අවුරුදු 26 කට පෙර සිදුකළ 'බලු ජුලිය '

   'බලු ජුලිය' මහා පරිමාණයෙන් 1983 ජුලි 24 මා සිටියේ කොළඹය .මා එදින කොළඹ ගියේ නැවත මා සේවයේ පිහිටුවන්නට යන බව ආරංචි වී ඒ වන වැඩි දුර සොයා  බැලීමටය .1980 ජුලී මහා වැඩවර්ජනයට සහභාගිවීම නිසා අවුරුදු තුනකට අධික කාලයක්  ජේ ආර් ගේ ආණ්ඩුව මා ගුරු සේවයෙන් නෙරපා  හැර තිබුණි .

එකළ අධ්‍යාපන අමාත්යංශය තිබුණේ කොළඹ 2 මැලේ වීදියේය.  මා  සේවයේ පිහිටුවන ලෙස කලුතර ප්‍රාදේශීය අධ්‍යාපන කාර්යාලයට දැනුම් දී ඇති බව අමාත්‍යංශයෙන් දැනගන්නට ලැබිණ .

අමාත්‍යංශයෙන් පිටතට පැමිණි විට බොහෝ දෙනෙකු කොටුව දෙසින් නගින දුම් රොටු දෙස බලා සිටියහ .දෙමල මිනිසුන්ගේ වෙළඳ ව්‍යාපාරවලට ගිනි තබා ඇති බව බලාසිටියවුන්ගේ කතා බහින් මට අවබෝධ විය .

මතුගම බලා ඒමට බස් රථයක් අල්ල ගැනීමේ අදහසින් ලේක්හවුසිය පැත්තට පා ගමනින් ගොස් රීගල් සිනමා හල ඉදිරිපිට පාරේ අනිත් පැත්තේ තිබු බස් නැවතුමක් අසලට වී සිටියෙමි.

පොලු අතේ තබාගෙන සිටි මැරයෝ කීප දෙනෙක් පුද්ගලික වාහන නවතා ප්‍රශ්න කොට දෙමලු සිටියේනම් වාහන වලින්  එලියට ඇද පොලුවලින් පහර දුන්හ .ඇතැමෙකු ගුටි කාගෙන රීගල් සිනමා හලේ පිටිපසට දිවුහ. ඉන්පසු මැරයෝ පෙට්‍ර්ල් වත්කොට  එම වාහනවලට ගිනි තැබුහ 

දහස් ගානක් මිනිස්සු මේ ප්‍රහාර දෙස නිහඬව බලා සිටියහ .

ඒ අතර හමුදා ට්‍රක් රථයක් මැරයන් පසු කොට ගෙන කොම්පඥඥ වීදිය දෙසට ගියේය එහි සිටි සෙබළු අත තුවක්කු තිබිණ .ඔවුන්ගේ කීප දෙනෙකු මැරයන්ට අත් ඔසොවා ආචාර කළහ.

මේ අතර එම ස්ථානයට පොලිස් පරික්ෂයෙකු හැකි යයි සිතිය හැකි නිලධාරියෙක් පැමිණ රිවොල්වරයෙන් අහසට වෙඩි තබමින් මැරයන් පලවා හැරියේය . මැරයෝ මීටර් 100 ක් පමණ  ඇතට ගොස් යලිත් දෙමල මිනිසුන් එන වාහන නවතා පහර දුන්හ .පොලිස් නිලධාරියා එතනට දුව ගොස් යලිත් මැරයන් පලවා හැරියේය .මැරයෝ යලිත් පෙර සිටි තැනටම පැමිණ පහර දීම ඇරඹුහ .පොලිස් නිලධාරියා යලිත් එතනට පැමිණ ඔවුන් පලවා හැරියේය . බස් රථයක් පැමිණෙන තුරු එය සිදුවිය .

මතුගම බලා යන බස් රථයක් පැමිණි අතර එය  කට පෙත්තටම පිරි තිබිණ . කෙසේ හෝ එහි එල්ලී බස් රථය තුලට රිංගා ගතිමි.

ගාලු පාරේ  විශේෂයෙන්ම බම්බලපිටිය දෙපස හැම තැනකම ගිනි ජාලා ඇවිලෙමින් තිබිණ . වැල්ලවත්ත හරහා යා නොහැකි බව කවුදෝ  කීවෙන්  අතුරු පාරකට බස් එක හැරවීය. අතුරු පාරේ තිබු දෙමල නිවෙස් වල ශීතකරණ මෝටර් බයිසිකල් පොඩි පට්ටම් කර හෝ ගිනි තබා තිබෙනු දැකිය හැකි විය.

බස් රථය යලි ගාලු පාරට දැම්මේ දෙහිවලිනි .එහිද දකින්නට තිබුණේ වෙළඳ සල් ගිනි ගන්නා අයුරුය.

මොරටුව හරියේ කතෝලික පල්ලියක් තුලට මැර පිරිසක් ඇතුළුවීමට උත්සාහ කර අයුරු දකින්නට ලැබිණ. තුවක්කුවක් තබාගෙන සිටි එක පොලිස් නිලධාරියෙකු එය වැලක්වීමට බලවත් උත්සාහ  ගනිමින් සිටිනු දකින්නට ලැබිණ . පල්ලිය තුළ සිටියේ  ජිවිත බේරා  ගැනීමට පැමිණි දෙමල පවුල්ය .

කළුතරට එන විට එහි තිබු දෙමල කඩයක් ගිනි ගනිමින් තිබුණේය. එහි අයිතිකරුට පැනයාමට ඉඩ නොදුන් බැවින් එම ගින්නට අසුවී ඔහු  මිය ගිය බව පසුව දැනගන්නට ලැබිණ.

මතුගමට පැමිණෙන විට එහි කඩ ගිනි තබා නොතිබුන නමුත් තම වෙළඳ සල වසා ආපු යමින් සිටි අයෙකුගේ මුදල් තිබු මල්ල මා ඉදිරිපිට දීම දෙදෙනෙකු විසින් මංකොල්ල කෑහ.

මා මතුගමින් පිටව ගිය විගසම පිටින් පැමිණි පිරිසක් විසින් මතුගම දෙමල ජාතිකයන්ගේ කඩ ගිනි තැබූ බව ආරංචි විය.

එසේ ගිනි තැබූ වෙළඳ සල් අතර මෙට්‍රෝ ෆාමසිය සහ නන්දා ස්ටෝර්ස් ද විය .

එම ෆාමසියේ තිබු බෙහෙත් සිංහලයෙකුට අයත් බෙහෙත් හලකට ඇද ගැනීමෙන් පසු ගිනි තැබූ බව පසු කලක මගේ මිතුරෙකු මා සමග කිවේය.

නන්දා ස්ටෝර්ස් හි අයිතිකරු මා හොඳින් දන්නා අයෙකු විය.  දිනක් මට බෙහෙත් වගයක් ගෙන යාම සඳහා හිස් බෝතලයක් අවශ්‍ය වූ බැවින් ඔහුගේ වෙළඳ සලට ගොස් අවශ්‍යතාවය කි විට මීටර් 200 ක් පමණ දුරකින් තිබු  ඔහුගේ කුලී ගෙදරට සේවකයෙකු යවා බෝතලයක් ගෙන්වා දුන්නේය.

ඔහුගේ වෙළඳ සල ගිනි තැබීමෙන් පසු සිය දරු පවුල නඩත්තු කිරීම සඳහා ගෙයින් ගෙට යමින් ඇඳුම් පැළදුම් විකුණුවේය.   වරක් ඔහු හමුවූ විටෙක තොරතුරු විමසු විට බිරිඳ පිළිකාවකින් පෙලෙන බැවින් හැම අතටම තමා  ණය තුරුස් වී සිටින බව මා සමග කිය.

උතුර නැගෙනහිර හැර රටේ හැම තැනකම දෙමල සංහාරයක් සතියක් පුරා කළද ජේ ආර් කට ඇරියේ නැත. අට වෙනි දවසේ ගුවන් විදුලියෙන් ප්‍රකාශයක් කළ ජේ.ආර්." දැන් ඔය අතට ගත්ත කඩුව බිම තබන්න"යි කිවේය.

කරුණා අම්මාන් කල ප්‍රකාශයකට අනුව 'බලු ජුලිය' වන විට කොටි සංවිධානයට සිටියේ 80 කට අඩු භට සංඛ්‍යාවකි එහෙත් කළු ජූලියෙන් පසු උතුර නැගෙනහිරට යවන ලද 50 දහසකට වැඩි ද්‍රවිඩයන් අතරෙන් දහස් ගණනක් කොටි සංවිධානයට එකතු වූ බව ඔහු කියා තිබුණි .

උතුරු නැගෙනහිර දෙමල තරුණ තරුණියන් වැඩි වැඩියෙන් කොටි සංවිධානයට එකතු  වීමට  කළු ජුලිය කල පෙළඹවීම අති මහත්ය .

සිංහල දෙමල මුස්ලිම් මිනිසුන් ලක්ෂ දෙකකට අධික සංඛ්‍යවකට මරණය අත් කර දෙමින් යුද්ධය තවත් අවුරුදු 26 ක් ගෙනයාමට ප්‍රභාකරන්ට බලය, ජවය සහ  ශක්තිය ලබා දීමට බලු ජුලිය මහත්සේ ඉවහල් වූ බව නොපිළිගන්නේ ඔලු නැති බුරුවන් පමණි .