  බවට  පත්වීමත්, එකල  බලවත්ම  ගුරු සංගමය වූ   ලංකා  ගුරු සංගමයේ  මධ්‍යම  කාරක සභිකයෙකු  බවට  පත්වීමත් නිසා විජේවීර  හඳුනා  ගන්නට  අවස්ථාව  මට  ලැබිණ . දහ පාලොස් වරක් ඔහු සමග  කතා  බහ  කරන්නට  හැකි වීම  නිසා   ඔහු සහ මා අතර  තරමක කිට්ටු සම්බන්ධයක්  ගොඩ  නැගුනේය .වරක්  ඔහු  මට  නමක්ද  පට බැන්දේය  . නම  KGB විය.  KGB යනුවෙන් හැඳින්වුයේ  සෝවියට් දේශයේ  ඔත්තු  සේවයයි . ජවිපෙ  පත්තරවලට  ලිපි ලියන්නට මට ආරාධනාවක් ලැබුණු විට  මා  පළමුවෙන්ම  ලියාගෙන  ගොස් විජේවීර අතට දුන් ලිපිය  වුයේ  කම්පුචියාවේ ( කාම්බෝජයේ ) පොල්පොට්  පාලනය විසින්  30 ලක්ෂයක්  මිනිසුන්  මරා දැමීම   ගැනය . එය  කියවූ විජේවීර මෙය  පළකළහොත්  මිනිසුන් බියට  පත් වෙන  බවත් මෙහි තිබෙන්නේ  KGB  ඔත්තු සේවය විසින්  ගොතන  ලද  බොරු බවත් එබැවින් එය පළකළ නොහැකි බවත්  කිය.    " පක්ෂයට KGB ලයින්  ගෙනාවොත්    මරනවා " යයි  ඉන්පසු දවසක සිනහවෙමින් විජේවීර  මට  කිව්වේය . මා එය සිනහවකින්  නොසලකා  හැරියද  මගේ  බිරියට එය  කි විට එය  බරපතල  ප්‍රකාශයක් සහ තර්ජනයක්  ලෙස  ඇය සැලකුවාය.



1980  ජුලි මහා වැඩ වර්ජනයේදී  ජවිපෙ එය  කඩාකප්පල් කිරීමට  රහසිගත  මෙහෙයුමක් කළ බැවින්  1980 ජුලි  මාසයේ ජවිපෙ ඉවත් වීමට මට සිදුවිය.වැඩ වර්ජනය  සාර්ථක වුවහොත් එහි ජයග්‍රහණය අත් වෙන්නේ වමේ  පක්ෂවල වෘත්තීය සමිති නායකයන්ට බැවින් ඔවුන් කම්කරුවන් අතර  තව දුරටත්  ජනප්‍රිය වෙනු  ඇතැයි  විජේවීර  බියට  පත් විය . වර්ජනය  කඩා  කප්පල් වුවහොත් වෘත්තීය  සමිති  නායකයන්ගේ රැකියා අහිමි වූ විට     එම සමිතිවල සිටින  ජවිපෙ හිතවතුන් මගින්  වෘත්තීය සමිතිවල බලය අල්ලා  ගැනීම  විජේවීරගේ සැලසුම විය . ප්‍රසිද්ධියේ වර්ජයට සහය දුන්  ජවිපෙ  ,  වර්ජනයට සහභාගී නොවන  ලෙස සිය  හිතවතුන්ට  රහසිගතව උපදෙස්  දුන් අතර වර්ජනය  කළ  තම හිතවතුනට වර්ජනයෙන් ඉවත්ව  නැවත සේවයට  යන ලෙස උපදෙස් දුන්නේය . ලංකා  ගුරු සංගමයේ සිටි ජවිපෙ ට දැඩි  හිතවත් කම් දැක්වූ අයටද එවැනි උපදෙස්  දුන් බව සංගමයට වාර්තා වීම නිසා ජවිපෙන් ඉවත් වීමට  ගුරු සංගමය  තීරණය  කළේය.  එවක  ගුරු සංගමයේ   නායකයා වුයේ විජේවීරගේ  බිරිඳගේ අය්යා වූ එච්. එන්. ප්‍රනාන්දුය .


විජේවීර  දක්ෂ  සංවිධායකයෙක් ,  දක්ෂ  කතිකයෙක් සහ  දක්ෂ  ලේඛයෙක් බවට    කිසිදු සැකයක් නැත  තම  පක්ෂය  ගොඩ නැගීම  සඳහා   ඔහු  තරමට කැපවූ  වෙනත් වමේ  නායකයෙකු  නැති තරම්ය. සමාජවාදී  පාලනයක්  ඔහුගේ  ජීවිත  කාලය  තුල ලංකාවේ  පිහිටුවීම  ඔහුගේ එකම ඉලක්කය විය . ඔහු සිහිනෙන් දුටුවේත්  සමාජවාදය  මිස වෙන  යමක් නොවන බවට  කිසිදු සැකයක් නැත .ඔහු තරම් දක්ෂ  සංවිධායකයෙකු ලංකා  දේශපාලනයේ   සිටියේ   නම් ඒ  ජේ ආර්  ජයවර්ධන පමණය . 


එහෙත් රාජ්‍ය බලය අල්ලාගැනීම සඳහා  ඔහු  ගත් තීරණ අදුරදර්ශී විය .1970  බලයට  පැමිණි ආණ්ඩුව  1971 අප්‍රේල් මාසයේදී පෙරලන්නට  යාම ගැන  මැදහත්ව  සිතන අයෙකු එය  පිළිගනු ඇත.1971 වන විටත් සිරිමා  බණ්ඩාරනායකගේ   ආණ්ඩුව  මහජනයා අතර  ජනප්‍රිය විය. එබැවින් 71  කැරැල්ල  පරාජය  කිරීමට ආණ්ඩුව සමග  මහජනයා අත්වැල්  බැඳ ගත්හ. පැනයන  කැරලි කරුවනට වතුර  ටිකක් දීමටවත්  මහා ජනයා  කැමති වුයේ නැත .ඔවුන් අල්ලා දීමට  මිනිස්සු ආණ්ඩුවේ  හමුදාවනට සහ  පොලිසියට  සහය වුහ .


1987  දෙවෙනි  කැරැල්ල අරඹන විට මහජනයාගෙන්   බහුතරයක්  ජේ. ආර්ගේ ආණ්ඩුවට  විරුද්ධව  සිටි බවට  නිගමනය  කිරීම සාධාරණය. එහෙත් 1989 වන විට රටේ  ජනගහනයෙන්  90%ක් ජවිපෙට  විරුද්ධ විය. සමසමාජ  පක්ෂය කොමියුනිස්ට් පක්ෂය  ,  විජය කුමාරතුංග  නායකත්වය දැරූ මහජන  පක්ෂය , වාසු දේව  සහ  වික්‍රමබාහු  කරුණාරතන  නායකත්වය දරු නව සම සමාජ  පක්ෂය  ආදී පක්ෂවල ඇතැම් නායකයන්ද   ක්‍රියාකාරීන්ද  මරා දැමීම නිසා  ඔවුන්  ජවිපෙට කිසිදු අනුකම්පාවක්  නොදැක්වූ  අතර ශ්‍රී ලංකා නිදහස් පාක්ෂිකයන් සහ  යුඑන්පි  කාරයන්  මරා දැමීම  නිසා ඔවුන්ද  ජවිපෙට විරුද්ධ වුහ  . වමේ  කුඩා  කණ්ඩායමක් වූ  කම්කරු මාවත  දේශපාලනය  කළ  කමකරුවන්ටද ,ජවිපෙ  දේශපාලන කොට  ඉන්   ඉවත්ව වෙනත් දේශපාලනයක්  කළ අයටද  ජවිපෙ තුවක්කුව එල්ල විය . තුවක්කුවේ  බලය යොදා  නොකඩවා වැඩ වර්ජන  මෙහෙයවීම  නිසා   රටේ එදිනෙදා  කටයුතු  නිරන්තරයෙන්ම අඩපණ වීම  නිසාත් , විජය කුමාරතුංග  වැනි  ජනප්‍රිය  මිනිසුන් ඝාතනය  කිරීම  නිසාත්  මධ්‍යස්ථ  මත දරන්නන්ද  ජවිපෙට විරුද්ධ සිටගත්හ  . මේ  නිසා  1989 අවසානය වන විට  ජවිපෙ  සන්නද්ධ ව්‍යාපාරය  මුළුමනින්ම  විනාශ  කිරීමට  ප්‍රේමදාස ආණ්ඩුවට  පහසු විය..


ජවිපෙ , වමේ  මිනිස්සුන්ට  තුවක්කුව  ඉස්සුවේ  ඔවුන් ජවිපෙට එරෙහිව  තුවක්කු එල්ල  කල නිසා  නොවේ.  ඉන්දු ලංකා  ගිවිසුම  යටතේ  පිහිටවූ පළාත් සභාවලට  පක්ෂ වූ නිසාය   එක දිගට  වමේ  මිනිසුන්  මරන්නට වූ විට  එයට  යටවී  ජීවිත  නැති කරගන්නවාද  නැතහොත්  තුවක්කු අතට  ගෙන එයට  මුහුණ දෙනවද  යන  ප්‍රශ්නය ඔවුන්ට  තීරණය  කරන්නට සිදුවිය.  ප්‍රා සංවිධානය  හැදුනේ එහි ප්‍රතිඵලයක් ලෙසය . ප්‍රා සංවිධානය,   ජවිපෙ  තුවක්කු කරුවන් තමන්  වෙත ඒමට පෙර ඔවුන්  සොයා  ගොස්  මරා දැම්මේය . තුවක්කුවත් අතට  ගත්  පුද්ගලයා  තව දුරටත්  සාමාන්‍ය මිනිසෙකු නොවේ.  ඔහු ලේ දැකීමේ ආශාවෙන් පෙලෙයි  . ඔහුගේ  ආශාව  හැකි පමණ සතුරන් වැනසීමය. ප්‍රා සංවිධානයේ හැසිරීමද එසේ  විය . ඔවුහු ජවිපෙ  සාමාජිකයන් අල්ලාගෙන  වද  හිංසා  පැමිණවූ බව  කියනු ලැබේ .



කැරැල්ල  උග්‍රව  පැතිරෙමින් තිබුණු සමයේ  ප්‍රේමදාස  ආණ්ඩුව සාම සාකච්චා  කිරීමට  ජවිපෙට ආරාධනා  කළ විට  ජවිපෙ එය  පිළිගත්තේ  නම් දස  දහස්  ගණන් ජවිපෙ  සාමාජිකයන්ගේ  ජීවිත  ආරක්ෂා  කරගැනීමට  හැකිවෙනු නොඅනුමානය . එතෙත්  ජවිපෙට  තමන්ගේ ශක්තියත් ආණ්ඩුවේ  ශක්තියත් පිළිබඳව  නිවැරදි  තක්සේරුවක්  කර  ගැනීමට  තරම්  බුද්ධියක් නොතිබුණු බැවින් සාම සාකච්චා  ප්‍රතික්ෂේප  කළේය. ආණ්ඩුව සමග  මහජනයා  හිටගත් බැවින් ආණ්ඩුවේ  හමුදා හතර වටෙන්ම  ජවිපෙ  වටකරගත් විට  ඔවුන්ට සහය  දෙන්නට  කිසිවෙකු නොසිටියේය. හැංගි පන බේරා  ගන්නට   වර්ග සැතපුම් 25000 ක් වූ  භුමිය  තුල  ඔවුන්ට ඉඩ  කඩ  තිබුනේ  මහපොළොව  යට  පමණි .



ජවිපෙ සාමාජිකයනට එවැනි ඛෙද  ජනක  ඉරණමක් අත් වීම අතිශයින් කනගාටු දායකය .  විජේවීර ඇතුළු නායකත්වය  එජාප විරෝධී  මිනිසුන් අමනාප  නොවන  පරිද්දෙන්  කැරැල්ල  මෙහෙයවූවේ  නම්     සැලකිය  යුතු අන්දමින්   හානි අඩු කරගත    හැකි වෙනු නිසැකය .  ප්‍රභාකරන් සේම  මස්   රාත්තලම  ඉල්ලු බැවින්   විජේවීරට ඇතුළු  නායකයන්ට  හා දස දහස්  ගණන් තරුණයන්ට අතිශයින්ම ශෝක  ජනක  ඉරණමක් අත්විය.


රටේ  චන්ද දායකයන්ගෙන්  5% ට වඩා  කැමැත්තක්  ජවිපෙට අද වන තුරු  ලබා  ගැනීමට  නොහැකි වී  තිබෙන්නේ   1987-89  ජවිපෙ  හැසිරීම   නිසාය.  එහෙත් ඔවුහු එයින් පාඩම්  ඉගෙන  ගෙන  තිබේදැයි සැක සහිතය .   ඔවුහු අදත් විජේවීරට  වන්දනා  මාන  කරති. 1971 දී  තරුණයන් පහළොස් දහසකටත් 87-89 සමයේ තවත්  හතලිස් දහසකට අධික  ජවිපෙ  සාමාජිකයනටත්   මරණය  අත් වුවේ  විජේවීර  ප්‍රමුඛ  නායකත්වය  විසින්  ගන්නා  ලද අංක එකේ  මෝඩ  තීන්දු  නිසාය. ජේ ආර්ටත් ප්‍රේමදාසටත් ජවිපෙ විනාශ  කිරීමට  හැකි වුයේ ඒ මෝඩ  තීන්දු  වලට  පින්සිදුවන්නටය .








Wednesday, November 8, 2017

කොස් ඇටයක්වත් නොලැබුණු උපවාසය




      හුණු  බිජ්ජකින් පමණක් සෑහි  ' මාරාන්තික' උපවාසය නවතා දැමීම  ගැන උපවාසයට සහභාගී වූ  පස්  දෙනාට පමණක් නොව අන්තරේට ද පෙරටුගාමී සහෝදරවරුන්ටද  ජනතා විමුක්ති පෙරමුණේ  නායක  කාරකාදින්ටද අපි මුව  නොසැහෙන සේ ස්තුති කරමු .හුණු බිජ්ජ  නම් වෙන යමක්  නොව   හර්ෂද සිල්වාගේ ලිපියයි .එම  ලිපියෙන්ද  හර්ෂද  සිල්වා  කිව්වේ වෙන කිසිවක්  නොව   2017 -10-29  දින ප්‍රවුර්ති දෙපාර්තමේන්තුව  නිකුත් කළ  නිවේදනයෙන් ආණ්ඩුව  කියා  සිටි කි දේමය . සයිටමය  අහෝසි කොට මුදල් අය  කරන  එහෙත් ලාභ අපේක්ෂා  නොකරන ආයතනයක්  පිහිටුවන  බව එදා  ආණ්ඩුව  කිවේය . හර්ෂද  සිල්වා ගේ  ලිපියෙන්  යලි තහවුරු  කළේ ද එයමය. එකම වෙනස  නම්  කලින්   නිකුත්  කළ දීර්ඝ  ලිපිය  ප්‍රවුර්ති දෙපාර්තමේන්තුවේ අධ්‍යක්ෂ  ජනරාල් වරයා අත්සන් කර  තිබිම වන අතර මේ  කෙටි ලිපිය හර්ෂද  සිල්වා  නියෝජ්‍ය ඇමතිවරයා අත්සන් කර  තිබීමය 




                                                             හර්ෂ ද සිල්වා ගේ ලිපිය 

    

                                     ප්‍රවුර්ති අධ්‍යක්ෂ ජනරාල් වරයා  නිකුත්  කළ නිවේදනය 


 උපවාසය ආරම්භ  කළ විට  මා  කිවේ  මස් රාත්තලම  ඉල්ලන්නට ගොස් විජේවීරත් ප්‍රභාකරනුත්  කෙලවා  ගත් බවය .  එබැවින් අන්තරේ  විසින්  මස් රාත්තලම  ඉල්ලන්නට  යාම පරාජයට මාවත  බවය . වෛද්‍ය සංගමය  ආණ්ඩුවේ  ස්ථාවරය  පිළිගෙන  නිහඬ වුයේ මස් රාත්තලම  ඉල්ලන්නට  ගොස්  තියෙන දෙකත් ගැලවෙන්නට ඉඩ තිබෙන බව දැන සිටි නිසාය .එහෙත් කොල්ලන්ට එවැනි බුද්ධියක් නැත . උන්ට උවමනා වන්නේ  සටන්ය. දවාලයේ  පෙළපාලි ගොස් හැන්දෑවට  ගෙදර  ගිය  විට  බත් පිඟාන  මේසය  මත තිබේ. අඳින්නට  කමිසය අම්මා විසින් සෝදා  තිබේ.  සපත්තු දෙක  නංගිට  කියා  පොලිෂ් කරගත හැක .පසුදා පෝස්ටර් අලවන්නට    යන්නට  රුපියල් දෙතුන් සීයක්  ඉල්ලා  කෙඳිරි ගෑවීට බැනුම්  කප්පරක්  සමග   තාත්තාගෙන්   එය ලැබෙන්නේය . තේ  බොන්නට දවල්ට  කන්නට  මහා පොළ ශිෂ්‍යත්වයෙන්  ගතමනාව  ලැබෙන්නේය . එබැවින් ඔවුහු  ඉගනීම දෙකට දමා තමන්ගේ  පක්ෂ  නායකයන් හෝ ශිෂ්‍ය  නායකයන්  කියන  කියන  දේ  කරන්නට  සැදී පැහැදී සිටිති .


ඔවුන්ට  මොලේ  පෑදෙන්නේ ගෙදර  බත් පිඟාන  නැතිවූ දවසටය .


උපවාසයක් ඇරඹුවද ඊට  මහජන සහය නොමැති බව අන්තරේ ලොක්කන්ටත්,  පෙරටුගාමින්ටත් , ජවිපෙටත් තේරුම් ගන්නට හැකිවුයේ දවස්  දෙකක් ගත වීමෙන් පසුවය . එබැවින් ඔවුන්ට  ඕනා වුයේ උපවාසය  නවත්තන්නට කුමක් හෝ  ගැලවිජ්ජාවකි . ආණ්ඩුවේ  ස්ථාවරය අලුත් වචන වලින්  ලියා  හර්ෂද සිල්වා දුන් විට එය  බාර ගෙන  ජාම් බේරා  ගන්නවා  හැර වෙනත් විකල්පයක් ඔවුන්ට  නොවිය.


සයිටමය ජනසතු  කරන තුරු සටන් කරන්නට  ගොස්  සටන අවසන් උනේ එසේය . මාස එකොළහක් තිස්සේ  පන්ති වර්ජනය  කළ සිසුන්ට සිදුවූ පිරිමැසිය නොහැකි පාඩුවට වග  කියන්නට  කිසිවෙකු නැත .  රටට  සිදුවූ  හානියට වග කියන්නට කෙනෙක් නැත  .දොස්තර වර්ජන නිසා  මිය ගිය  රෝගීන්ට   පන දෙන්නට  කෙනෙක් නැත 

 එහෙත් එක  ශිෂ්‍ය  ජීවිතයක්  හෝ  අහිමි නොවී මෙය මෙසේ අවසන් වීම සියලු පාර්ශවයන් ලැබූ  ජයග්‍රහණයකි .

Friday, October 27, 2017

ලේ හලන කුමන්ත්‍රණයක් අත ළඟ



බෝම්බ  කතා , උල තැබීමේ  කතා,   වෙඩි උණ්ඩ  බැස්සවීමේ  කතා  යලි ඇරඹි  තිබේ. ඒ නව ව්‍යවස්ථාවක් වෙනුවෙන්  පෙනී සිටින්නන්  තොග  පිටින්  මරා දැමීමටය . එහෙත් තවමත්  ආණ්ඩු ක්‍රම ව්‍යවස්ථාවක්  කෙටුම්පත්  කර  නැත .පාර්ලිමේන්තුවට ඉදිරිපත් කරනු ලැබුවේ ව්‍යවස්තාවක් සකස්  කිරීම සදහා මන්ත්‍රී කමිටු සකස්  කළ යෝජනා ඇතුලත්   වාර්තාවක්  පමණි .එහෙත්  ඇතැම්  භික්ෂු පිරිසක් විසින්  සිවුරු කරට  ගෙන රට  පුරා  ගිනි ඇවිලවීමට   පටන්ගෙන ඇත.


 භික්ෂුන්ගේ මේ  හැසිරීම අලුත් දෙයක් නොවේ.1957 සිටම  ලංකාවේ අන්තගාමී  භික්ෂුන් විසින් මේ ඛේදවාචි  නාටකය  රඟපා  තිබේ. බණ්ඩාරනායක  මහතා 1957  චෙල්වනායගම් සමග  ගිවිසුමක් අත්සන් කොට උතුරේ  සහ  නැගෙනහිර  ප්‍රදේශවල  පළාත්  බද සභා (Regional Councils ) පිහිටුවීම සඳහා උත්සහ  කළ අවස්ථාවේද භික්ෂුන්  හැසිරුනේ  මෙලෙසමය . රොස්මිඩ් පෙදෙසට  පැමිණි 100  පමණ  භික්ෂු පිරිසක්  ගිවිසුම  ඉරා දමන  ලෙස  බණ්ඩාරනායක  මහතාට  බලකළහ .මොලයක් තිබුණත් කොන්දක් නොතිබුණු බණ්ඩාරනායක  මහතා ඔවුන් ඉදිරියේ  ගිවිසුම  ඉරා දමා  ගිවිසුම  ක්‍රියාත්මක  නොකරන  බවට  ලිඛිත  පොරොන්දුවක්ද  පැමිණ සිටි භික්ෂුන්ට දුන්නේය .එහෙත් බණ්ඩාරනායක  මහතා ගිවිසුම  ඉරාදැමීමට පෙර  මෙසේ  කිය.


" ඔබ වහන්සේලාට  උවමනානම් මේ ගිවිසුම මා ස්ථිර ලෙසම ඉරා  දමන්නම්. එහෙත් මෙයින් සිද්ධ වෙන්නේ  රටේ අනාගතය   ව්‍යසනයකට  පත්වීමයි. ඔබ වහන්සේලා  ඒ  ගැන  කල්පනා  කළ යුතුයි ."


ජාතිවාදයෙන්  උම්මත්තක  භාවයට  පත්ව සිටි  භික්ෂුන්ට  බණ්ඩාරනායකගේ  අනතුරු ඇඟවීම  වටහා  ගැනීමට තරම් බුද්ධියක්  තිබුනේ  නැත .



                                  බණ්ඩාරනායක- චෙල්වනායගම්  ගිවිසුම අත්සන්  කළ අවස්ථාව 


ගිවිසුම ඉරා දැමීමෙන් පසු උතුරු  නැගෙනහිර  ප්‍රදේශවල  කලබලකාරී  තත්වයක්  නිර්මාණය වීම  නිසා එම  ප්‍රදේශවල දෙමල  භාෂාවෙන්  යම් පමණකට   කටයුතු කිරීමට  ඉඩ දීම සඳහා  දෙමල  භාෂා  විශේෂ  විධි විධාන  පනත නීති ගත  කරන්නට  බණ්ඩාරනායක  මහතාට 1958 දී සිදුවිය .එහෙත් බණ්ඩාරනායක  මහතාට  සිදුවුයේ  එහි ප්‍රතිඵලයක්  ලෙස ජීවිතයෙන් වන්දි  ගෙවන්නටය . 1959 සැප්තැම්බර්  මස  25 දින තල්දුවේ  සෝමාරාම  භික්ෂුව විසින් රොස්මිඩ්  පෙදෙසේ  බණ්ඩාරනායක  මහතාගේ  නිවසේදී රිවෝල්වරයකින් ඔහුට  වෙඩි  තැබූ අතර  පසු දින බණ්ඩාරනායක  මහතා   රෝහලේදී අභාව ප්‍රාප්ත විය . ඔහු මරා දැමීමට  සෝමාරාම  භික්ෂුව  මෙහෙයවන  ලද්දේ  කැලණිය රජමහා විහාරයේ අධිපති  මාපිටිගම බුද්ධරක්ඛිත  භික්ෂුව විසිනි .

තමන් ලඟට පැමිණ  වැඩියේ  මන්දැයි  බණ්ඩාරනායක  මහතා  ඇසු විට  රිවොල්වරයෙන්  ඔහුට  තමන් වෙඩි තැබූ බව  තල්දුවේ  සෝමාරාම  භික්ෂුව උසාවියේදී  පාපොච්චාරණය  කළේ මෙසේය .



“...that morning, I went to Rosmead Place. The Prime Minister was talking to another monk. I occupied a seat at the end of the verandah, and then he came up to me and inquired why I had come ...I shot at the Prime Minister once. That shot struck him. He started running into the house. I followed behind him and fired three more bullets. Someone shot me as well and I lost consciousness. I do not remember what happened next”. -Thalduve Somarama—statement by 1st accused [from the dock.]


ඩඩ්ලි  සේනානායක  මහතාගේ නායකත්වයෙන් යුතු එක්සත් ජාතික  පක්ෂය  1965  බලයට  පත්වූ අතර  1966 දී  ඩඩ්ලි සේනානායක මහතා ෆෙඩරල්  පක්ෂයේ නායක චෙල්වනායගම්  මහතා සමග  ගිවිසුමක් අත්සන් කරමින් දෙමල  භාෂා විශේෂ විධි විධාන  පනතට සංශෝධන  ඉදිරිපත් කොට  උතුරු  පළාතේ සහ  නැගෙනහිර  පළාතේ  පාලන  කටයුතු දෙමල  බසින් කිරීමටත්  ලේඛන  කටයුතු  දෙමල බසින් කිරීමටත් එකඟ විය .


එයට එරෙහිව ශ්‍රීලංකා  නිදහස්  පක්ෂයත්  සමසමාජ  සහ  කොමියුනිස්ට්  පක්ෂත් 1966  ජනවාරි 8 දින විහාරමහා දෙවි උද්‍යානයේ  සිට ගාලු මුවදොර  පිහිටි  පාර්ලිමේන්තුව දක්වා පෙළපාලියක් සංවිධානය  කළ අතර එහිදීද  භික්ෂුන් ඉදිරියෙන් ගමන් කළහ . ඩඩ්ලි  සේනානායක  ආණ්ඩුව විරෝධතා  හමුවේ  ගිවිසුම  ක්‍රියාත්මක  නොකළ  බැවින් ෆෙඩරල් පක්ෂය 1968 දී එක්සත් ජාතික  පක්ෂ  ආණ්ඩුවෙන්  ඉවත් විය .


1970  බලයට  පැමිණි  සිරිමා  බණ්ඩාරනායක  ප්‍රමුඛ සමසමාජ  කොමියුනිස්ට්  ආණ්ඩුව මගින් දෙමල  ජනයාගේ  ඉල්ලීම් වලට සවන් නොදුන් අතර දෙමල  මිනිසුන් තව දුරටත් අසහනය  පත් කරමින්  විශ්ව විද්‍යාලවලට සිසුන් ඇතුලත්  කර  ගැනීමේදී  ජන අනුපාතය  අනුව විය  යුතු බවට  නීති පැනවුවේය ප්‍රමිතිකරණය  නමින් හැඳින්වූ එම  නීති හේතුකොටගෙන ඉහලින් උසස් පෙළ සමත් වූ දෙමල සිසුන් රැසකට සරසවි දොර වැසුණේය.ඔවුන්ට වඩා අඩු සුදුසුකම්  ලැබූ  සිංහල සිසුන්ට සරසවි දොර  ඇරුණේය.


 දෙමල වී ඉපදීම නිසා සරසවිවලට  තෝරා නොගැනීම ගැන බලවත් ලෙස අසහනයට  පත්  උතුරේ සහ නැගෙනහිර  සිසුන් EROS (Eelam Revolutionary Organisation of Students ) නමින් සංවිධානයක්   පිහිටුවාගත් අතර එහි නායකයා  වුයේ බාලකුමාර්ය . ඔවුහු  ඉක්බිතිව   ආයුධ අතට  ගෙන ආණ්ඩුවට එරෙහිව සටන්  කළ අතර  LTTE සංවිධානය  විසින් අනෙකුත්  දෙමල සංවිධාන විනාශ  කර දමන්නට වූ විට ඊරෝස්  නායකයෝ  එම සංවිධානය විසුරුවා  හැර  කොටි සංවිධානයට එකතු වුහ .


දෙමල  ජනයාගේ  ගැටළු විසඳීම සඳහා  වට  මේස  සාකච්චාවක්  පවත්වන  බවට  පොරොන්දු දෙමින්  1977 බලයට  පැමිණි  ජේ ආර්. ජයවර්ධන මහතා සාකච්චාවන් වෙනුවට  උතුරට  හමුදා  යවා එහි පවතින විරෝධතා  මර්දනය  කිරීමට  පියවර  ගත්තේය 1980 උතුරට  හමුදා  ප්‍රධානියෙකු  පත් කළ ඔහු දෙසැම්බර් 31 වන විට  උතුර සුද්ධ කර දෙන  ලෙස  කිවේය .ඉන්පසු ඔහුගේ ඇතැම් ඇමතිවරු   යාපනයේ පුස්තකාලය  ගිනි තැබූ අතර 1983  කළු ජුලිය දියත් කළේය.

 

27 අවුරුද්දක් ඇවිලුණු යුද්ධය ඇරඹුණේ එලෙසය . යුද්ධයෙන් මියගිය සිංහල දෙමල මුස්ලිම් මිනිසුන්ගේ  ගැහැණුන්ගේ  ළමුන්ගේ මහල්ලන්ගේ සංඛ්‍යාව ලක්ෂ දෙක ඉක්මවයි .   තුවක්කුවෙන්ම  යුද්ධය අවසන්  කළ නොහැකි බව ජේ  ආර්ට  වැටහුනේ 1986 වන විටය. ඉන්දියාවේ මැදිහත්වීමෙන්  ඉන්දු ලංකා  ගිවිසුම සැකසුනු අතර ඒ  යටතේ පළාත් සභා  පිහිටුවන  ලද්දේ යුද්ධය අවසන් කිරිමට එමගින් හැකිවෙනු ඇති අපේක්ෂා  කළ හෙයිනි. එම  ගිවිසුම  යටතේ උතුරේ  තිබු  සන්නද්ධ  සංවිධාන  බොහොමයක් ආයුධ බිම  තබනු ලැබිය .ආයුධ  බිම  නොතැබූ  කොටි සංවිධනයට එරෙහිව  ඉන්දියානු  හමුදාව සටන් කළ අතර  උතුරෙන්  කොටි  පලවා  හැරීමට ඔවුන් සමත් වුහ .නැගෙනහිර  පළාතේ  වනාන්තරවල සිට  ක්‍රියාත්මක වීමට  කොටින්ට සිදුවිය 


පළාත් සභා  මගින් රට කෑලි අටකට  කැඩී  යන බව  කි  ජනතා විමුක්ති පෙරමුණ එයට එරෙහිව  සන්නද්ධ  කැරැල්ලක් සිංහල ප්‍රදේශවල  දියත් කළ අතර  භික්ෂුන් සැලකිය  යුතු පිරිසක්ද ඒ අතර විය  .  කොටි මර්දනය  කිරීම  ඉන්දියානු හමුදාවට  භාර දුන්  ජේ  ආර් එහි සිටි  සිංහල  හමුදාව දකුණට  ගෙන්වා  ජවිපෙ  කැරැල්ල අනුකමපා විරහිතව  මර්දනය  කරනු ලැබීය . පළාත්සභා  මගින් රට  කුඩුපට්ටම් වෙන  බව කි ජවිපෙ පසු  කාලයේ  පළාත් සභාවලට  තරඟ  කොට  මන්ත්‍රී වරු බවට  පත්වුහ .


මහින්ද  රාජපක්ෂ  මහතා  බලයට  පත්වීමෙන් පසු  පළාත් සභා  ක්‍රමයෙන් එහාට  යන  විසඳුමක්  දෙවන  බව  ඉන්දියාවට  කී බැවින්  කොටි පරාජය  කිරීම සඳහා  ඉන්දියානු ආණ්ඩුවේ  නොමඳ සහය  මහින්දට  දුන්නේය .  එහෙත් කොටි පරාජය වීමෙන්  පසු මහින්ද  ඉන්දියාවට දුන්  පොරොන්දුව අමතක  කළේය 


 2009 දී යුද්ධය අවසන් වුවද  උතුර සහ දකුණ  තවමත් සැබෑ  ලෙස  එක්සත් වී  නැත. විශාල  හමුදාවක්  උතුරේ සහ නැගෙනහිර  තබා  ගැනීමට ආණ්ඩුවට  සිදුවී  තිබෙන්නේ  ඒ නිසාය . වත්මන් ආණ්ඩුවේ  නායකයන් උතුරේ සහ නැගෙනහිර  නායකයන් සමගද  විපක්ෂය සමගද එක්ව  නව ව්‍යවස්ථාවක් හදාගැනීමට උත්සහ  කරන්නේ උතුර  දකුණ සැබෑ  ලෙස  එක්සත් කිරීමටත් , ඇමරිකා එක්සත් ජනපදයේ  ජනාධිපතිවරයාටවත් නොමැති තරම් අධික  ඒකාධිපත බලතල සහිත විධායක  ජනාධිපති  ක්‍රමය  අහෝසි  කිරීමටත්  සිංහල , දෙමල  මුස්ලිම් මිනිසුන්ගේ  ප්‍රජාතන්ත්‍රවාදී අයිතිවාසිකම්  තහවුරු  කිරීම සඳහාත් නව ආණ්ඩුක්‍රම ව්‍යවස්ථාවක්  පණවන ලෙස  ඉල්ලමින් 62  ලක්ෂයක්  මෛත්‍රීපාල සිරිසේන  මහතාට  චන්දය දුන් බැවිණි.  2016  මහා  මැතිවරණයේදී ඊටත් වඩා පිරිසක්  චන්දය දී වත්මන් ආණ්ඩුව  බලයට  පත් කොට  තිබේ. 

මහින්ද රාජපක්ෂ මහතාද  2015 ජනාධිපතිවරණයේදී නව ව්‍යවස්ථාවක්  පනවන  බවට ලිඛිතවම  පොරොන්දු විය.


එහෙත් මේ වන විට  නව ව්‍යවස්ථාවක්  සැකසීමට එරෙහිව  විමල් වීරවංශ වැනි රස්තියාදු දේශපාලකයන්ද කමල් ගුණරත්න වැනි ලේ  පිපාසිතයන්ද යුද්ධ  ප්‍රකාශ  කොට  තිබේ. ඔවුන්ට නායකත්වය දීමට දුෂ්ට  භික්ෂුන් අතලොස්සක්ද  ඉදිරිපත් වී  සිටිති. නව ව්‍යවස්ථාවට  පක්ෂ අය වෙඩි තබා මරා දැමිය  යුතුය  යන  ඇඟ  කිළිපොලන  ප්‍රකාශයක් කමල්  ගුණරත්න  නමැති ගොටභය පක්ෂයේ  විශ්‍රාමික  හමුදා නිලධාරියා විසින්   කිරීම  , ව්‍යවස්ථාව  සම්මත වුවහොත්  ගුවන් යානයකින් පාර්ලිමේන්තුවට    බෝම්බ දැමිය යුතුයයි විමල් වීරවංශ  විසින් ප්‍රසිද්ධියේ කීම , නව ව්‍යවස්ථවට පක්ෂ අය  උල  තබා  මරාදැමිය  යුතුයැයි මහින්දගේ හෙන්චය්යෙකු වන පාර්ලිමේන්තු මන්ත්‍රී  රණතුංග විසින් කීම   අතිශයින්ම  භයන්කරය  . මෙවැනි  ප්‍රකාශ  අනුව  පැමිණි හැකි නිගමනය  නම් විශ්‍රාමික  ඉහල පෙලේ හමුදා නිලධාරීන් සහ විමල් වීරවංශ වැනි  මහින්ද  හෙන්චය්යන් රාජ්‍ය  නායකයන්  මර  හෝ දමා නව ව්‍යවස්ථාවක්  සම්මත වීම වැලක්වීමට කුමන්ත්‍රණයක්  ආරම්භ  කර  තිබෙන  බවය  .මේ වන විට  මේ  කුමන්ත්‍රණයේ  පාර්ශව  කරුවන්  බවට ඇතැම් භික්ෂුන්ද  පත්ව තිබේ. ඔවුන් අතර  බුද්ධ රක්ඛිතලා සහ සෝමාරාමලාද සිටින  බවට සැකයක් නැත 


පවත්නා  බිහිසුණු  තත්ත්වය  ආණ්ඩුව ත් ජනාධිපතිවරයාත් අවබෝධ  කර ගත බවක් පෙනෙන්නේ  නැත .එසේ අවබෝධ  කරගත්තේ  නම් කමල් ගුරත්නලා  වීරවන්සලා මේ වෙනකොට  රහස්  පොලිසියට  ගෙන ගොස් තිබිය  යුතුය .


මේ  කුමන්ත්‍රණ  කරුවන් හුරතල් කිරීමෙන් සිදුවන්නේ  1987-89 ටත් වඩා  භීෂණයක්  ඔවුන් විසින්  රටපුරා දියත් කිරීමය  . එය  වලක්වා  ගැනීමට  නම් අනුකම්පා ව්රහිතව  මේ  කුමන්ත්‍රණය  පරාජය  කිරීමට ආණ්ඩුව  හනික  පියවර  ගැනීම  අත්‍යවශ්‍යය.






Saturday, September 23, 2017

මා දුටු 87-89 භීෂණය -4 කොටස - හමුදාව මහා රෑ නිවසට කඩා වදී





       මෙයට පෙර   ලිව තුන් වන  කොටසේ  මා විස්තර  කළේ දිනක් පාන්දර  නාවුක  හමුදා  භටයන් මගේ  නිවසට  පැමිණ  නිවස   සෝදිසි කොට  නැවතත්  මා  හමුදා  කඳවුරට ගෙන්වා ගෙන  ප්‍රශ්ණ  කළ ආකාරයය. මා  එහි ගියේ මට පහර දී ඇට  කටු කඩා අවසානයේදී පාරක් අසබඩදී රාත්‍රී  කාලයේදී මා  වෙඩි  තබා මරා දමනු ඇතැයි යන භීතියෙනි. නමුත් මා  ජවිපෙ සාමාජිකයෙකු නොවෙන  බව ප්‍රශ්න කිරීමෙන් අනතුරුව වටහා ගත්  නිසාදෝ   ඔවුහු  මට ආපසු ඒමට ඉඩ දුන්හ .





                                               (චන්දය දැමීම  නිසා ජවිපෙ කළ දඩයමකි )


රටේ අනෙකුත් සිංහල ප්‍රදේශවල  මෙන්ම  අපේ ගමේ සහ අවට ගම්මාන වල ද 1988 මැද භාගයෙන්  පසු  ජවිපෙ ක්‍රියාකාරකම් වැඩි වෙමින් තිබුණි . රාත්‍රී කාළයේ ගමේ  නිවෙස් වලට  ජවිපෙ තුවක්කු කරුවන්  ගොස්  තිබුණු බවට ප්‍රවුර්ති ලැබෙමින් තිබුණි. දිනක් මා  හමුවීමට  පැමිණි  කාන්තාවක් ඉකුත් දින  රාත්‍රියේ  ජවිපෙ තුවක්කු කරුවන්  තම නිවසට  පැමිණි බවත් නිවසේ අල්මාරි ලාච්චු පවා   විවුර්ත කොට සෝදිසි කොට අවසානයේදී හිංසාවක් නොකොට  පිටවී  ගිය බවත්  කීවාය.   අද උදැසන ලාච්චු  විවුර්ත  කොට බැලුවිට එහි තිබු රත්තරන් වළලු (සංඛ්‍යාව මතක නැත ) අතුරු දහන් වී  ඇති බවත් ඒවා  ගෙන  යන්නට ඇත්තේ  රාත්‍රී  කාලයේ  පැමිණි  ජවිපෙ  තුවක්කු කරුවන අතරින්  ලාච්චු ඇවිස්සු අය විය  යුතු බවත් කීවාය. එක වළල්ලක්  තබා ගෙන  අනිත් වළලු  ආපසු  ලබා දෙන  ලෙස  ඉල්ලමින් ජවිපෙට  පණිවිඩයක්  යවන  ලෙස ඇය මගෙන් ඉල්ලා සිටියාය.


1980 න් පසු ජවිපෙ සමග  මගේ  කිසිදු සම්බන්ධයක් නැති බව  මම ඇයට පැහැදිලි කළෙමි .එබැවින් ඒ සම්බන්ධයෙන් කිසිදු උදව්වක්  කළ  නොහැකි  බව   කි මා   ජවිපෙ ප්‍රාදේශීය සන්නද්ධ  නායකයා සිටින්නේ අසල  ගමක් වූ ගිරිකොල ප්‍රදේශයේ  බැවින්  හැකි නම්  ඔහු හමුවී මේ පිළිබඳව  ඔහුට දන්වන  ලෙස   ඇයට කීවෙමි.


ජවිපෙ ප්‍රාදේශීය  සන්නද්ධ  නායකයා වුයේ   මතුගම   පොළේ එළවලු විකුණු වෙළෙන්දෙකි . ඔහු කලක් පදිංචිව සිටියේ  මගේ නිවස අසල  ගෙයක් කුලියට ගෙනය . එකල  ඔහු ජවිපෙට සම්බන්ධ  බව  කිසිවෙකු දැන සිටියේ  නැත . රාත්‍රී කාළයේදී  නීති විරෝධී ලී ජාවරමක්ද ඔහු කළේය. පොලට  ගිය අවස්ථාවල  ඔහුගෙන් කීප අවස්ථාවක   මා එළවලු මිලදී  ගත් බැවින් ඔහු සහ  මා අතර  දුරස්ථ සම්බන්ධ කමක් තිබුණි. ඔහු ජවිපෙ ක්‍රියාකාරිකයෙකු බවට  ගමේ  ප්‍රසිද්ධ වුයේ  නාවික  හමුදාව ඔහු අල්ලා  ගැනීමට  දින දෙකක් ඔහුගේ  නිවස වැටලීමෙන් පසුවය . එහෙත් දිවීමේ ශුරයෙකු වූ ඔහුව අල්ලා  ගැනීමට  නොහැකි විය. ඉන්පසු  ඔහු අපේ  ගම අත් හැර  ගිය නමුත් ප්‍රදේශයේ  ජවිපෙ සන්නද්ධ  නායකයා  ලෙස  ක්‍රියා  කාරකම් වල  යෙදුනේය . ඔහුගේ දෙවෙනියා වුයේ පොලිස් කොස්තාපල් වරයෙකි.  පොලිසියේ සේවය සඳහා වාර්තා  කිරීමෙන් වැළකුණු ඔහු ජවිපෙ සන්නද්ධ  ක්‍රියා  කාරකම්වල  නිරත විය . කැරැල්ලේ  පරාජයෙන් පසුව පොලිසිය විසින්  ඔහු අල්ලාගෙන මිනීමැරීම් චෝදනා  මත  අධිකරණයට ඉදිරිපත් කළ අතර  අධිකරණය විසින් ඔහුට  මරණ දඬුවම නියම  කරනු ලැබීය . අවුරුදු 20 කට අධික  කාලයක් සිරගතව  සිටි ඔහු මේ වන විට  නිදහස  ලබා වෙනත් ප්‍රදේශයක  ජීවත් වන  බවට  මෑතකදී  මට දැනගන්නට ලැබිණ . ප්‍රාදේශීය  ජවිපෙ නායකයා අල්ලා  ගැනීමට  කැරැල්ලේ  පරාජයෙන්  පසුවද පොලිසියට  නොහැකි විය .ඔහුද උප නායකයා සමග දුරස්ථ ප්‍රදේශයක  ජීවත් වෙන බවට ආරංචි තිබේ .




 ජවිපෙ විසින් අනෙකුත් බොහෝ දේශපාලන  පක්ෂ  මේවන විට  තහනම්  කොට  තිබු බැවින්  දේශපාලන  පක්ෂ වලින්  ඉවත්වූ බව සඳහන් කරමින් බැනර් දමන  ලෙස  ජවිපෙ අවට  ගම්මානවල දේශපාලන පක්ෂවල   ප්‍රමුඛයනට  නියෝග  කර  තිබුනේය .එම නියෝගය අනුව  කටයුතු නොකළ හොත් මරණය අත්වෙන  බැවින්  දේශපාලන  කටයුතු වලින් ඉවත්වූ බව දන්වමින් අපේ  ගමෙත් අවට  ගම්මානවලත් පාරවල  හරහා එල්ලූ බැනර් සිය  ගානක්  දැකීමට  හැකිවිය . වැඩියෙන්ම එවැනි බැනර් එල්ලා  තිබුනේ  මා එකල ඉගැන්වූ  පාසල තිබු  ගම වූ ගිරිකොලය .මුළු ගමම  ජවිපෙ ආධිපත්‍යයට  යටත් වී  තිබිම එයට  හේතුව  විය .


                                         (ජවිපෙ  විසින්   ගිනි තැබූ  ආණ්ඩුවේ  බස් රථ )


දේශපාලන  පක්ෂකට සම්බන්ධ වුවද,  නැතද , සියල්ලෝම  කාලය  ගත  කළේ බියෙන් සහ සැකයෙනි.රාත්‍රී කාලයේ තම නිවසට එක්කෝ ආණ්ඩුවේ  හමුදා  හෝ ජවිපෙ එනු ඇතැයි බියට පත්ව සිටියහ. අඳුර වැටුණු පසු  බොහෝ රෑ වන තුරු  මා ගත  කළේ මිදුලට වී අන්ධකාරයේය. අද මෙන් වාහන සුලබ නොවූ එකල  වාහනයක් එනු ඇසුණු විට පපුව  තුල ඇතිවන ගින්දර ගැන දන්නේ  එකල සිටි අය පමණි. රාත්‍රී  කාලයේ  නින්දේ සිටියද කිලෝ මීටර  භාගයක්  දුරක සිට  නැගෙන වාහනයේ  හඬ පවා මිනිසුන් ඇහැරවයි. වාහනවල එන්නේ ආණ්ඩුවේ  හමුදා  හෝ මන්ත්‍රීවරු යටතේ  පැවති සන්නද්ධ  කණ්ඩායම්ය  . ජවිපෙ තුවක්කු කරුවන් ට  අඩු වශයෙන් යතුරු  පැදියක්වත් නොතිබුණු  බැවින්  ඔවුන් රාත්‍රී   කාලයේ  සැරිසැරුවේ  පා  ගමනිනි . 



දිනක් රාත්‍රී 8 ට  පමණ  මා  කළුවරේ  මිදුලට වී සිටින විට  නිවස  ඉදිරිපිටින් දිවෙන  පාර දිගේ  කිසියම් වාහනයක්  පැමිණ , මගේ  නිවස  පසු කොට මීටර්  50 ක් පමණ ගොස්  නැවත්වුයේය. ඊළඟ මොහොතේ  මා දුටුවේ  හමුදා  භටයන් යයි සිතිය  හැකි පිරිසක්  මගේ  නිවස දෙසට දුවගෙන එන  අයුරුය .ඔවුන් පැමිණෙන්නේ  මා අල්ලාගෙන  යාමට විය  හැකි  යයි  සිතු  මා නිවස පිටුපස දෙසින් පැනයාම සඳහා දුවන්නට  පටන් ගතිමි. පිටුපස සිටි  නැගණිය  මා දුවනු දැක "මොකෝ " යයි ඇසු විට 'ආමි එක එනවා ." කියමින් වත්ත  පහලට  දුවගොස් කුමුරු  හරහා දුවන්නට  පටන් ගතිමි. කට්ට  කළුවරේ කුඹුරුවල  නියරවල්  දිගේ දිවිය  නොහැකි බව ඔබට සිතා   ගත  හැකි විය  යුතුය. නියරවල් මත  හැරී හැරී දුවන විට  මා කීප වතාවක්ම හොඳින්  වැවී තිබුණු ගොයම් මතට  කඩා වැටුණේය. ඒ හැම විටකම  යලි නැගිට  දුව  ගොස් අක්කර  දෙකක් පමණ  වූ එම  කුඹුරු  යායෙන් එපිටින් වූ රබර් වත්තට  ගොඩවී එහි තිබු විශාල  ගල් පොත්තක්  මත වාඩිවී ගිමන් ඇරියෙමි. එහි සිට  මගේ  නිවසට මීටර් 150 කට වඩා දුර  නැත .



මා සිටි රබර් වත්ත බැවුම් සහිත ඉඩමකි. එය අයත් වුවේ  පන්සලටය .ටික වෙලාවක් මා  එහි සිටින විට ඉඩමේ  ඉහල  පැත්තෙන් වරින් වර 'දඩාස් ' ' දඩාස් ' යනුවෙන් මොනවදෝ වැටෙන  හඬ ඇසෙන්නට  විය. හමුදා  භටයන් පන්සලට ගොස් එහි සිට වත්ත දෙසට විශාල ගල් එවන්නේ   මා එහි සිටිතැයි   සිතා විය  යුතුය යැයි මා  කල්පනා  කළෙමි. මා සිත තුළ වූ භීතිය තව දුරටත් වැඩි විය .



                                  (පවුලේ සාමාජිකයෙකු  හමුදාව  විසින් රැගෙන  යාමෙන් පසු  )


තවත් පැය භාගයක්  ගතවූ  විට  පැමිණි වාහනය ආපසු යන  හඬ මට ඇසුණේය. ඇතැම් විටෙක  හමුදා  භටයන් නොමැතිව වාහනය  ආපසු  යනවා විය  හැකියයි මා  කල්පනා  කළෙමි. වාහනය  ආපසු යන  බව ඇසුණු විට මා  යලි නිවෙසට  ගිය විට මා අල්ලා  ගැනීමට  ඔවුන් නිවෙස අවට සැඟවී සිටිනවා විය හැක . එබැවින් මා  තව දුරටත් ගල්තලාවට වී සිටිමට  තීරණය  කළෙමි.


අපේ ලිඳ  තිබුණේ මා පසු කොට ආ  කුඹුර ආසන්නයේය. හමුදා වාහනය  ගොස් පැය භාගයකට හමාරකට   පසුව   ලිඳට  පැමිණි කිසිවෙකු පනිට්ටුවකින් වතුර  ගනිමින් අනවශ්‍ය පරිදි පනිට්ටුව ලින් ගැට්ටේ කීප වාරයක්  හප්පන  හඬ  මට ඇසුනේය. අනතුර  පහව  ගොස් ඇති බැවින් ආපසු  එන ලෙස මගේ බිරිඳ  කරන සංඥාවක් ලෙස  සැලකු මම සෙමින් සෙමින් ආපසු  නිවසට එන විට බිරිඳත් නැගෙණියත් නිවසේ  පිටුපස දොර අසල සිටි අතර ඉක්මනින් නිවෙස  තුළට  එන  ලෙස කිහ .


"ගියාද?     නිවසට ඇතුළු වෙමින්  බිරිඳගෙන් ඇසිමි.


"'ඔව් ගියා " බිරිඳ  කීවාය .


" මොනවද ඇහුවේ?"  


" ඒ මිනිස්සු  නරක මිනිස්සු  නෙවෙයි . හොඳට  කතා  කළා . "



                                  ( හමුදා අත් අඩංගුවට  පත්වූ  ජවිපෙ සාමාජිකයෙකුගේ  ඉරණම )

        


මා  නිවස පිටුපසින් පැනයනවාත් සමගම හමුදා  භටයන් කීප දෙනෙකු නිවස  පසු පසට  දුව ආ  බව සොහොයුරිය මා සමග කීවාය . මා තවත් මොහොතක් හෝ ප්‍රමාද වී  දිව්වේ  නම්   ඔවුන් මට වෙඩි තබනු සිකුරුය. එදින රාත්‍රියේ එම භට පිරිසම  වෙනත් නිවසක් වැටලීමේදී පැන ගිය අයෙකුට වෙඩි තැබීම  නිසා බොකු බඩවැල් එලියට  පැන දොලක වැටි සිටි බව    පසුදා ආරංචි විය .


" මොනවද ඇහුවේ ?" යලිත් බිරිඳගෙන් ඇසුවෙමි.


" ඔයා  කෝ කියල ඇහුව . මංකිව්වා දැන් හිටිය  කියල . දැන් හිටියනං කෝ  කියල ආයිත් ඇහුව  .මං කිව්වා  සමහරවිට  පංසලට යන්න ඇති පත්තර  බලන්න කියල ".

 (පන්සල තිබෙන්නේ මගේ ගෙවත්තට අල්ලපු වත්තට අල්ලපු වත්තේය .)

" ඉතින් ?" 

ඉතින් නොකිය   ගියේ මොකද  කියල ඇහුව.  නොකිය  යන්නේ  පුතා  පස්සෙන් යන නිසා කියල මන් කිව්වා. ( එකල  ලොකු පුතාගේ වයස අවුරුදු 6 ක් පමණ විය ) ඊට   පස්සේ  මුළු ගේම ඇවිස්සුවා.ඇඳන්  යට  පවා බැලුව . සොල්දරේ  හැංගිලා  ඉන්නවා  නේද  කියල ඇහුව .( එකල  තිබු අපේ  පැරණි නිවසේ  සොල්දරයක් තිබිණ .) මං කිව්වා සැක නම් සොල්දරේට  නැගල බලන්න  කියල. එයිට  පස්සේ  සොල්දරෙටත් නැගල බැලුව. 

" ඊට පස්සේ ?"

"  මං ඇහුව  කොහෙන්ද ආවේ  කියල . කියන්න  මං මහත්තයව එක්කන් එන්නම් එතනට  කියල . නැහැ.  අපි ආයිත් එන්නම්  කියල  ආමි එකෙන් ආපු  ලොක්ක  කිව්වා .  බය වෙන්න දේකුත් නැහැ බොහොම විනීත විදිහට තමා  කතා  කළේ "


 මා සිත තුළ වූ බිය  තරමකින්  පහ වුවද රාත්‍රී  ආහාරය ගැනීමටවත් බඩ  ගින්නක් ඇති වුයේ  නැත. බිය  පත් වූ කළ  කුසගින්න අතුරුදහන්  වන  බව  වැටහුනේ එකලය . කෙසේ වෙතත් ඔවුහු  සැර වැර නොකර  කතා  බහ  කර  තිබුණු නිසා  මගේ සිත  තුල වූ බිය තරමකින්   අඩු විය .එබැවින් ඔවුන් නැවතත්  පැමිණිය  හොත් පැන නොගොස් ඔවුන්ට   මුහුණ දීමට  තීරණය  කළෙමි.  ඔවුන් අසන  ප්‍රශ්න වලට දිය යුතු පිළිතුරුද දින දෙක  තුනකදී මා  තීරණය  කර ගතිමි . මා සපයන  පිළිතුරු අසත්‍ය  ලෙස  ඔවුන්ට වැටහුනහොත්  මා  කුදලාගෙන  යාමට  ඉඩ  තිබුණි. එබැවින් මා   කාලය  ගත  කළේ කිසිදු මානසික සහනයක්  නොමැතිවය .



              

ඉන් සති දෙකකට  පසු දිනක  පාන්දර දෙකට  පමණ හිටි හැටියේ  මා අවදි වුයේ තරමක් දුරින් ඇසුණු වාහනයක   හඬටය . එන්නේ  හමුදා වාහනයක් විය  හැකිය.  ප්‍රධාන දොර අසලින්  පුටුවක් තබා එහි නැග දොරට  ඉහලින් තිබු ලී  කැටයම් කවුළුව  තුළින් පිටත බැලීමි . වාහනය නිවස  පසු කොට  මද දුරක් ගොස්  නවත්වනු ලැබීය. එයින් බැසගත්  හමුදා  භටයෝ මගේ නිවස දෙසට දුවගෙන  එන  බව  දුටු මා වහා  පුටුවෙන් බැස  එය  පැත්තකින්  තබා  නැවතත්  කාමරයට  ගියේ  නිදාගෙන සිටින  බව ඇඟවීමටය . ඊළඟ  මොහොතේ  ඔවුහු  දොරට  තට්ටු කළහ .


"කවුද? "  


"අපි  හමුදාවෙන්. දොර අරින්න ."


නිවාස  තුළද  ,පිටතද  විදුලි පහන් දල්වා  ඉන්පසු දොර විවුර්ත  කොට යන්තමින් පිටත  බැලීමි. දොර දෙපස  බිත්තිවලට හේත්තුවී  හමුදා  භටයන් දෙදෙනෙකු  සිටි අතර දොර  හැර  තබා අඩි කීපයක්  පසු පසට වීමි. ඉන්පසු එක හමුදා  භටයෙක් දොර  ඉදිරිපසට  විත් මගේ  බිරිඳ  අමතා 


'බය වෙන්න එපා  මිස්. අපි  තමා  කලින් දවසෙත් ආවේ " යයි කිවේය.


" මහත්තය ඉන්නවා  කියල සර්ට එන්න  කියන්න ". යයි  ඔහු අනිත් භටයාට  කිවේය .


සන්සුන් බවක්  මා  පෙන්වුවද  මා සිත  තුල ගිණි ඇවිලෙමින් තිබුණි  . කුමකින් කුමක් වෙනු ඇත්ද ? තවත් මොහොතකින්  ඔවුන් මා  හමුදා  රථයේ නංවාගෙන  රැගෙන  යාමට  ඉඩ තිබේ.


විනාඩි දෙක තුනකින් පසු  බර අඩි  තබමින්  හමුදා  ලොක්කා නිවස දෙසට එන  හඬ ඇසුණු අතර ඊළඟ  මොහොතේ ඔහු නිවස  තුළට ආවේය . ඔහු පැළඳ   සිටියේ කැලෑ ඇඳුමකි . ආදී හයක් පමණ උස  පුද්ගලයෙකු වූ ඔහුගේ  මුහුණේ  තිබුණේ රවුද්‍ර බවකි .


මා  පුදුමයෙනුත් පුදුමයට  පත් කරමින්  ඔහු මගේ අතට අත දුන්නේය .


" You are a master teacher ?"


"No.I am just an ordinary  teacher"


Mr. Karunarathna is a master teacher? 


Yes


(කරුණාරත්න  යනු කලින් පැමිණි දින  ඔවුන්ට අතර  මගදී මුණගැසී  ප්‍රශ්න  කරනු ලැබූ  ගුරු උපදේශකයෙකි.)


 "You are an English teacher?" ඔහු ඇසුවේය 


"Yes I am' යයි  මා  පිළිතුරු දුන්නෙමි .


" Okay .Let's sit and talk "


හමුදා  නිලධාරියා කතා  කළේ තරමක් කැඩුණු ඉංග්‍රීසියෙනි . ඔහුට අවශ්‍ය වුවේ අනිකුත්  භටයන්ට ඔහු ඉංග්‍රීසි දන්නා  බව  පෙන්වීමට  බව  මොහොතකින් මට වැටහින . ඒ  බව  නොහඟවා    ඔහුගේ  ගරුත්වය රැක දීමට ඉංග්‍රීසි බසින්ම  පිළිතුරු දුනිමි.


හමුදා  නිලධාරියා අසලින් මා වාඩිවූ පසු  ඔහු ඉංග්‍රීසියෙන්  සිංහලට  මාරුවිය .


" දේශපාලනේ  කරනවද?"


"මෑතක් වෙනකම්ම කොමියුනිස්ට් පක්ෂේ  වැඩ  කළා. මේ දවස්වල ටිකක් වැඩ නවත්තල  ඉන්නේ"


" ඒ මොකද?"


" කොමියුනිස්ට් පක්ෂේ  මිනිස්සුන්ව  JVP කාරයෝ මරනවනේ .ඒ  නිසා පරිස්සම් වෙන්න  ඕන නිසා ටිකක් නිශ්ශබ්දව ඉන්නේ  ." මා  කීවෙමි .


" එදා  අපි එනකොට  ඔයා  හිටියේ නැහැ. කොහෙද  හිටියේ.?"


"ළඟ   පාත  අපේ ඉඩමක්  තියෙනවා .මාසෙකට  කළින්  ඒ ඉඩමේ  රබර් පැල  හිටවනකොට අල්ලපු ඉඩමේ  මිනිහා මායිමකට අරියාදු  කළා .රබර්  පැල රැට ගලවල දානව  කියල මිනිහ  තර්ජනය  කළා. ඒ නිසා  මං අඳුර වැටුනම  ඉඩමට ගිහිල්ල  පැය  තුන  හතරක්  කරුවලේ වාඩි වෙලා  ඉන්නවා.රබර්  පැල  ගලවනවද  බලන්න . එදාත් මං ඉඩමට වෙලා  හිටියේ ."


" කොහෙද ඔය  ඉඩම  තියෙන්නේ ?" නිලධාරියා  නැගිටිමින් ඇසුවේය.


"මේ  පාර දිගේ ආපහු යනකොට  පාලමක්  හම්බ වෙනවා .ඒ පාලම පහු වෙනකොටම දකුණු පැත්තේ  තියෙන  ඉඩම ."


ඇත්ත වශයෙන්ම  මා  ඉඩම සම්බන්ධයෙන්  කි කතාව ඇත්තය . මසකට  පමණ පෙර  එහි රබර්  පැල සිටවන  විට  යාබද  ඉඩම් අයිතිකරු මා සමග  පුංචි පහේ ආරවුලකට ආ   අතර මායිමේ තිබෙන  රබර් පැල  ගලවන  බවට තර්ජනයක් ද කළේය. සත්‍යය සමග බොරුව මිශ්‍ර කොට      හමුදා  නිලධාරියාට මා කිවේ  කලින් දිනයේ    පැන දිව්  බව වසන් කරන්නට  තිබු හොඳම  මග එය වූ නිසාය .


දොර වසාගෙන  නිදා  ගන්නා  ලෙස  කිව්  හමුදා  නිලධාරියා අනෙකුත්  භටයන් සමග යන්නට  ගියේය.


තවත්  මර  උගුලකින්  ගැලවීම ගැන  මහත් සැනසීමක්  ලැබිණ .එහෙත් එය වැඩි  කල්  පැවතුනේ  නැත. ඉන් දින  කීපයකට පසු රාත්‍රී 12 ට  පමණ  ජවිපෙ  තුවක්කු කරුවෝ මගේ  නිවසට ආහ .


( ඒ පිලිබඳ විස්තර  මී  ළඟ  ලිපියේ  පළකෙරේ.)

පි. බර්ටි රණවීරගේ 

ගමගැන 

ගම 

අඩු වයසෙන් වැඩි වියට පැමිණි ක්‍රොයේෂියානු කෙල්ල

 පාපන්දු ක්‍රීඩාව  ගැන උනන්දුවක් දක්වන ලාංකිකයන්  බහුතරයක්  ලෝක  පාපන්දු තරඟාවලියෙන් ක්‍රොයේෂියාවේ ජයග්‍රහණය ප්‍රාර්ථනා  කළේ  මන්දැයි...