වෙසක් බයික් රේස් සහ රතු විප්ලවය.

බුදුන් වහන්සේ  කෙරෙහි  මා   සිත  තුළ  බලවත්  ගවුරවයක්  තිබේ.. එයට  හේතුව  නම් දෙව් ලොව  මිනිස්  ලොව සැප සම්පත් විඳින  හැටි  කියා  දුන් නිසා නොවේ. සංසාර  සාගරයෙන් එතෙර  වී  නිවන් දැකීමට  මග කියා දුන් නිසා  නොවේ.  මිනිසෙක් උසස් හෝ  පහත වන්නේ  උපතින් නොව  ක්‍රියාවෙන්  බව  කී නිසාය.   කුලවාදය මත  පදනම් වූ සමාජයක ඉපිද  කුලවාදය ප්‍රතික්ෂේප  කළ නිසාය. කුලවාදයට එරෙහිව  දේශනා  කළ  නිසාය. මිනිස්  අයිතිවාසිකම් ගැන පමණක් නොව සතුන්ගේද  ගස්  වැල්වලද අයිතීන් ගැන දේශනා  කළ නිසාය. යුද්ධයට එරෙහිව දේශනා  කල නිසාය. අහිංසාව දේශනා  කළ නිසාය.

බුදුන්ගේ  කාලයෙන් අවුරුදු 2500ක් ඉක්ම  ගොස්  අද  ජීවත් වන අපේ  රටේ   බහුතරයක් භික්ෂුන්  කෙරෙහි මා   සිත  තුළ  කිසිදු  ගවුරවයක්  නැත්තේ  ඔවුන්  කුලවාදය කර පින්නා  ගෙන  යන නිසාය. ජාතිවාදය දේශනා  කරන  නිසාය. හිංසාවට  සිංහලයන්  පොළඹවන  නිසාය. කොටින්ම බුදුන්ගේ  මග වෙනුවට දෙවදත්ගේ  මග අනුගමනය  කරන  නිසාය.

එවැනි ශ්‍රේෂ්ට  මිනිසෙකු වූ බුදුන් වහන්සේට ගවුරව්‍යක් ලෙස වෙසක් කුඩු දෙක  තුනක් වත් ආලෝකමත් කිරීම  සුදුස බැවින්    අහල  පහල  කඩ  මන්ඩියට  මා අද උදේ වරුවේ ගියේ වෙසක් කුඩු  මිලදී  ගැනීම  සඳහාය.ඉස්සර  නම් වෙසක්  කුඩු විකුණන්නට  තිබුනේ  කොළඹ  පමණය. එහෙත් දැන් නම් අපේ  ගමේ  කඩවලත්  ඒවා විකිණීමට  තිබේ. අනිකුත් ගම්  වලත් එසේ  නොවෙන්නට  හේතුවක්  නැත.නිවන් මග  අහුරන කාමයේ යෙදීමේ අඩුවක් අපේ  රටේ  බවුද්ධ්යන් අතර  නැති බැවින්  ජනගහණය ඉහල  යාම හේතුකොට ගෙන බට  ගහක්වත් වැවෙන්නට  ඉඩක් නැත.  ඒ  නිසා  ගම්වල  අපිටත් වෙසක් කුඩු කඩේ  මුදලාලිගෙන්  මිලදී ගැනීමට සිදුවී තිබේ. 

මේ  ලිපිය  ලියන්නට  පාදක  වුනේ    වෙසක් කුඩු ගැනීමට කඩමන්ඩියට ගිය විට   දුටු දර්ශන කීපයක්  නිසාය.  එක් පැය භාගයක් තුළ පමණක්   තරුණ  ගැටවුන්  රංචු  ගණනාවක්  මෝටර් බයිසිකල්වල  නැගී එකිනෙකා පරයමින් ධාවනය කරනු  මා  දුටිමි. එක් අවස්ථාවකදී ඉතා වේගයෙන් (පැයට  කිලෝ මීටර් 70 තරම  වේගයෙන් )  මා   සිටි දෙසට  බයිසිකලයක් ධාවනය කර ගෙන  ආවේය. ඒ  සමගම  ඔහු පිටුපසින් තවත් බයිසිකලයක්  වෙගයෙන් පැමිණි අතර  අනිත් පසට  වෙනත් වාහනද  ගමන් කරමින් තිබුණි. පසුපසින් පැමිණි ගැටයා වෙට්ටුවක් දමා ඉදීරියෙන්  ගිය බයිකලය  පසු  කළේය. එවැනි වේගයකින් බයිකලයක් පදින්නට හේතුව  මට වටහා   ගත  හැකි වුයේ මා  පසු  කර  යන විටය. ඔහු පිටුපස  සිටියේ  ගැටිස්සියකි. ඇය  සිහින්ය.  පියකරුය. නමුත් අගේ  මුහුණේ  තිබිනේ භීතියකි. ගැටයා   කෙරෙහි කෙන්තියක්ද  ගැටිස්සිය  කෙරෙහි අනුකම්පාවක්ද  මා  සිත  තුළ   පහළ විය.තමන්ගේ  ජීවිතය නැති  කර  ගැනීම  හෝ  අතපය  කඩා  ගැනීමට  වගකිව යුත්තේ  තමන්ය . එහෙත් අනුන්ගේ  ජීවිතයක් නැති කිරීමට  හෝ  අත  පය  කඩා දැමීමට  ඒ  ගස්තර  කොල්ලාට  ඇති අයිතිය  කුමක්ද?   

හවස් වරුවේ  ආරංචි වුවේ  රේස්  එකේ  ගිය  බයිසකල් රංචුවක  එකෙකු  පෙරළුණු බයිසිකලයත් සමග  අඩි  50ක් 60 ක් දුර කාපට්  පාරේ  ඇදී  ගොස්  අත් පාවල  හම,  ගලවා ගත් බවය.

කොල්ලන් වනාහි එඩිතරය. අයුක්තියට එරෙහිව සටන් කරන්නට එක  පයින්ම සුදානම්ය. මිත්‍රයන් වෙනුවෙන් බොක්කෙන්ම   කැප කිරීමට   සුදානම්ය. එහෙත් දුර දිග  හිතීමට අසමත්ය.  ඒ  නිසා වීරකම් කරන්නට  ගොස්  අමාරුවේ  වැටෙති . මොලේ  පහළවන්නේ  අතපය  කඩා ගත්තාට පසුවය .  නැතහොත් චන්ඩි  කම් කරන්නට  ගොස් අම්බානට  ගුටි කෑවාට  පසුවය. මෙය  ෆන් ගන්නා කොල්ලන්ට  පමණක් සීමා  නොවේ. විප්ලව  කරන්නට  යන තරුණයන්ටද  වලංගුය. අවුරුදු  කීපයක් හිරගෙදර  සිටින විට බොහෝ විප්ලවකරුවනට  මොලය  පහලවේ   

1971  කැරැල්ලට සහභාගිවී හිරගෙදර  ගිය  අයගෙන්  90% ආයිත්  ජවිපෙට එකතු  උනේ  නැත. 87-89 කැරැල්ලට සම්බන්ධ වී කෙසේ  හෝ  පණනල  බෙර ගත්ත  අයගෙන් 90% ද යලිත්  ජවිපෙට සමග දේශපලනයට බැස්සේ  නැත. 71  කැරැල්ලට  සම්බන්ධ හිරේ  ගිය  අයගෙන්   සැහෙන  පිරිසක් වෙනත් දේශපාලන  සංවිධාන  හදා ගෙන දේශපාලනය කළ නමුත්   කාලයාගේ  ඇවෑමෙන් ඒවා අභාවයට  පත්විය. 

අයුක්තියට එරෙහි  තරුණයන්ට ජවිපෙ ආකර්ෂණය වූ බැවින් ඔවුන්ගේ  සැලකිය  යුතු  පිරිසක්  ජවිපෙ වටා යලිත් එකතු වී තිබේ. දෙමල ජනයාගේ  ඉල්ලීම් වලට එරෙහිව  ජවිපෙ හඬ  නැගු බැවින්ද  ඇතැම් සිංහල තරුණයනට මෙන්ම මධ්‍යම පන්තික ස්තරයකටද එය  ආකර්ශනීය වී තිබේ.දුෂණ විරෝධී ජවිපෙ  හඬද ඇතැම් පිරිස්  තුළ  ජවිපෙ  කෙරෙහි ප්‍රසාදයක් ඇති වීමට  හේතු වී තිබෙන  බව  පෙනේ.

එහෙත් ඔවුන් සමග සිටි බලවත් පිරිසක් ජවිපෙන් ඉවත්වී පෙරටුගාමී නමින් සංවිධානයක් ගොඩ නගා ගැනීමත්  සෝමවංස අමරසිංහ ඉවත් වී කර  විවේචන නිසාත් ජවිපෙට නරක  කල දසාවක් උදාවී තිබේ  යැයි  කිව හැක. ඉකුත් මහා  මැතිවරණයේදී  මන්ත්‍රී ආසන 20ක් බලාපොරොත්තු වූ නමුත්  එය  හයකට  පමණක් සීමා වීමෙන්ද  ප්‍රබල නායකයනට පවා  ආසන  අහිමි වීමෙන්ද  එය  තහවුරු විය. 88-89 සමයේ  ජවිපෙ  හැසිරීම එම සංවිධානයට මිනිසුන්  විරුද්ධ වීමට බෙහෙවින් බල පා තිබේ.

ජවිපෙ  පිලිබඳ කරන විවේචන  එයට සම්බන්ධ  තරුණයන් කිසිසේත් පිලි ගන්නේ  නැති බව මා  හොඳින්ම දනිමි. මා  ජවිපෙ ක්‍රියාකාරිකයෙකු  ලෙස  කටයුතු   කරන  සමයේ මාද හැසිරුණේ එසේය. ජවිපෙ  විවේචනය   කරන්නන්   ද්‍රෝහීන් ලෙස සැලකීමට නායකයන්  විසින් සාමාජිකයන් හුරු කර  තිබීම එයට  හේතුවය.

1990 දක්වා ජවිපෙට  තරුණයන් එකතු වුයේ  සමාජවාදී පාලනයක් මේ  රටේ   ස්ථාපිත  කිරීමේ  අරමුණෙන්ය.  එහෙත් 1991 දී  සෝවියට් දේශයත් ඒ  සමග නැගෙන හිර  යුරෝපයේ තිබු  ධනවාදී නොවන  රාජ්‍ය පද්ධතිය කඩා වැටීමත්  චීනය ධනවාදී  මාවතේ  ගමන් කිරීම  නිසාත් සමාජවාදය  පිලිබඳ බලාපොරොත්තු ලොව  පුරා වසන   ප්‍රගතිශීලී   ජනයා  තුළ  ගිලිහී  ගොස්  තිබේ. එය අපේ  රටටද පොදුය. එබැවින් 1990 පෙර මෙන් ජවිපෙට සමාජවාදී විප්ලවයක් ගැන කියමින්  තරුණයන් එය වටා  ආකර්ෂණය  කර  ගත නොහැක.

යම් දිනක ජවිපෙට   මහජනයාගේ සහය  ලබා ගෙන  ආණ්ඩුවක්  පිහිට වුවත් එය ධනේශ්වර  ආණ්ඩුවක් පමණක් වන්නේය.  එහි පැවැත්ම සහතික වන්නේ  ධනේශ්වර  ලෝකයේ  සහය  ලැබුන හොත්  පමණි.ඔවුන්ගේ  සහය ලැබෙන්නේ  වේගවත් ප්‍රතිසන්ස්කර  නොකරන්නේ  නම් පමණි. තෙල් තිබුණු වෙනිසියුලාව වේගවත්  ප්‍රතිසංසකරණ කළ නමුත් ඉකුත්  මැතිවරණයේදී  එය  පරාජයට  පත් විය. එයට හේතුව  වුයේ  ආර්ථිකයේ ඇතිවූ  කඩා වැටීමයි.

එබැවින්  අනාගතයේ  යම් දවසක  මහජන සහය ලැබුනහොත් ඔවුන්ට  පිහිටුවීමට  සිදු වන්නේ  මහින්ද  රාජපක්ෂ පන්නයේ  ආණ්ඩුවකි.එහෙත් එවැනි  ආණ්ඩුවකට  කල හැක්කේ  කුමක්ද  මේ  රට වැටී තිබෙන  ණය උගුලෙන්  නිදහස්  වන්නේ  කෙසේද ? කල හැකි වන්නේ  ගත ණය  වාරික සහ  පොලී ගෙවීමට  තව දුරටත් ණය  ගැනීමය.  ණය දෙන්නේ  කොන්දේසි මතය කොන්දේසි වන්නේ  සහනාධාර  කැපීම , රුපියල අව ප්‍රමාණ  කිරීම සේවක වැටුප් වැඩි  නොකිරීම , විශ්‍රාම වැටුප් කප්පාදුව  වැනි දේය.

ජවිපෙ  සමග එකතුවී  ඉතා අවංකව දේශපාලනය  කරන  තරුණයන්ගේ අනාගත  බලාපොරොත්තු ඉටුවීමේ ඉඩ  කඩ  ඉතාම  අවම  වීම ඛේදවාචයකි