සජිත් පේමදාසගේ සිහින මාලිගාව

       

      අද උදේ මම අපේ නැන්දා කෙනෙකුට බොහෝ කලකට පසු දුරකථන ඇමතුමක් දුන්නෙමි .අරමුණ වුයේ තොරතුරු දැනගැනීමය නැන්දගේ සහ වැඩිමහල් පුතුගේ විස්තර දැනගැනීමෙන් පසු බාල පුතාගේ විස්තර ඇසීමි.

බාල පුතා සංගීතඥයෙකි ඔහුට සංගීත කණ්ඩායමක් තිබෙන අතර ප්‍රධාන සංචාරක හෝටල් කීපයක් සමග වාර්ෂික ගිවිසුම් අත්සන් කොට සංගීත සැන්දාවන් හෝටල්වල පවත්වා සංචාරකයන් පිනවීම ඔහු අවුරුදු 30 ක් පමණ කාලයක් ඔහු කළේය. එමගින් දරූ පවුලක් සමග අගනුවර ආසන්නයේ නගරයක ජිවත් වීමට ප්‍රමාණවත් ආදායමක් ඔහු ඉපැයීය .

"දැන් බාල පුතා ගෘප් එක අරන් හෝටල්වල යන්නේ නැහැ .හෝටල්වලට බෝම්බ ගැහුවට පස්සේ ඒක නැවතුන .වෙලාවට ස්ටුඩියෝවක් දාල තිබුන නිසා ජිවිතේ ගැටගහගෙන යනවා " නැන්දා මා සමග කීවාය .

රටේ ආර්ථිකය තිබෙන්නේ කොතනදැයි හිතා ගැනීමට මෙම  පුර්විකාව හොඳ ඉඟියක් සපයයි . එහෙත් එක්සත් ජාතික පක්ෂයේ ඇතැම් නායකයන් ජනාධිපති අපේක්ෂකත්වය ගැනීම සඳහා බලු පොරයක නිරත වී සිටින්නේ යුඑන්පි අපේක්ෂකයාට චන්දය දීමට රටේ බහුතරයක් ජනයා සැදී පැහැදී සිටිනාවක් මෙන්ය .මේ මිනිසුන්ගේ ඔළුවල තියෙන්නේ මොනවාදැයි මට නම් සිතා ගත නොහැක .

ඇත්ත වශයෙන්ම යුඑන්පි කාරයන්ට වලකපන්නේ සජිත් ඇතුළු පිරිස යන්න මගේ වැටහීමයි.

ඒ කාරණාවන් දෙකක් නිසාය .

පළමු කාරණාව පක්ෂයේ තීන්දුවක් නොමැතිව ජනාධිපති අපේක්ෂකයා තමන් බව හඟවමින් සජිත් මැතිවරණ ව්‍යාපාරය ඇරඹීම මගින් පක්ෂයේ බෙදීමක් ඇති කිරීමය.

දෙවෙනි කාරණාව යුඑන්පියේ බෙදීම නිසා ප්ධන පක්ෂ දෙකටම අයත් නොවන අය ක්‍රමානුකුලව ගොටාභය පිලට සහ අනුර කුමාරට හේත්තු වීමය.

ඇත්ත වශයෙන්ම සජිත්ට දිනන්නට හැකියාවක් නැත යන්න මගේ අදහසයි.

සහරාන්ගේ ප්‍රහාරයෙන් පසු රටේ ව්‍යාපාර රැසක් වසා දමා තිබෙන අතර තවත් ඒවා දැන් යන්නේ හොම්බෙනි. නැවතත් එවැනිප්‍රහාරයක් ඇති වීමට ඉඩ නොදෙමින් රට ගෙනයාමට හැකි බලවත් අයෙකුට රටේ පාලනය භාර දීම බහුතරයක් චන්ද දායකයන්ගේ අපේක්ෂාව බව මගේ විශ්වාසයයි.

එම අපේක්ෂාව ඉටු කිරීමට සජිත් සමත් වෙතයි බහුතරයක් මිනිස්සු පිළිගන්නේ නැත .සජිත්ගේ 2.50 කතා නිසා ඔහුගේ ජනප්‍රියතාවය තවත් අඩුවී තිබේ .

එජාපයට දිනන්නට උවමනා නම් කල යුත්තේ බලවත් අපේක්ෂකයෙකු ඉදිරිපත් කිරීමය. සජිත් වෙනුවට රනිල් ඉදිරිපත් කිරීමද කොහෙත්ම ආදේශයක් නොවේ .සජිත් තරම් වත් ජනප්‍රියත්වයක් රනිල්ට නැත .
කරු ජයසුරිය වුවද මහජන විශ්වාසය දිනාගත හැකි අපේක්ෂකයෙකු ලෙස මට නම්   පේන්නේ නැත.

සොයාගත යුත්තේ ගෝටා වැනි බිහිසුණු පුද්ගලයෙකු පරාජය කළ හැකි සිංහල දෙමල මුස්ලිම් කාගේත් සහය ලබාගත හැකි අපේක්ෂකයෙකි.

එහෙත් ඒ සඳහා ඇත්තේ සීමිත  කාලයකි .