Wednesday, July 19, 2017

විජේදාස රාජපක්ෂ හෙවත් ඥානසාර බොඩිගාඩ්






මට විජේදාස  රාජපක්ෂ  මහතා  මුලින් හමුවුයේ  2001 වසරේ දීය . 2000 වසරේ  බලයට  පැමිණි රනිල් වික්‍රමසිංහ ආණ්ඩුව අධ්‍යාපන ශේෂ්ත්‍රයට අයත් දහස්  ගණනකට හිමිව තිබු උසස් වීම් අත් හිටුවීම  නිසා අධිකරණ නියෝගයක්  මගින් එම  උසස්වීම් ලබාගැනීමේ අරමුණෙන්  නඩුවක්  පවරන  ලෙස  ඔහුගෙන් ඉල්ලා සිටීමට  තවත්  ගුරු  පිරිසක් සමග  ඔහු හමුවීමට  ගියෙමි . දහස්  ගණනක් වෙනුවෙන්  පැවරු එම  නඩුවේ  පළමු  පෙත්සම් කරු වුයේ  මමය . එහෙත් එම  නඩුව දිනවා  දීමට විජේදාස  රාජපක්ෂ  මහතාට  නොහැකි විය .   නඩුව  විභාග  කිරීමට  පැමිණි අග්‍ර විනිශ්චයකාර සරත් නන්ද  සිල්වා  හිතුවක්කාර  ලෙස එම  නඩුව ඇසීම  ප්‍රතික්ෂේප  කොට පෙත්සම් කරුවන්ගේ මානව අයිතීන් උල්ලංඝනය වී  තිබේදැයි  සොයා  බලන  ලෙස  මානව  අයිතිවාසිකම  කොමිසමට එය  යොමු කරන ලෙස නියෝග  කළේය 


මානව අයිතිවාසිකම් කොමිසමට  ගොස්   සෙතක් නොවෙනු ඇතැයි  බොහෝ අයගේ  කල්පනාව  වුයෙන්  වෙනත් පොයින්ට් එකක් අල්ලාගෙන යලිත්  ශ්‍රේෂ්ඨාධිකරණයේ නඩුවක්  පැවරීමට,  උසස් වීම් අහිමි කරන  ලද  ගුරුවරු සහ විදුහල්පතිවරු  දහස්  ගණනක්  සමග  පැවැත්වූ  හමුවකදී කතා  බස්  කොට  ගත් අප,   සම සමාජ  පක්ෂයේ  නායකයෙකුවූ   චන්ද්‍රිකා ආණ්ඩුවේ අධිකරණ ඇමති ලෙස  කටයුතු  කළ  බැටි වීරකෝන් මහතා  හමුවීමට  ගියෙමු . නඩුව  පැවරිය  යුතු  පොයින්ට් එක  හෙවත් නඩු නිමිත්ත අපි බැටීට දුන්නෙමු. ඔහු නඩුව  භාරගත්තේය  ඔහු නඩුවට  කතා  කළේය . ඔහු නඩුව  දිනවා දුන්නේය. පීඩාවට  පත් දහස්  ගණනක්  ගුරුවරුන්ට සහ විදුහල්පතිවරුන්ට  සහන  හිමිවුයේය.


මගේ  මිත්‍රයෙකු වූ කොමියුනිස්ට්  පක්ෂයේ  නායකයෙකු ද .ලේඛකයෙකු වුද , මුල්පෙළේ  දේශපාලන  කථිකයෙකු වුද   වජිර  පැල්පිට සහෝදරයාට දිනක් මේ  පිළිබඳව  මා  කීවිට  ඔහු කිවේ  "පියරු බබ්බුන්ට පුලුවන්ද  සුප්‍රීම් කෝට් එකේ නඩු  කතා  කරන්න ? "  කියාය.



ඔහු පියරු බබා  ලෙස  හැඳින්වුයේ  මේ  ලිපිය  ලියන්නට පාදක වූ  විජේදාස  රාජපක්ෂ මහතාය.  අග්‍ර  විනිශ්චයකරුවූ  සරත් නන්ද ද සිල්වා  විජේදාස  රාජපක්ෂ  මහතා  ඉදිරිපත් කළ  කරුණු  තුට්ටුවකටවත්  ගණන් නොගත්තේ   නඩුවට ඉදිරිපත් කළ  කරුණුවල  අඩු ලුහුඬුකම්   නිසා   නොව ඔහු  පියරු බබෙක් ලෙස  සැලකීම නිසා   විය  හැකිය. සරත් නන්ද සිල්වාගේ  නඩු ඇසිල්ල කැකිල්ලේ නඩු ඇසිල්ලට  බොහෝ දුරට සමාන වූ  බව ඔහුගේ   කැරැට්ටුව දන්නා  අයට අමුතුවෙන් කියන්නට  උවමනා  නැත. HELPING HAMBANTHOTA නඩුවේදී  තමන් දුන් තීන්දුව වැරදි බවට  පසු  කාලයේ  වැමෑරුවේද  ඔහුමය .




ඉතින් අපි දැන් අපේ  කතාවට  බසිමු .




 විජේදාස  රාජපක්ෂ ඇමතිවරයා මේ  ආණ්ඩුවේ අධිකරණ ඇමතිවරයා  ලෙස  පත්වීමට පෙර  හොඳ  නමක්  දිනාගෙන  සිටි නමුත්  මේ වන විට බොහෝ දෙනෙකු ඔහු පිළිබඳව  බලවත් ලෙස  කලකිරීමට  පත්ව  සිටිති  . චන්ද්‍රිකා බණ්ඩාරනායක විසින්  ජාතික  ලැයිස්තුවෙන්  මන්ත්‍රී  තනතුරකට  පත්  කරනු  ලැබූ ඔහු   මහින්ද  බලයට  පත් වීමෙන් පසු ඔහු යටතේ  ඇමති තනතුරක්ද ලැබීය   පසුව ඉන් ඉවත් වූ අතර  ශ්‍රීලනිපයේ  මහරගම  සංවිධායක  තනතුරෙන්ද  ඉවත් විය. මන්ත්‍රී ධුරයේ  දිගටම රැඳී සිටිමින්     කෝප් කමිටුවේ සභාපති  ලෙසද කාලයක් කටයුතු  කළ ඔහු 2009 වසරේ    එක්සත්  ජාතික  පක්ෂයට එකතු වුයේ මහින්දගේ ප්‍රතිපත්තිවලට  එකඟ  නොවෙන  බැවින්  යැයි බොහෝ අය සිතුවාට සැකයක් නැත.  මහින්දගේ  ජනප්‍රියම සමය වූ 2009-10  කාලයේ  මහින්ද දමා අවුත් එක්සත්  ජාතික  පක්ෂයට එකතු වීම නිසා ඔහුට  තිබු ගවුරවය  තව දුරටත්  ඉහල ගියේය 





නීතිඥ සංගමයේ  සභාපති  ලෙස පසු  කලෙක ඔහු  පත් කර  ගනු ලැබුවේද  අයුක්තියට එරෙහිව සටන්  කරන  පුද්ගලයෙකු  ලෙස  කීර්තියක් අත්  ගෙන සිටි නිසාය .  ශිරානි බණ්ඩාරනායක  මහත්මිය අග විනිසුරු ධුරයෙන් ඉවත් කිරීමට එරෙහිව විජේදාස  රාජපක්ෂ  මහතා ප්‍රබල වැඩ  කොටසක්  ඉටු කළ  බැවින් ඔහුගේ  කීර්තිය  තව දුරටත් වර්ධනය  වුයේය.

  රාජපක්ෂ  රෙජීමය  ඔහු  බියගැන්වීම සඳහා  ඔහුගේ  නිවසේ   ඉදිරිපස දී 2012 දෙසැම්බර  මස එක  රාත්‍රියකදී   වෙඩි දෙකක්  තැබූ අතර  එම සිද්ධියෙන්  අපගේ වීරයා  බියගුල්ලා වී    ඉන් පසු  එළඹී  නීතිඥ සංගමයේ නිලවරණයේ දී  එහි සභාපති  තනතුරට   ඉදිරිපත්  වුයේ  නැත .එකල නීතිඥ සංගමය  රාජපක්ෂ  රෙජීමයේ දුෂ්ට ක්‍රියාවන්ට  එරෙහිව  ප්‍රබල වැඩ  කොටසක් කරමින් සිටියේය..



    එහෙත් 2015  ජනාධිපතිවරණයේදී  මෛත්‍රී වෙනුවෙන්  ඔහු  කැපී  පෙනෙන වැඩ  කොටසක්  ඉටු කළේය. මෛත්රිගේ ජයග්‍රහණයට  ඔහු දුන් දායකත්වය සුළු පටු නැත . ජයග්‍රහණයෙන් පසු  එළඹී   2015 මහමැතිවරණයෙන්  පසු අධිකරණ  ඇමති  තනතුරත්  බුද්ධ  ශාසන ඇමති  ධුරයත්  ලැබූ  ඔහු  අයුක්තියට එරෙහිව  කඟ වේනෙකු  මෙන්  වැඩ  කරනු ඇති  කවුරුත්  පාහේ  බලාපොරොත්තු වුහ .



ඇමති තනතුර  ලැබීමෙන්  පසු ඔහුගේ අපේක්ෂාවන් වෙනස්වූ  බව ඉන්පසු  ඔහුගේ  කල්කිරියාවෙන්  පෙනී යයි .උසාවි  යන  කාලයේ හොඳ  හැටි  හරි හම්බ  කර  ගත් ඔහු , අධිකරණ ඇමතිකම  ලැබීමෙන් පසු තව දුරටත්  උසාවි  ගොස්  ගොස්  මුදල් සොයාගත  නොහැක . ඇමතිවරයෙකු ලෙස  ඉහල වැටුපක් සහ දීමනා රාශියක් ලැබුවද  ඉහල ජීවිතයකට  හුරුවී  සිටින  ඔහුට එය  ප්‍රමාණවත් වන්නේ  නැත .එබැවින් වෙනත් මාර්ග වලින් රන්  කාසි  හොයන්නට  ඔහු  සිතුවේද? 



විජේදාස  රාජපක්ෂ වීරයා දියවී  යන්නට  පටන්   පටන්ගත්තේ ඇවන්ගාඩ් යටිමඩි ගැහිල්ල හෙළි වීමත් සමගය  . ඇවන්ඩ්ගා සමාගමට එරෙහිව  අපරාධමය (CRIMINAL) නඩුවක් නොමැති බවට  නීතිපතිවරයා  කියා තිබෙන  බවට විජේදාස  ඇමතිවරයා  කීප වරක්  කියා සිටි නමුත් ඇත්ත  කතාව  නම් ඇවන්ගාඩ් ලොක්කා වන  නිස්සංක සේනාධිපති ට සහ  ගෝඨාභය රාජපක්ෂට එරෙහිව  නඩු  පැවරීමට කරුණු  තිබෙන  බවට නීතිපති  දෙපාර්තමේන්තුව ඔහුට දන්වා  තිබීමය .


ඇවන්ගාඩ් සමාගමේ සභාපති   නිස්සංක  සේනාධිපති සහ  තමා  අතර  පුද්ගලික සමබන්ධකම්  නොමැති බවට ඇමතිවරයා  කිව්  නමුත් එය  බොරුවක්  බව  තහවුරු  කරමින් ෆීල්ඩ් මාර්ෂල් සරත් ෆොන්සේකා  මහතා පින්තුර විසි  ගණනක් මාධ්‍යයට  ලබා දුන්නේය .ඒවා විජේදාස  සහ  නිස්සංක  තම  පවුල්වල සාමාජිකයන් සමග  2006 දී ඇමරිකාවේ  කළ සංචාරයක  පින්තුර විය . සේනාධිපතිගෙන්  අල්ලස්  ලබා ගෙන ඇවන්ගාඩ් සිද්ධිය  යටගැසීමට  විජේදාස  කටයුතු  කරන  බවට  සරත් ෆොන්සේකා  ඇමතිවරයා  චෝදනා  කළ අතර එය  බොරුවක්  බව  කියමින්  අපහාසයට  වන්දි ඉල්ලා  නඩුවක් දමන බව  විජේදාස  මහතා  කීවද එවැනි නඩුවක් දැමු බවට දැනගන්නට  නොමැත.











විජේදාස  සිටින්නේ  ඔහු බලයට  පත්  කළ  මිනිස්සුන් ගේ  පැත්තේ  නොව  සතුරන්ගේ  පැත්තේ  බව   හෙළිවන්නට  වූ විට ඔහු සමග සිටි  යුක්තිගරුක  මිනිසුන්  ඔහු අත්හැර  ගියහ . දිගින් දිගටම  වාසි සහගත  දේශපාලනයේ  රැඳී සිටීමට නව  බලවේග සොයාගත  යුතුය .    සිංහල අන්තවාදීන් සමග හිට  ගැනීමට  තීරණය  කළ  ඔහු   ගෝටාගේ නිෂ්පාදනයක් වන  ඥානසාර  නිකාය හමුවීමට ගියේය. නීතිය  ගරු නොකරන, උසාවියට  කඩා පැන එහි කටයුතු  කඩා  කප්පල්  කරන  ප්‍රසිද්ධ  මැරයෙකු  සමග  කිසිම ශිෂ්ට රටක අධිකරණ  ඇමතිවරයෙක්  ඇසුරු කරනවා  තබා පැත්ත පළාතකටවත්  ඒමට  ඉඩ දෙන්නේ  නැත . එහෙත් විජේදාස  මහතාට  ඥානසාර නමැති   කහ මැරයා පෙනුනේ  තමන්ගේ  ගැලවුම් කාරයෙකු ලෙසය .


අලුත් මිතුරන් සොයා  යන  ගමනේදී  විජේදාස  මඩකලපුවේ  මංගලාරාමයටද  ගොඩ විය .එහි විහාරාධිපතිවන අම්පිටියේ සුමනරතන  හිමි මඩකලපුව  ගිනි තැබීමට උත්හසා  කළ  මැරයෙකි. එම  පන්සලේ උත්සවයකට  ජනාධිපති  මෛත්‍රීපාල  මහතාට ආරාධනා  කළද ඔහු   සහභාගී  නොවීම නිසා  වියරුවට  පත්ව  ජනාධිපති නමින් සකස්  කර තිබු ඵලකය  කඩා  බිඳ දැමු අවිනීත සිවුරු කාරයෙකි   . පන්සලට අයත් නොවන  ඉඩමක්  බලහත්කාරයෙන් අල්ලා  ගන්නට  ඔහු තැත්  කළ විට එයට   විරුද්ධවූ  ග්‍රාමසේවක  නිලධාරියාට  තිත්ත  කුණුහරුපයෙන්  බැන වැදී  "තෝ කොටියා.තෝ දකින විට  මගේ  ලේ  උනුවෙනවා  කියමින්  මහපාරේ  යකා  නැටු මැර  භික්ෂුවකි  දෙමල  මිනිසුන් ඔහුට  පහර දුන්නේ  නම්  මඩකලපුව  පමණක් නොව  බොහෝ ප්‍රදේශවල ද  ජාතිවාදී  කලකෝලාහල  ඇතිවිය  හැකිව  තිබිණ. මෙම සිවුරු  කාරයාට එරෙහිව  නීතිමය  කටයුතු  කරන  ලෙස  දෙමල  මිනිසුන්ද  මුස්ලිම් මිනිසුන්ද    ආණ්ඩුවෙන්  ඉල්ලා   සිටියහ . එහෙත් සිදුවුයේ එය නොවේ . විජේදාස  රාජපක්ෂ  මහතා ඥානසාර සමග  මංගලාරාමයට  ගොස් අම්පිටියේ  සුමනට වන්දනාමාන  කොට  මැර  භික්ෂුවගේ  ආරක්ෂාව වෙනුවෙන් පෙනී සිටීමය  .




තමන්ගේ  ඇමති ජොබ් එකට අදාළ දේ කිරීම  පැත්තක  තබා  පන්සල්වල  හාමුදුරුවරුන් තෘප්තිමත් කිරීම සඳහා ඕනෑම දෙකට සුදානම් වී සිටින විජේදාස  මහතා  ගිය  අවුරුද්දේ දවසක  පන්සලකට  ගොස්   කටින සිවුරු මැසුවේය  බුද්ධ  ශාසන  ඇමති වුවද  භික්ෂු  කතිකාවතක්  හදා  නීතිගත  කරවා  ගැනීමටවත්  ඔහුට  කොන්දක්  තිබුනේ  නැත .සිවුරු දාගත්  කට්ටඩියන්ගේ විරෝධය  හමුවේ  හීන්දාඩිය දැමු විජේදාස  මහතා  කෙටුම්පත්  කොට  තිබු  භික්ෂු කතිකාවත  කුණු කුඩයට  විසි කළේය  .



ගිය  ආණ්ඩු  කාලයේ දී   කෝටි  දස  දහස්  ගණනින් පිල්ලි ගැසූ මෝරුන්  අධිකරණය  හමුවට  ඉදිරිපත්  කිරීමට නොහැකි වුයේ  විජේදාස  මහතා  කළ බාධා  කිරීම් නිසා  යැයි සමාජයේ  බලවත් විශ්වාසයක්  පවතී. .ඩීල් දාස  යයි  පුරවැසියන් ඔහුට   නමක් පට බැන්දේ ද ඒ  නිසාය.



විමල් වීරවංශ  පන්නයේ  මිනිහෙක් බවට  ඔහු වේගයෙන්  පරිවර්තනය  වෙමින් සිටින  බව  පසු ගිය  සතියේ ලංකාවට  පැමිණි  එක්සත්  ජාතීන්ගේ සංවිධානයේ  විශේෂ  නියෝජිත  බෙන් එමර්සන්  මහතා  සමග කලබැගෑනියක්  හදාගෙන  මාධ්‍ය වලට එය  ලීක් කිරීමෙන් පෙනේ . ඔහු ලංකාවට  පැමිණ  දින  හතරක්  තිස්සේ  අගමැති සහ  ජනාධිපති ලේකම් සමගද  ආරක්ෂක අංශවල  ප්‍රධානීන්ද,  අගවිනිසුරු ඇතුළු නීති ශේෂ්ත්‍රයේ  නිලධාරින්ද , වෙනත් ඉහල මට්ටමේ  නිලධාරින්ද , ත්‍රස්තවාදය වැලක්වීම්  පනත  යටතේ  සිරගෙවල්වල  රඳවා  තබාගෙන  සිටින සිරකරුවන්ද  මුණගැසුණේය . ඉන්පසු ඔහු මාධ්‍ය සාකච්ඡාවක්  පැවැත්වූ අතර   හමුදා  විසින්හෝ   පොලිසි  විසින්  අත් අඩංගුවට ගනු  ලැබුවන්ට  එල්ලවී  තිබෙන  භයානක අනතුරු  පිළිබඳ  අතිශයින්  වැදගත්  කරුණු  රැසක් හෙළි කළද  සිංහල මාධ්‍යයෙන් පළවන පුවත්පත් සහ රුපවාහිනි සේවා එම  කරුණු  පිළිබඳව  යොමු කළේ ඉතා අඩු අවධානයකි  .



අත්අඩංගුවට  ගනු  ලැබුවන්ට  වධ හිංසා  පමුණුවන  ලෝකයේ නරකම රටවලින් එකක් බවට ලංකාව  පත්ව ඇති  බව   ඔහු  කියා  සිටි අතර ජාතින් අතර සහජීවනය සඳහා වන වැඩ  පිළිවෙල  මුළුමනින්ම වාගේ  නැවතී  තිබෙන  බව  කීවේය.  ලංකා ආණ්ඩුව  එක්සත් ජාතීන්ගේ  මානව  හිමිකම් කවුන්සලය  රවටන  බවත් මේ  තත්වය  තමා එම  කවුන්සලයට වාර්තා  කරන බවත් ඔහු වැඩි දුරටත්  කියා සිටියේය.




අත්අඩංගුවට ගනු ලැබූ අයට වධ   හිංසා  කිරීම ඉඳ හිට සිදුවන දෙයක් නොව  සාමාන්‍ය දෙයක් බවට  පත්ව  තිබෙන බව  ඔහු  මාධ්‍ය සාකච්චාවේදී කීය .  නියපොතු ඇතුලට  ඉඳිකටු වලින්  විදීම , නියපොතු  ගැලවීම , මහපොට ඇඟිලිවලින් පැය  ගණන් එල්ලා තැබීම , පොලුවලින්  පහර දීම භූමිතෙල් වලින් පෙඟවූ ආවරණ  හිස සහ මුහුණ වසා  හුස්ම  හිර  කිරීම , දරාගැනීමට  නොහැකි ඉරියව්වලින් සිරකරුවන් තැබීම , ජලය යොදාගෙන වධ හිංසා  පැමිණවීම, ලිංගේන්ද්‍රියන්ට  හානි   කිරීම  ආදී කෘර වධ  හිංසා,  ත්‍රස්තවාදය වැළක්වීමේ  පනත  යටතේ අත් අඩංගුවට  ගනු ලැබූ අයට  පමුණුවා   තිබෙන  බව  තහවුරු වූ  බව  බෙන් එමර්සන්  මහතා කියා සිටියේය. එය  මෙම ආණ්ඩු සමයේද සිදුවී  තිබෙන බව  ඔහු  තව දුරටත්  කිවේය.




බෙන් එමර්සන්  මහතා  දන්නේ ත්‍රස්තවාදය වැළකීමේ පණත  යටතේ අත් අඩංගුවට  ගත් අය  සම්බන්ධයෙන් පමණි. සාමාන්‍ය  නීතිය  යටතේ   අත්අඩංගුවට  ගනු ලබන  පුංචි මිනිසුන්ට  පොලිසි විසින් දෙනු ලබන වධ  හිංසා ද ඊට දෙවෙනි  නැති බව ඔහු දන්නේ  නැත  .  1971 කැරැල්ලේදී  මෙන්ම 88-89  කැරැල්ලේදී ද  අල්ලාගත්  තරුණ තරුණියන්  දස දහස්  ගණනක්    හමුදා සහ  පොලිසියේ   බිහිසුණු  වධ බන්ධනයන්ට  මුහුණ දුන්හ . බහුතරය වද විඳිමින්  මිය ගියහ .  


 ත්‍රස්තවාදය වැළක්වීමේ  පනත  බලපාන්නේ  දෙමළුන්ට  පමණක් නොවේ . එම  පනත  යටතේ අත් අඩංගුවට ගනු ලබන   මුස්ලිම් ජාතිකයනට මෙන්ම  සිංහලයන්ටද     දහසකුත් එකක් වධ  හිංසාවන් පමුණුවන්නට  එමගින්  හොර  ලයිසන් ලබා දී  තිබේ.  එබැවින් අන්තර්ජාතික  නීතියට අනුකුලව  ත්‍රස්තවාදය වැළක්වීමේ  නව  නීති  පනවන  ලෙස එක්සත්  ජාතීන්ගේ සංවිධානය ආණ්ඩුවට  කියා තිබුණු අතර  ආණ්ඩුව එයට එකඟ වී  නව  පනතක්  සකස්  කළේය . නමුත් එම  පණත  මගින්ද  සැක  කරුවනට වධ හිංසා  පැමිණ වීම සඳහා  ඉඩ  කඩ සලසා  තිබෙන  බව  බෙන් එමර්සන් මහතා  හෙළි කළේය  .



විජේදාස  රාජපක්ෂ  මහතා සමග  ගැටුමක් ඇති  කරගත්තේදැයි බෙන් එමර්සන් මහතාගෙන් මාධ්‍යවේදියෙකු  ප්‍රශ්න  කළ  විට  පුද්ගලික සාකච්චා  පිළිබඳව  කරුණු හෙළි කිරීම  තමන්ගේ  ප්‍රතිපත්තිය  නොවෙන  බව  ඔහු කිවේය . එසේ  නම්  මාධ්‍යවේදීන්  මේ  පිළිබඳව  කල් ඇතුව දැන  සිටියේ  කෙසේද? එම මාධ්‍ය සාකච්ඡාව  පැවැත්වීමට  පෙර දිනයේද මෙම  ගැටුම  ගැන පුවත්පතක  පලවී  තිබිණ . වීරයෙක් වීමට ක්‍රම විධි  සොයමින් සිටින විජේදාස ඇමතිවරයා විසින්ම එය මාධ්‍යයට  හොර රහසේම  ලබා දී ඇති බවට අනුමාන  කිරීම සාධාරණය .

   අත් අඩංගුවට  ගනු  ලැබුවන්   ලබා දෙන  කට උත්තර සාක්ෂියක්  ලෙස  පිළිගත  යුතු බවට නව  පණත  යටතේද   ප්‍රතිපාදන සලසා ඇති බැවින්   එය ඉවත්  කළ යුතු බව  බෙන් එමර්සන් මහතා   විජේදාස  රාජපක්ෂ  මහතාට    කී  විට ඔබේ  රට  වන එංගලන්තයේද මේ  නිතිය  තිබෙන  බව  කියමින් ඔහුගේ මුනට  කඩා පැන්නේය  එසේ  මුනට  කඩා  පැන්න  බව අපි දන්නේ  ඔහු  මාධ්‍යයට   ඒ බව කිව් නිසාය . බෙන් එමර්සන් මහතාගේ හැසිරීම හොඳ  නැති බවට  ජනාධිපතිට  පැමිණලි කරන  බවද  ඔහු තව දුරටත්  කියා  තිබුනේය 

 විජේදාස  මහතාගේ    පෙරකදෝරු  තර්කය එහෙම  පිටින්ම  හාස්‍ය  ජනකය. බෙන් එමර්සන් මහතා  මෙහි ආවේ  එංගලන්ත  ආණ්ඩුවේ  නියෝජිතකු  ලෙස  නොව එක්සත්  ජාතීන්ගේ සංවිධානයේ  විශේෂ  නියෝජිතයෙකු ලෙසය. එවැනි තර්ක  දමා  සුප්‍රීම් උසාවියේ    තබා  සාම  මණ්ඩලයක  පවත්වන නඩු  විභාගයකදීවත් වාසියක් ලබා  ගත  නොහැක . විජේදාස  මහතාගේ මේ  නැටුම පැහැදිලිවම අන් යමකට  නොවේ. ඥානසාර  ගැලරිය  පිනවීමටය .


බොදු බල සේනාව, රාවන බලය වැනි සංවිධාන  අබවුද්ධ  ආගමික මධ්‍යස්ථාන සීයකට අධික සංඛ්‍යාවකට  පහර දී තිබෙන  බවට  නීතිඥ  ලක්ෂාන්  ඩයස්  මහතා  ප්‍රකාශ කිරීම  නිසා අධික ලෙස  කෝපයට  පත් විජේදාස  මහතා   ඔහුගේ නීතිඥ  පට්ටම  ගලවා  ගෙදර  යවන  බවට  වහසි බස් දොඩා ද වැඩි දවසක්  නොමැත . එහි අරමුණ වුයේද  ගැලරිය  පිනවා  ඔවුන් අතර වීරයෙකු වීමටය.


විජේදාස  මහතා මේ කරන්නේ  අධිකරණ ඇමතිවරයාගේ  ජොබ් එක නොවේ. විමල් වීරවංසගේ ජොබ් එකය.  සිංහල අසිංහල භේදයකින් තොරව  සියලුම  ලාංකිකයනට  යුක්තිය ඉටුවන අධිකරණයක් නීති පද්ධතියක් වෙනුවෙන් පෙනී සිටීම අධිකරණ ඇමතිගේ රාජකාරිය  වුවද  විජේදාස  මහතා  දැන් බැස තිබෙන්නේ  විමල් වීරවංස කෙනෙක් වී ඉදිරි දේශපාලන  ගමන  යන්නටය . ප්‍රාඥයා   කියා චන්ද  කාලයේ  පෝස්ටර්  ගස්සවා  ගත්   විජේදාස  මහතා  රටේ  තිබෙන අන්තිම  තුප්පහි  බලවේග  සමග ගමන් කරන්නේ සිය     අනාගත දේශපාලන  බලාපොරොත්තු  සාක්ෂාත්  කර ගැනීමේ  වාහකය ලෙස  එම  බලවේග    යොදා  ගැනීම  ඔහුගේ ව්‍යාපෘතිය වී  තිබෙන  නිසාය .



වීරවංශ  පාරේ  යන  විජේදාස  මහතා තවමත්  නොකළේ එකක් විතරය . එනම්    එක්සත් ජාතීන්ගේ සංවිධානයේ  කාර්යාලය  ඉදිරිපිට  උපවාසයක්  පමණි .මහා මැතිවරණයක් ආසන්නයේ දිනක  ඔහු එවැන්නක්ද  නොකරනු ඇතැයි සිතීමට  දැන් නම් හේතු නැත .

  

Tuesday, July 11, 2017

ජේ ආර් ගෙන් අස්ගිරියට ඊ මේල් පණිවිඩයක්







ජේ  ආර්  ජයවර්ධන  මහතා  ඊයේ  රාත්‍රී  ජාමයේ  මට  ඊමේල් එකක් ඒවා  තිබුනේය 


ඊමේලය මෙසේය .

jrj@mattala.com 


     මා  දැන් පදිංචිව  ඉන්නේ මත්තල එයාපෝර්ට් එකේය . එහි සිටින්නේ මා  පමණක් නොවේ. අපවත්වූ  අස්ගිරි, මල්වතු , රාමඥ්ඥ, අමරපුර නිකායවල  සමහර  මහා  නායකවරුද ,   ආර්. ප්‍රේමදාස  , සිරිමා  බණ්ඩාරනායක ද  විජේවීර සහ  ප්‍රභාකරන්ද එහි පදිංචිව  සිටිති  . අප  එහි  පදිංචියට  තෝරා  ගත්තේ  මනුෂ්‍යයන්  නොගැවසෙන  බැවින්ය  .අපට  නිදහසේ  ගත  කිරීමට  සුවපහසු  තැනක් ඉදි  කර දීම  ගැන අප  සියලු දෙනාගේ කුරුතඥතාවය රාජපක්ෂ  මහතාට ගිය සතියේ  ඊ මේල් පණිවිඩයකින් දැනුම් දුන් බවද  සඳහන් කොරන්නට  කැමතියි. .


මා මේ ඊමේල් එක  එවන්නේ එම  කාරණාව  කියන්නටම නොවේ. මා මේ දවස්වල  ඉන්නේ  බලවත්  චිත්තපිරීතයෙන්  බව  දැනුම් දීමටය  . සතියකට  හමාරකට   පෙර රැස්වූ අස්ගිරියේ  මල්වත්තේ  සහ අනෙකුත් නායක උන්නාන්සේලා  විසින්  රැස්වී  මා හැදු වියවස්තාව අබ  මල් රේණුවක් හෝ  වෙනස්  නොකරන  ලෙස  ආණ්ඩුවට  කීම  ගැන  ඒ වහන්සේලාට  ඉස්තුති  කිරීමටය .  නායක වහන්සේලාට  නවීන දේවල්  නොතේරෙන  බැවින්  ඊ මේල් මගින්  මගේ ඉස්තුතිය උන්නන්සේලාට  යවන්නට කොරමයක් නැත මා  කල්පනා  කොලේ මගේ  කුරුතඥ තාවය  ඔබ  මගින්  යවන්නටය . ඒ  නිසා   මගේ  ඉහලම  කුරුතඥාතාවය   උන්නාන්සේලාට දන්වා  යවන    ලෙස ඔබෙන්    කරුණාවෙන්  ඉල්ලා  සිටිමි   

රටක්  හරියට  කොරන්නට  නම් මගේ වියවස්තාව  නැතිවම  බැරි බව දැන්  දැන්  කවුරු  කවුරුත්  වටහා  ගෙන  ඇති  බව  හොඳින්ම  පෙනේ.  ගැටඹේ  පන්සලට  මා  කටුකම්බි ගැසුවේ  ඔය වියවස්තාව    නිසාය . 1980- ජුලි වැඩවර්ජකයන් 40000 ක් ගෙදර  යැව්වේ  ඔය වියවස්තව  නිසාය  83 කළු ජුලිය  මෙහෙයවූ මගේ  මිනිසුන්ට අබ  ඇටයක  හානියක්වත්  නොකර  ඔවුන් මා  ආරක්ෂා  කොරේ  ඔය වියවස්තාවේ  බලය  නිසාය. .ඉන්දියානු  හමුදාව ගෙන්නුවෙත් පළාත් සභා  හැදුවෙත් මගේ මේ වියවස්තවේ  ආනුභාවයට  පින්සිද්ද වෙන්නටය . එක්සත්  ජාතික  පක්ෂයේ සියලුම  මන්තිවරුන්ගේ  ඉල්ලා අස්වීමේ  ලියුම්  මා  ඉල්ලුවිට ටකස්  ගා ඒවා  දුන්නේ  මගේ වියවස්තාවේ  බලසම්පන්න  කම නිසාය  .





කොටින්ම කොටි සංවිධානය  හැදුවෙත් මගේ වියවස්තාවය  .එය නැති  කළේත්  මගේ විය්වස්තාවය 




වියවස්තාව  වෙනස්  කොරන්නට  කියා  බලයට  පැමිණි  සියලුම  ජනාධිපතිවරු එය  දිගටම  තබා  ගත්තේ එය  සුපිරි වියවස්තාවක්  නිසාය. කොටින්ම  කියතොත් ඇමරිකාවේ  ජනාධිපතිටවත්  ඔච්චර  බලගතු එකක් නොමැති  කළ එය  අයින් කොරන්නට  කැමති වන්නේ  කොයි  ජනාධිපතිද?





මෛත්‍රී  උන්නැහ මගේ වියවස්තාව  හරියට  ක්‍රියාත්මක  කොරනවානම් ඔය එකෙක්වත්  කට  හොල්ලන්නෙ  නැත . මල්වත්ත  දෙකඩ  කඩන  බව මහින්ද  කීවේ  මගේ වියවස්තවේ  හය්ය නිසාය   සිරිසේනට  තියෙන්නේත්  මල්වත්තේ  අස්ගිරියේ  උන්නාන්සේලා  මුණගැහෙන්නට  නොව  අස්ගිරි නිකාය දෙකට  කඩනවා  කියා  කියන්නට  විතරය  .පිං කැට සීල්  තිබ්බා   කියා  හොටු  හුරන අයට ලේන්සු  දීලා  රට  කොරන්නට  බැරිය 



එබැවින් මගේ වියවස්තාව  දිගට  ගෙනයාමට  කැමැත්තෙන් සිටින   නායක වහන්සේලාටත් ශ්‍රී ලංකා එකේ මන්ත්‍රීවරුන්ටත් ජාතික  හෙළ උරුමයේ  ඕමල්පේ  වහන්සේටත් , චම්පිකටත්  අතුරලියේ රතන වහන්සේටත්  මගේ  හද  පත්ලෙන් නැගෙන  බලවත්  ඉස්තුතිය පලකොර  සිටිමි  .

  

මෙයට අවංක  ජේ  ආර්. ජයවර්ධන

මත්තල  ගුවන් තොටුපොල  


.


Tuesday, July 4, 2017

උමා දුෂණය වහන්නට ෆෙඩරල් රෙද්දෙන් පුලුවන්ද?





උමා  ඔය  ව්‍යාපෘතිය  නිසා ඇතිවූ සහ ඇතිවෙමින් තිබෙන  බිහිසුණු  ප්‍රතිඵල  නිසා කරකියාගන්නට  දෙයක් නැතිවූ  බණ්ඩාරවෙල  මිනිස්සු  පාරට බැස  දෙවුන්දර  තුඩුවටත්  පේදුරුතුඩුවටත් ඇසෙන්නට  විලාප  නැගු  නමුත්  රාජපක්ෂ  මහත්තයා එය  තඹ   පයිසෙකටවත්   ගණන් ගත්  බවක් පෙන්නේ  නැත .ඔහුට  අනුව  දැන් තිබෙන ලොකුම  ප්‍රශ්නය හදාගෙන  යන  නව ආණ්ඩු ක්‍රම ව්‍යවස්ථාවය.  නව  ආණ්ඩු  ක්‍රම  ව්‍යවථාවෙන් ෆෙඩරල් පාලනයක් ඇති  කරන්නට  යන  බව කිව්  ඔහු  පළාත්  පාලන චන්දය  තබන්නට දින  තීරණය  කරන  තුරු ව්‍යවස්ථාව  හදන්නට  ඔහු සහ  ඔහුගේ  ගෝලබාල  මනත්‍රී වරුන්ගේ සහය  නොදෙන  බව  කියා සිටියේය.


රාජපක්ෂ  මහතාට  ඕනෑම  පන්දමක් අල්ලන  අස්ගිරියේ වහන්සේලාද  රාජපක්ෂ අනුව  යමින් නව ව්‍යවස්ථාවක්  උවමනා   නැති  බවත් , සංශෝධන  ගෙන  ඒම පමණක්   ප්‍රමාණවත්  බවත් , විධායක  ජනාධිපති  ක්‍රමය දිගටම  පවත්වාගෙන  යායුතු  බවත්  ප්‍රකාශ  කළහ. විධායක  ජනධිපති  ක්‍රමය අහෝසි කරන  ලෙස  මහජනයා  සෑම මැතිවරණයකදීම එක හෙලා  කියා   ඇතත්  එය  තුට්ටුවකටවත්  මායින්  නොකොට    අස්ගිරියේ වහන්සේලාගේ තීරණය  ක්‍රියාත්මක  කළ  යුතුයැයි සිතීමට  තරම් ඔවුහු උද්ධච්ච වී තිබේ.


උමා ඔය ව්‍යාපෘතිය  මගින්  රාජපක්ෂලා  හොඳ  ගැහිල්ලක්  ගසා ඇති  බව දැන් ඕනෑවටත් වඩා  පැහැදිලිය.2005 වසරේදී ඇමරිකන් ඩොලර් මිලියන 155 කට ඇස්තමේන්තු  කළ ව්‍යාපෘතිය ක්‍රියාත්මක  කිරීමට  2009 දක්වා  ප්‍රමාද වීම  නිසා  ආණ්ඩුවේ  නිලධාරීන් එය ඇමරිකන් ඩොලර් මිලියන  300 කින් කළ  හැකි බවට  ගණන්  හිලවු හැදු  නමුත් රාජපක්ෂ ආණ්ඩුව  ඉරාන සමාගමට  කොන්ත්‍රාත්තුව  දුන්නේ ඇමරිකන් ඩොලර් මිලියන 548 ටය .වෙනත් වචනවලින්  කියත්තොත් වැඩි පුර  දුන් මුදල ඇමරිකානු  ඩොලර් මිලියන 248 කටය . 2009 දෙසැම්බර මාසය වන විට  ඇමරිකන් ඩොලරයක වටිනාකම  රුපියල් 113 ක් විය . ඩොලර් මිලියන 248   රු.  113  තුනෙන් වැඩි  කළ විට  ලැබෙන  උත්තරය රුපියල් මිලියන 28024 කි .රාජපක්ෂලාට  ඉහලින්  කපුටෙකුටවත්  පියාඹීමට  ඉඩ  නොලැබුණු එකල එම  රුපියල  මිලියන 28024 හෙවත් රුපියල් කෝටි 2802 කුත් තව ටිකක් සාක්කුවේ   දමාගත්තේ උන්දලා  නොවේ  නම් වෙන  කොයිකාද?


රාජපක්ෂ  මහතා මේවාට  උත්තර බැඳිය  යුතු  නමුත් නොඇහුනා සේ  සිටින  ඔහු බ්‍රහ්මදත්ත  ලෝකය දක්වා  ගඳගසන උමා  ඔය  රාජකීය  මංකොල්ලය  ගැන පිළිතුරු දීම වෙනුවට මිනිසුන්ගේ අවධානය වෙනත්  අතකට  හැරවීම සඳහා   නැති ෆෙඩරල්  කතන්දරයක්  ඉදිරියට  දමාගෙන  තිබේ. ලංකාව  දෙකඩ  කිරීම සඳහා  කරන  කවර  උත්සාහයක් වුවද  පරාජය  කළ  යුතු  බව දෙමල දේශපාලන  පක්ෂ දිව්ර  දිව්රා  කිව්වද රාජපක්ෂ සමාගම සහ ඔහු  නැතිව  වතුරත්  නොපෙවෙන කල්ලි  දිගින් දිගටම  කියන්නේ  රට  බෙදන  ව්‍යවස්ථාවක් ගෙන ඒමට  ආණ්ඩුව හැංගි හොරා  කටයුතු  කරමින් සිටින  බවය .




ක්‍රිස්තු වර්ෂ 1500 මානසිකත්වයෙන් පසුවන  විශාල  පිරිසකට  රාජපක්ෂගේ බේගල් කතන්දර පරම සත්‍යය  ලෙස පෙනේ  .රදල සංස්ථාවක් වන අස්ගිරිය හිතන්නේ  මතන්නේද ඊට  වෙනස්  අන්දමින් නොවේ.කනගාටුවට  කරුණ නම්  එවැනි රදල නෂ්ඨාව ශේෂ පොලිෂ්  කරන්නට සමාජවාදී  කියන  අය්යලාද පුදපුජා  රැගෙන  ඔවුන් දණ්ඩ  නමස්කාර කිරීමට  යාමය .


වෙනත්  රටක  නම් මේ වන විට රාජපක්ෂලා  හිර කුඩුවේ දමා  හමාරය . එහෙත් මේ රටේ ඒවා  සිදුවන්නේ  නැත .උමා  ඔයේ  ගසා කෑම  ගැන  පරීක්ෂණයක් කරන  බව  සිරිසේන ජනාධිපතිවරයා  කිව්   නමුත් වැරදි  කරුවන් ට දඬුවම්  කෙරෙනු ඇතැයි සිතීමට  මේ ආණ්ඩුවේ  කැරැට්ටුව  අපිට   අවසර දෙන්නේ නැත . ඇතැම් හොරකම් ගැන  නඩු  පවරා  තිබෙන  බව සත්‍යකි . එහෙත් ඒවා  තවත් වසර  ගනනාවක්  දිගින්  දිගට ඇදී  යනු ස්ථිරය . ඉදිරි මැතිවරණයකදී  රාජපක්ෂලා  හෝ රාජපක්ෂ + මෛත්‍රී ආණ්ඩුවක් පිහිටවනු  ලැබුව  හොත් එම  නඩු  එතැනින්ම අවසන් වනු ඇත.   ගසා  කෑ  රාජපක්ෂලා පෙරටත් වඩා  හොඳින්  වැජඹෙනු ඇත. මේ ආණ්ඩුව  යටතේ   ගසා  කෑ එවුන්ද  ඔවුන්ට  එකතු වන  බවට  කිසිදු සැකයක් නැත  . එබැවින්  බණ්ඩාරවෙල  මිනිසුන්ට  මෙන්ම  අපටද සිදුවන්නේ  උමා  ඔයට  පැන දිවි  නසාගන්නටය .




Thursday, June 22, 2017

බෙල්ල යන සයිටම් ගෝරිය








                   කොල්ලෝ  මෙන්ම  කෙල්ලන්ද ආවේග ශීලිය . . එමෙන්ම  ඔවුහු බොහෝ දුරට දේශපාලනික වශයෙන් අවංකය .තරුණ  කම  නිසා   ගෝරියටද  බරය. ත්රිලට  කැමතිය .ආණ්ඩුවට අභියෝග  කිරීමෙන් ලැබෙන්නේ  පොඩි පහේ  ත්‍රිලක් නොවේ . රාජිතගේ අමාත්යංශය අල්ලා ගන්නට සමහර සිසුන්  ගියේ ඒ  මගින් හොඳ ත්‍රිලක්  ලැබෙන  නිසාය  .තවත් අය  ගියේ  සයිටමය නිසා නිදහස් අධ්‍යාපනයට කෙලවෙනු ඇතැයි අවංකම  සිතු  නිසාය . ඇතැමෙකු  ගියේ ධනපති  ආණ්ඩුවට  එරෙහිව  සටන් කොට කවදා හෝ සමාජවාදී  ආණ්ඩුවක්  පිහිටුවා  රටට  කිරියෙන්  පැණියෙන්  උතුරවන්නට  තිබෙන  උවමනාව නිසාය. උසාවිය විසින් තහනම් නියෝගයක්  පනවා  තිබියදී එයද පසිසෙකටවත්  මායීම්  නොකොට  සවුඛ්‍ය අමාත්‍යංශයේ  ගේට්ටුද  කඩාගෙන ඇතුලට පැන්නේ ඒ  නිසාය 



  එහෙත් පොලීසියෙන්   ඔය  තරමට  නෙලනු ඇතැයි සිසුන්ගේ  බහුතරය  සිතන්නට නැත . එහෙත්   අන්තරයේ   බොස්ලාත්  අන්තරේ බොස්ලාගේ  බොස්ලාත් කොල්ලන්ට  හොඳ  කෑමක් කන්නට වන  බව  කලින්ම අනුමාන  කරන්නට ඇත .  සවුඛ්‍ය අමාත්යංශය  යනු ඉඩ  කඩ  තිබෙන   ලොකු ගොඩනැගිල්ලක් නොවේ. එක විදිහකින්  හිර  ගෙයක් වැනි තැනකි. එයට  බලහත්කාරයෙන් රිංගු අයට  හොඳ  හැටි සබ්බුව  දෙන්නට  පොලීසියට  පුළුවන . ඒ  නිසා අන්තරේ බොස්ලගේ  බොස්ලාට   උවමනා වන්නට ඇත්තේ    සිසුන්ට  ඔයිටත් එහා  කෑමක්  කවන්නටය . සයිටම් විරෝධය  දිගට  ගෙන  යා  හැක්කේ   පොලීසියට කියා  කොල්ලන්ගේ  කෙල්ලන්ගේ  ඔලු  වැඩි වැඩියෙන්  පැලෙව්වොත්  පමණි.  නැතහොත්  කොල්ලන් කෙල්ලන් දෙතුන් දෙනෙකු  වෙඩි  කා  පරලොව  ගියහොත්ය .    GMOA  මහත්තුරුද  සයිටම්  ප්‍රශ්නය දිග්සීගැමට සුදානමින්  සිටියහ .  එවැනි  බරපතල සිද්ධියක්  නොවුනද ශනික  නුඩ්ල්ස් තැම්බෙන්නට  ගතවන  කාලයටත්  කලින් පාදෙණිය  මහතාගේ  සංගමය මහා වැඩවර්ජන  තීන්දුවක්  ගත්තේ  ඒ  නිසාය . රාජපක්ෂ වාදී පාදෙණිය  මහත්තුරුත් පෙරටුගාමි  පක්ෂයත් අත්වැල් බැඳගෙන සයිටම් ප්‍රශ්නය  තව තවත්  උග්‍ර  කිරීමට දැනටමත් සැලසුම්  හදා  තිබෙන  බවට සැකයක් නැත .   පොලීසිය විසින්  සිසුන්ට   පහර  දීමට එරෙහිව    පන්ති වර්ජනයකටද   සිසුන්  කැඳවීමට අන්තරය කටයුතු  කරනු නිසැකය .




අන්තරය  මෙහෙයවන්නේ කවුද ? සරසවි සිසුන්  නොව  . වෙනත්  දේශපාලන  කණ්ඩායමකි. ඒ   88 -89  කැරැල්ලේ  නායකයෙකු  වූ  ගුනරත්නම්ගේ  නායකත්වයෙන්  හදා ගත්  පෙරටුගාමී සමාජවාදී  පක්ෂයයි .ජනතා  විමුක්ති පෙරමුණ  ගැන  කලකිරුණු කණ්ඩායමක් එකතු කරගත්  ගුණරත්නම්  මහතාගේ අරමුණ වුයේ   ජවිපෙට වඩා  ලොකු  පක්ෂයක් හදා  ගැනීමය . මුලින් සැලකිය  යුතු  පිරිසක් සිටියද මේ වන විට එම  පක්ෂය  බෙහෙවින් දුර්වල වී  තිබෙන බව  ඔවුන්ගේ  පසුගිය  මැයි දිනය සනාථ  කළේය. ඔහුට  තිබෙන එකම ශක්තිය අන්තරය  පමණි. ඔවුන්  තව  දුරටත් ඔහුගේ   න්‍යාය  පත්තරයට අනුව මෙහෙයවා  ගත  හැක්කේ  සයිටම් විරෝධය  දිගින් දිගටම  ගෙන  යාමෙන්  සහ සරසවි සිවුන්ගේ  ප්‍රශ්න වෙනුවෙන් පෙනී  සිටීමෙන් පමණි . සයිටම් සටන  පැරදුනහොත්  අන්තරය  ඔහුගෙන් ගිලිහී  ගොස්  තම  පරම දේශපාලන සතුරා වූ  ජවිපෙ  අතටම  ආපසු යාමට  ඉඩ  තිබේ.  එමෙන්ම ඔහුගේ  පක්ෂය සැබවින්ම  ත්‍රීවීලර්  පක්ෂයක් බවට පත්වනු ඇත. එබැවින් සයිටම් සටන වනාහි පෙරටුගාමී පක්ෂයට  ජීවිතයත්  මරණයත් අතර  ප්‍රශ්නයකි . එබැවින්  සයිටම්  සටන දිනාගැනීම සඳහා ඔහුගේ දේශපාලන  පොතේ තිබෙන සියලු සුත්තර  ක්‍රියාත්මක  කරනු ඇත  .



GMOA මහත්වරුන්ට  සයිටමයට පෙන්නන්නට  බැරිවී  තිබෙන්නේ  ප්‍රධාන වශයෙන්ම දේශපාලනයක් නිසා  නොවේ . නිදහස් අධ්‍යාපනය  ගැන කැක්කුමක්ද   තිබෙන නිසා  නොවේ.පාදෙණිය  ඇතුළු නායක  කාරකාදින්ට නම් මහින්ද  උණ  ආන්කල්වෙන්නටම  හැදී  තිබේ. . එහෙත් අවශේෂ  දොස්තර මහත්වරුන්ට සයිටම් භීතිකාව ඇති වී  තිබෙන්නේ  ඔවූන්ගේ සාක්කුවට වදිනු ඇතැයි  යන බිය නිසාය. සයිටමය ඉඩ දීම  යනු   තවත් සයිටම් තුන  හතරකට දොර ඇර  දීමක් බව  ඔවුන් දනිති. එසේ  වුවහොත්  එම   වෛද්‍ය විශ්ව විද්‍යාලවලින්  එලියට එන  දොස්තරලාට  ආණ්ඩුවේ  රෝහල්වල රස්සාවල්  ලබා  ගැනීමට   තිබෙන  ඉඩ  ඉතා  අල්ප හෙයින්  ඔවුන්ට සිදුවන්නේ පුද්ගලික රෝහල්වල සේවයට  යන්නටය .පුද්ගලික  රෝහල්ද එයට  වඩාත් කැමති වන්නේ  දැන් මෙන්  නොව  දවසේ  පැය 24  ම සේවය  කිරීමට  වෛද්‍යවරුන්  පිරිසක් ඔවුන්ට  ලැබෙන  නිසාය . එපමණක් නොවේ. පුද්ගලික වෛද්‍ය උපාධිය  ලබා  පැමිණෙන  දොස්තර මහත්වරු සහ  නෝනලා උදේට  හැන්දෑවට සහ රාත්‍රියට  නගරවල  පමණක් නොව  ගම්වලද  බෙහෙත්  සාප්පු  දමා  ගනු ඇත. එසේ  සිදුවුවහොත් තමන්ගේ  පොකැට්ටුවට එළඹෙන්නේ  මහත් අනතුරකි .එබැවින් සයිටම්  යනු  ආණ්ඩුවේ  දොස්තර  මහත්වරුන්ට මහත් විපත්තියකි මාස  ගණනක් හෝ වර්ජනය  කොට එම විපත්තිය වලක්වා   ගැනීමට ඔවුන් එක  හෙලා සුදානම් වනු ඇත .




ආණ්ඩුව  පැත්තෙන් ගත්   කළ  සයිටමය  ඉඩ නොදීම  ඔවුන්ට විපත්තියකි.  විදේශ ණය  ගෙවා  ගැනීමට   පිටරටින්  තව  තවත් ණය  ගැනීම  හැර වෙනත් විකල්පයක් නැති      භයානක ආර්ථික  අර්බුදයට  මුහුණ දී තිබෙන ආණ්ඩුව  විදේශ  ආයෝජන  ගෙන්වා  ගැනීම   සඳහා   සියලු  පුරුෂ වීරිය දරන්නේ අර්බුධයෙන්  ගොඩ ඒමට තිබෙන මාවත් වලින් එකක්    එය වන   නිසාය .  ජාත්‍යන්තර විශ්ව විද්‍යාල  ලංකාවේ  ශාඛාවන්   විවුර්ත  කොට   වෛද්‍ය  උපාධි මෙන්ම අනෙකුත් විෂයන් සඳහා  උපාධි  ලබා දෙන්නේ  නම් එය ආණ්ඩුවට  කීප අතකින්  සහනයක් වන්නේය.  පිටරටවල  ඉගනීමට  යන  ලාංකික  සිසුන් වෙනුවෙන් වැය වන  විදේශ විනිමය යම් ප්‍රමාණයක් හෝ  ඉතිරිවන අතර අහල  පහල  රටවල සිසුන් එම  ආයතනවල  ඉගනීම සඳහා මෙහි පැමිණීමෙන් ඩොලර් ,පවුම්ආදිය  ලංකාවට  ලැබෙන්නේය . එපමණක් නොවේ. උසස්පෙළ සමත් සියලු සිසුන්ට  සරසවි වල  දොර ඇරීම සඳහා ආණ්ඩුවට  හය්යක් නැති බැවින් පුද්ගලික විශ්ව විද්‍යාල මෙහි විවුර්ත  කළ විට උසස් පෙළ සමත් තවත්  කොටසකට මුදලට  හෝ  උපාධියක  ලබා  ගැනීමට අවස්ථාවක් උදා වන්නේය. අනිත් වැදගත්  කාරනව  වන්නේ නිදහස් ආර්ථික  ප්‍රතිපත්තිය අන් රටවල  මෙන්ම  ආණ්ඩුවේ ද ප්‍රතිපත්තිය  වන  නිසාය .



අන්තරයට  යටවී  සයිටමය අකුලා ගැනීමෙන් ශිෂ්‍ය  විරෝධතා අවසන්  නොවන  බව  ආණ්ඩුව  දනී .සයිටමය  හකුලා  ගතහොත්   ජයග්‍රහණය  සිසුන්ට හිමිවීම  නිසා ශිෂ්‍ය ව්‍යාපාරය  තව  තවත් ශක්තිමත් වන අතර තව තවත්  ඉල්ලීම්  රැගෙන  පාරට  බසින වඩාත්  හයි හත්තිය  තිබෙන  ශිෂ්‍ය ව්‍යාපාරයක්  බිහිවී පාසල්  පද්ධතියද  තුලටද  රිංගන  බව  ආණ්ඩුව දන්නේය . එසේ   වුවහොත්   පාසල්  පවත්වාගෙන  යාමට  නොහැකි පරිසරයක්  නිර්මාණය වීමට  තිබෙන  ඉඩකඩ  බොහෝය.  අනෙත් අතින් පාදෙනියලා  වඩාත් ශක්තිමත් වී රාජපක්ෂලා සමග  කල්ලි  ගැහී ආණ්ඩුවේ  බෙල්ල  මිරිකීමටද   ඉඩ  තිබේ. 



එබැවින් සයිටම් ගෝරිය සෙල්ලමක්  නොවේ.  ජීවිතයත්  මරණයත්  අතර  සටනකි. බෙල්ල    ගහලා  යන උගුලකි .  සයිටම්  ගෝරියෙන් ආණ්ඩුව  පැරදුනහොත්   ආණ්ඩුවේ  බෙල්ල  යන්නේය. ආණ්ඩුව දිනුවොත්   අන්තරේ  බෙල්ල  යන්නේය .අන්තරේ  බෙල්ල  ගියහොත් පෙරටුගාමින්ගේ  බෙල්ල  යාම අනිවාර්ය බව අමුතුවෙන්  කියන්නට  උවමනා   නැත . ගෝරිය   පැරදුනහොත් දොස්තර  මහත්තුරුන්ගේ  නෝනලාගේ සාක්කුවට, පර්ස් එකට   තට්ටුවන්නේය. සටන  දිනුවොත්  දොස්තර  මහත්තුරුන්ගේ හොද්ද  හොඳටම  බොරවන්නේය .









Thursday, June 1, 2017

දේශපාලුවන්ගේ රෙදි ගැලවූ ගංවතුර


 


 ගිය  සතියේ බ්‍රහස්පතින්දා  (25) රාත්‍රියේ  සිට ගලන්නට  පටන්ගත්  ගංවතුර  හේතුකොට  ගෙනද,   අධික වර්ෂාව නිසා ඇතිවූ නාය  යාම් නිසාද  මැරුණු  ගණන කොපමණදැයි  තවමත්  අපි හරියටම දන්නේ නැත . ආණ්ඩුව දන්නේද  නැත  .


ගංවතුර සහ නාය යාම් නිසා කී දෙනෙකුගේ නිවාස  විනාශ වුයේ දැයි අපි  හරියටම දන්නේ  නැත .ආණ්ඩුව  දන්නේද  නැත .


ආපදා  කලමනාකරණ මධ්‍යස්ථානය ඉහත  කරුණු සම්බන්ධයෙන් ඊයේ  උදේ කිව් ගණන් හිලව්  දවල්වන විට වෙනස්  විය .දවල් කිව්  ගණන් හවස් වන විට  වෙනස් විය .හවස  කිව්  සංඛ්‍යා ලේඛණ අද  උදේ වෙනවිට  යලිත් වෙනස් විය  . හවස එය නැවතත් වෙනස් විය 


හොඳ අතට  නොවේ. නරක අතටය .


පෙරේද උදේ(මැයි 30)  කීවේ  ආපදාවන්ට පත්ව  ඇති පිරිස ලක්ෂ  5 ට  මදක් වැඩි බවය . 


පෙරේදා සවස 6 ට නිකුත්වූ වාර්තාවට  අනුව එය  604713 විය. 


ඊයේ හවස වන විට එම සංඛ්‍යව 630082ක් දක්වා  ඉහල  ගොස් තිබුණි  


අද  (ජුනි 1 ) උදේ 9 ට නිකුත්  කළ වාර්තාවට අනුව එම සංඛ්‍යාව 629704 කි. එය ඊයේට වඩා  378 කින් අඩුවී තිබේ. 


එහෙත් අද දවල් 12 ට නිකුත්  කළ සංඛ්‍යා ලේඛන අනුව පුද්ගලයන්  646596ක් ආපදාවන්ට  ලක්වී  තිබේ. 

ඊයේ සවස 6 ට  නිකුත්  කල වාර්තාව සමග සැසඳූ  කල ආපදාවන්ට  ලක්වූ සංඛ්‍යාව  16514 කින් ඉහල  ගොස් තිබේ. 


අද දින සවස  6 ට  නිකුත්  කළ  වාර්තාව අනුව  ආපදාවන්ට  ලක්වූ  පිරිස  තව දුරටත්  ඉහල  ගොස් තිබේ.


ඒ  අනුව ආපදාවන්ට  ලක්වූ  පිරිස 658490 කි . 



       ( නාවික  හමුදාව  බුලත්සිංහලට  රැගෙන ආ ගංවතුර සහනාධාර  ලබා  ගැනීමට පැමිණි පිරිසක් ) 


මියගිය පිරිස 206 කි .


 අතුරුදහන් වූ  පිරිස 96 කි .


 මුළුමනින්ම  විනාශවූ නිවාස සංඛ්‍යාව 1713කි .


අඩ වශයෙන් විනාශවූ නිවාස  ගණන 9294කි 



හෙට  වන විට  ආපදා  කළමනාකරණ  මධ්‍යස්ථානය  හෙවත්  ආණ්ඩුව  නිකුත්  කරන  සංඛ්‍යාලේඛන  තව  දුරටත්  වෙනස් වනු  නිසැකය .


 ආපදා  කළමනාකරණ  මධ්‍යස්ථානය වරින් වර  විවිධ සංඛ්‍යා  ලේඛන නිකුත්  කිරීමෙන් පෙනී  යන්නේ  කුමක්ද?  ආපදා හානි අවම  කර  ගැනීම  තබා  ඒවා  පිලිබඳ  හරි  වාර්තාවක්  ලබා  ගැනීමටවත් ආණ්ඩුව සතු  යාන්ත්‍රණයක්  නොමැති බව නොවේද?


ලංකාවේ සිදුවූ පළමු  හෝ දෙවන  හෝ තුන්වන  ස්වභාවික  විපත ගිය සතියේ  ගලන්නට ගත්  ගංවතුර  නම්   මෙසේ  ගණන් හිලව් වරින් වර වෙනස් වීම  මහා  ලොකුවට ගණන් ගත  යුතු නැත .

 එහෙත් මේ  ලංකාවට  ගැලු  පළමු හෝ දෙවන හෝ තුන්වන ගංවතුර නොවේ. 

මා අසා තිබෙන  පරිදි  1938  මහා ගංවතුරක් පැමිණි අතර 1942 නැවතත් එවැනිම දැවැන්ත  ගංවතුරක් ලංකාවේ  බොහෝ ප්‍රදේශ යටකළේය  .  1957 නැගෙනහිර  පළාත  විනාශ කළ  මහා  ගංවතුර 20 වන සියවසේ  ගැලු ලොකුම  ගංවතුර  බව එවක මඩකලපුවේ  උප දිසාපති වූ එල් .සී.අරුල්ප්‍රගාසම් මහතා  ලිවූ  ලිපියක සඳහන් වේ.* 


ඉකුත් අවුරුදු  50 කාලය  තුළදී    කළුතර  හා  රත්නපුර දිස්තිරික්කවලට ගංවතුර  නොගැලූ වසරක් තිබුනේ  නම්   කලාතුරකිනි. ඇතැම් විටෙක වසරකට දෙවරක්  ගංවතුර  ගැලු අවස්ථාද විය . 


2010 නොවැම්බරයේ  කොළඹට  ගැලු ගංවතුරේ තරම මතක් කරතොත්  පාර්ලිමේන්තු භුමියද අඩි 6 කින් යටවිය  .



2013 වසරේ ගැලු ගංවතුරෙන්  ආපදාවට ලක්වූ  සංඛ්‍යාව මෙවර  ගංවතුරට වඩා අධිකය. එය සංඛ්‍යාව  ලක්ෂ දහයකි .


ඉකුත් වසරේ මැයි  මාසයේ පැමිණි  ගංවතුර රටේ  බොහෝ  පළාත් වලට බලපෑ අතර  .අරනායක නායයෑමෙන්   පවුල් රැසක්  තත්පර  කීපයක්  තුලදී අවසන් ගමන් ගියහ . කොළඹ එහෙම  පිටින්ම වාගේ  යටවිය .


ගංවතුර,  වැළක්විය  හැක්කක් නොවේ.  අපට මෙන්ම  ඇමරිකාවට  යුරෝපයට චීනයට සහ  කියුබාවටද  ගංවතුර  ගලයි.  එහෙත් එයින් සිදුවන ආපදාවන්  අවම  කරගැනීමට ඕනෑ  කමක්  යම් ආණ්ඩුවකට  තිබේනම් එසේ   කර  ගත  හැකිය .   වත්මන් ආණ්ඩුවට  මෙන්ම  තිබු ආණ්ඩුවලටද එවැනි  උවමනාවක් තිබුනේ  නම් මෙපමණ  විපත්ති  සිදුවන්නේ  නැත.


ගංවතුරෙන් ,  නාය  යාමෙන්, ඉඩෝරයෙන් , සුනාමියෙන්,  කුණාටුවෙන් සිදුවන  අනතුරු  අවම  කරගැනීමට  හරි  හමන් වැඩ  පිළිවෙලක්  අපේ   රටේ  නැත . මන්ත්‍රී  පඩි වැඩි  කරගැනීමට,  රථවාහන  ගැනීමට ආණ්ඩු සහ  විපක්ෂයේ දේශපාලකයන් දක්වා ඇති  උනන්දුව  ආපදා  වලක්වාගැනීම සම්බන්ධයෙන්  දක්වා  නැති  බව අමුතුවෙන් කිව  යුතුද? 


සිදුවී  තිබෙන්නේ   ගසා කෑම  මුලික  කරගත් අධිවේගී  මාර්ග තැනීම , ගංගාවල ඉවක් බවක් නැති වැලි හැරීම ,අක්කර සිය දහස්  ගණනින්  පස්  කැපීම , වනාන්තර  කැපීම ආදීය  නිසා ආපදා අවස්ථා වේගයෙන් ඉහල  යාමය . එම  නොසන්ඩාල වැඩ  පිටුපස  සිටින්නේ ද සිටියේද  බලයේ  සිටි  හා සිටින දේශපාලකයෝය .


 ආණ්ඩුවේ  අකාර්යක්ෂමතාවය දැක්වීමට වැඩි දුර  යායුතු  නැත . ආපදා  කළමනාකාර ඇමති  ප්‍රියදර්ශන යාපගේ  වැඩ  කිඩ අධ්‍යයන  කිරීම  පමණක්  ප්‍රමාණවත්ය .ඔහු  මේ අවස්ථාවේදී රට  තුළ සිට ආපදා අවම  කරගැනීමට  කඩියෙකු ලෙස  කටයුතු  කළ යුතු වුවත්   මෙක්සිකෝවේ  සිට  හනික ආපසු  ඒමට  ඔහු   කිසිදු උනන්දුවක්  දැක්වුයේ  නැත . එය  කිසිසේත්ම සමාවදිය  හැකි  කරුණක් නොවේ. ජනාධිපතිවරයාට   කොන්ද  තිබේ  නම් ඔහු අප්‍රමාදව ගෙදර  යැවිය  යුතුය .


මහින්ද සමරසිංහ මහතා  ආපදා  කළමනාකාර ඇමති  ලෙස  සිටි  කාලයේ (2006-2010) ආපදා  අවම  කරගැනීමේ අරමුණෙන්  කිසියම් වැඩපිළිවෙලක්  ක්‍රියාත්මක  කළ  නමුත් එය  ඉදිරියට  ගෙන  යාමට  ඉන් පසු  පැමිණි ඇමතිවරු  උනන්දුවක්  දැක්වුවේ  නැත.


මගේ  මේ  ලිපියේ අරමුණ ආපදා  හානි අවම  කරගැනීම සඳහා  යෝජනා  කීපයක්  ලියා  තැබීමය .


සෑම ග්‍රාමසේවා  කොට්ටාශයකම   ආපදා අවම  කිරීමේ  කමිටුවක්  පිහිටවිය  යුතු අතර එහි ප්‍රධානින් ලෙස  ග්‍රාම සේවා  නිලධාරියාද , අදාළ  ප්‍රදේශයේ ආගමික  නායකයෙකුද  ප්‍රාදේශීය  නායකයෙකුද  පත්  කළ යුතුය . එමෙන්ම  අදාළ  ප්‍රදේශයේ  සැම අනු  ප්‍රදේශවල  පදිංචි තරුණයන් එම  කමිටුවේ සාමාජිකයන් ලෙස  පත්කිරීම අත්‍යවශ්‍යය.


ආපදා  කළමනාකරණ  මධ්‍යස්ථානයට එම  කමිටු අනුබද්ධ  කළයුතු අතර එය විසින් කමිටු සාමාජිකයනට අවශ්‍ය දැනුම සහ  පුහුණුව  ලබා  දිය  යුතුය. එමෙන්ම ආපදා අවම  කරගැනීම සඳහා අවශ්‍ය  උපකරණද එම  කමිටුවලට  ලබා දිය  යුතුය. 


පසුගිය  සුනාමි විපතෙන් පසු එවැනි වැඩසටහනක් දිගින් දිගටම පවත්වාගෙන  ආ අතර  සුනාමියක්  නැවත  පැමිණියහොත්  ජීවිත  ආරක්ෂා  කරගැනීම  සඳහා  කළ යුතු දේ  රැසක් එම වැඩසටහනට  අයත් විය .


කිසියම්  ආපදා  තත්වයක්  ඇතිවන්නේ  නම් ඒ  බව  තම ප්‍රදේශයේ සිටින  මහජනයාට   දැනුම් දීම සඳහා සයිරන් වැනි  නලාවක් මගින් දැනුම් දීමෙන්   ජීවිත  පමණක් නොව  මිනිසුන් සතු අත්‍යවශ්‍ය   දේපොළ  පවා  යම් තරමකින් හෝ  රැක  ගැනීමට  හැකිවෙනු ස්ථිරය .අද  සෑම  කෙනෙකුටම  ජංගම දුරකථන   තිබුණද ගංවතුර  වැනි ආපදාවකදී ඒවා බොහෝ දුරට  නිහඬ වේ. එයට  හේතුව විදුලිය විසන්ධි  කිරීම හෝ  විසන්ධි වීම  නිසා දුරකථන  කුලුණුද අක්‍රීය වන  බැවිනි.


  ආපදා   තත්වයකදී  මහජනයා එක රැස්විය  යුතු ආරක්‍ෂිත ස්ථාන පිළිබඳව ආපදා අවම  කරගැනීමේ  කමිටු  විසින් තම  ප්‍රදේශයේ  ජනයා දැනුවත්  කොට  තැබිය  හැකි  වන අතර ඔවුන්ට අවශ්‍ය ආහාර  පාන  සහ  ප්‍රථමාධාර එම  මධ්‍යස්ථානවලදී ලබා දීමටද හැකි වෙනු ඇත.  


විශාල වශයෙන්  ආපදා  තත්ත්වයක්  ඇතිවූ  විට ආපදාවනට  ලක් නොවූ ප්‍රදේශවල  මහජනයා  මෙන්ම  ආණ්ඩුව විසින්ද  ලබා දෙන ආහාරපාන  ඇඳුම් පැළඳුම් ආදියද ගසාකෑම් වලින් තොරව සුදුසු අයට  පමණක් ලබා දීමද  මෙම ආපදා  අවම  කර  ගැනීමේ  කමිටු  මගින් හැකි වනු  බවට  සැකයක් නැත.


මෙම  කමිටු වඩාත්  ඵලදායි  වෙන්නට  නම් ඒවාට  නීත්‍යනුකුල  භාවයක්  පනතක්  මගින්  ලබා දිය  යුතු අතර එම කමිටු සාමාජිකයන්ගේ සේවයට   නිසි ගවුරවයද  මහජන පිළිගැනීමද  එමගින් හිමිවනු  ඇත.


ආපදා අවම  කිරීම  සම්බන්ධයෙන්  තීරණාත්මක කාර්ය  භාරයක් ඉටුකළ  හැකි එක ආයතනයක් වන්නේ  කාලගුණ විද්‍යා දෙපාර්තමේන්තුවයි. ඔවුන්ගේ  කාල  ගුණ  අනාවැකි  බොහෝ දුරට වැරදී  යන්නේද විශාල  ආපදා  තත්වයන් පිළිබද  නිවරදි අනාවැකි  කීමට  නොහැකි වී  තිබෙන්නේද  නවීන  උපකරණ  ඔවුන් සතුව  නොමැති  නිසාය .  කාලගුණ  අනාවැකි කීමට  උපකාරවන   ඩොප්ලර්  යන්ත්‍රයක්   පසුගිය  පාලන සමයේ ගෙන  ආ  නමුත් එය සවි  කලේ  නැත. මේ ආණ්ඩුව  යටතේද සවි  නොකළ එම  යන්ත්‍රය  දිරාපත්වෙමින්  තිබෙන  බව  මාධ්‍ය වීසින් වාර්තා  කර  තිබේ. කාල  ගුණ අනාවැකි  පලකළ  හැකි නවීන  උපකරණ තිබුනේ  නම් බොහෝ  ජීවිත බේරා  ගත  හැකි වනු නොඅනුමානය.


ආපදා අවම  කරගැනීම සඳහා තවත්  බොහෝ දේ  තිබේ. එහෙත් මේ  ලිපියේ අරමුණ ඒවා  ගැන කීමට  නොවේ. ඒවා  ගැන දන්නා  විශේෂඥයෝ බොහෝ සිටිති . ඔවුන්ගේ එම සේවය  ලබා  ගැනීම  ආණ්ඩුවේ  වගකීමයි .


නැවතත් වරක්  මහා  විපතක්  එන  තුරු  ආණ්ඩුවට  බකං නිලාගෙන  ඉන්නට නොදීම  පුරවැසියන් වන අපගේ  වගකීමයි . අපත් බකං නිලාගෙන  සිටින්නේ නම් අපි  පුරවැසියන් නොව ඉපදුනාට  ජීවත් වන  සත්ව  කොට්ටාශයක්  පමණක් බව  කියන්නට  මා  පැකිලෙන්නේ  නැත .







_________________________________________________________________________________

අරුල් ප්‍රකාසම් මහතා  1957  මහා ගංවතුර  ගැන ලිවූ  ලිපිය පහත  ලිංකුවෙන් කියවිය  හැක .

* http://transcurrents.com/tc/2011/01/the_batticaloa_floods_of_19571.html  


Friday, May 19, 2017

මළවුන් හතලිස් නව දෙනෙකු සමග රාත්‍රියක්

   

                

                 දිනය 2017 අප්‍රියෙල් 4 වනදාය .කොළඹ  හෝටලයක පැවතුණු  මංගල උත්සවයකට සහභාගී වී  හෝටලයෙන් පිටතට  මා පැමිණෙන  විට  රාත්‍රී 11 ට  ආසන්න වී  තිබුණි .ගාල්ල  දෙසට  යන  බස්  රථයකින්  කළුතරට  ගොස්  කටුකුරුන්දේ  වසන  මගේ  ඥාතියෙකුගේ  නිවසේ  රාත්‍රිය ගත  කොට පසුදා උදැසන ගෙදර  යාම මගේ සැලැස්ම විය .ලේක්හවුස් වටරවුම දක්වා  පා ගමනින් ගිය  මා  එහි බස්  නැවතුමක  නතර වී  බල සිටියේ  ගාල්ල දෙසට  යන බස්  රථයක් එනතුරුය. පැය භාගයකට ආසන්න වෙලාවක්  බලා සිටි නමුත් බස්  රථයක් නොපැමිණියෙන්  මා සිටියේ  තරමක්  නොසන්සුන්වය .මගේ නොසන්සුන් තාවය වැඩි කිරීමට බස්  නැවතුමේ  සිටි  තරුණියද හේතුවූ බව  අවංකව  ඔබට  කිව  යුතුය.තරමක සුරුපිනියක් වූ ඇය මා  හා  කතා  බහට වැටී ඉන්පසු යෝජනා  කළ ඇතැම් දේ  මෙහි  ලිවීමට  නොහැකිය.    අවුරුදු විසිපහක් තිහක්  පමණ වයසැති කතක් මහා  රාතියේ  තනිවම  බස්  නැවතුමකට වී  සිටින්නේ  මන්දැයි තීරණය  කිරීම  පාඨකයන්ට  භාර  කරමි .ඇගෙන් ගැලවී  යාම සඳහා පැමිණෙන  ඕනෑම  බස් රථයක නැගීමට  මා අවසානයේ  තීරණය කළෙමි. එම  තීරණය  ගෙන වැඩි වෙලාවක් ගත වුයේ  නැත . වාසනාවකට කලුපාට  බෙන්ස් මෝටර් රථයක්  පැමිණ මා ඉදිරිපස  නතර  කළේය .


 "අද හිල්ටන් එකේ තිබුණු වෙඩින් එකේ හිටිය  මට මතකයි.  කොහාටද  යන්නේ ?" රියදුරු අසුනේ සිටි  පුද්ගලයා  ඇසීය 


" මං යන්නේ  මතුගමට . ඔබ තුමා  කොහෙටද  යන්නේ ? " මා  විමසීමි .


"මං නම්  යනවා දොඩන්ගොඩට  යනකං.      කැමතිනම් නගින්න . මමත් මේ  වෙඩින් එකේ  ඉඳල එන්නේ "


 මා  හනික රථයට  නැග්ගේ ඔහුට  බලවත් ලෙස ස්තුති  කරමිනි.  රියදුරා වනාහි  බස්  නැවතුමේ අටවා  තිබු උගුලෙන්  ගලවා  ගැනීමට මගේ  මියගිය  සීයා විසින් එවන  ලද දුතයෙකු විය  හැකියයිද  මට සිතුණේය.එසේ  සිතුණේ පැරණි අත්දැකීම් කීපයක් නිසාය.ඒවා විස්තර කිරීමට මේ අවස්ථාව  නොවේ. පසු අවස්වථාක ඒ  පිළිබඳව ලියමි.


.ආසනයේ හරිබරි ගැසී  වාඩිවීමෙන් පසු    රියදුරා දෙස බැලීමි . ඔහු උසය, මහතය .මැදියම් වයස  පසු කරමින් සිටියේය.  .ඔලුවේ  එකම කෙස්  ගසක්වත්  තිබුනේ  නැත . ඔහු  කලුපාට  කලිසමක් සහ  සුදු  කමිසයක්  පැළඳ සිටියේය. මා රථයට නංවා  ගැනීමෙන් පසු  ඔහු වේගයෙන් රිය ධාවනය  කළ නිසාදෝ  මා සමග එකම වචනයක්වත් කතා  කිරීමට  ඔහු උනන්දු වුයේ  නැත .මංගල උත්සවය  ගැන  මා වචනයක් දෙකක් කී  නමුත්  ඔහු  කිසිදු  පිළිතුරක්  නොදුන් බැවින් මමද  නිහඬව සිටියෙමි . 


රියැදුර දෙසින්  කිසියම් දුර්ඝන්ධයක් පැමිණෙන  බව දැනුනේ ටික වෙලාවක්  ගතවූ විටය.එවැනි දුර්ඝන්ධයක්  මෙයට  පෙර  මට දැනී  තිබුණේ කලකට  පෙර  දියේ  ගිලී මියගිය ගම්වාසියෙකුගේ අවමගුලකදීය ..රියදුරා  මිණී  එම්බාම් කරන්නෙක්ද? නැතහොත්  මෝටර් රථයේ කොතැනක  හෝ  මළමිනියක්  සඟවාගෙන යන  මිනී  මරුවෙක්ද? මොහුගේ  සැලැස්ම මිනී  මැරුමට  මා  පටලවා බේරී  යන්නටද? මගේ  ඔලුව  යකාගේ  කම්මල  බවට  මොහොතකින්  පත් විය . බස්  නැවතුමේ  සිටි  තරුණියගේ  උගුලට අසු වී  නම් මෙයට වඩා  හොඳයයි සිතුණි . මේ මර උගුලෙන්  ගැලවෙන්නේ  කෙසේදැයි  නැවත  නැවත  කල්පනා  කළෙමි.

  

රියදුරා  මගේ  සිත  කියවන්නට ඇතැයි මට සිතුණේ මගේ ආසනය අසලවූ  කවුළුව  ඔහු  විවුර්ත  කළ  හෙයිනි.  ඊ ළඟ විනාඩියේදී සුළඟ විසින් දුර්ඝන්ධය  පිස දැමු  හෙයින් මගේ  සිත  තරමක්  සන්සුන් විය.


මෝටර් රථය ගමන් කරන්නේ  ගාලු  පාරේ  නොව වෙනත්  දිසාවකට  බව මට වැටහුනේ  ඇස් වාට්ටුව හන්දිය දුටු විටය. ඊ  ළඟ මොහොතේ එය  වෝඩ් පෙදෙස දෙසට  හරවා ගමන්  කොට විශාල  මන්දිරයක්  ඉදිරිපස  නවතනු  ලැබිණ. " බොස්ව දාගෙන    යන්න  තියෙනවා .ඒකයි නැවැත්තුවේ." කී  රියදුරා  වාහනයෙන් බැස  රථයේ  පිටුපස වම් පැත්තේ  දොර  විවුර්ත කළේය. ඊ  ළඟ  මොහොතේ නිවසේ  ගේට්ටුව  විවුර්ත  වූ අතර ජාතික ඇඳුමින් සැරසුණු උස  පුද්ගලයෙකු පැමිණ රථයට  ගොඩ  විය .වහා  දොර වැසු  රියදුරා රියදුරු අසුනට  පැමිණ රථය පැදවීම ආරම්භ කළේය. 


"සර් ! දොඩන්ගොඩ  කොයි හරියේද ? දැකල  නම් පුරුදුයි " පිටුපසට  හැරී මා 'බොස් '  ගෙන්  විමසුවේ   ඔහුගේ  වාහනයේ ඔහු සමග  සුහද  කතා  බහක  නොයෙදී  ගමන් කිරීම අපේ සංස්කෘතියට නොගැලපෙන  නිසාය. 


 "අඳුන ගන්න  බැරි  උනාද ?        මං ජේ .ආර්. ජයවර්ධන . " 



ජේ ආර් ? ඔහු මියගියේ  1996 දී  බව  මට සිහිවිය .මා සිහි විසඥ  නොවුනා  පමණය .


මගේ මුලු සිරුරම අයිස් සේ  සීතල වී ගිය අතර  ඊළඟ  මොහොතේ හිස මුදුනේ සිට යටිපතුල් දක්වාම දහදියෙන් පෙඟී යනු දැනුණි.  හදවතේ  ගැස්ම ඉහල  ගොස් නැගුනු  හඬ  රියදුරාටද ඇසෙන්නට ඇත . මේ  විපත්තියෙන්  ගැලවීමට  ඇති එකම  මග  මෝටර්  රථයෙන්  එලියට  පැනීම  පමණය .


" එලියට පැනල දැන්ම  අපේ  ලෝකෙට එන්න හදන්න  එපා.  අනික දොරවල් ලොක් කොරල  තියෙන්නේ"  

ජේ.ආර්.ගේ ගොරෝසු කටහඬ අවවාදයකට වඩා  තර්ජනයක ස්වරුපයෙන් යුක්ත විය .


ඔහු නැවත  කතා  කළේය. එහෙත්   සැර  බාල කොටය .


"  මිස්ටර් රණවීරගේ ! තමුසේ බය වෙන්න අවශ්‍ය  නැහැ. තමන්ට  කිසිම  හානියක් වෙන්නේ  නැහැ . අනික  තමුසේ වගේ  පුංචි මිනිහෙකුට  හානියක්  කරලා මට  තියෙන  ප්‍රයෝජනය  මොකක්ද ? මං තමුසෙව  ගෙන්න  ගත්තේ  නිකම් නෙවෙයි.තමුසේ  අපක්ෂපාත  බ්ලොග් රයිටර්  කෙනෙක් නිසා . මන් තමුසෙගෙ  'සුදු කුකුළා'  කියවල   සෑහෙන්න  පැහැදුනා "


එයට  පිළිතුරු දීමට  මා  උත්සාහ  කළද  කවුරුදෝ  බෙල්ල  හිරකරගෙන  සිටින්නාක් මෙන් මට දැනුණේය. 


"බ.....බ .........බ......බය.........නැ.....නැ   .........ද්ද.......ස.....ස...සර්........."තවත් විනාඩි  ගණනකට  පසු  කීවෙමි "


'"මොකට  බය වෙනවටද? " බය වෙන්න  ඕනේ  පණ පිටින් ඉන්න   අයටනේ අයිසේ "


"ස...ස .....සර්....  අභාවප්‍රාප්ත වෙලා දැන් ....දැන්...... අ....අවුරුදු   ගානක් වෙනවා . ඔබ  තුමා පණපිටින් ඉන්නකොටත්  රටෙන් බාගයක්ම  බයෙන්....බයෙන්  .....  හිටියේ......සර්ට  ආයි පණ ඇවිල්ල  තියෙනවා දැක්කොත්  මුළු  රටටම  නු....නු...ල් ....නුල්  බඳින්න වෙනවා ."


"හොහ්,        හොහ්       හොහ්      හොහ් "        හිනහව  නවතා  ගැනීම ජේ.ආර්. ට තරමක් අසීරු විය ."


වැටුණු  උගුලෙන්  බේරීමට කිසිදු මගක් නැති  බව ක්‍රමයෙන් පැහැදිලිවන්නට  විය  .වෙන දෙයක්  උනාවේ  කියා අන්තිමට  හිත  හදා  ගත්   මා ජේ.ආර්.ගේ  අවතාරය  සමග  කතා  බහ  කිරීමට  තීරණය  කළෙමි.


" ඉතින් ස...ස....සර් මාව  ගෙන්න  ගත්තේ  මො......මො......මොකද  කියල  කියනවනම් " 


"දැන් මේ  යන්නේ මළවුන්ගේ  රැස්වීමකට . එතන  ඉන්නවා මැරිච්ච  ප්‍රසිද්ධ දේශපාලකයෝ  50 දෙනෙක්. තමුසේ මාත් එක්ක ඇවිල්ල   ඒ  ගැන ආටිකල් එකක්  ලියනවා . එතැනදී  බණ්ඩාරනායක  ,  ප්‍රේමදාස  එන්.එම්  , කොල්වින් , විජේවීර , විජය කුමාරතුංග කාරිය  හම්බ වෙන්නත් පුළුවන් . ආ ප්‍රභාකරනුත් ඒවි.

 

මළවුන්ගේ රැස්වීමකට ගොස් ආපසු පණපිටින් ඒමට  ලැබේදැයි මා  කල්පනා  කළා   පමණය .ජේ.ආර්.  යලිත් කතා  කළේය . " බය වෙන්න දෙයක්  නැහැ . මගේ ඩ්‍රයිවර් තමුසෙව  මතුගමට ගිහිල්ලා දායි ."


 .ලේඛකයෙකු එඩිතර  විය  යුතු  බව  මතක් වුයේ එවිටය . එඩිතර මාධ්‍ය වේදීන් යුධ  බිමට  ගොස්  කරන  ලද වාර්තා  කිරීම්  නොවන්නට මිනිසුන්ට  කියවන්නට  වෙන්නේ  පත්තර  කන්තෝරුවල  සිට  ලියන අතේ  රෝල්ය. අනෙක් අතට මට මේ අවස්ථාව  දීම  ගැන  මා  ජේ.ආර්ට සදා  ණයගැති විය  යුතු  නොවේද? 


මළවුන්ගේ රැස්වීමක් මෙයට  පෙර  ලොව  කිසිවෙකු  දැක  හෝ  වාර්තා  කොට  නැත. ඇතැම් විටෙක  මගේ  ලිපිය වෙනුවෙන් Pulitzer සම්මානය  ලැබී  මට  ලෝක ප්‍රසිද්ධියක්  ලැබීමටද  ඉඩ තිබේ.  මා අපක්ෂපාත  ලේඛකයෙකු  බැවින්  බොහෝ දේශපාලනඥයන්  මා සමග අමනාප  බවට  සැකයක් නැත.මා  දුටු විට  ඔවුන්  මා මරා  කෑමටද ඉඩ  තිබේ.  ඒ  කෙසේ වෙතත්  බිය  අමතක  වී  යාමට  අඩියක්  ගැසීමට  ඇත්තේ  නම් ඊට සුදුසු ම වෙලාව මේ  මොහොතය .


" ආ ගන්නවා මේක "      ජේ.ආර්.කීවේය .මම ආපසු  හැරී  බැලු විට ජේ.ආර්.  බ්‍රැන්ඩි  බෝතලයක් මා  දෙසට  දික් කළේය . 


"වීදුරුවක් ?   " මං හිමින්  කීවෙමි.


"මොන වීදුරුද අයිසේ . ටික  ටික  කටට  හලා  ගන්නවා .


 " Thank you very much sir"


" It's a pleasure "


" Don't  take more than two drams" ජේ .ආර්. එසේ  කීවේ මා  වැඩියෙන්කී බී  සියල්ල  අනාගනු ඇතයි සිතු  නිසා  විය  හැක. 


දෙපාරක්  බෝතලය  කටට  හලා ගැනීමෙන් පසු ගත වුයේ   විනාඩි  තුන  හතරක්  පමණි.  යකුන්  දාහක්  ඉදිරියට  උවද යාමට  තරම්  එඩිතර  කමකින් සිත  පිරී  යන්නට  විය .ලැබී ඇත්තේ ස්වර්ණමය  අවස්ථාවක් බව  ඊ ළඟ විනාඩි  5 තුලදී  මට අවබෝධ විය . ජේ  .ආර්.ලොක්කාගෙන් ඇසිය  යුතු  දේ ඇසිය  යුත්තේ  දැන්ය.  ඔහු  සමග සම්මුඛ  සාකච්චාවක් කිරීමට ලැබෙන එකම අවස්ථාව  මෙයය . එය අපතේ  යවතොත් මා  කළ ලොකුම  මෝඩකම එය වනු ඇත 


 "සර් මොකද  හිතන්නේ  ජනාධිපති  තුමා   ගැන ? "

 

" ආන්න තමුසේ  ලයින් එකට ආව .  තමුසෙලාගෙ  ජනාධිපතිද ? කණගාටුයි  කියන්න .  කොන්දක්  නැහැ .මං වගේ  කොරා  නම් ඔය එක  බල්ලෙකවත්  පාරට  බහින්නේ  නැහැ."


" එතකොට  අගමැති  තුමා  ගැන  මොකද අදහස ?"


" මිනිහත්  අනාගත්ත . අර බොන්ඩ් මගුලෙන්  "


"ඇයි සර්  අගමැතිතුමා  මුණගැහිල උපදේශයක් වත් දෙන්නේ  නැත්තේ ?"


"  විශ්‍රාම ගත්තට පස්සේ මං ආයි ඕවට  ඇඟිලි  ගහන්නේ  නැහැ .ඒක  මගේ  ප්‍රතිපත්තිය . "


" මන්ත්‍රී වරුන්ට ඩියුටි ෆ්‍රී කාර් දීම  ගැන සර්ගේ අදහස? "


"ආ.. ..... ඒක  පටන් ගත්තේ  මමනේ .     ඒක  හොඳ  ප්රෝතිපත්තියක්.  ආණ්ඩුවක් අවුරුදු  5 ගෙනියන්නේ පුළුවන් වෙන්නේ එහෙම  කොළොත්  තමයි  . නැත්තම්   ගෙබ්බෝ  වගේ අනිත් පැත්තට  පැනල ආණ්ඩුව  පෙරලනවා . "


 " සර් 83 කළු  ජුලිය  ගැන ගැන  ප්‍රශ්නයක් අහන්න  තියෙනවා "


" Go ahead "


" ඇයි සර් අහක  හිටපු  කොමියුනිස්ට්  කාරයන්වයි  සමසමාජ  කාරයන්වයි , ජේවීපී එකයි ඒකට  ගෑව්වේ?"


" අපේ  එවුන්ව බේර  ගන්න  තිබිච්ච හොඳම විධිය ඒක  තමා "


" සර්  77  බලයට  ආවේ ධර්මිෂ්ට සමාජයක්  හදනව  කියලනේ. ඒවුනාට සර්  ඉන්න  කාලේ  රටේ  සැහෙන්න  ලේ  හෙල්ලුනානේ "


" තමුසේ  හිතනවද  මිනිස්සුන්ට  බණ කියල  ධර්මිෂ්ට සමාජයක්  හදන්න  පුළුවන්  කියල? අධර්මිෂ්ටයන්ව  නැති  කරල   තමයි ධර්මිෂ්ට සමාජයක්  හදන්න  පුළුවන්.  මං කොරේ   ඒක"


"සර්  හදපු ආණ්ඩුක්‍රම ව්‍යවස්ථාව හොඳ  නැහැ  කියල හුඟක් අය  කියනව ."


" මොන බොරුද?  රාජපක්ෂ ඒක  තව  ටිකක්  පොලිෂ්  කොරලා  ගත්තේ  නරක  හින්දද?    මගේ ව්‍යවස්ථාව දිගටම  තියාගන්න  අද සටන් කොරන්නේ  කවුද? යු එන් පී.කාරයෝද?    නෑ.   ශ්‍රී ලංකා  කාරයෝ "


නැවතත්  ජයවර්ධන  මහතා හොහ් .....හොහ් .....හොහ්  ගා  හිනාවුනේය 


." එතකොට ඉන්දියන් හමුදාව  ගෙන්නපු එක ? "


" ඉන්දියන් හමුදාව  මට  ගෙන්නන්න  සිද්ධ උනේ මගේ ආණ්ඩුව  තුවක්කුවෙන් පෙරලන්න  විජේවීර ලැස්ති   උන  නිසා..මං ඉන්දියන් හමුදාව ගෙන්නුවේ  නැත්තම් අපේ  හමුදාවට  උතුරෙයි දකුණෙයි දෙකේම සටන් කොරන්න  වෙනවා. එහෙම උනානම් ප්‍රභාකරන් උතුර අල්ල  ගන්නවා. විජේවීර  දකුණ අල්ලගන්නවා . ඉන්දියන් හමුදාව ගෙන්න  ගත්ත  නිසා උතුරේ  හිටපු හමුදාව  දකුණට  ගෙන්න  ගෙන  විජේවීරට  මුහුණ දෙන්න  මට  පුළුවන් උනා." 


මෝටර් රථය බොරැල්ලේ කනත්තේ ප්‍රධාන දොරටුව  ඉදිරිපසට පැමිණ  තිබෙන  බව මා  දුටුවේ එවිටය. .ගේට්ටුව ඉබේම විවුර්ත වූ අතර මෝටර් රථය කනත්ත  තුලට ඇතුළුවී සෙමින් ඉදිරියට  ධාවනය වන්නට  විය. වට  පිට  බැලු විට  මා  දුටුවේ සොහොන් කොත් අසල  නැගී සිටි මිනිසුන් සහ  ගැහැනුන්  අප  ගමන් කළ  මෝටර් රථය දෙස  බලා සිටින අයුරුය .ඇතැමෙකු අත්පොලසන් දෙමින් සිටියහ  . තවත්  පිරිසක්  හු හඬ  නැගුහ. කිසිවෙකු මෝටර්  රථය දෙසට ගලකින් ද  ගැසුවේය .



ආදාහනා  ගාරය අසලට  පැමිණි මෝටර් රථය එහි නවත්වනු  ලැබීය  .  කීප දෙනෙකු ආයුධ සන්නද්ධව  මෝටර් රථය දෙසට  දුව  එනු දුටු  විට මා  තුළ  කොතරම් බියක් ඇතිවීද  කිවතොත් මෝටර් රථයෙන්  බැසීමට  තරමටවත්  මගේ දෙපාවලට  ශක්තියක් නොවීය.


" ගන්නවා  තව ටිකක්  ඔය  බෝතලෙන් " මා සිත  තුළ වූ බිය වටහා  ගත්  ජේ. ආර් නියෝග  කළේය.


බ්‍රැන්ඩි  බෝතලය කටට ගෙන එක  හුස්මට බීගෙන බීගෙන  ගියෙමි.


"ඔය ඇති .දැන් බහිනවා."  


"OK සර් ."


මළවුන්ගේ රැස්වීමේ  පින්තුර  කීපයක්  ගත  යුතුයැයි  සිතා කැමරාව  ගැනීමට  මා සිතුවා  පමණි. ජයවර්ධන  මහතා ඝෝරනාඩු  කළේය.


 "කැමරා   බැ.ෆෝන් බෑ. නෝට්  බුක් එකයි  පැනකුයි පමණයි . "


ජේ  ආර් ජයවර්ධන  මහතා වාහනයෙන් බැස ගත්  විට පැමිණි සිටි ආරක්ෂකයෝ  ඔහු  වටකර ගත්හ . ජයවර්ධන  මහතා ආදාහනාගාරය අසලවූ  ගොඩනැගිල්ල දෙසට  ගමන් කළ අතර  මම  ඔහු  පසුපසින් ගමන් කළෙමි.


ආදාහනාගාරය අසල ශාලාවේ තිබු සුවපහසු  පුටුවල    පිරිසක්  වාඩිවී  සිටියහ . ඉදිරිපස අසුන් වල ඩී. එස්.  සේනානායක , ඩඩ්ලි සේනානායක , එස්.ඩබ්ලිව් . ආර්.ඩී.බණ්ඩාරනායක  ,සිරිමා බණ්ඩාරනායක, ආර්.ප්‍රේමදාස,   ඩබ්ලිව් .විජේතුංග ,  එස්. ඒ.වික්‍රමසිංහ , එන්.එම් පෙරේරා, කොල්වින් ආර් ද සිල්වා ,  පීටර්  කේනමන්, පිලිප් ගුණවර්ධන , හෙක්ටර් කොබ්බැකඩුව මහත්ම  මහත්මීන් වාඩි වී  සිටි අතර පසු  පස  ආසනවල වාඩිවී  සිටි පිරිස අතර    අනුර  බණ්ඩාරනායක , ගාමිණි දිසානායක , ලලිත් ඇතුලත්මුදලි   සහ විජය  කුමාරතුංග  වුහ .රෝහණ විජේවීර සහ  ප්‍රභාකරන් යන  මහත්වරු   පැමිණියේ  අප එහි යනවිටමය . ඔවුන් දෙදෙනාද  දෙවන  පෙළ  අසුන්වලින් වාඩි වුහ .ඇතැමෙකු  ජාතික ඇඳුමෙන්  සැරසී  සිටි අතර සමහරෙකු යුරෝපීය ඇඳුමෙන් සැරසී   සිටියහ . ප්‍රභාකරන් සෆාරි ඇඳුමක් ඇඳ සිටි අතර  විජේවීර කලිසමක් සහ  ඉරි  කමිසයක්  පැළඳ  සිටියේය. පාවහන් පැළද  සිටියේදැයි  මට  මතක  නැත .  කිසිවෙගේ  මුහුණ දෙස  නොබැලු  විජේවීර  වාඩි වූ විගස  කිසියම් පොතක්  කියවන්නට  පටන් ගත්තේය  විජය  කුමාරතුංග  මහතා  වාඩිවී  සිටියේ තරමක් ඈතිනි.  මුහුණෙහි  විශාල  පැල්ලමක් තිබු අතර එය  ඔහුගේ   මුහුණ  තරමක් අවලස්සන  කළේය කළු  කලිසමක්ද සුදු කමිසයක්ද පැළඳ සිටි ඔහු වරින් වර  විජේවීර දෙස  බැලුවේ  සැක  මුසු බැල්මකින් යයි  මට සිතින. 


ජේ.ආර්. ජයවර්ධන  මහතා  දුටු බොහෝ අය ආසන වලින් නැගී සිටි  නමුත් ඇතැමෙකු  නැගී නොසිටියේ  නැගිට සිටීම  ශක්තියක් නොවූ  නිසා  බව  පෙනින .ඩි.එස්.  සේනානායක ,  බණ්ඩාරනායක  මහතා  සහ    මහත්මිය , එන් එම්. පෙරේරා , කොල්වින්  ආර්. ද සිල්වා     ආදීන්  වාඩි වී  සිටියේ  රෝද  පුටුවලය .  මළවුන්ගේ  ලෝකයෙන්ද චුතව  යාමට  ආසන්න  තරමට  ඔවුන් දුර්වල  වී  සිටියහ. ජයවර්ධන   මහතා  මුලාසනයේ  වාඩිවූ  විගස  නැගී සිටි විජය  කුමාරතුංග මහතා ජේ ආර් දෙසට  හැරී "මළවුන් වෙනුවෙන්  ඔබ තුමාව සාදරයෙන්  පිළිගන්නා"  බව කියා සිටි අතර අද දින  පැමිණීම  49 දෙනෙකු  බවද කියා සිටියේය.





"කවුද නොපැමිණි සාමාජිකයා ?" ජයවර්ධන  මහතා  විමසීය.


'අමිර්තලිංගම්  මහත්තය . ප්‍රභාකරන් මහත්තයට සාමාජිකත්වය  දුන්න  නිසා එයට විරෝධය  දැක්වීම  සඳහා අද දින  නොපැමිණෙන  බව දන්වා  තිබෙනවා ." විජය  කුමාරතුංග මහතා ලිපියක් පෙන්වමින්  කීය.


" හොඳයි . දැන් අපි රැස්වීම  පටන්ගමු " ජයවර්ධන  මහතා කීය .


  මාධ්‍යවේදීන්ට  ආසන වෙන් කර  නොතිබුණෙන් මට සිදුවුයේ හිටගෙනම  සටහන් ලියාගන්නටය .


" නෝනාවරුනි ! මහත්වරුනි! " ජයවර්ධන  මහතා  සභාව ඇමතීම ඇරඹුවේය .අප මේ රැස්වීම කැඳවුයේ ඇයි දැයි ඔබතුමාලාගෙන් ඇතැමෙකු   දැනටමත්  දන්නවා   ඇති .  ලබන  මාසයේ  25 , 26, යන  දිනවලදී  අභාවප්‍රාප්ත  දේශපාලනඥයන්ගේ    ජාත්‍යන්තර සම්මේලනයක් සිරියාවේදී  පැවැත්වීමට ඇමරිකා එක්සත්  ජනපදයේ  හිටපු  ජනාධිපති ජෝන් කෙනඩි  මහතා  විසින් කටයුතු  කරමින් තිබෙනවා


  එම සමුළුවට නියෝජිතයන්  තුන් දෙනෙකු එවන  ලෙස මගෙන් ඉල්ලීමක් කර  තිබෙනවා. ඒ සඳහා  සුදුස්සන්  තුන් දෙනෙකු අපි අද  තෝරා  ගත යුතුයි . ඒ  සඳහා මගේ සහභාගිත්වය අත්‍යවශ්‍ය  බව  එතුමා  දැනුම් දී  තිබෙන  බැවින් නියෝජිත  කණ්ඩායමේ  නායකත්වය  මා  විසින් දරන අතර   අනෙත්  දෙදෙනා   තෝරා  ගන්නා   ලෙස  මා   ඔබ සැමගෙන්ඉ ල්ලා  සිටිනවා . එම සම්මේලනයට  යාම සඳහා   23  වන දින  දහවල් 12  ට  මත්තල  ගුවන් තොටුපොළට ගුවන් යානයක් එවන  බවද දැනුම් දී  තිබෙනවා ."


"දවල්  දොළහට ? අපිව මිනිස්සුන්ට  පේනවනේ" කවුදෝ පිටුපස්  සිට කිවේය .


"කොහොම  පේන්නද? බලු බල්ලෙක්වත් රෑට තියා  දවල්ටවත්  යන  තැනක් නෙවෙයිනේ ." ප්‍රේමදාස  මහතා  කීය.


"මට ආරංචි  හැටියට  දකුණු  පළාතේ  මැරිච්ච  අය දැන්  පදිංචිවෙලා  ඉන්නේ  මත්තල එයාපෝට් එකේ " සිරිමා  බණ්ඩාරනායක  මහත්මිය  කීවාය . 


"ඉක්මනට දෙන්නෙක්  තෝර  ගන්න ." ජේ .ආර්. නොයිවසිල්ලෙන්  කීය .


ඉන්පසුව   සභාවේ ඇතිවුයේ   මහත්  කාලගෝට්ටියකි .තමන්වද  නියෝජිතයෙකු ලෙස  තෝරා  ගන්නා  ලෙස  ඉල්ලමින් බොහෝ අය  කෑ  ගසන්නට  වුහ.


"මට  ස්ටාලින්ව මුණගැසී  උපදෙස්  ලබා  ගැනීමට  තියෙනවා. ඒ  නිසා  මට  යන්නම  ඕන." විජේවීර  මහතා  ශබ්ද  නගා  කීවේය.


"මට  පොල්පොට්  පණිවිඩයක් එවල  තියෙනවා හමුවෙන්න  කියල . ඒ  නිසා  ඔය සමුළුවට  මා  යායුතුමයි ."  ප්‍රභාකරන් ඉංග්‍රීසියෙන්  කීවේය .


 " මාෂල් ටිටෝව මුනගැහෙන්න මන් කැමතියි . ඒ  නිසා  මට අවස්ථාවක් දෙන්න ." සිරිමා  බණ්ඩාරනායක  මහත්මිය රෝද  පුටුවෙන් නැගී  සිටීමට උත්සාහ කරමින් කීවාය .


   වේගයෙන් පුටුව  පස්සට  කර  නැගී සිටි  ප්‍රේමදාස  මහතා "කරුණාකරලා  මාව  තෝරාගන්න . මට  ඉන්දිරා  ගාන්ධි එක්ක  ගනදෙනුවක් බේර  ගන්න  තියෙනවා " 


" එක්සත්  ජාතික  පක්ෂෙන් දෙන්නෙක්  යන එක අයුක්ති සහගත ,අසාධාරණ  වැඩක් . ඒ  නිසා  ප්‍රේමදාස  මහත්තයට අවස්ථාවක් දෙනවට  මා  තදින්ම  විරුද්ධයි    .මට  න්‍යායික  ගැටළු වගයක්  තියෙනවා ට්‍රොට්ස්කි  මුණගැහිලා  කතා  කරගන්න . ඒ  නිසා  නියෝජිතයෙකු  ලෙස කරුණාකරලා  මාව  තෝර ගන්න "  යයි එන්.එම. පෙරේරා  මහතා වහා  නැගිට  කිවේය .  ඔහුගේ  මුහුණ  කේන්තියෙන් රතුවී  තිබිණ .


" එන්. එම්.සහෝදරය !  න්‍යායික  ගැටළු විසඳගෙන මොකක්  කරන්නද?  . ට්‍රොට්ස්කි ඔහේ  එක්ක  කතා  කොරන එකක්වත්  නැහැ"


 පීටර්  කෙනමන් මහතා  හරස්  කපමින්  කියා  සිටියේය. "ට්‍රම්ප් අද  තුන්වෙනි  ලෝක  යුද්ධයකට අර අඳිනවා . ඒක සිද්ධ  උනොත් මිනිස්සු කෝටි  ගානක් මැරිලා අපේ  ලෝකේ  ඉඩ  මදිවෙනවා  .ඒ  නිසා ඒක වලක්වන්න  කළ  හැකි  සියල්ල වහා  කළ යුතුයි .ඒ සඳහා  සෝවියට් දේශයේ  හිටපු නායකයන් එක්ක  සාකච්චා  කරලා  වැඩ පිළිවෙලක්  හදාගන්න  මා  සුදානම් වෙන්නේ  . බ්‍රෙෂ්නෙෆ් සහෝදරයත් සෑහෙන කාලෙකට  මුණ  ගැහුනේ  නැහැ . ඒ   නිසා  කරුණාකරලා   මට  අවස්ථාව  දෙන්න ."


තව දුරටත්  කිසිවෙකුට  කතා  කිරීමට ජයවර්ධන  මහතා  ඉඩ  දුන්නේ  නැත.


"  වාද  කොර  කොර  ඉන්න වෙලාවක්  නැහැ. ව්‍යවස්ථාවෙන්   මට තියෙන  බලතල අනුව නියෝජිතයන් මා විසින්  තෝරනවා මිස වෙනත් විසඳුමක් නැති බව    මේ  කාල  ගෝට්ටිය අනුව තමුන්නාන්සේලාට   අවබෝධවෙලා  ඇති.  ඒ අනුව  මා  කටයුතු  කොරනවා . තව දුරටත් ඒ   සම්බන්ධයෙන් කරුණු දැක්වීම     තහනම්  බව  මා මේ සභාවට  දැනුම් දීමට  කැමතියි .තෝරා  ගත්  නියෝජිතයන් දෙදෙනාට යථා  කාලයේදී  දැනුම් දීමට  මා  කටයුතු  කොරනවා . 


'ඔය  තීරණයට  අපේ  බලවත් අප්‍රසාදය  පළ  කරනවා ." රැස්වීමේ  පිටුපස  සිටි  කිසිවෙකු  මහා  හඬින්  කියා සිටියේය.


ඉන් පසු ජේ ආර් ජයවර්ධන  මහතා මළවුන්ට  මා  හඳුන්වා දුන්නේය .


" මා   අද  අමුත්තෙකු  සමග  මෙතනට  පැමිණියේ  තමුන්නාන්සේලා වෙනුවෙන් යුතුකමක් ඉටු කිරීමටයි .මේ සිටින්නේ එම අමුත්තා වන  බර්ටි  රණවීරගේ  මහතා .  ඔහු බ්ලොග් කරුවෙක් .ඒ  කියන්නේ  නවීන  ලෝකයේ  මාධ්‍ය  කරුවෙක් .ඔහුට  පක්ෂයක්,  පාටක් නැහැ . අපි    ගැන  පත්තරවලත් රුපවාහිනි වලත් අන්තර් ජාලයේත්  සෑහෙන්න   බොරු  ලියන බව  මං නොකිව්වට තමුන්නසේලා හොඳින්ම දන්නවා . තමුන්නසේලගෙන් පස්  දෙනෙකුට  මං අවස්ථාව දෙනවා.  මහජනයාට  දැනුම් දිය  යුතු  පණිවිඩයක්  තියනවානම්  දැන් එය ඉදිරිපත්  කරන්නට  කියා. ඔහු  ඔබගේ එම  පණිවිඩ ඔහුගේ   සුදුකුකුලා බ්ලොග් එක  මගින් සමස්ත ලාංකික  පුරවැසියන්ට දැනුම් දෙනවා ඇති. "


වාඩිවී  සිටි  මලවුන්  බොහෝ දෙනෙකු   ආසනවලින් නැගිට ඒ සදහා තමන්ට අවස්ථාව  ලබා  දිය  යුතු  බව  කියමින් කැ ගසන්නට වුහ .


ජේ  ආර්.  ජයවර්ධන   මහතා  නැගී සිට  සියලු දෙනාටම   නිහඬවන  ලෙස   තදින්  කීවේය  . බොහෝ අය ආසනවල  වාඩි  වූ නමුත්   විජේවීර  මහතාත් ප්‍රභාකරන් මහතාත් වාඩි වුයේ  නැත .


" මන් ගැන බොරු තොග  ගණනින්  මාධ්‍ය  කාරයෝ  ලියනවා .ඒ  නිසා  මට අවස්ථාව ඕනෑමයි." විජේවීර  මහතා දෑත්  ඉහලට  ඔසොවමින්  කීවේය ."


" මගේ  මරණය  ගැන ලංකාවේ  මාධ්‍ය අමු බොරු  ලියල තියෙනවා .ඒ  නිසා මට අවස්ථාවක් අවශ්‍යයි " ප්‍රභාකරන් කීවේ කේන්තියෙන්  පුපුරමින්ය . ඔහු  කතා  කළේ  ඉංග්‍රීසි බසිණි


"තමුන්නාන්සේලා හොඳින්ම  දන්නවා මං ප්රෝජාතාන්තර වාදයට  බොහොම  ගරු  කරන  කෙනෙක්  බව .ඒ  නිසා පක්ෂ  හෝ  සංවිධාන  5 ක  නියෝජිතයනට  අවස්ථාව  දෙන්න  කැමතියි .මං නම්  කොරනවා  5 දෙනෙක් දැන් .ඒකට  ගරු  කොරල අනිත් අය නිස්සද්ද වෙන්න  උවමනායි ."


" First ,  I invite  Mr.S.W.R.D.Bandaranaike  to give his message . But don't take  more than five  minutes please."


බණ්ඩාරනායක  මහතාට  නැගී   සිට අදහස් දැක්වීමට  තරම් වාරුවක් තිබුනේ  නැත .ඔහු  වාඩිවී  සිටම  ඉංග්‍රීසි  බසින්  අදහස්  දක්වන්නට  පටන් ගත්තේය .


" මට  තියෙන්නේ  බොහොම  කෙටි පණිවිඩයක් . මං  කනගාටුවෙනවා සිංහල  භාෂාව පමණක්  රාජ්‍ය  භාෂාව කිරීමට ගත්ත  තීන්දුව  ගැන . මහා  මැතිවරණය වෙලාවේ ඒ  පොරොන්දුව  දුන්නේ  නැත්තම් මට  ආංඩු  බලය  ලැබෙන්නේ  නැහැ. මේ  එන් එම් , කොල්වින් ,පීටර් කේනමන්ලා       කිව්ව  විදිහට  සිංහල ,දෙමල භාෂා  දෙකම  රාජ්‍ය  භාෂා කළා  නම් යුද්ධයක් ඇතිවෙන්නේ  නැහැ .ජීවිත  ලක්ෂ  ගානක්  නැතිවෙන්නේ  නැහැ  .  මා  ඒ  පිළිබඳව  බලවත්  ලෙස  තැවෙමින්  සිටින  බව  ශ්‍රී  ලාංකික  ජනතාවට දැනුම් දෙන්නට  කැමතියි ."


" මං ඊ ලඟට ආරාධනා  කොරනවා ආර්.ප්‍රේමදාස හිටපු  ජනධිපති  තුමාට "


ප්‍රේමදාස මහතා පැළඳ සිටියේ සුදු  කමිසයක් හා  සරමකි.ඔහු   ඔරලෝසුවක් පැළඳ සිටි අතර සුදු  ලේන්සුවක්ද අතේ  තබාගෙන  සිටියේය,  මලවුන් අතර බාබු සිටීදැයි  මා පැමිණි පිරිස අතර  සෙවූ  මුත්     රැස්වීම් ශාලාවේ  පසුපස අන්ධකාරයෙන්  පිරී  තිබුණු  නිසා  සොයා  ගැනීමට  නොහැකි විය.


"   මගේ  පුතා  සජිත් ප්‍රේමදාසට  එක්සත්  ජාතික  පක්ෂය  තුළ  හිමි ස්ථානය  ලබා දීම වැලක්වීමට රනිල් ඇතුළු  කල්ලියක් විසින්  කුමන්ත්‍රණ  කිරීම  මා දැඩි  ලෙස  හෙලා  දකිනවා. සජිත් දවසක  මේ  රටේ  ජනාධිපති විය  යුතුයි .ඒ සඳහා එක්සත්  ජාතික  පාක්ෂිකයන්ගේ සහය  ලබා දෙන  ලෙස  ඉල්ලා සිටීමට  මා  කැමතියි."


" මී  ළඟ අවස්ථාව විජය  කුමාරතුංග  මහතාට ."


සිනහ  මුසු මුහුණෙන්  නැගී සිටි  කුමාරතුංග  මහතා අවස්ථාවක්  ලබා දීම  ගැන  ජයවර්ධන  මහතාට  ස්තුති  කර  සිටියේය.


"    බුද්ධිමත් දේශපාලනයක්  කිරීමට   සුදුසු  තත්ත්වයකට රට  මෝරා  නොමැති  බැවින් දේශපාලන  පොර  පිටියට  නොපැමිණෙන ලෙස  මගේ දරුවන්ගෙන් ඉල්ලා  සිටිනවා .මගේ  පණිවිඩය එපමණයි."


" එක  බොහොම  හොඳ  තීරණයක් . මී  ලඟට  විජේවීර  සහෝදරයාගේ අදහස්  කියන්න.."


" මගේ අදහස් වචනයෙන් දෙකෙන්  කියන්න  බැහැ. ඒ නිසා  මා  සමග සම්මුඛ සාකච්චාවක් කිරීමට වෙනත් වෙලාවක  පැමිණෙන  ලෙස  මාධ්‍ය කරුගෙන් ඉල්ලා සිටිනවා.."


"\ජයවර්ධන  මහතා එයට  ඉඩ  නොදෙනු  ඇති  සිතු මා  " මං  ලෑස්තියි දැන්   උනත්. දැන් බැරි නම්    මට කෝල්  එකක් දෙන්න  දවසයි වෙලාවයි  තැනයි  කියල "   හනික  කිව්  මා   මගේ  දුරකථන  අංකය සඳහන්  කාඩ් පත  ඔහු අසලටම  ගොස්  දුනිමි . 


" එයාට  විතරක්  සම්මුඛ  සාකච්චාවක් ලබා දෙනවට අපි එක  හෙලාම විරුද්ධයි. අපිටත් තියෙනවා  මහජනයාට  කියන්න දේවල්  " මලවුන් සියල්ලෝම වගේ  නැගිට  කෑ ගසන්නට වුහ.


" මෙයා  දෙපාරකට  කොල්ලෝ කෙල්ලෝ ලක්ෂයක් විතර  මෙහෙට එව්වා ..ආයිත් පාරක් තවත්  ලක්ෂයක් හමාරක්   මෙහාට එවන්නයි ඔය  ලෑස්තිවෙන්නේ .මෙහෙ දැන්  ඉඩකඩත්  නැහැ ." කොල්වින් කිවේය.


'" ද්‍රෝහීන් කවදත්   ලාංකික විප්ලවයට හතුරු  කම් කළා .මැරිලා  කරන්නෙත්  ඒකමයි ." දෙනවා  ඔලුව  ගැලවිලා   යන්න" කී විජේවීර  පුටුවක් එසවුවේය.


" විජේවීර ! මෙතන  චන්ඩිකම් කරන්න  ආවොත් ප්‍රේමදාසට ලවා    ආයි  පාරක් අර  ආදාහනාගාරේට  දාල අළු කරනවා." ජයවර්ධන  මහතා කීවේ  යක්ෂාවේශ  වුවාක්  මෙන්ය . ජයවර්ධන   මහතාගේ  ආරක්ෂකයන්  දෙදෙනෙකු  වහාම  විජේවීර අසලට  ගොස් ඔහුගේ  හිසට  පිස්තෝල එල්ල  කළහ.


"සමාවෙන්න සර් "  කිව්  විජේවීර එසවූ  පුටුව  බිම  තබා එහි වාඩිවිය .


" Mr. Prabhakaran !  Have you got any  message  for your  people? ජයවර්ධන  මහතා ඇසීය .


ප්‍රභාකරන් විනාඩි  පහක් පමණ එක  දිගට  කතා  කළේය. ඔහු  කතා  කළේ  දෙමල  බසින් බැවින් ඔහු කිව්වේ  කුමක්දැයි මට වටහා ගැනීමට  නොහැකි විය. ඔහු ගේ අදහස්  පාඨකයන් වෙත  ගෙන  ඒමට නොහැකි වීම  ගැන පාඨකයන්  වෙත  මගේ  බලවත්  කණගාටුව  පලකරමි. 


  " හොඳයි. අපේ  රැස්වීමේ  පළමු සැසිවාරය  අවසානයි . දෙවන සැසිවාරය  පාන්දර  දෙකට  ආරම්භ  කරනවා ." කී ජයවර්ධන මහතා ආරක්ෂකයෙකු  කැඳවා ජයවර්ධන  මහතාගේ  මෝටර් රථයෙන්  මා  මතුගමට  ගොස්  බස්සන  ලෙස  කියා  සිටියේය. 


" කාර්  එකේ  ඇති විස්කි  කේස් එකක් .ඒකෙන් බෝතල් දෙකක්  මේ  මහත්තයාගේ  බෑග් එකට දානව." ජයවර්ධන මහතා ආරක්ෂක භටයාට නියෝග  කළේය 

.

" Thank you very much sir .      "

" සර්  නැතිව කාර් එකේ  යනකොට මට  කරදරයක් වෙයිද  දන්නේ  නැහැ ."  මා එසේ  කිවේ මැරුණු  මිනිසුන් දෙදෙනෙකු  සමග යන අතර  තුර මගේ  බෙල්ල  මිරිකා දමනු ඇතැයි ඇතිවූ අධික  භීතිය නිසාය.මේ වන විට බ්‍රැන්ඩි  උගුරු කීපය  ලබා දී  තිබු එඩිතරකම දියවෙමින් තිබිණ 


 " මැරිච්ච  අය  පණපිටින්  ඉන්න  අයට  බයයි  ඕයි. තමුසේ  බය  නැතිව  යනවා." 


ජයවර්ධන මහතාට  ආයුබෝවන් කී මා  ආරක්ෂක භටයා  සමග මෝටර්  රථය   දෙසට  ගමන් කලෙමි . අප රථය ට ආසන්න වනවාත් සමගම වාහනයේ   පිටුපස  දොර  හැරගෙන  කාන්තාවක්  කලබලයෙන්  පිටතට   ආ අතර  අනිත්  පස  දොර  හැරගෙන  පිටතට  ආවේ  රියදුරාය . කාන්තාව  කවුදැයි  හඳුනාගැනීමට මට වැඩි වෙලාවක් ගත  වුයේ  නැත .ඒ විමලා විජේවර්ධනය.  බණ්ඩාරනායක මහතාගේ ආණ්ඩුවේ  ඇමතිවරියක් වූ විමලා විජෙවර්ධනගේ  රුව  තවමත් එතරම් අඩුවී   නොමැති  බව  ක්ෂණිකව  මට අවබෝධ විය  .තරමක  ලැජ්ජා  ගතියක් පෙන්වූ ඇය පැළඳ සිටි  සුදු ඇඳුම සකස්  කරමින්   අඳුරට  ගොස්  ක්ෂණිකව අතුරු දහන් වුවාය.


මා  ඉදිරිපස  අසුනෙන් වාඩිවූ  අතර ආරක්ෂකයා   පිටුපස  අසුනේ  වාඩිවිය. ආරක්ෂයා  දෙස  හැරී  බැලු  රියදුරා " අපේ සර්ට දැනගන්න  තියන්න එපා"  යයි  බැගෑපත්  හඬින්  කීය .


" ආ  මෙන්න ඔහේගේ  බෑග් එක.   විස්කි  බෝතල් දෙකයි බ්‍රැන්ඩි  කොටෙයි  බෑග් එකට දාල ඇති ." ආරක්ෂකයා  මගේ  ගමන් මල්ල  මා අතට දෙමින් කීය .


" සර්ට  කියන්නේ  නැහැ නේද?"  රියදුරා  යලිත්  ආරක්ෂකයාගෙන්   ඇසීය .


මොනවා  කියන්නද අය්යා ! ඒ  ඔහේගේ  පරණ  ගර්ල් ෆ්‍රෙන්ඩ් නේ "


මට දෙවියන් සිහිවුයේ එවිටය . මේ සිටින  රියදුරා මාපිටිගම බුද්ධරක්ඛිත විය  යුතුය . ඔහු  මිය ගියේ  හිරගෙදරදීය  බණ්ඩාරනායක මහතා  මරන්නට  කුමන්ත්‍රණය  කළේ  ඔහුය .  මාපිටිගම බුද්ධරක්ඛිත  හිමිගේ   හොර අඹුව  වුයේ  විමලා විජේවර්ධනය .. රියදුරාගේ  මුහුණ දෙස  බැලුවිට මේ අන් කෙනෙක් නොව   ඒ බුද්ධරක්ඛිතම  බව පැහැදිලිවම  පෙනිණ. මේ සිද්ධිය  මා අන්තර්  ජාලයේ  පළකරනු ඇතැයි  බියට  පත්ව  අතර  මගදී මගේ  බෙල්ල  විකා   මරා දමාවි දැයි මා තුළ ඇතිවූ  බිය  කීමට  මා  ළඟ වචන නැත .


දැන්ඇත්තේ එකම විකල්පයකි  එනම් සිහි  නැතිවෙනතුරුම  බීමය .බ්‍රැන්ඩි  බෝතලය  අතට  ගත්  මා එක  හුස්මටම ඉතිරි වී  තිබු බ්‍රැන්ඩි බෝතල් භාගයම  බී  දැමුවෙමි.


ඉන්පසු   වාහනය  තුලදී සිදුවූ කිසිවක්   මට  මතක නැත්තේ  එක්කෝ  සිහි  නැතිවී  යාම නිසාය    නැතහොත්  වෙරි මතට නින්ද  යාම  නිසාය.   


 යලි    පියවි  තත්වයට  පත්වන  විට  මා සිටියේ මතුගම සුසාන  භුමිය අද්දර  තණකොල   බිස්සේය.  සිදුවුයේ  කුමක්දැයි  සිහියට  ආවේ  තවත්  ටික වෙලාවකට  පසුවය . පොද වැස්සක් වැටෙමින් තිබුණු අතර  ඉතා සෙමින්   හිරු එලිය අවට  පැතිරෙමින් තිබිණ   . මා රැගෙන  ආ මලවුන් දෙදෙනා  මගේ   ගමන් මල්ලද     මා අසලම  තබා  ගොස්  තිබිණ . මා එය  හනික  විවූර්ත  කොට  බැලුවේ  මගේ  සියලුම අඩුම  කුඩුම  තිබේදැයි  බැලීමටය .සියල්ල  තිබුන  මුත් විස්කි  බෝතල් දෙක අතුරුදහන් වී  තිබුණි 


බණ්ඩාරනායක  ඝාතන  නඩු  විභාගයේදී  සාක්ෂි දුන්  විමලා  විජේවර්ධනගේ  නිවසේ  සේවකයකු,  රාති ආහාරය  සඳහා  බුද්ධරක්ඛිත  බොහෝ විට  පැමිණෙන  බවත් ආහාරයට  පෙර    විස්කි බීමට  තදින් ප්‍රිය  කළ  බවත්  කී බව  මට  සිහි වුයේ  ඒ අවස්ථාවේය  .

    ++++++++++++++++++++++++++++++++++++++++++++++++++++++++++

  ( මේ  සත්‍ය සිද්ධි  මාලාව ඇතුලත් ලිපිය   පිලිබඳ  ඔබේ අදහස්  පහළ  තීරයේ  ලියන්න .)

විජේදාස රාජපක්ෂ හෙවත් ඥානසාර බොඩිගාඩ්

මට විජේදාස  රාජපක්ෂ  මහතා  මුලින් හමුවුයේ  2001 වසරේ දීය . 2000 වසරේ  බලයට  පැමිණි රනිල් වික්‍රමසිංහ ආණ්ඩුව අධ්‍යාපන ශේෂ්ත්‍රයට අය...