ඩොනල්ඩ් ට්‍රම්ප්ගේ හාමිනේ

ඇමරිකානු ජනාධිපති ඩොනල්ඩ් ට්‍රම්ප්ගේ නෝනා මෙලනියා ට්‍රම්ප් වතුර ගෙන ඒමට දිනපතා උදේ හවස අල්ලපු වත්තට යන්නීය ඊට හේතුව ධවල මන්දිරය තිබෙන භුමියේ ලිඳේ වතුර කිවුල් රහ නිසාය .ඇය එම ලිඳේ වතුර පාවිච්චි කරන්නේ රෙදි සේදීමට, වලන් පිගන් සේදීමට ආදි වැඩ වලට පමණි.

අල්ලපු ගෙදරට වතුර ගෙන එන්නට ඇය ගිය විට එම නිවසේ සිටින කාන්තාව මෙලනියා සමග ඕප දුප කතා කරන්නට නොවරදවාම එන්නීය ගිය සතියේ ඉරිදා හැන්දෑවේ වතුර ගෙන ඒමට ගිය විට මෙලනියා යන විට අල්ලපු ගෙදර කාන්තාව හෙවත් ජේන් ලිඳ ළඟ සිටියාය

"ඔයාගේ මහත්තය මේ දවස්වල චීනෙට ලවක්දෙවක් නැතිව බනින්නේ ඇයි අනේ ?අමු කැවිලද කියල හුඟක් අය අහනව ' ජේන් ඇසුවාය

"මේකනෙ ජේන් , අපේ මිනිහගේ ගොන් කම් නිසා මේ රටේ මිනිස්සු ලස්සෙකට වඩා කොරෝන වලින් මැරුනනේ. ඉතින් ලබන සැරේ චන්දෙ ඉල්ලන්නේ නැහැ කිව්වා ඉල්ලලා පරදින්න බැහැ කියල "

"ඉතින් චීනෙට බනින්නේ මොකද ? චීනේ මොකක්ද කරපු වැරැද්ද ?"

"මෙහෙමයිනේ අනේ, එයාගේ උපදේශකයෝ දීපු උපදෙස් නේ "

"නල්ලමලේ උපදේශකයෝ තමයි එයාටත් ඉන්නේ .උන් මොනවද කියල තියෙන්නේ "ජේන් ඇසුවාය .

"ඒ අය කියල කොරෝනවලින් මිනිස්සු මැරිච්ච එක තමන්ගේ ගොන්කම් වලින් උනා කියන එක වහගන්න තියෙන හොඳම ක්‍රමේ චීනෙට බනින එක කියල . මේ ලෙඩේ විස්තර චීනේ හංගපු නිසා ඇමරිකාවට බෝ උනා කියල එක දිගට බනින්න කියල. එහෙම දිගටම බැනගෙන බැනගෙන බැනගෙන යන කොට මිනිස්සු ඒක පිළිඅරගෙන ලබන සැරෙත් අපේ මහත්තයට චන්දෙ දෙයි කියල "

"ඔව් අනේ ඇමරිකාවේත් ඉතින් සැහෙන්න බය්යෝ ඉන්නවනේ .උන් නිකාම්මම අහුවෙනවා " ජේන් කිව්වාය

"බායි මෙලනියා "

"බායි ජේන් "

මැටි කලයට වතුර පුරවා ඉනේ තබා ගත් මෙලනියා උකුල දෙපසට පද්දවමින් ධවල මන්දිරය දෙසට ලැසි ගමනින් ගියාය .