දෙවියෝ සිටීද ?

 

දරුවාගේ අසනීපයට වෛද්‍ය ප්‍රතිකාර නොදී දෙවියනට යාඥා කොට රෝගය සුව කරන්නට ගොස් දරුවා මියයාම නිසා බඩල්ගම මවක් පියෙක් සහ මිත්තනියක් පොලිස් අත්අඩංගුවට ගත් බව ඊයේ වාර්තා විය

ඉස්සර නම් මෙවැනි සිද්ධීන් ගැන අපට අහන්නට ලැබුනේ ඉන්දියාවෙනි .

ඉන්දියාව දේවාල ලක්ෂ ගණනක් තිබෙන රටකි. 33 කෝටියක් දෙවියන් සිටින බව ඉන්දියානුවෝ විශ්වාස කරති. දෙවියන් 33 න් කෝටියත් රැගෙන ඉන්දියානුවන් මෙහි ආ බැවින් දෙවියන් 33 ක් කෝටියක් සිටින බව අපිද විශ්වාස කරමු .33 න් කෝටියක් දෙව් දේවතාවන්ට පිං අනුමෝදන් කරන ලෙස භික්ෂුන් කියනු දහස් වාරයක් ඔබට ඇසී ඇති බවට සැකයක් නැත .

ක්‍රිස්තියානි ආගමිකයන්ට ඇත්තේ එක දෙවියෙකි .එම දෙවියන් ගේ පිහිට සියල්ලෝම යදිති ඇතැම් ක්‍රිස්තියානි නිකායන් දේව බලයෙන් කොරුන් ඇවිද්දවන බවත් ගොළුවන් ලවා කතා කරවන බවත් බිහිරන්ට ඇසීමේ හැකියාව ලබා දෙන බවත්, අන්ධයනට පෙනුම ලබා දෙන බවත් කියති විදේශික පුජකයෝ මිනිසුන් පිට්ටනිවලට කැඳවා එවැනි යාඥා සංදර්ශන පවත්වන අවස්ථා වලට මිනිස්සු තම නිවෙස්වල සිතින අන්ධයන් ,බිහිරන් කොරුන් ගොළුවන් රැගෙන යති. සුවවූ බව කියමින් ඇතැමුන් වේදිකාවට නගිති

එහෙත් එය ඇත්තද බොරුද කියා සෙවූ කෙනෙක් නැත .එ නිසා සාමාන්‍ය මිනිස්සු ඒවා ඇත්ත ලෙස පිළිගනිති .තමාගේ ගෙදර සිටින කොරා අන්ධයා බීරා ගොළුවා යාඥාවට එක්කර ගෙන ගියත් එහිදී සුව නොවුනත් අනාගතයේ දිනක සුව වනු ඇතැයි විශ්වාස කරති .

වික්ටර් රත්නායකගේ නැතිවූ කඩහඬ ලබා ගැනීම සඳහා පුජකයෙකු පිහිට පැතු බව වසරකට හමාරකට පෙර ආරංචි විය ඒ ගැන පින්තුරද මාධ්‍යවල පලවිය .

මීට අවුරුදු දෙකකට පෙර තමිල්නාඩුවේ සිට වව්නියාවට පැමිණි ක්‍රිස්තියානි නිකායක පුජකයෙක් දෙවියන්වහන්සේගේ බලයෙන් කොරෝනා සුවකරන බව කියා යාඥාවක් එහි පැවැත්වීය. එම පුජකයාගෙන් සහභාගිවූ කීපදෙනෙකුට පුජකයාගෙන් කොරෝනා ආසාදනය වූ අතර ආපසු තමිල්නාඩුවට ගිය පුජකයාට කොරෝනා උග්‍රවී වී මියගිය බව මාධ්‍යවල පලවිය

විශ්ව බලයෙන් ලංකාවේ කොරෝනා මුලින්ම පිස දැමීමට ගංගාවලට මුට්ටි දමන ලෙස කිව් වෛද්‍යවරයෙක් බවට හඳුන්වා ගත් එලියන්ත වයිට් කොරෝනා ආසාදනය වී මිය ගියේය

පිරිත් කියා කොරෝනා රටින් තුරන් කර දැමිය හැකි යයි විශ්වාස කරමින් පිරිත් කියන භික්ෂුන්ටද කොරෝනා ආසාදනය වී තිබේ ප්‍රසිද්ධ භික්ෂුවක් කොරෝනා ආසාදනය වී මියගියේය

පසුගිය කාලයේ මහා බලගතු යයි කියන මුන්නේශ්වරන් දේවාලයේ තිබු රත්තරනින් තැනු බොහෝ වටිනා දේව ප්‍රතිමාවක් කිසිවෙකු හොරකම් කොට තිබිණ

සීනිගම දේවාලයේ මුදල් හොරකම් කොට තිබුණු බවත් කපුවා පොලිසි ගිය බවත් වාර්තා විය

කතරගම දේවාලයේ තිබු රු. කෝටි ගණනක් වටිනා රන් තැටියක් මාස කිපයකට පෙර අතුරුදන් කරනු ලැබිණ අද වෙන තුරු හොරා අහුවුයේ නැත.

ඉස්ලාම් ආගමිකයන්ගේ දෙවියා අල්ලාය. අල්ලා දෙවියන් කෙරේ විශ්වාසයක් නැති අයට මුස්ලිම් සමාජයේ ජීවත්වන්නට ඉඩක් නැත අල්ලා දෙවියනට අපහාස කරන අය මරා දැමීමට ඉස්ලාම් අන්තවාදීන් මොහොතක් වත් පැකිලෙන්නේ නැත .ලංකාවට ආ සුනාමියෙන් මුස්ලිම් ජනයා විශාල ලෙස මියගියෙන් ඔවුන්ගේ ජනගහන ප්‍රතිශතය 1%කින් අඩු විය .අල්ලා දෙවියන් එම ජනතාව බේරාගන්නට ඉදිරිපත් නොවුනද මුස්ලිම් ජනයා අල්ලා දෙවියන්ගේ පිහිට තව දුරටත් ඉල්ලා සිටිති

දේව බලය කියා දෙයක් නැති බව දහස් වාරයක් ඔප්පු වුවද වැඩි දෙනෙකු එය පිළිගන්නට සුදානම් නැත

ඒ ඇයි ?

මිනිසුන්ට තර්කානුකුල ලෙස සිතා නිගමනවලට ඒමට තරම් බුද්ධියක් නැති නිසාද ?

නැතහොත් මායා ලෝකවල ජීවත්වන්නට ඇති කැමැත්ත නිසාද?

එසේත් නැත්තම් අසරණවූ විට මිනිසුන්ට තම දුක කියා හිතට සැනසීමක් ලබා ගැනීමට කුමන හෝ අදෘශ්‍යමාන බලයක් අවශ්‍ය නිසාද ?