Thursday, June 14, 2018

තුවක්කුවට විශ්‍රාම දුන් කර්නල් රත්නප්‍රිය සහ ගෝටා



 ඡායාරූපය:

    

කර්නල් රත්නප්‍රිය බන්දු  නමැති මනුස්ස  හමුදා  නිලධාරියා  කවුදැයි සොයන්නට මා වෙහෙසුනෙමි .ඔහු ගැන කිසිදු විස්තරයක්  ඉංග්‍රීසි බසින් ඇත්තේම  නැත .ඔහු ගැන  විකිපීඩියා විශ්ව කෝෂයට ඉංග්‍රීසියෙන් තබා සිංහලෙන් වත්  කිසිවෙකු  ලියා  නැත . සිංහල  බසින්  ඔහු පිළිබඳව පල වී  තිබුනේ මාධ්‍ය වාර්තා  පමණි. ඒවා  වැඩිමනත්ම ලියා තිබුනේ  අලෙවිය වැඩි කරගැනීමේ අරමුණෙන්  ජාතිවාදය  කවලම් කොටය . එයින් වෙනස්ව  කිසියම්  විස්තරයක්  ලියා  තිබුනේ රැස  පත්තරය  පමණි .


 ඔහු විශ්ව මඩුවට  ගොස් යුද්ධයෙන් කඩා වැටුණු මිනිසුන් වෙනුවෙන් අත හිත දීමේ වැඩ පිළිවෙල ඇරඹුවේ  2012 දිය . ආණ්ඩුවේ නියමය  පරිදි  ඔහු සිවිල් ආරක්ෂක දෙපාර්තමේන්තුවක් ආරම්භ  කළ  අතර  පළමු දවසේම දෙමල තරුණ  තරුණියන් 4000  ක් එයට  බැඳුනු බව ඔහු  කියයි. එසේ බැඳුනු පිරිස අතරේ  පුනරුත්ථාපනය  කරනු ලැබූ LTTE සාමාජිකයන්ද වුහ  .ඔහු,  හිටපු LTTE සාමාජිකයන් හඳුන්වන්නේ  හිටපු  ත්‍රස්තවාදීන්ද කියා නොව ' ළමුන් ' කියාය . ඔවුන්ට  ඔහුගේ කාර්යාලය හුදු කාර්යාලයක්  නොවේ .එය  ඔවුන්ගේ සියලු ප්‍රශ්නවලට  පිළිතුරු සපයන තැනකි .ප්‍රේම සම්බන්ධයක් හෝ ඒ හා සම්බන්ධ  ගැටළුවක්  ඇතිවූ විට පවා  ඒ  ගැන කීමට  ඔවුහු  ඔහුගේ  කාර්යාලයට  යති . මේ  වන විට  උතුරේ  තිබෙන  ජනප්‍රියතම රාජ්‍ය ආයතනය සිවිල් ආරක්ෂක දෙපාර්තමේන්තුව  බව  කර්නල්වරයා  කියයි .


 යුද්ධයෙන් බිඳ වැටුණු  උතුරේ මිනිසුන්ට  ජීවත්වීමට අරමුණක්  හදා දීම තම  අරමුණ වූ බව  කියන ඔහු මිනිසුන්ට  ජීවත්වීමට ආධාරවන  කර්මාන්ත රැසක් ද ඇරඹීමට මුලික වී තිබේ. එමෙන්ම අධ්‍යාපනය  කඩා  කප්පල්වූ දරුවන් 58000 ක් නැවත  පාසල් වෙත  යොමු කිරීමට  ඔහු කටයුතු  කල බව රැස  පත්තරය  කියයි .



Image result for colonel rathnapriya

තමන්ට උතුරේ  මිනිසුන් ආදරය  කරන්නට හේතුව 'අවි රහිත' සංකල්පය  බව  ඔහු කියයි අවුරුදු  5 ක් තිස්සේ  ඔහු දියත් කළ කිසිදු  කටයුත්තක් සඳහා  එකම අවියක් හෝ  පාවිච්චි නොකළ  බව  ඔහු කියා  තිබේ .



දකුණේ  මාධ්‍ය විසින් උතුර  ගැන  පලකරන බොරු පිළිබඳව  කතා  කරන  කර්නල් වරයා ඒ පිළිබඳව මෙසේ  කියයි .


"දකුණේ අය උතුර ගැන මවාගෙන ඉන්න චිත්‍රයට වඩා සම්පූර්ණයෙන්ම වෙනස් උතුරේ චිත්‍රය. ඒ මිනිස්සු යුද්ධය කියන වචනයවත් නැවත අහන්න කැමති නැහැ. සාමය තමයි ඒ අයගේ බලාපොරොත්තුව. ඒ අය ඉතාම කැමැත්තෙන් ඉන්නේ දකුණත් එක්ක සහයෝගයෙන් අත්වැල් බැඳගන්න. ඒත් ලංකාවේ බහුතරයක් ජනමාධ්‍ය සහ විවිධ පිරිස් ආයිමත් ජාතිවාදය පතුරවන්න හදනවා. ඒකට අපි ඉඩදෙන්නේ නැහැ. "



මේ හමුදා නිලධාරියාගේ ස්ථාන  මාරුව අවලංගු කරන ලෙස ඉකුත් කැබිනට් රැස්වීමේදී  මනෝ ගනේෂන් ඇමතිවරයා විසින් ඉල්ලා සිටි නමුත් ඔහු එය  ප්‍රසිද්ධ  කලේ  නැත   නමුත් විමල් වීරවංශ  මන්ත්‍රීවරයා විසින්  මාධ්‍යවලට  පිටපත් සහිතව  ජනාධිපතිවරයාට  ලිපියක් යවමින්  ඔහුගේ  ස්ථාන  මාරුව අවලංගු  කරන  ලෙස ඉල්ලා  තිබෙන  නමුත් එම ලිපිය  මගින්ද  ඔහු කරන්නේ සංහිදියාව ඇති කිරීමට සහයෝගය දක්වන එක්සත් ජතිගේ සංවිධානයට  පහර  ගැසීමය .




Image result for colonel rathnapriya



කර්නල් රත්නප්‍රිය  මහතා  දෙමල  මිනිසුන්ගේ ජීවිත  යලි ගොඩ  නැගීම සඳහා ගන්න  ලද ක්‍රියා මාර්ග දෙමල  ජනයාගේ සතුටට  හේතුවී තිබෙන්නේ  තුවක්කුව  පෙන්වීමෙන් නොව  මිත්‍රත්වයේ අත දිගු කිරීමෙනි .  උතුර  නැගෙනහිර පුරා  හමුදා  කඳවුරු සිය  ගණනක් පවත්වාගෙන  යාමෙන්,  දෙමල මිනිසුන්ගේ  ඉඩ  කඩම් , නිවෙස් සහ වෙනත් දේපොළ  හමුදාව සතු  කර  තබා  ගැනීමෙන් , අතුරුදහන් වුවන්ගේ  ඉරණම  සොයා නොදීමෙන්  සිදුවී ඇත්තේ උතුර දකුණට එකතු  කිරීමක් නොව එයට  බාධාවක් වීම  පමණය . ඔවුන්ගේ දේපොළ  ඔවුන්ට ආපසු දී ඒවා සංවර්ධනය  කරන්නට  හමුදාව අත  හිත දෙන්නේ  නම්  හමුදාව උතුරේ සිටීම ජනජීවිතයට මහත් බාධාවක්   ලෙස නොදැකීමට  වුවද ඉඩ තිබේ.



  ගෝටාභය රාජපක්ෂ සහ ඔහු වටා  සිටින  හිටපු  හමුදා නිලධාරීන්ගේ ද, මහින්ද-වීරවංශ සමාගමේද , මාවත වන්නේ  කර්නල් රත්නප්‍රිය මාවත  නොවේ. රත්නප්‍රිය තුවක්කුව අත්හැර  වැඩට බැස්ස අතර ගෝටා කොම්පැණිය සුදානම් වන්නේ තුවක්කු අමෝරාගෙන වැඩට බසින්නටය .



2015 ජනවාරි 8  දා මහජනයා  තීරණය  කළේ කර්නල් රත්නප්‍රිය මාවතය. එහෙත්  වීරවංශ සහ සමගම අපට කියන්නේ ඒ මාවත අතහැර ගෝටා මාවත  තෝරා  ගන්නා ලෙසය . 2020 දී  ගෝටා මාවත මහජනයා තෝරා  ගතහොත්  එය සුද්දන් රට  හැර  යාමෙන් පසු  අප  විසින් ගන්නා  ලද අන්ත  තකතිරි  තීරණය  වෙනු ඇති බවට දුවිලි කැටයක  තරමක්වත් සැකයක් මට  නම් නැත . 




Sunday, May 20, 2018

ප්‍රභාකරන් , විජේවීර සහ රාජිත




Image result for prabhakaran and rhana wijeweera



    රාජිත සේනාරත්න අමාත්‍යවරයා විසින් ,මිස්ට ප්‍රභාකරන් සමග  කොම්රෙඩ් විජේවීර  සංසන්දනය කිරීම නිසා ජවිපෙ අනුගාමිකයන්ට මලයකා වැහි තිබේ. 



  මියගිය තම සහෝදරවරුන් සිහි කිරීමට ජනතා විමුක්ති පෙරමුණට හැකිනම්  යුද්ධයෙන් මිය  ගිය  තම ඥාතින් සිහි කිරීමට උතුරේ වැසියන්ටද නොහැකි මන්දැයි    රාජිත විසින්  මාජ්ජ වේදී  කියන දෙතුන් දෙනෙකුගෙන්   පෙරලා  ඇසීම  නිසා  දේශ පෙරේමි  කියා කියා  ගන්නා  තවත්  කෂ්ටියකට මහසෝනා වැසි තිබේ .



 ඒ අතර දඹදිව විසු බුදුන්වහන්සේගේ  නොව  නල මාර්ගයෙන්  ලංකාවේ  උපද්දවන  ලද   බුජුන් වහන්සේගේ අනුගාමිකයන්ට රාජිතගේ දෙවන  ප්‍රකාශය නිසා  මල  පැන තිබේ .


දඹදිව  ඉපදී වසර  45  ක් තිස්සේ යුද්ධය නොව සාමය දේශනා  කළ  ගෞතම  බුදුන් වහන්සේට මහත් ඉහලින් ගරු  කරන  අපට ද රාජිතගේ එම ප්‍රකාශ දෙක සම්බන්ධයෙන්  මතයක්  තිබේ .එය මෙහි අප ලියන්නේ යලිත් මේ රටේ  ලේ  ගංගාවල් ගැලීම නවත්වන්නට අපට  කල හැකි දේ  අප කළ යුතු නිසාය .


අපි 1971  කැරැල්ල දුටුවෙමු . 1987-89 භීෂණය අත් දුටුවෙමු . අවුරුදු 27 ක් පුරා ලේ ගංගා  ගලා  ගිය  යුද්ධය දුටුවෙමු . එබැවින්  රාජිත සේනාරත්න  කිව්වේ ඇත්තක්ද ? නැත්තක්ද? යන්න ගැන විමසා  බලන්නට අපට සුදුසු කම්  තිබේ .


 තිරුවෙන්කඩම් වේලුපිල්ලෙයි  ප්‍රභාකරන් සහ පටබැඳිගේ දොන් නන්දසිරි විජේවීර අතර සමාන  කම් මෙන්ම අසමාන  කම් ද  තිබේ .


දෙදෙනා අතර  තිබු අසමානකම්  මොනවාද?


 ප්‍රභා උතුරේ  සහ නැගෙනහිර වෙනම රාජ්‍යයක් පිහිටුවා  ගැනීම අරමුණ  කරගත් අතර වීජේවීරගේ අරමුණ වුයේ ලංකාවම අල්ලා  ගන්නටය.



 ප්‍රභාකරන් සමාජවාදය නොපිළිගත් අතර  විජේවීර  ස්ටාලින්  ආදර්ශයට ගත් සමාජවාදියෙකු විය. 


ප්‍රභාකරන්ගේ සංවිධානය  දෙමලුන්, මුස්ලිම් ජාතිකයන්  සහ සිංහලයන් ඝාතනය  කළ අතර විජේවීරගේ සංවිධානය දෙමළුන් හෝ මුස්ලිම් ජාතිකයන්  ඝාතනය  නොකළේය . විජේවීර අණදුන්නේ ජවිපෙ  මතවාදයට විරුද්ධව කතා  කළ  හෝ ක්‍රියා  කළ හෝ සිංහල පිරිස්  ඝාතනය  කරන්නටය  .


ප්‍රභාකරන්ගේ  හමුදාව  නැගෙනහිර සිංහල  ගම්මානවලට  ගොස් පොඩි එකාගේ සිට කපා  කොටා මරා දැමු   නමුත් විජේවීරගේ  හමුදාව  පොඩි එවුන්  කපා  කොටා මැරු බවට වාර්තා  නැත  


 දශක  දෙකක්  පමණ  උතුරේ සහ නැගෙනහිර විශාල  ප්‍රදේශයක් පාලනය  කරන්නට ප්‍රභාකරන්ට  හැකිවූ නමුත් දකුණේ එක වර්ග  කිලෝමීටරයක් වත්  පාලනය  කරන්නට විජේවීරට  එක දවසක්වත්  හැකි වුයේ  නැත . 


ප්‍රභාකරන් අවුරුදු 27 ක් ආණ්ඩුවලට එරෙහිව සන්නද්ධ සටනක් කළ අතර  විජේවීරට හැකිවුයේ යන්තම් අවුරුදු  තුනක්  පමණි .



ප්‍රභාකරන් නවීන අවි ආයුධ භාවිතා  කරමින් ලංකාණ්ඩුවට එරෙහිව සටන් කළ අතර විජේවීර    ගල්කටස් වලින් ආණ්ඩුවට එරෙහිව සටන් කළේය .ඔවුන්ට නවීන අවි  තිබුනේ අල්පයක් පමණි .



ප්‍රභාකරන්ට 2002 සටන් විරාම  ගිවිසුම දක්වා  දෙමල  ජනයාගේ සහය සැලකිය  යුතු මට්ටමින් ලැබුණු නමුත්   රෝහණ විජේවීරට මහජනයාගෙන්  5%ක වත්  සහයෝගයක් ලබා  ගැනීමට පුළුවන් වුයේ නැත .


ප්‍රභාකරන් සිය ජීවිතයේ අවසන් සටන කරන අවස්ථාවේ  තම දරුවන්ට සහ  බිරිඳට කරදරයක්  නොකරන  ලෙස ආණ්ඩුවේ හමුදාවලින් ඉල්ලා  නොසිටි අතර  විජේවීර අල්ලා  ගැනීමට   බ්‍රිගේඩියර්  ජානක පෙරේරා  හමුදා භටයන් සමග   පැමිණි විට තම දරුවන්ට සහ බිරිඳට  කිසිදු කරදරයක් නොකරන ලෙස  විජේවීර   ඉල්ලා සිටියේය .


 ප්‍රභාකරන් අවසාන  මොහොත දක්වා  යටත් නොවූ  අතර  විජේවීර අල්ලා  ගන්නට ආ  හමුදා  කණ්ඩායමේ  ප්‍රධානියාවූ  බ්‍රිගේඩියර්  ජානක  පෙරේරා වීජේවීරගේ  ඔලුවට  පිස්තෝලයක් එල්ල  කල විට තමා විජේවීර  බව  පිළිගෙන   යටත් විය .


ඒ විජේවීර සහ  ප්‍රභාකරන් අතර තිබු අසමානකම්ය . ඔවුන් දෙදෙනා අතර  තිබු සමානකම් මොනවාද?


විජේවීර සිය  අරමුණ  තම ජීවිත  කාලය  තුළ   ඉටු කර  ගැනීමේ අරමුණෙන්    නොපසු බස්නා  උත්සාහයෙන් කටයුතු කළ නායකයෙකි . ඒ සඳහා අති විශාල  කැපවීමක් කළ පුද්ගලයෙකි .  ඔහු සිහිනයෙන්ද දුටුවේ ඔහු විශ්වාස කළ සමාජවාදී  ආණ්ඩුවක්  පිහිටවීම  ගැනය . 


ඊලාම්  රාජ්‍යයක්  පිහිටුවා  ගැනීම සඳහා වූ ප්‍රභාකරන්ගේ  කැපවීම ද විජේවීරගේ  කැපවීම හා සමානය. 


ප්‍රභාකරන්ට එරෙහිව ජනතා විමුක්ති පෙරමුණ  උතුරු නැගෙනහිර දෙමල  ප්‍රදේශවල  හැර  අන් සෑම ප්‍රදේශයකම  ප්‍රබල මතවාදයක් ගෙනගියේය . එහෙත් එකම කොටි සාමාජිකයෙකුවත් මරා   දමන්නට තබා  අල්පෙනෙත්තකින් වත් අනින්නට විජේවීර තීරණය  නොකළ අතර   . ප්‍රභාකරන්ද  රෝහණ විජේවීරගේ සංවිධානයේ එකම සාමාජිකයෙකුටවත් අල්පෙනෙත්තකින්වත් ඇන්නේ නැත . 



  තමා ගේ සංවිධානය තුළ  ජීවිත  පරිත්‍යාගයෙන් ක්‍රියා  කළ  ඇතැමුන් මරා දැමීමට ප්‍රභාකරන් එක  මොහොතක් හෝ පැකුලුනේ  නැත .ඔහුගේ දෙවෙනියා වූ  'මහත්තයා ' ඉන්දියානු ඔත්තු කරුවෙකැයි සැක කළ  ප්‍රභාකරන්  ඔහුට  මරණ දඬුවම දුන්නේය . LTTE සංවිධානයේ ආරම්භයෙදී එහි මධ්‍යම  කාරක සභාවේ සභාපතිවු  උමා  මහේෂ්වරන් මරා  දමන්නට  ප්‍රභාකරන් ඉන්දියාවේදී  උත්සාහ  කළේය .එය අසාර්ථක වුවත් ඔහු මරා  දැමීමට ප්‍රභාකරන්  ඔහු පසු පස  හඹා  ගියේය . රෝහණ විජේවීරද එසේම විය .ජවිපෙ වෙනුවෙන් කොතරම් කැප වුවද ජවිපෙ අත්හැර  ගොස් වෙනත් දේශපාලනයක්  කළ  කිසිවෙකු පන පිටින් සිටිනු දකින්නට විජේවීර  කැමති වුයේ නැත 1971 දී විජේවීර යාපනය  හිරගෙදරින් බේරා  ගැනීමට ගියාවුද,  1971 දී සිරගත  කල විට ,  හිරගෙදරින් කීපවරක් පැන අවුත් යලි ජවිපෙ ගොඩ නැගුවාවුද, නන්දන  මාරසිංහ වැන්නන් මරා දමන ලෙස නියෝග දෙන්නට විජේවීර  මොහොතක්  පැකිලුනේ  නැත . 1987 -11-27  දින අනුරාධපුරයේ පොලේදී ඔහු  මරා දමනු ලැබිණ .




Image result for නන්දන මාරසිංහ

   ජවිපෙ 'විමුක්ති ගී 'කණ්ඩායමේ  ගී ගයන  නන්දන මාරසිංහ පින්තුරයේ දකුණු පස සිටි 


ඉන්දු ලංකා  ගිවිසුම හරහා  ඉන්දියානු හමුදාව  ලංකාවට  ගෙන්වා  ගැනීම පිළිබඳව විජේවීර විරුද්ධ විය. ප්‍රභාකරන්ද  එලෙසම ඉන්දියානු  හමුදාවට  විරුද්ධ  විය 


ඉන්දු ලංකා  ගිවිසුම  යටතේ පළාත් සභා  පිහිටුවීමට එරෙහිව විජේවීර  යුද්ධ  ප්‍රකාශ  කළේය . එමගින් රට කෑලි  අටකට කැඩී  යන බව ඔහු කිවේය . ප්‍රභාකරන්ද පළාත්සභා  පිහිටුවීමට  දැඩි ලෙස  විරුද්ධ විය. ඔහු එයට විරුද්ධ වුයේ එය  තම සිහිනය වූ ඊළමා පිහිටුවීම වැලක්වීමට අටවන  ලද  උගුලක්  බව කියමින්ය .


ඉන්දු ලංකා  ගිවිසුමට  පක්ෂ  පාතිවු උතුරේ සංවිධාන සහ නායකයන්  විනාශ   කිරීමට ප්‍රභාකරන්  නියෝග දුන් අතර ඒ අනුව උතුරේ විශාල මිනිස්  ඝාතන  ප්‍රමාණයක් LTTE විසින් කරනු ලැබිය . ඉන්දු ලංකා  ගිවිසුමට  පක්ෂපාතිවු  සංවිධාන  විනාශ  කිරීමට විජේවීර නියෝග  දුන් අතර  ඒ අනුව  ජවිපෙ සන්නද්ධ කණ්ඩායම වූ දේශප්‍රේමී ජනතා ව්‍යාපාරය දේශපාලන  පක්ෂ රැසක් තහනම් කළ අතර  ඒවායේ ක්‍රියාකාරීන් රැසක්   ඝාතනය කරනු ලැබිණ .




    Image result for uma maheshwaran

                                PLOTE සංවිධානයේ  නායක  උමා  මහේෂ්වරන් 


ප්‍රභාකරන් උතුරේ  ක්රියාකාරිවු  වාමාංශික සංවිධාන වල  නායකයන් සහ  සාමාජිකයන්  ඝාතනය  කළේය.  EPRLF සහ  PLOTE  යන සංවිධාන මාක්ස්වාදී  මත දරන්නවුන්ගෙන් සමන්විත  විය .ප්‍රභාකරන්  එම සංවිධානයන්හි  බොහෝ නායකයන් සහ සාමාජිකයන් රැසක්  ඝාතනය  කළේය.  තමන්ගේ සංවිධානය  හැර  වෙනත් කිසිදු සංවිධානයකට පවතින්නට ඔහු ඉඩ දුන්නේ  නැත . විජේවීරද  සිටියේ එම  මතයේමය . 1988-1-18 දින  ජවිපෙ තුවක්කු කණ්ඩායම වූ දේශප්‍රේමී  ජනතා  ව්‍යාපාරය  නිවේදනයක් නිකුත් කරමින් මහජන  පක්ෂය , ලංකා සම සමාජ  පක්ෂය , ශ්‍රී ලංකාවේ  කොමියුනිස්ට්  පක්ෂය  ,නව සම සමාජ පක්ෂය ,සහ  ජවිඑපං වෙන්වී පිහිටුවාගෙන සිටි කුඩා සංවිධාන  තහනම්  කළේය . ඉන්පසු   එම  පක්ෂවල නායකයන් සහ සාමාජිකයන් රැසක්  මරා දැම්මේය . විජය  කුමාරතුංග  නායකත්වය  දුන් මහජන  පක්ෂයේ නායකයන් සහ සාමාජිකයන් රැසක් ඝාතනය  කළ අතර   ලංකා සම සමාජ  පක්ෂයේද  ශ්‍රී ලංකාවේ  කොමියුනිස්ට්  පක්ෂයේද වික්‍රමබාහුගේ නායකත්වයෙන් යුතු නව සම සමාජ  පක්ෂයේද නායකයන් සහ සාමාජිකයන් රැසක්  විජේවීරගේ  දේශප්‍රේමී  ව්‍යාපාරය විසින්  ඔවුන්ට විරුද්ධව කිසිදු සන්නද්ධ  ක්‍රියාවක නිරත නොවී සිටියදී ඝාතනය  කර  දැම්මේය .13 නවන ආණ්ඩුක්‍රම ව්‍යවස්ථා සංශෝධනයට  පක්ෂපාති වීම ඔවුන් මරා දැමීමට එකම හේතුව  විය . කොළඹ විශ්ව විද්‍යාලයේ ශිෂ්‍ය  නායකයා වූ දයා  පතිරණ මීට  පෙරම මරා දමා   තිබිණ . ඔහු මරා දැම්මේ 1986 දෙසැම්බර් 15 වනදාය .



තමන්ට  හැර අන් අයට දේශපාලනය  කිරීමට ඉඩ නොදීම  දේශපාලන වාග් මාලාවේ  හඳුන්වන්නේ ෆැසිස්ට් වාදය  ලෙසය. ඒ අනුව ප්‍රභාකරන් ෆැසිස්ට් වාදියෙකු වූ සේම විජේවීරද  ෆැසිස්ට් වාදියෙකු විය .


ඉහත  කරුණු සලකා  බැලු විට විජේවීර සහ ප්‍රභාකරන් අතර  බොහෝ සමානකම්  තිබේ. රාජිත සේනාරත්න අමාත්‍යවරයා  ප්‍රභාකරන්ගේ සංවිධානය සහ  විජේවීරගේ සංවිධානය  සමාන බව  කිවේ  ඉහත  කරුණු අනුව  විය  හැක .



මෙහිදී ජවිපෙ අනුගාමිකයන්  වාමාංශිකයන්  මරා දැමීමට  හේතුව  ලෙස  ඉදිරිපත් කරන්නේ    ' ප්‍රා '  සංවිධානය  පළමුව ජවිපෙ සාමාජිකයන් ඝාතනය කිරීම  නිසා  බවය . එහෙත් 87-89 ජවිපෙ කැරැල්ල  පිළිබඳව දීර්ඝකාලීන අධ්‍යයනයක්  කළ  ලේඛකයෙකු වන ධර්මන් වික්‍රමරත්න  ඔහුගේ ' ජවිපෙ දෙවෙනි කැරැල්ල '  නමැති ඔහුගේ  කෘතියේ ලියා  තිබෙන්නේ 'ප්‍රා'  හෙවත්  මහජන  විප්ලවකාරි රතු  හමුදාව (PRRA)  සංවිධානය ඇරඹුණේ විජය  කුමාරතුංග  මහතා  ඝාතනය  කිරීමෙන්  පසුව  බවය. විජය  කුමාරතුංග  මහතා  ජවිපෙ විසින් ඝාතනය  කළේ 1988 පෙබරවාරි 16 වනදාය . ප්‍රා සංවිධානයේ  පළමු ප්‍රතිපත්ති ප්‍රකාශය  නිකුත් කර ඇත්තේ 1988 අගෝස්තු පලමුදාය .



ධර්මන්  වික්‍රමරත්න  මහතාට අනුව  ප්‍රා සංවිධානය  බිහි කර  ලද්දේ මහජන  පක්ෂයේ විජයගෙන් පසු නායකයා වූ  ඔසී අබේගුණසේකර ,සහ  හලාවත පොඩි සිල්වා ගේ නායකත්වයෙනි .හලාවත  පොඩි සිල්වා 1971  කැරැල්ලේදී දී  ඇල්පිටිය  ප්‍රදේශයේ  ක්‍රියා කාරිවු  තැනැත්තෙකි.  



Image may contain: one or more people, people sitting and outdoor

මුල්ලවයික්කාල්හිදී  යුද්ධයෙන්  මියගිය අය සමරා  පහනක් පත්තු කරන්නට  ඔවුන්ගේ    ඥාතීන්ට ඉඩ දිය යුතුයයි  රාජිත සේනාරත්න  මහතා කි විට   සියලු අමනුස්සයෝ පරල වුහ.  එහෙත් මුල්ලවයික්කාල් සැමරීමට යන අයට සිසිල් බීම සංග්‍රහ  කළේ  හමුදාවය . හමුදාවට එය  හොඳනම්   බෝම්බයක සද්දයක්  හීනෙන්වත් අසා  නැති මේ අමනුස්සයන්ට අමුතු   කිරිපණු ගායක්  හැදුනේ මන්ද ?   
















Thursday, May 17, 2018

කොටි සමතලා කළේ මහින්දද ?රනිල්ද? නැත්තම් ප්‍රභාකරන් මද?




Image result for prabhakarans last battle

     

 ත්‍රී වීල් අය්යලාට  අනුව  නම් කොටි සංවිධානය  පරාජය  කළේ  මහින්ද  රාජපක්ෂ  මිස අන් කිසිවෙකු නොවේ. එහෙත් එය ඇත්තක්ද ?


මේ  ගැන දීර්ඝ  ලිපියක් ලියන්නට  කරුණු ඇතත්   ඉතා  කෙටියෙන්  පිළිතුරක් ලියන්නට  මා  කැමතිය .


ඇත්ත වශයෙන්ම  LTTE සංවිධානය පරාජයට  ප්‍රධානතම හේතුව වුයේ    ප්‍රභාකරන් ගේ අදුරදර්ශී තීරණ  නිසාය . ඔහු සහ ඔහුගේ හෙන්චය්යින් අතර  මැදි විසඳුමකට ඒමට  කිසිසේත්  සුදානම් නොවූ බැවින් ඔවුන්ගේ  උපදේශක ඇන්ටන් බාලසිංහම් ඔවුන් අත්හැර  යන්නට  ගියේය .




Image result for rajiv gandhi killing

ඔහු කළ  පළමු ගොන් කම  නම් රජිව්  ගාන්ධි මරා දැමීමය එහි ප්‍රතිපලය ,කොටි  පරාජය කිරීමට  ලංකාණ්ඩුවට දිය  හැකි     උපරිම  සහය දීමට ඉන්දියානු ආණ්ඩුව තීරණය  කළේය . ඉන්දියාව  කොටින්ට සහය දුන්නේ  නම් කොටි  පරාජය  කිරීමට ලංකාණ්ඩුවට  ඉන්දියාව  කිසි සේත්  ඉඩ දෙන්නේ  නැත .මෙය  නොපිළිගන්නා  අයෙක් වෙතොත්  ජේ ආර් විසින් දියත් කළ වඩමාරච්චි සටන නවතා  හමුදාව ආපසු ගෙන්වා  ගැනීමට සිදුවීම , සහ  ඉන්දියානු  යුධ ගුවන්  යානා සමග  පැමිණි  යානා  විසින් යාපනයට  පරිප්පු දැමීම ගැන  නැවත  කියවා  බැලීමට  යෝජනා  කරමි.




Related image

LTTE සංවිධානයේ  පරාජයට  බලපෑ දෙවෙනි ප්‍රධාන  කාරණාව වන්නේ 2002 වසරේදී  නොර්වේ රාජ්‍යයේ මෙහෙයවීමෙන් රනිල් වික්‍රමසිංහ සහ ප්‍රභාකරන් අතර අත්සන් කළ සටන් විරාම  ගිවිසුමය .මෙම ගිවිසුමෙන් අමානන්දනයට  පත් උතුරු නැගෙනහිර දෙමල  ජනයා යලිත් ජීවිතය  ගොඩනගා  ගැනීම සඳහා මහත් බලාපොරොත්තු ඇති  කරගත්හ . සටන් විරාම ගිවිසුමේ දෙවන ප්‍රතිඵලය  ලෙස LTTE සංවිධානයේ දැවැන්තම  පිපිරිම සිදුවිය . කරුණාගේ ප්‍රධානත්වයෙන් තිබු  නැගෙනහිර  කොටි හමුදාව  කරුණා විසින් විසුරුවා  හැරීම දක්වා එම  පිපිරිම බලවත් විය  .කරුණා විසින්  ගන්නා  ලද එම  පියවර කොටි සංවිධානයේ  පරිහානියට  කොතරම් බලපෑවේද  යන්න අවබෝධ  කරගැනීමට  තමිලිනි ලිව්‍ 'තියුණු අසිපත සෙවන  යට ' කියවිය යුතුය .


තමිලිනි ගේ  පොත  ගැන  මා 2016  මාර්තු  මස  මා  මේ  බ්ලොග් අඩවියට ලියු  ලිපිය කියවුවහොත්  ඔබට  එය  පැහැදිලි වෙනු ඇත 







 සටන් විරාම  ගිවිසුම කඩකරමින් කොටින්  යලි යුද්ධයට සුදානම් වීම  උතුරේ  ජනයා  නොයිවසු අතර  එතැන් පටන් උතුරේ  මිනිසුන්  කොටින්ට සහය නොදුන් බව  තමිලිනි  සිය ග්‍රන්ථයේ සඳහන්  කර තිබේ . එබැවින්  කොටින්ගේ පරාජයට  බලපෑ  දෙවන   කාරණාව වන්නේ  රනිල්-ප්‍රභා  සටන් විරාම  ගිවිසුමය .



ඉන්දියානු  සාම සාධක  හමුදාව විසින් කොටින්ට එරෙහිව  කරන  ලද  සටන්ද  කොටි ව්‍යාපාරය  දුර්වල  කිරීමට  හේතු සාධක විය  . ඔවුන් විසින්  යාපනය අර්ධ ද්වීපය කොටින්ගෙන් නිදහස්  කර  ගත් අතර  ප්‍රේමදාස  ජනාධිපතිවරයා  ඉන්දියානු හමුදාව  ආපසු  යැවීම නිසා  කොටි  යලිත්  යාපන අර්ධද්වීපය  අල්ලා  ගත්තේය .  යලිත්  උතුරු  ප්‍රදේශය පමණක් නොව  මන්නාරම සහ අවට  හමුදාව විසින් අල්ල  ගත්තේ  චන්ද්‍රිකා  බණ්ඩාරනායක  ජනාධිපතිවරියගේ  පාලන සමයේය . LTTE සංවිධානය චන්ද්‍රිකා  මර දැමීමට බෝම්බ  පිපිරෙව්වේද ඒ පලිය  ගැනීමටය .


සරත් ෆොන්සේකා හමුදාපතිවරයා ගේ යුධ සැලසුම් සහ  දැඩි අධිෂ්ඨානය LTTE පරාජයට තීරණාත්මක  ලෙස  බලපෑ  බව  අමුතුවෙන් කිවයුතු  නැත . ලෝකයේ සිටින දක්ෂතම  හමුදාපතිවරයා  ඔහු බව  කියන්නට  මහින්දට සිදුවුයේ ඒ නිසාය 



ඉහත කි සියළු  වාසි සහගත  තත්වයන් සහ    මහින්ද  රාජපක්ෂ මහතාගේ නොසැලුණු  නායකත්වය මෙන්ම   ඔහු විසින් අත දිග  හැර  යුද්ධයට මුදල් වියදම්  කිරීම ,   අවසාන වෙඩිල්ල  නන්දිකඩාල්  කලපුවේදී ප්‍රභාකරන්ට  එල්ල  කරන්නට  හමුදාවට  හැකිවූ බව ඉතා  පැහැදිලිය  .


 තමිලිනි  ලිව්  පොත  පිලිබඳ ලිපිය පහත  ලින්කුවෙන් කියවිය  හැක .



http://sudukukula.blogspot.com/2016/05/blog-post_24.html

Wednesday, May 16, 2018

කන්‍යාවන් එපා කි හැරි කුමාරයා




Image result for meghan markle's parents

  ලංකාවේ  අපි  පමණක්  නොව ඉන්දියාවේ   , පකිස්ථානයේ සහ තවත් බොහෝආසියාතික  රටවල  කොල්ලන්  සියයට සියයක් වාගේම  කසාද  බඳින්නට  හොයන්නේ කන්‍යා භාවය තිබෙන  කෙල්ලන්ය .  අරාබි  කරයේ  නම් හොයන්නේ  කන්‍යා  භාවය  පමණක්  නොව කොල්ලෙක්ගේ බැල්මක් වත්  නොවැදුණු  කෙල්ලන්ය . එපමණ ක්  නම් කමක් නැත . කාන්තා අයිතීන් ගැන දේශනා පවත්වන  විප්ලවවාදීන් ට  පවා  කරකාර  බැඳගන්නට  හොයන්නේ  කන්‍යා  කුලකුමරියන්ය .  එය එසේ  වුවත්   රජපවුලේ  කොල්ලෙක් , කන්‍යාවන්  දස දහස්  ගණනක් තමා  හා දීග  යන්නට එක පයින් සුදනම්වී  සිටියදී , ඔවුන් තඹ  පයිසෙකට ගණන් නොගෙන තවත් මිනිහෙකු සමග අවුරුදු දෙකක්  දීග  කෑ ගැහැනියක්ව  මේ මැයි මාසේ 19 වෙනිදා  ලෝකෙටම අඬබෙර  ගසා බෙල්ලේ එල්ලා  ගන්නට තීරණය කර තිබේ .


ඒ වෙන  කවුරුවත්  නොව එංගලන්තයේ රැජිණගේ මුනුබුරෙකු වන,  ඩයනාගේ සහ චාර්ල්ස්  කුමාරයාගේ බාල පුත්‍රයා වන හැරී  කුමාරයාය . ඔහු කරකාර  බැඳගන්නට  යන්නේ  ඇමරිකානු පුරවැසියෙකු වන මෙගාන් මාකල්ය .  ටෙලි නාට්‍ය සහ චිත්‍රපට  නිලියක් වූ ඇය චිත්‍රපට නළුවෙකු සහ  නිෂ්පාදකයෙකු වන ට්‍රෙවර් එංගල්සන් සමග 2011 සිට 2013 දක්වා අවුරුදු දෙකක්  දීග  කා දික්කසාද වුවාය. හැරී කුමාරයට  ඇයව  මුණගැසෙන්නේ ඉන් පසුවය .

හැරී  කුමාරයා මාකල්ව  හමුවීමට  පෙර  ගැහැණු ළමුන් 10 දෙනෙකු සමග වරින් වර රෝන්දේ  ගිය  නමුත්  2016 දී මාකල් ව  හමුවීමෙන් පසු ඇයට වශී විය . ඇයව විවාහ  කරගන්නට  ඔහු  තීරණය  කලේ හමුවී  මාස කිපයකින්ය . ඉන්පසු  ඇය සමග සතියක් අප්‍රිකාවේ වන සතුන් නැරඹු ඔහු ඇය  කසාද  බැඳගන්නට  උවමනා  බව  රජපවුලට දැනුම් දුන්නේය .



                       හැරී  පරණ  පෙම්වතියක් සමග 

      ලංකාවේ ධනවත්  පවුලක  කොල්ලෙක් මාකල් වැනි ගැහැනියක්ව  කසාද  බැඳ ගන්නට  ගියොත් ඔහුගේ  අම්මා සහ  තාත්තා  කනේරු ඇට  කා දිවි නසා  ගන්නවාට සැක නැත . එහෙත් රජ පවුලේ උදවිය මෙම විවාහයට විරුද්ධවූ බවට  කිසිදු වාර්තාවක්  නැති අතර  19 වනදා වින්ඩ්සර් මාලිගාවේ පැවැත්වෙන  මේ ජෝඩුවගේ මංගල්‍යට රජ පවුලේ පුර්ණ ආශීර්වාදය  හිමිවී  තිබේ .


මෙගාන් මාර්කල්  කවුද?


හැරි කුමාරයා ට වඩා  අවුරුදු  තුනකින් වැඩි මහල් මාකල් රංග  කලාව සහ  ජාත්‍යන්තර  කටයුතු  විෂයයන් සඳහා  උපාධියක් ලබා  තිබෙන අතර  ටෙලි නාට්‍ය  ගණනාවක සහ   චිත්‍රපට කීපයක්  රඟ පා තිබේ.  ඇගේ  මව  ඩොරියා රග්ලන්ඩ් සමාජ සේවිකාවක් මෙන්ම යෝග උපදේශිකාවක් ද වන්නීය . ඇය  කළු ජාතික  කාන්තවකි .ඇගේ  මුතුන් මිත්තන් අප්‍රිකාවෙන් ගෙන එන ලද වහල්ලු වෙති . සුදු ඇමරිකානුවෙකු වන ඇගේ පියා  තෝමස්  මාර්කල් චිත්‍රපට සඳහා ආලෝකය සැපයීමේ  වෘත්තියේ  නිරත වූවෙකි ඔහු ලන්දේසි  ,ඉංග්‍රීසි සහ අයර්ලන්ත යන රටවලින් ඇමරිකාවට  පැමිණ  පදිංචිවූ මුතුන් මිත්තන්ගෙන් පැවත එන්නෙකි .


කෙසේ වෙතත්  මාර්කල්ගේ මව සහ පියා, මාකල් කුඩා  කාලයේදී  දික්කසාද වූ අතර  මව  ඇමරිකාවේද පියා  මෙක්සිකෝවේද  ජීවත්වෙති .  විවාහ  උත්සවය සඳහා ඔවුන් දෙපොලටද ආරාධනා  යවා ඇතත් පත්තර  කාරයෙකු විසින් කරන ලද අවුලක් හේතුවෙන් මාකල්ගේ පියාට  හදිසි  හර්දයබාධයක් වැළඳීම නිසා  මංගල්‍යයට සහභාගී වීමට  නොහැකි වෙන  ලකුණු පහල වී තිබේ . එහෙත් ඇගේ  මව  රාජකීය මංගල්‍යට සහභාගී වීම සඳහා  මේ වන විටත් එංගලන්තයට පැමිණ සිටි.


Image result for meghan markle's parents

              මාකල්  සහ ඇගේ මව ඩොරියා

 

Image result for meghan markle  and father

                                    මාකල්  පියා සමග 


 තමන් සුදු කළු  කවලම් දරුවෙකු වීම ගැන   ආඩම්බර වන බව  මාකල්  කියයි. 




The couple released their official engagement photos shortly before Christmas

දේශපාලකයට ආරාධනා  නැහැ 


 මාස  කීපයක සිට කෙන්සිංටන්  මාලිගාව අසල  මන්දිරයක  ජීවත්වන  හැරීගේ සහ මාකල්ගේ    විවාහ  උත්සවයට  බ්‍රිතාන්‍ය අගමැතිනිය, ඇමරිකානු  ජනධිපති ඩොනල්ඩ් ට්‍රම්ප්  ඇතුළු දේශපාලකයන්ට ආරාධනා  නොකිරීමට හැරි කුමරු සහ  මාකල්  තීරණය  කළ බව බ්‍රිතාන්‍යයේ Sun පුවත්පත  කියා  තිබේ .


රාජකීය පවුලකින් විවාහයක්  කරගනු වෙනුවට දික්කසාද වූ  වයසින් වැඩි සුදු කළු ගැහැණියක් විවාහ  කර  ගැනීමටත් මංගල්‍යයට දේශපාලකයනට ආරාධනා  නොකිරීමටත්  හැරි කුමරු තීරණය කිරීම රජගෙදර සිදු කළ  පුංචි පහේ විප්ලවයක්  ලෙස  හැඳින්වීම සාධාරණය .






Saturday, May 5, 2018

ලෝකය හෙල්ලූ කාල් මාක්ස්






        

   කාල් මාක්ස් මෙලොවට පැමිණ  අදට  (2018 -05-05 ) අවුරුදු 200 ක් සම්පුර්ණ වේ .  මේ  ලිපියෙන් මාක්ස්වාදය  පිළිබඳව විග්‍රහයක් කිරීමට අපේක්ෂා නොකරන අතර ඔහුගේ ජීවිත  කතාව සංක්ෂිප ලෙස ලිවිම පමණක් මගේ අරමුණ වේ .මාක්ස්  කවුදැයි අපේ පාඨකයන්ට හඳුන්වා දීම මගේ යුතුකමක් ලෙස මා සලකමි .ධනවතෙකු වීමට අපමණ අවස්ථා සහ හැකියාව තිබු මාක්ස්  , එය මුළුමනින්ම  ප්‍රතික්ෂේප  කොට ඉතා දුක්ඛිත ජීවිත ගතකළ සහ ගත  කරන  ලොව පුරා වැඩකරන මිනිසුන්ගේ  ජීවිත සැපවත් කිරීම සඳහා නව මාවතක් ලොවට පෙන්වා දීමට  ඔහු  සිය ජීවිත  කාලයම  කැප කළේය 



      කාල් මාක්ස් උපන්නේ 1818 මැයි මස පස්වනදා ප්‍රසියාවේ ට්‍රියර් නගරයේ මධ්‍යම පාන්තික පවුලකය . ( ප්‍රසියාව යනු වත්මන්  ජර්මනිය සහ යුරෝපා රටවල් කීපයක කොටස් වලින් තනන  ලද  1932 දක්වා  පැවති රාජ්‍යයකි ) ඔහුගේ මව සහ පියා යුදෙව්වන් වුහ.  පියා වූ හෙන්රිච් මාර්ක්ස් බොහෝ දුරට නිරගමිකයෙකු වූ අතර වෘත්තියෙන්  නීතිඥයෙකු විය .ඔහුට අයත් මිදිවතුද  තිබිණ  .මව, හෙන්රියට් ප්‍රෙස්බුර්ග් නම්  නෙදර්ලන්ත යුදෙව්  කාන්තාවක් වූ අතර  ඇයද ධනවත් ව්‍යාපාරික  පවුලක සාමාජිකාවක් වුවාය .මාර්ක්ස්ට සහෝදර සහෝදරියන් 8 දෙනෙකු සිටි අතර වැඩිමහල් සොයුරා කුඩා කාලයේදී  මිය ගිය  බැවින් මාක්ස්  පවුලේ වැඩිමහල් පිරිමි දරුවා බවට  පත්විය  . කුඩා  කාලයේදී මාක්ස් නිවසේ සිට  අධ්‍යාපනය ලැබූ අතර  1830 දී ට්‍රියර් උසස්  පාසලට ඇතුලත් කරනු ලැබිණ .නිදහස් මත දරන ගුරුවරුන් බහුතරයකින් සමන්විතවූ එම  පාසැලට  ප්‍රසියානු බලධාරීන් විසින්  වරක් පොලිසිය  එවා එහි සිටි ගුරුවරුන් ගණනවක් ඉවත් කරනු  ලැබිය. 



මාර්ක්ස්ගේ වයස අවුරුදු 17 වූ කළ පියා ඔහු බොන් සරසවියට ඇතුළු කළේ  දර්ශනය සහ සාහිත්‍යය  ඉගනීමට මාර්ක්ස්  කැමතිවු බැවිණි. එහෙත්  නිතිය ඉගෙනගන්නා  ලෙස  පියා  ඔහුට බලපෑම් කළේ එය වඩාත්  පලදායි විෂයක් ලෙස ඔහු දුටු නිසාය . මාර්ක්ස් එහිදී කවියන්ගේ සංගමයේ  සහ  බෙබේලාගේ  සංගමයේ  සාමාජිකත්වය  ගත් අතර මුල් කාලයේ විෂයන් සඳහා  ඉහළ ලකුණු ලබා  ගත්තේය . නමුත් පහු  පහු වන්නට විෂයන් සඳහා අඩු ලකුණු  ලබා ගැනීම නිසා එම සරසවියෙන් ඉවත් කොට බර්ලින් විශ්ව විද්‍යාලයට ඇතුළත් කිරීමට පියා වග බලාගත්තේය .



එහිදී නිතිය  ඉගෙනගත් ඔහු දර්ශනය ඉගැනිමටද උනන්දුවිය  දර්ශනය  ඉගෙනගන්නා සිසු  කණ්ඩායම් සමග එකතුව හෙගල්ගේ දර්ශනය පිළිබඳව අධ්‍යයනය  කළහ .හෙගල්ගේ දර්ශනයේ  පාරභෞතික උපකල්පනයන්  විවේචනය  කළ ඔවුහු  එහිවූ  ද්විඝටන ක්‍රමෝපාය පිළිගනිමින්  පවත්නා සමාජය , ආගම් සහ දේශපාලනය දෙස වාම වාම වාදී දෘෂ්ටියක් තුලින් බැලීමට පටන්ගත්හ .



මාක්ස්ගේ පෙම් කවි 


ලිවීමට  ප්‍රිය  කළ මාර්ක්ස් 1836-37 සමයේදී  නවකතා , නාට්‍ය සහ  කවි ලිවිය  .ඒ අතර  ඔහුගේ  පෙම්වතිය වූ ජෙනි වෙස්ට්ෆාලන්ට ලිවූ පෙම් කවි ද විය . ඔහුගේ දුවක් වූ ලෝරා ලෆාර්ග්ට  අනුව  ඔහු කාව්‍ය සංග්‍රහ දෙකක්ද  ගීත එකතුවක්ද   ලියා තිබුණු අතර  'මගේ සදාදරණිය ජෙනි ෆොන් වෙස්ට්ෆාලන් වෙත පිළිගන්වමි 'යනුවෙන් සටහන් කර තිබුණේය. එහෙත් එම කවි සහ ගීත නොගැඹුරු දේ  ලෙස මාර්ක්ස් ඉක්මනින් දුටු අතර ඒවා  යලි සිහිපත් වූ  අවස්ථාවලදී මවත් පියාත් කොක් හඬලා සිනහවූ  බව ලෝරා  කියයි.




Related image

               මාක්ස්ගේ බිරිඳ 


ප්‍රබන්ධ  ලිවිම ඉක්මනින්ම අතහැර දැමු  මාර්ක්ස් ඉංග්‍රීසි සහ ඉතාලි  භාෂා  ඉගනිමත්  කලා කෘතීන් හි ඉතිහාසය සහ ලතින් සම්භාව්‍ය කෘති හැදෑරීමත්  ආරම්භ කළේය . ජර්මන් දර්ශනවාදියෙකු සහ ඉතිහාසඥයෙකු වූ බෘනෝ බවර් සමග එකතුව හෙගල්ගේ කෘතියක්වූ ආගමේ දර්ශනය 1840 දී සංස්කරණය  කළේය . මේ අතර ඔහු සිය ආචාර්ය  උපාධිය සඳහා වූ නිබන්ධනය ද  පිළියෙළ කිරීම ඇරඹිය . ' ඩිමොක්‍රිටස්ගේ දර්ශනයේ සහ  එපිකියුරියස්ගේ දර්ශනය අතර වෙනස ' නම් වූ එම නිබන්ධනය බර්ලින් විශ්ව විද්‍යාලයට  ඉදිරිපත්  කළ විට එහි සිටි පැරණි මත ධාරී ආචාර්යවරු එය  පිළිගත්තේ නැත .එබැවින් මාර්ක්ස් එම නිබන්ධය පර්යේෂණ  කටයුතු පිලිබඳ සරසවියක්වූ ජෙනා විශ්ව විද්‍යාලයට එය  ඉදිරිපත් කළේය . එම සරසවිය 1841 දී  ඔහුට  ආචාර්ය උපාධිය  පිරිනැමුවේය .



 විශ්ව විද්‍යාල ආචාර්ය වරයෙකු  ලෙස  කටයුතු  කිරීමට මාර්ක්ස් අපේක්ෂා  කළද,  ප්‍රසියානු ආණ්ඩුව එයට ඉඩ දුන්නේ  නැත .එයට හේතුව  වුයේ ඔහු දරන  මතයන්ට ආණ්ඩුව  විරුද්ධ වීමයි  .මේ නිසා  කොලොන් නගරයට ගිය මාර්ක්ස් එහි තිබු රැඩිකල්  පුවත් පතකට ලිවීම ආරම්භ  කළේය මාර්ක්ස්ගේ  ලිපි ගැන අවධානය  යොමු කළ ආණ්ඩුව  එම පුවත්පත  ඉක්මනින්ම තහනම්  කර දැම්මේය .



 ලස්සනම  තරුණිය සමග  විවාහ වීම  


කාල් මාර්ක්ස් 1843 ජුනි 19 දින ළමා  කාලයේ සිට  හඳුනාගෙන සිටි පසුව ප්‍රේමවන්තිය  බවට  පත්වූ ජොහානා බර්තා ජුලී ජෙනි වොන් වෙස්ට්ෆාලන්  සමග  විවාහ විය . ට්‍රියර්   නගරයේ සිටි  ලස්සනම තරුණිය ඇය වූ බව කියනු ලැබේ.  මාක්ස්ට වඩා අවුරුදු 3 කින් වැඩි මහල්වූ ජෙනි ප්‍රසියාවේ ආණ්ඩුවට සම්බන්ධ  ප්‍රභූ   පවුලක තරුණියක් වුවාය . ඇගේ එක සහෝදරයෙක් 1850-58 සමයේ  ප්‍රසියානු ආණ්ඩුවේ අභ්‍යන්තර  කටයුතු ඇමති වරයා විය.  ජෙනි  ඇගේ  මරණය දක්වාම  මාර්ක්ස් ට දැඩි  ලෙස ආදරය  කල අතර  මාක්ස් ද එලෙසම ඇයට ආදරය කළේය .ගෙදර දොර  කටයුතු වලට  පමණක් සිමා  නොවූ ඇය ඔහුගේ දේශපාලන  කටයුතු වලටද පුර්ණ සහය දුන් අතර   ඔහු ලිවූ ලිපි සහ  ග්‍රන්ථවල අත් පිටපත්  වඩා පැහැදිලි අකුරෙන්  ලිවීමද  කළාය.



1843 දී ඔක්තෝම්බර් මාසයේදී මාක්ස්   සිය බිරිඳ සමග අල්ලපු රටවු  ප්‍රංශයට  ගියේ වාම විප්ලවකාරී  පුවත්පතක සම කර්තෘ ධුරය  භාරගැනිමටය එම පුවත්පතට  ඔහු ලිවූ  ලිපි අතර ' යුදෙව් ගැටලුව 'නමැති ලිපිය වැදගත් ලෙස සැලකෙන්නේ  'නිර්ධන  පන්තිය  විප්ලවකාරී  බලවේගයක්'  බව කීම සහ කොමියුනිස්ට්වාදය පිළිබඳව  පළමු වරට  අදහස් ඉදිරිපත් කිරීම  නිසාය .කෙසේ වෙතත්  පුවත්පතේ අනෙක් සම  කර්තෘ සමග ඇතිවූ මත  ගැටුමක් හේතුවෙන් පුවත් පත  පල කිරීම එතනින් නතර විය . එහෙත් මාක්ස් ලිවිම නතර කලේ නැත . එකල පැරිසියේ  සිට  පලකරන ලද 'ඉදිරිමග ' නමැති පුවත් පතට   ලියමින්  සමාජවාදය  පිළිබඳව සිය  මතය එය මගින් පතලකර හැරියේය .


අඹ  යාලුවා මුනගැසීම


කාල් මාක්ස්ගේ  මරණය දක්වා අඹ  යහළුවා  බවට  පත්වූ , ජර්මන් සමාජවාදියෙකු වූ  ෆෙඩ්රික් එංගල්ස් මාක්ස්ට පළමු වරට  මුණගැහුනේ පැරිසියේ තිබු සුප්‍රසිද්ධ චෙස් ක්‍රීඩාගාරයකදී 1844 අගෝස්තු 28 වනදාය . ඔහු විසින් ලියන ලද ' එංගලන්තයේ 1844  කම්කරු පන්තියේ තරාතිරම  ' (The Condition of Working Class in England in 1844) නමැති කෘතිය මාක්ස් ට පෙන්වීය. ඉතිහාසයේ සිදුවෙන අවසාන විප්ලවයේ මෙහෙයවන්නා  කම්කරු පන්තිය  බව එම ග්‍රන්ථය මාක්ස්ට ඒත්තු ගැන්වීය . වැඩි කල්යාමට  පෙර  මාක්ස් සහ එංගල්ස් එකතු වී ග්‍රන්ථයක් ප්‍රකාශයට   පත් කළහ ඒ ' ශුද්ධ  පවුල ' විය .මෙය හෙගල් අනුගාමිකයන් විවේචනය  කිරීම සඳහා  ලියන ලද්දකි .



Image result for frederick engels

                     ෆෙඩ්රික් එංගල්ස් 

    1843-45 සමයේ මාක්ස්, ඇඩම් ස්මිත් ,ඩේවිඩ් රිකාඩෝ ,ජේම්ස් මිල්ස් ආදීන්ගේ කෘතින්ද,  ප්‍රංශ මනෝ රාජික සමාජවාදීන්ගේ කෘතින්ද ,ප්‍රංශ ඉතිහාසයද හැදෑරුවේය.   ඔහු කරන  ලද මෙම හැදැරීම් ද,  ධනේශ්වර ආර්ථිකය  ක්‍රියාත්මක වන ආකාරය  පිළිබඳව  තියුණු  ලෙස අධ්‍යයනය කිරීම නිසාද  මාර්ක්ස්වාදය   නමින් අප හඳුන්වන  දැක්ම   කරා   පැමිණීමට ඔහුට ආධාර විය .  මාක්ස්වාදයේ උල්පත්  ලෙස සැලකෙන්නේ හෙගල්ගේ ද්විඝටනාත්මක  භෞතිකවාදය , ප්‍රංශ සමාජවාදය සහ ඉංග්‍රීසින්ගේ  ආර්ථික විද්‍යාවයි .



1845 දී  ප්‍රංශය අතහැර  බ්‍රසල්ස්  නගරයට  යාමට  මාක්ස්ට සිදුවිය එයට හේතුව වුයේ  ප්‍රන්සයේ  සිට  ඔහු  පලකළ 'ඉදිරිමග ' පත්තරය  නතර  කරන ලෙස ප්‍රසියාවේ රජු ප්‍රංශයෙන් ඉල්ලීම අනුව පුවත් පත තහනම් කිරීමත්  ඔහු ප්‍රංශයෙන් නෙරපා  හැරීමට ප්‍රංශ ආණ්ඩුව  තීරණය  කිරීමත්ය. බෙල්ජියම් ආණ්ඩුව  ඔහුට බ්‍රසල්ස් නගරයේ නැවතීමට  ඉඩ දුන්නේ සමකාලින  දේශපාලනය පිළිබඳව  කිසිවක්  නොලියන්නේ  යයි මාක්ස් පොරොන්දු කරගෙනය .


බ්‍රසල්ස් හි වසන අතර  තුර එංගල්ස්ද එහි පැමිණියේය .ඉන්පසු දෙදෙනාම එකතුව  එංගලන්තයට චාරිකාවක්  ගියේ එකල එහි  පැවතී චාර්ටිස්ට්  ව්‍යාපාරය හැදෑරීමටත් එහි නායකයන් හමුවීමටත්ය මාක්ස් ඒ අතර  ලන්ඩනයේ සහ මැන්චෙස්ටර් නගරයේ  පුස්තකාලවල ට  ගොස් වැඩි දුර අධ්‍යයන  කටයුතු කිරීම සඳහා සම්පත් තිබේදැයි සොයා  බැලුවේය .


එංගල්ස් සහ මාක්ස් එකතුව  බ්‍රසල්හිදී  ' ජර්මානු  මතවාදය ' ( German ideology) නමින් ග්‍රන්ථයක් නිකුත් කළහ .  අයිතිහාසික  භෞතිකවාදය   ගැන  ලියවුන  එය  පළකරන්නට  බලධාරීන්ගෙන් අවසර  ලැබුනේ නැත. එය මුද්‍රණය  කර ප්‍රසිද්ධ  කරන  ලද්දේ  මාක්ස් මියගොස් වසර 44  කට පසුවය .


ඉන්පසු මාක්ස්  ලිවේ  දර්ශනයේ දුගීභාවය (The Poverty of Philosophy )   නම් ග්‍රන්ථයයි . .ඔහු එම නම යොදාගත්තේ  බලධාරීන්ගේ  කතුරට අසු වීම වලක්වා  ගන්නටය. ඇත්තටම එම ග්‍රන්ථය මගින් ඔහු ඉදිරිපත් කළේ විප්ලවාදී නිර්ධනපන්ති ව්‍යාපාරයකට තිබිය  යුතු න්‍යාය සහ  උපක්‍රම ය .





 කොමියුනිස්ට් ප්‍රකාශයේ  පළමු  ජර්මන් මුද්‍රණය


      ලොව   පුරා මාක්ස්වාදීන්ගේ අත් පොත බවට පත්වූ  සුප්‍රසිද්ධ  'කොමියුනිස්ට් ප්‍රකාශනය  මාක්ස් සහ එංගල්ස් එකතුව  ලියා 1848 දී  ප්‍රකාශයට  පත් කළහ  .ඔවුන් එම ලියවිල්ල ලියන ලැබුවේ යුරෝපයේ විප්ලවදින්ගෙන් සමන්විතවූ  කොමියුනිස්ට් සංගමයේ  ඉල්ලීම අනුවය .


බෙල්ජියමෙන් පන්නා දැමීම 


1848 වසරේදී  යුරෝපයේ බොහෝ රටවල ආණ්ඩු විරෝධී කැරලි ඇතිවිය.  මාක්ස්  මෙම කැරලි සඳහා සහාය  ප්‍රකාශ  කල අතර බෙල්ජියමේ කැරලිකරුවන්ට ආයුධ  මිලදී  ගැනීමට  මාක්ස් ආධාර  කලේ  යයි බෙල්ජියන් ආණ්ඩුව මාක්ස්ට චෝදනා  කොට බෙල්ජියමෙන්  පන්නා  දැමුවේය . 1848 කැරැල්ලක්  මගින්  ප්‍රංශයේ රාජාණ්ඩුව  පෙරලා  දමා සමුහාණ්ඩුවක් බලයට පැමිණි තිබු බැවින් බෙල්ජියමෙන්  පන්න දැමු විට  ඔහු ආවේ ප්‍රංශයටය .




මේ වන විට  ප්‍රසියාවේ පාර්ලිමෙන්තුවක් පත්වී  තිබුණෙන්  එහි ගොස් ' ජර්මානු  කමකරුවන්ගේ  සංගමය '  නමින් සංවිධානයක් පිහිටුවා දේශපාලන  කටයුතු ආරම්භ  කළ අතර පුවත් පතක් මුද්‍රණය  කොට බෙදා  හැරියේය . එහෙත් වැඩි කලක්  ඔහුට දේශපාලන  කටයුතු කිරීමට  ඔහුට  ඉඩ  ලැබුනේ නැත . ප්‍රසියාවේ රජු පාර්ලිමේන්තුවේ බලය අහිමි කොට  නව ආණ්ඩුවක් පිහිටුවා විප්ලව කරුවන්  මර්දනය  කළ අතර  මාර්ක් ට රටින් පිටවන  ලෙස  නියෝග  කළේය .ඔහු ආපසු පැරිසියට පැමිණි  විට ප්‍රතිගාමී  පාලනයක් එහි යලි බලය අත්  කර ගෙන තිබුණු  බැවින් ඔහු පැරිසියෙන්  පිටුවහල්  කරනු ලැබුවේය  එබැවින් ඔහු සිය බිරිඳ සහ දරුවන් සමග ලංඩනයට 1849  පැමිණි අතර එතැන් පටන් මරණය දක්වාම සිය බිරිඳ සහ දරුවන් සමග ජීවත් වුයේ  ලන්ඩනයේය .


ලංඩනයේ පදිංචිවීම 


මාක්ස් ලන්ඩනයට  පැමිණි පසු කොමියුනිස්ට් සංගමයේ මුලස්ථානය ද එහි ගෙන අතර ටික දිනකට  පසු එහි බෙදීමක  ලකුණු පහල විය.  කොමියුනිස්ට් සංගමය වහාම  කැරැල්ලක් ඇරඹිය  යුතු බවත් එවිට  යුරෝපය  පුරා අනායාසයෙන්ම  කැරලි ඇතිවෙනු ඇති බවත්  කොමියුනිස්ට් සංගමයේ  පිරිසක්  කිහ .මාක්ස් සහ එංගල්ස් එය අතිධාවනකාරී ක්‍රියාවක්  බව   කි අතර  එය  කොමියුනිස්ට් සංගමය කරන දිවි නසා  ගැනීමක් බව   කියා සිටියහ . අධිෂ්ඨාන සහගත  අතලොස්සක් දෙනෙකුට එක රාත්‍රියකින් සමාජයේ වෙනස්කම් ඇති කළ  නොහැකි බව  මාක්ස් කිය. (ලංකාවේ  71  කැරැල්ල සමග සඳහා  බලන්න .) සමාජයේ  වෙනස්කම් කළ හැක්කේ  සමාජ සංවර්ධනයේ  විවිධ අවස්ථා  පසුකරමින් විප්ලවය  දෙසට  ගමන් කිරීමෙන්  බව  මාක්ස් සහ එංගල්ස්  කිහ .

මේ අවස්ථාවේදී   කොමියුනිස්ට් සංගමය  කළ යුත්තේ  නැගී එන ධනේශ්වර  පංතියේ  ප්‍රගතිශීලි  කොටස් සමග එකතුව රදළ  ප්‍රභූ පංතියට එරෙහිව සටන් කරන  ලෙස  කම්කරු පන්තිය ධයිර්යමත් කිරීම  බවත්  රදළ පාලකයන් වෙනුවට මහජන චන්දයෙන්  තෝරාගනු ලබන නියෝජිතයන්ගේ  ව්‍යවස්ථාපිත පාලනයන් පිහිටවන ලෙස  උද්ඝෝෂණය  කිරීම  බවත් මාක්ස්ගේ කණ්ඩායම කියා සිටියහ . දීර්ඝ  මතවාදී අරගලයක  යෙදීමෙන් අනතුරුව  මාක්ස් ඇතුළු කණ්ඩායමේ මතය  ජයගත් අතර  අනෙක් මතය  ඉදිරිපත් කළ  පිරිස කොමියුනිස්ට් සංගමයෙන්  ඉවත්ව  යන්නට  ගියහ .





මේ අතර මාක්ස් පවුල  ජීවත්වුයේ අධික  දරිද්‍රතාවය  මධ්‍යයේය  ඔහුට දරුවන් 7 දෙනෙකු සිටි නමුත් ඉන් හතර දෙනෙකුම  මියගියේ  ඔවුන් ගතකළ දුක්බර   ජීවිතය  හේතු කොටගෙනය . මේ නිසා තම පවුලේ අය ජීවත් කරවීම සඳහා  මාක්ස් ඇමරිකාවේ සහ  යුරෝපයේ   පුවත් පත්වලට  ලිපි  ලියා  කිසියම් ආදායමක් සෙවීම  ආරම්භ කළේය  1850 සිට 1862  දක්වා  මාක්ස් සැලකිය  යුතු  කාලයක් යෙදෙව්වේ   ඒ සඳහාය.

  ප්‍රාග්ධනය  පළකිරීම



ඒ  අතර  තුර මාක්ස් බ්‍රිතාන්‍ය  කෞතුකාගාරයට  ගොස් එහි තිබු පොත් පත් සහ ලියවිලි අවුරුදු 7 කට අධික  කාලයක් තිස්සේ  කියවමින්  ධනවාදය පිළබඳව  හැදෑරුවේය මාක්ස් විසින් ලියන  ලද වෙළුම් තුනකින්  යුතු ප්‍රාග් ධනය සහ අතිරික්ත ශ්‍රමයේ  න්‍යායන් නමැති ග්‍රන්ථ  ඔහු විසින් ධනවාදය  සම්බන්ධයෙන් කරන ලද  පර්යේෂණයන්ගේ  ප්‍රතිඵලය විය . එම ග්‍රන්ථ මාක්ස්ගේ පර්යේෂණයන්ගේ අග්‍ර ඵලය ලෙස සලකනු ලැබේ .කෙසේ වෙතත් ප්‍රාග්ධනය නමැති කෘතියේ දෙවෙනි සහ  තුන්වන වෙළුම්  ප්‍රකාශයට  පත් කරනු ලැබුවේ මාක්ස්ගේ  මරණයෙන් පසු එංගල්ස් විසිනි .



Image result for das kapital

පළමු  ජාත්‍යන්තරය පිහිටුවීම 


1864 මාක්ස් වැදගත් වැඩකට අතගැසුවේය. ඒ  පළවෙනි   ජාත්‍යන්තරය  පිහිටුවීමය.  එහි අරමුණ වුයේ  ලොව  පුරා සිටින විවිධ වාම  මත දරන්නන්  සහ  කම්කරු සංගම්  ඒකාබද්ධ  කිරීමය . මෙම සංවිධානයේ දීප්තිමත්ම  අවධියේ  සාමාජිකයන්  ලක්ෂ 80  දක්වා එය වර්ධනය විය.  1872 දී මෙම සංවිධානය  කොමියුනිට්වාදීන් සහ අරාජිකවාදීන් ලෙස දෙකට කැඩුණු අතර 1876 දී පළමු ජාත්‍යන්තරය විසුරුවා  හරිනු ලැබිය .



මාක්ස්ගේ අභාවය  


1877 වන විට  මාක්ස්  තදබල ලෙස අසනීප වන්නට  විය. 1849 සිටම අක්මාවේ ආබාධයකින්  පෙළුණු නමුත් විවේක  නොමැතිව නිදිමරමින්  වැඩ කිරීමත්, මුදල් නොමැති කම නිසා  බාල වර්ගයේ සුරුට්ටු  බිමත්,  නුසුදුසු ආහාර   ගැනීමත්  ,මත්පැන්  පානය නිසාත් මාක්ස්ගේ සෞඛ්‍ය  තත්වය දිගින් දිගටම  පිරිහුනේය .  ඔහුගේ බිරිඳ ජෙනි 1881 දෙසැම්බරයේදී මියයාම  අසනීපයෙන් සිටි මාක්ස්  තදබල කම්පනයකට  පත් කළේය . මේ  නිසා  ඔහු පෙළෙමින් සිටි අසනීප   තව තවත්  උග්‍රවූ අතර පෙනහැලි රෝගයක්ද වැලදුනේය. ඉන්පසු පීනස් රෝගයක්ද  ඔහුට  වැළඳුනු අතර  1883 මාර්තු මස 14 වන දින පස්වරු 2.45 ට මාක්ස්  සිය නිවසේදී අවසන්  හෙලුවේය . ඔහු මියයන විට වයස අවුරුදු  64 ක් විය . මාර්තු 17 වනදා ලන්ඩනයේ හයිගේට් සුසාන භූමියේදී දුසිමකටත් අඩු පිරිසකගේ සහභාගිත්වයෙන් මාක්ස්ගේ දෙන භූමදානය  කරනු ලැබිය .



Image result for tomb of karl marx

මාක්ස්ගේ මරණයෙන් පසු  ඔහු ඉදිරිපත් කළ  මග  මාක්ස්වාදය ලෙස ලොව පුරා  ප්‍රචලිත විය . පසු  කාලයේ ඔහුගේ ලියවිලි සහ ග්‍රන්ථ  ලෝකයේ භාෂා දහස්  ගණනකට පරිවර්තය  කරනු ලැබූ අතර ඒවායේ පිටපත් කෝටි ගණනක් වූ බවට සැකයක් නැත .ඔහුගේ  මග අනුගමනය   ලක්ෂ  ගණනක්  මිනිසුන් විසින් ධනවාදය  පෙරලා  දමා සමාජවාදය නමින් නව  සමාජක්‍රමයක්  රටවල්  ගණනාවක   බිහි කළහ .


සෝවියට් දේශය ඇතුළු රටවල් ගණනාවක සමාජවාදය අසාර්ථක වී  නැවතත්  ධනවාදී මාවතට  පැමිණීම නිසා මාක්ස්වාදයේ වලංගු භාවය පිළිබඳව  බොහෝ දෙනා විසින් අද ප්‍රශ්න  කරනු ලැබේ ..එහෙත් ධනවාදය කඩා වැටෙමින් තිබෙන  බව  කියන  මාක්ස් වාදීන් පවතින ආර්ථික සහ සමාජ  ප්‍රශ්න වලට  මාක්ස්  හඳුන්වා දුන්  මාවත  හැර වෙනත්  විකල්ප මාවතක්  නැති  බව කියති .


මාක්ස් මියගොස් අවුරුදු 200 ක් ගතවුවද ලොව පුරා සිටින  ලක්ෂ  ගණනක් වූ මාක්ස්වාදීන් තුළ කාල් මාක්ස් තවමත්  ජීවත්වේ .


Monday, April 30, 2018

නිධානයක් වූ ලෙස්ටර් ට පස්ස පෙන්වීම



Image result for lester james peiris

   

 ලෙස්ටර් ජේම්ස්  පිරිස් මහතා, ලංකික සිනමාව  යා යුතු ඉසව්ව   රේඛාව සහ ඉන් පසු තැනු විශිෂ්ට සිනමා  කෘතීන්  මගින් අපට  කියා  දුන්නේය. එහෙත් ඔහු එළිකළ  මාවතේ  ගියේ අතලොස්සක් සිනමා  කරුවන් පමණි .බොහෝ සිනමා  කරුවන් විසින් කසි කබල්  ඉන්දියානු චිත්‍රපට අච්ච්වේ සිංහල  චිත්තර  පටි  අච්චු ගසා ප්‍රසිද්ධ  කළහ . එමගින්  ඔවුන්ගේ සාක්කු පුරවා  ගත්  අතර ලාංකික සිනමාව වල පල්ලට ඇද දැම්මේය .


ලෙස්ටර් යුරෝපයේ හෝ ඇමරිකාවේ උපන්නේ නම් ඔහු  අංක එකේ සිනමා  කරුවෙකු ලෙස  ලෝකයම හඳුනා ගනු ඇත . එවැනි විශිෂ්ටයෙකුගෙන් අප  ඉගෙන ගත්තානම් ඒ සොච්චමක්  පමණි . අප කණගාටු විය යුත්තේ  ඔහුගේ  අභාවයට වඩා ඒ  පිලිබඳවය .


මගේ බුකි මිත්‍රයෙකු වන  කේතක දිනාජ් විසින් ලෙස්ටර් ගේ  සිනමා නිරමාණ  ගැන අගනා විවරණයක් බුකියේ ලියා තිබුණේය. එය මා  මෙහි නැවත  පළකරන්නේ එවැනි රචනයක්  ලියන්නට  තරම්  සිනමාව ගැන තිබෙන මගේ දැනුම ප්‍රමාණවත් නොවන නිසාය .


 ===========================

ලෝකය ඉදිරියේ ලෙස්ටර් නිරාවරණය කල ලංකාවේ නිධානය

නිධානය චිත්‍රපටයට පාදකකොට ගෙන ඇත්තේ ජී.බී සේනානායක මහතාගේ 'පලිගැනීම'කෙටිකතා සංග්‍රහයෙහි එන 'නිධානය' නම් කෙටිකතාවයි.'නිධානය' කෙටිකතාවෙහි ප්‍රධාන චරිතය වන 'විලී අබේනායකගේ' ස්වයං පාපොච්චාරණය නිධානය නමින් කෙටිකතාව ලෙසට ප්‍රබන්ධ කොට ඇත.


Related image

                                                        (නිධානය )


ණය බරින් මිරිකී ගිය පිරිහුණු රදළ පවුලකට අයත් විලී අබේනායක නිධානයක් පිළිබඳ උනන්දු වෙයි. එලෙස නිධානයක් ගැන ඔහු දැනුවත් වන්නෙ පැරණි පුස්කොල පොතක එන විස්තරයක් කියවීමෙනි. නිධානය ලබා ගැනීමට නම් නළලෙහිද නහය අගද කම්මුලෙහි වල ගැසෙන තැනද අනුක්‍රමයෙන් කුඩාවී යන උපන් ලප ඇති ස්ත්‍රියක් බිලිදීමට අවශ්‍යය. එවන් ස්ත්‍රියක සොයා සැරිසරන විලී අබේනායක අවසානයේ 'අයිරින්' නම් අර කී ලක්ෂණ දරන ආකාරයේ ස්ත්‍රිය සොයා ගනී.

ඇයව විවාහ කරගන්නා විලී අබේනායක ඈට මහත් සේ ප්‍රේම කරන අතර ඇයද ඊටත් වඩා ඔහුට පෙරළා ප්‍රේම කරයි.ණය බර දියුණු වී දේපලද අහිමිව යෑමේ අවදානම් තත්වයක් ඇතිවූ විට විලී අබේනායකගේ සිතෙහි ඇයව මරා නිධානය ලබා ගැනීමේ අදහස නැවතත් මතුව එයි.ප්‍රේමයට වඩා දිලින්දෙකු වීමේ අවමානය පිලිබඳ හැඟීම දැඩි වීම නිසා අවසානයේ ඇයව මරා නිධානය ලබාගැනීමට ඔහු තීරණය කරයි.



Image result for lester james peiris


                                                           (නිධානය )


කැලයෙහි උස් පර්වතයක මුදුනෙහි වන ගල් දොරක් අබියසට යන විලී අබේනායක අයිරින් හා එක්ව බහිරව පූජා පවත්වයි. පිරුවට හැඳ මන්ත්‍ර කියමින් පූජා පවත්වන විලී අබේනායක අවසන පිහියකින් ගෙල සිඳ අයිරින් මරා දමයි. නියමිත ආකාරයට වත්පිළිවෙත් කොට අයිරින් ද බිලිකල නමුදු නිධානය සඟවා ඇති ගල් ගුහාවේ ගල් දොර නොඇරෙයි. 

අතිශයින්ම කම්පාවට පත්වන විලී අබේනායක ජීවිතාශාව අත් හරී.

ජී.බී සේනානායක මහතාගේ නිධානය කෙටිකතාව සැකෙවින් එලෙසය. නිධානය කෙටිකතාව එතරම් දීර්ඝ කතාවක් නොවේ. එමෙන්ම කෙටිකතාවේ එකදු දෙබසක් හෝ අඩංගු නොවෙයි. තමා කල මනුෂ්‍ය ඝාතනය ගැන කම්පා වන මිනිසෙකුගේ පාපොච්චාරණයක විලාසයට කෙටිකතාව රචනා කර ඇත.



Related image


                                ලෙස්ටර් තැනු ' ගොළු හදවත ' 



නිධානය කෙටිකතාව ලිවීමට අවශ්‍ය ආවේශය ජී.බී සේනානායකලැබුවේ කෙලෙසද යන්න පිලිබඳ තොරතුරු නොමැත. ඇතැම් විටෙක සිටු දියණිය මරා අභරණ පැහැර ගැනීමට අදහස් කල සත්තුක නම් සොරා ගැන බෞද්ධ සාහිත්‍යයේ එන කුණ්ඩලකේෂී කතාපුවත ඊට වස්තු බීජය සැපයූවා විය හැක.

නිධානය කෙටිකතාව ආශ්‍රයෙන් ලෙස්ටර් ජේම්ස් පීරිස් මහතා අධ්‍යක්ෂණය කල ඇන්තනී පිල්ලෙ මහතා (සිලෝන් තියටර්ස්) නිෂ්පාදනය කල චිත්‍රපටය නිපදවන්නේ 1972 වසරේදීය.චිත්‍රපටයේ සාර්ථකත්වයට විශාල ලෙස බලපා ඇත්තේ තිස්ස අබේසේකර මහතාගේ තිර පිටපත සහ දෙබස් ය. කෙටි,දෙබස් රහිත කෙටිකතාවකට අතිශය සාර්ථක සිනමාරූපී බවක් ලැබෙන්නෙ තිස්ස අබේසේකර මහතාගේ මැදිහත් වීමෙනි.

                    අනෙක් අතට සිංහල චිත්‍රපටයක දැක ඇති ඉහලම පසුබිම් සංගීතය ඇත්තේද නිධානයෙහිය. නිධානයෙහි සංගීත අධ්‍යක්ෂණය ප්‍රේමසිරි කේමදාස මහතාගේය.



Related image


                                         ලෙස්ටර්ගේ  ගම් පෙරලිය 


ලෙස්ටර්,තිස්ස,කේමදාස ත්‍රිත්වය ලෝක සිනමාවෙහි සනිටුහන් කල නිධානය ලාංකේය සිනමාවෙහි හැරවුම් ලක්ෂ්‍යයකි.

විලී අබේනායකගේ චරිතය මැනවින් නිරූපණය කල ගාමිණී ෆොන්සේකාගේ ප්‍රබල රංගනය ද මාලිනී ෆොන්සේකා කෙරෙන් නිරූපණය වූ අවිහිංසක ගැමි ස්ත්‍රියද නිධානයට මහත්ම ආලෝකයක් විය.

ශෝකජනක අවසානයක් ඇති නිධානය චිත්‍රපටයේ සෑම චරිතයක්ම එකී ශෝකජනක අවසානයට හිමිකම් කියන්නේ මන්ද යන්නට පිලිතුරු ඇත.


 එහි ආකාස්මික හේතු කිසිවක් නොමැත.විලී අබේනායක අතිශය සාහසික මිනී මරුවෙකු වන්නේ මන්ද ? 

ධනවාදී ව්‍යාපාරිකයින් පංතියක් ලෙස වැඩෙද්දී පිරීහි යන වැඩවසම්බව දැඩිව අල්වා ගෙන ධනවාදයට ප්‍රතිවිරුද්ධව ක්‍රියාකිරීමට යෑම එයට හේතුවයි.මුදලින්,දේපලින් පිරිහී යෑම වැඩවසම් රදලයාට ඉහිලුම් නොදෙන ශෝකයක් වෙයි. ඔහු කෙසේ හෝ තමාට පරම්පරාවෙන් කිසිදු වෙහෙසකින් තොරව උපතින්ම හිමි වූ දේපල ආරක්ෂා කිරිමට සිතයි. එයට සාධාරණ හේතු සහිත වටපිටාවක් චිත්‍රපටයේ පෙන්වා ඇත. විලී අබේනායක නම් සාහසික මිනීමරුවා කෙරෙහි සංවේගයක් මිසක කෝපයක් හට නොගන්නේ එබැවිනි.

ලෝක සිනමාව කෙරෙහි නිධානය බලපෑ අතර විදෙස් අවධානය වරින් වර ඊට හිමි විය.1972 ඉතාලියේ වැනිස් සිනමා උළෙලෙහි එයට රජත සිංහ (Silver Lion) සම්මානය හිමිවිය.

ප්‍රංශයේ සිනමතෙක් ආයතනය විසින් 1995දී ලෝක සිනමාවට වසර සියයක් පිරීම නිමිත්තෙන් නම් කල ලොව බිහිවූ සිනමාපට 100 අතරට නිධානය නම් කර ඇත.

1999 කොරියාවේ පූසාන් අන්තර් ජාතික සිනමා උළෙලේ දී විසිවන සියවසේ ආසියාවෙන් බිහිවූ හොඳම සිනමාපට 13 න් එකක් ලෙස නිධානය නම් කර ඇත.


Image result for lester james peiris


විවිධ පාර්ශව ඔස්සෙ ලෙස්ටර් ලංකාවේ සිනමාවට කල මෙහෙය කිසි කලෙක මැකී නොයෙන එකකි.එළිමහනේ 'රේඛාව' අධ්‍යක්ෂණය කිරීමෙන් වාණිජවාදී සිනමාවට නව මානයක් පෙන්වමින්ද නිධානය වැනි චිත්‍රපටයක් අධ්‍යක්ෂණය කරමින් සම්භාව්‍ය සිනමාවට අඩිතාලම දැමීමෙන් ද ලෙස්ටර් ලංකාවේ සිනමාකරුවන්ගේ පීතෲවරයා ලෙස ඉතිහාසගත වී අවසන් ය.



Image result for lester james peiris

Wednesday, April 25, 2018

නන්දිකඩාල් කලපුව අද්දර සිට ඔබට ලියමි

Image result for nandikadal lagoon


        තමිල් ඊළමේ විමුක්ති කොටින්ට උතුරු  ලංකාවේ  මේ  කෙරවල  වසර  ගණනාවක්  බලකොටුවක්  වි තිබිණ  .තමන්ගේ  පොලිසි ද  ,තමන්ගේ  උසාවිද LTTE සංවිධානයට  තිබුනේය. කුඩා වාණිජ මධ්‍යස්ථානයක් වූ  පුතුක්කුඩියිරුප්පු හී ඔවුන්ගේ නායකයාවූ  වේලුපිල්ලෙයි ප්‍රභාකරන්ට නිවසක්ද ශක්තිමත්  බංකරයක්ද තිබිණ .


අද මුලතිව්  දිස්ත්‍රික්කයේ වාසය  කරන  තරුණ පරම්පරාව  වැඩි කාලයක් ජීවත්වුයේ ලංකාවේ ආණ්ඩු යටතේ නොව LTTE  පාලනය  යටතේය .


LTTE සංවිධානය 2009 දී තම අන්තිම සටන  කරුණු ලැබුවේද මුලතිව් හීදීය .හතරැස්  කිලෝමීටර  3  ක වැලි තීරයක සිදුවූ  යුද්ධයෙන් බේරීම සඳහා  දෙපැත්තේම වෙඩි ප්‍රහාරයන්ට  මැදිවෙමින් ලක්ෂයක  ජනතාවක් මෙහි සරණ සොයා පැමිණියහ .එහි අවසාන  මාස  කීපය 'අපායට සමානවූ බව ' එක්සත් ජාතීන්ගේ වාර්තාවක් කියා තිබේ.


යුද්ධය අවසන් වී වසර 10 කට ආසන්න වී  ඇතත්  බොහෝ තුවාල තවමත් සුවවී  නැත . 


මෙම දිස්ත්‍රික්කයෙන් හමුදාව  ඉවත් වී යාම  ඉතා මන්දගාමී  වන අතර ලංකවේ දුප්පත්ම දිස්තික්ක වලින්  එකක් වන්නේ  මෙයයි.


Image result for mulativ district


මුලතිව්  නගරය වටා සැරිසරන විට  ඇසෙන්නේ   ජනයාගේ දුක්ඛ දෝමනස්සයන්‍ ය. ඔවුන් කලකිරී සිටින්නේ   ආණ්ඩුව සම්බන්ධ්යෙන්  පමණක් නොවේ . තමන් විසින්  දිගින් දිගටම  කර උඩ තබාගෙන සිටි  දෙමල  ජාතික සන්ධානය පිලිබඳවද   කලකිරී සිටිති .


හමුදාව විසින් අල්ලාගෙන තිබෙන  ඉඩම්  නිදහස්  කර  දෙන බවට,  අතුරුදහන් වුවන්ට සිදුවුයේ  කුමක්දැයි සොයා දෙන  බවට දුන්   පොරොන්දු  ඉටු නොකිරීම  ගැන තමන් නියෝජනය  කරන  බව   කියන දේශපාලකයන් පිළිබඳව මුලතිව් වැසියන් සිටින්නේ  කේන්තියෙනි  .

    Image result for mulative

                               මුලතිව්- පරන්තන් පාර 

පෙබරවාරි මාසයේ  පැවතී පළාත් පාලන  මැතිවරණයේදී පුතුක්කුඩුයිරිප්පු හි අලුත්  දේශපාලන බලවේගයක් ඉදිරියට  පැමිණීම  මිනිසුන් තුළ  පවත්නා බලාපොරොත්තු කඩවීම  ප්‍රකාශ  කරයි .


මන්තිරිවරු 22  කින් සමන්විත  ප්‍රාදේශීය  සභාවට කිසිදු දේශපාලන  පක්ෂයකට සම්බන්ධ නැති ' වෙනසක් සඳහා වන  තරුණ  තරුණියෝ ' (Mattathukkana Ilajooir Amaipu,) නම් සංවිධානය  මන්ත්‍රී ධුර 4 ක් දිනාගැනීමට සමත්වූ විය  .ඔවුන් එම සංවිධානය  පිහිටුවාගෙන  තිබුනේ මැතිවරණයට  දින 45 ක් තබාය


එම සංවිධානය ඉදිරියේ  පැවැත්වීමට නියමිත පළාත් සභා  මැතිවරණයට  ඉදිරිපත්වීමට සුදානම් වෙමින් සිටි. දෙමල  ජාතික සන්ධානය ඉබාගාතේ  යමින් සිටින බවත්  ගිය  මැතිවරණයේදී ඔවුන් මුලතිව් පැත්තටවත් ආවේ  නැති බවත් 'වෙනසක් සඳහා වන තරුණ තරුණියෝ සංවිධානයේ සභාපතිවන ටි .නිත්‍යානන්දන්  කිවේය .




" උතුර පළාතේ කුඩා නගරයක මිනිසුන්ගේ ප්‍රශ්න  කතා  කිරීම නිසා  සුළු වෙනසක්  කරන්නට අපිට  හැකිවී  තිබෙනවා .ඉදිරියේදී උතුර  ගමන් කරන්නේ  කොයි දෙසට දැයි සිතා  ගැනීමට මෙය හොඳ සලකුණක් " ඔහු තව දුරටත් කිවේය .


Image result for mulativ district

    පැසවන බලාපොරොත්තු  කඩවීම 


යුද්ධයේ උරුමය වන තල් ගස්  අතර පුපුරා  ගිය  නිවෙස්,  දිස්ත්‍රික්කය පුරා  තිබෙන  බොහෝ යුධ  කඳවුරු අතර  මාවත් දිගේ ගමන් කරන සොල්දාදුවන් සහිත වාහන, මෙහිදී  ඔබට දැක ගත  හැකිය .


ප්‍රතිපත්ති පර්යේෂණ අධ්යාලාම්  මධ්‍යස්ථානයේ තොරතුරුවලට අනුව ශ්‍රී ලංකා  යුධ හමුදාවේ  60000 (හැටදහසක් ) මුලතිව් දිස්ත්‍රික්කයේ රඳවා තිබේ.එම සංඛ්‍යාව රාජකාරිවල නියුක්තව සිතන  ලංකා  හමුදාවෙන්  25%කි .


මුලතිව් නගරයෙන් පිටත පිහිටුවා තිබෙන පිලක්කුඩුජිරිප්පු ගුවන් හමුදා  කඳවුර  ඉදිරිපස පවුල් ගණනවක්  තාවකාලික  කුඩාරමක් සවිකොටගෙන නැවතී සිටිති.


එහිදී මා සමග  කතා  කළ 51 හැවිරිදි අරුමොගම් වේලායුද පිල්ලෙයි,  දින 411 ක් තිස්සේ විරෝධය  පළකිරීමක් ලෙස  මෙහි නැවතී සිටින බව  කිවේය .


"අප  ඉල්ලන්නේ වෙන මොකවත් වත් නෙවෙයි.අපේ ඉඩම් " ඔහු කිය.


හමුදාවේ  අවසාන  ප්‍රහාරය  සිදුවූ සමයේ , 2008 -12.26 වන දින ගේ දොර අත්හැර දමා සිය පවුලේ සාමාජිකයන් සමග  පැන ගිය  බවත්  අභ්‍යන්තර අවතැන්වුවන්ගේ කඳවුරක  ගතකොට 2012  ආපසු  පැමිණිවිට තමන්ගේ නිවසට  යන  පාර ගේට්ටුවක් දමා  වසා  තිබුන  බවත් ගේට්ටුව  විවුර්ත කිරීමට  හමුදාව  ඉඩ නුදුන් බවත් වේලායුද පිල්ලෙයි   කියා සිටියේය .


වෙනත් කුඩා  ඉඩමක  තමන් පදිංචි කරවූ නමුත් තමන්ගේ  පරම්පරාගත නිවස සහ අලුත් ස්ථානය  අහසට  පොලොව  මෙන් වෙනස්  බවත් ඔහු කියයි.


" කලින්  ගෙදර එක පැත්තක කලපුව. අනිත් පැත්තෙන්  කුඹුරු .ඉඩමේ  පොල් ගසුයි අනිත් ඕන දේවලුයි තිබුන. දැන් ඉන්න ඉඩමේ ඒ මොකුත් නැහැ මම කඩෙන් පොල් ගන්නවා .මගේ වත්තේ පොල් හමුදාව  කඩා ගන්නවා " වෙලායුදපිල්ලෙයි කිය.


නගරයේ  අනිත් පැත්තේ  තවත් විරෝධතා  කඳවුරක්  තිබේ එහි සිටින්නේ කාන්තාවන් පිරිසකි .අතුරුදහන් වූ තම  පවුල්වල සාමාජිකයන්ට අත්වූ ඉරණම කුමක්දැයි ඔවුන් අසති .


මුලතිව්හි අතුරුදහන් කරනු ලැබුවන් වෙනුවෙන් පිහිටුවාගන්නා   ලද සංවිධානයේ  දිස්ත්‍රික් සම්බන්ධිකාරක වන්නේ 42  හැවිරිදි  මෙරියාසුරේෂ් ඊශ්වරි  නමැති කාන්තාවයි .ඇයට සිය ස්වාමිපුරුෂයා අහිමි වුයේ 2009 මාර්තු මාසයේය . යුධ හමුදාව විසින් ඔහු අත් අඩංගුවට  ගත් බව  රතු කුරුස සේවය ඇයට  කියා  තිබේ, නමුත් ඉන්පසු ඔහු පිළිබඳව  කිසිදු ආරංචියක්  නැත .


Mariyasuresh Isswary, 42

" දැන් අවුරුදු 10 ක් ගත වෙලා. අපේ  ස්වාමිපුරුෂයන්  පන පිටින් ඉන්නවද නැද්ද  කියල අපි දන්නේ නැහැ .ඔවුන්ට අත්වූ ඉරණම  ගැන  අපි දැනගන්න  තුරු අපිට අපේ ජීවිතවලට  කිසිම අනාගත සැලැස්මක් හදාගන්න බැහැ" ඊශ්වරි කීවාය.


" අපේ දේශපාලන නියෝජිතයන් අපිව රවට්ටලා .මේ ප්‍රශ්නෙට  පිළිතුරක් හැටියට  ලඟදි ආණ්ඩුව  පිහිටවපු අතුරුදහන් වුවන් පිලිබඳ  කාර්යාල ය පිළිබඳව විශ්වාසය  තියන්න  පුළුවන් කියල දෙමල මන්ත්‍රීවරු කියනව. නමුත් ඒ කාර්යාලයට  නැහැ නඩු පවරන්න  බලයක් .අනික ඕකේ ඉන්න  අය  කොළඹ  ඉහල පැලැන්තියේ අයයි,  හමුදා නියෝජිතයෝයි.  මට නම් හිතෙන්නේ  ලෝකේ රවට්ටන්න  හදපු සුත්තරයක්  කියල ඔය  කාර්යාලේ ."


'අපි දෙමල  ජාතික සන්ධානයට  චන්දෙ දුන්නේ ඒ ගොල්ලන්ව විශ්වාස  කරලා.  නමුත් ඒ ගොල්ලෝ අපේ ප්‍රශ්න  ගැන උවමනාවෙන්  පාර්ලිමේන්තුදි  කතා  කරන්නෙත් නැහැ  ලෝක  ප්‍රජාවට අපේ  ප්‍රශ්න  කියන්නෙත්  නැහැ අපි මේ  කුඩාරමට වෙලා  ඇතිවෙන්න දුක් විඳිනවා .ඒ ගොල්ලෝ ඒ සී වාහනවල  යනවා " 


මේ පිළිබඳව  දෙමල ජතික සන්ධානයේ  මුලතිව් දිස්ත්‍රික්කයේ තරුණ අංශයේ  නායකයා වන පීටර් ඉලන්චේලියගෙන් විමසුවෙමි .

පීටර් ඉලන්චේලියන් 

"අපේ නායකයන් විශ්මකර්ම  වැඩ  කරන්නේ  නැති එක ඇත්ත නමුත් ඔවුන්ගේ උත්සාහය නිසා තමයි කෙප්පපුලව් ප්‍රදේශයේ අකකර 133 ක් හමුදාවෙන් ආපහු ගන්න  පුළුවන් උනේ .


සති තුනකට පෙර ධීවරයන් පිරිසක් අත් අඩංගුවට ගනු ලැබිණ. එයට හේතුවුයේ නාවික  හමුදාව විසින් නදිකඩාල් කලපුවේ ධීවර  කටයුතු කිරීමට ඉඩ නොදීම  ගැන විරෝධතා ව්‍යාපාරයක්  ගෙන ගිය නිසාය . 


" නන්දිකඩාල්  කලපුව අපිට ජීවත්වෙන්න  තියෙන එක සම්පතක් . නේවි එක හිටියට අපිට  කමක් නැහැ . නමුත් අපිට මාළු අල්ලගන්න  ඉඩ දෙන්න  ඕනේ ." එක ධීවරයෙක් කිය. අපි විරෝධතා දක්වන එක නවත්තන්නේ  නැහැ .කලපුවේ  මාළු අල්ලන්න දෙනකම් අපි විරෝධතා ව්‍යාපාර ගෙනියනවා  මොකද  අපි දන්නේ  මාළු අල්ලන රස්සාව විතරයි .


 ( Walter Wuthermann නමැති ඇමරිකානු ලේඛකයා Daily News පුවත් පතට  ලියා  තිබු  ලිපියක් ඇසුරෙන් ලියන ලද ලිපියක්  බව සලකන්න )


Thursday, April 19, 2018

සුගන්ධිකා කිව් කතා සහ නොකිව් කතා



Image result for sugandhika fernando

       සුගන්ධිකා  ෆර්නැන්ඩු මහත්මිය එක රැයකින්  ජනප්‍රිය චරිතයක් වී  තිබේ. එමෙන්ම එක රැයකින් සතුරන් රැසක්ද ඇය ඇති කරගෙන තිබෙන බව  පෙනේ. අධිකරණ ශේෂ්ත්‍රය කොතරම් කුණු වී තිබේ දැයි ඇය  හෙළි කිරීම නිසා  බොහෝ  නීතිඥයන් ඇය සමග  උරණ වී  තිබේ . ඔවුන්ට   සුගන්ධිකා අප්පිරිය වී  තිබෙන්නේ ඇය බොරු කීම නිසා  නොවේ. ඇත්ත  කීම නිසාය . ඇත්ත  හෙළි කිරීමෙන් උසාවියේ   හංගාගෙන තිබෙන  ඇට සැකිලි දැක අධිකරණය කෙරෙහි  තිබෙන ගෞරවය මිනිසුන්  තුළින් අහෝසි වී  යතැයි මෙන්ම නීතිඥ යන් යනු ඩ්රැකියුලාගේ පරම්පරාවෙන් පැවත එන්නන් බවට  සැකපහල කරනු ඇතැයි ද බියට  පත්වූ  බොහෝ නීතිඥයෝ     ඇයට දෙස් දෙවොල්  කියන්නට  පටන්ගෙන   තිබේ.




සුගන්ධිකාට  පෙර අධිකරණයේ   නොපණත්  කම් වලට එරෙහිව මෑත කාලයේ  සටනට  බැස්සේ  නීතිඥ  නාගානන්ද  කොඩිතුවක්කු  මහතාය . මේ නිසා නීතිඥ  සංගමය මෙන්ම ඇතැම් අධිකරණ නිලධාරීන්  ඔහු දෙස  බලන්නේ සතුරෙකු  ලෙස  බව  පෙනේ. සුගන්ධිකා  මහත්මිය ආපසු එතෙර නොගොස්  ලංකාවේ  නතරවී සටන දිගට  ගෙනියන්නේ නම  නාගානන්ද මහතාටද   නව  පණක් ගෙන  සටන  ඉදිරියට  ගෙන යාමට ශක්තියක් වනු ඇත  .


Image result for NAGANADA KODITHUWAKKU

 

අධිකරණයේ ඇතැමෙකුගේ   කැත වැඩ  පළමු වරට සමාජයට හෙළි කළේ වික්ටර් අයිවන් මහතා  යයි  මා සිතමි .  දසක දෙකකට  පමණ පෙර ඔහු විසින් දිගින් දිගටම රාවය  පත්තරය  මගින්  හෙළිදරව්  ගණනාවක්  කළත්   කැත වැඩ  කළ  අයට සිදුවූ දෙයක් නැති තරම්ය.


මා මේ ලිපියෙන්  කියන්නට  යන්නේ විනිසුරුවන් ගැන නොවේ. ඔවුහු  තිරය  පසුපස  සිට  කරන දේවල් මා දන්නේ  නැත .කෙසේ වෙතත් ඔවුන්  හා ඇසුරක්  තිබෙන්නේ  නම්  නඩු තීන්දු තමන්ට  උවමනා  පරිදි වෙනස්  කරගත  හැකි බව  පසු ගිය  කාලයේ ඇසුණු  කතා වලින් පැහැදිලිය .  සරත් එන් සිල්වා  මහතා විසින්ම එය  ඔප්පු කළේ සුනාමි  ගැහිල්ලට  මහින්දව  හිරේ යැවීමට  පුළුවන් කම තිබුනද  තමා එසේ  නොකළ බව  කිමෙන්ය . හිටපු අග විනිසුරු මොහාන් පීරිස්  තමා  හමුවට ඇවිත් රැකියාවෙන් ඉවත් නොකරන්නේ  නම් ආණ්ඩුවට අවශ්‍ය  පරිදි නඩු තීන්දු  ලබා දිය  හැකි බව කිවේයයි කිවේ   වත්මන් ජනාධිපතිවරයාමය . ශිරාණි බණ්ඩාරනායක  මහත්මියට එරෙහිව  පාර්ලිමේන්තුවේදී කැකිල්ලේ  නඩු තීන්දුවක් දී  ගෙදර   යැව්වේ රාජපක්ෂ  මහතාට උවමනා  පරිදි  නඩු තීන්දු ලිවීමට පසු කාලයේ ඇය අකමැති වූ නිසා  බව  ප්‍රසිද්ධ  කරුණකි .හෝමාගම දිස්ත්‍රික් විනිසුරුවූ සුනිල් අබේසිංහ  ඉඩම් නඩු  තීන්දුවක් වාසි වන ආකාරයට  ලබා දීමට  රුපියල් ලක්ෂ තුනක අල්ලසක්  ලබා ගැනීමේදී අසුවිම නිසා වැඩ තහනම් කරනු ලැබිණ.මේ විනිසුරුවන්ගේ කැත වැඩ  ගැන ලියවී  තිබෙන  තොම්බුවෙන් කීපයක් පමණි .


Related image

දුෂණය වී  තිබෙන්නේ අධිකරණයේ  ඉහල  තට්ටුව  පමණක්  නොවේ. ඉහල සිට පහල  සුළු සේවකයා දක්වාම  අධිකරණ ශේෂ්ත්‍රය අල්ලස් වැනි දුෂණ  ක්‍රියාවලින්  කම් වලින් මෙන්ම  නොපනත්  කම වලින්   පිරී  ගොස් තිබේ  .ඉඩම් නඩු  දෙක තුනක් කීමට  මට ද සිදුවූ බැවින් ඒ පිළිබඳව තරමක අවබෝධයක්  මට තිබේ .



කිසියම් උසාවියකට අයත්  කාර්යලකින් නඩුවකට සම්බන්ධ  ලියවිල්ලක්  ඉක්මනින් ලබා  ගැනීමට  හැකිවන්නේ එහි කිසිවෙකුට අතමිට  මෙලවුවහොත් පමණය .අධිකරණයෙන්  කිසියම් තහනමක් ඔබ   ලබාගතහොත්  එය  ඉක්මන්  කර අනෙක් පාර්ශවයට දැනුම් දිය යුත්තේ  පිස්කල් නිලධාරියෙකු විසිනි . එහෙත්  එම රාජකාරිය  ඉක්මනින් කිරීමට  පිස්කල් නිලධාරියට  උවමනාවක්  නැත . එය  ඉක්මන් කරවීමට  ඔබට  හැකි වන්නේ පිස්කල් නිලධාරියා  සොයාගෙන  ගොස් (බොහෝ විට ඔහුගේ නිවසට ) ඉක්මනින් රාජකාරිය  ඉටු කරන  ලෙස ඉල්ලමින් සන්තෝසමක් දිමෙන් පමණි. .වරක්  නඩු තීන්දුවකින්  මට අයත්වූ  ඉඩම් කට්ටිය  භාර දෙන ලෙස  අධිකරණයෙන්  ඉල්ලා සිටියෙමි. ඒ සඳහා උසාවිය  එවන්නේ එහි කාර්යාලයේ ප්‍රධානියාය . මේ  සම්බන්ධයෙන් විමසීම සඳහා  උසාවියේ කාර්යාලයට  ගිය  විට එහි සේවකයෙකු  මට කිවේ ලොකු මහතා අරක්කු නොබොන  බවත් බියර්  පමණක්  බොන බවත්ය . ඔහුට ඉඩමට  පැමිණීමට වාහනයක් සපයන  ලෙස  කිව් සේවකයා  සන්තෝසමක් ලෙස  ලොකු මුදලක්  ලොකු සර්ට දිය යුතු බවද මට කිවේය .



ඉඩම්  නඩුවක්  අවසන් වීමට අඩු වශයෙන් වසර  දහයක් පහළොවක්  ගතවේ .ඇතැම් නඩු අවුරුදු තිහක් ගතවීත් අවසන් වන්නේ නැත . නඩු අවසන් වන විට පාර්ශ්වකරුවන්ගෙන් ඇතැමෙකු පරලොව  ගොස්ය .තීන්දුව එන විට   පැමිණිලි පාර්ශ්වය  මෙන්ම   විත්ති පාර්ශ්වයේ බොහෝ දෙනෙකු (නොමැරී සිටියහොත් ) ආර්ථික වශයෙන් නට්ටම් වී  හමාරය . ඔවුන් නට්ටම් වන විට නීතිඥ  නෝනා  මහත්වරු තට්ටු පිට  තට්ටු ගෙවල්  හදාගෙන අහවරය .

 

 නීතිඥවරු සම්බන්ධයෙන් ද  තිබෙන්නේ  කට්ට  කළු චිත්‍රයකි . තම සේවා  දායකයාගේ කැවුත්තටම සුරා  කන  පිරිසක්  ලෙස නඩු යන්නෝ ඔවුන් හදුන්වති .නීතිඥයන්ට තමන් කැමති  කැමති හැටියට  ගාස්තු අය  කිරීමට පවතින නීතියෙන් ඉඩකඩ සලසා  තිබීම එයට  ප්‍රධානම  හේතුව වෙයි . නීතිඥ මහතා හෝ මහත්මිය  විසින් අය  කරන සේවා  ගාස්තුව සඳහා සේවා දායකයාට ලදු පතක්  කිසිදිනක ලැබෙන්නේ  නැත . එසේ  වන්නේ  නීතියෙන් එයට  ප්‍රතිපාදන සලසා  නැති නිසා විය  යුතුය . එබැවින් නීතිඥයෙකු  කොපමණ ආදායමක්  උපයන්නේ දැයි දන්නේ  ඔහු පමණි. ඔහු/ඇය ලබන ආදායම වෙනුවෙන් ආණ්ඩුවට ඔහු/ඇය බදු ගෙවීමක්ද  නොකරයි .මහජනයාගේ බදු  මුදලින් අධ්‍යාපනය  ලබා නීතිඥයෙකු වන  ඔහු /ඇය විශාල ආදායමක්  උපයාගන්නා  නමුත් මහජනයාට සේවා සැපයීම සඳහා   තඹ සතයක් වත් බදු ලෙස  ගෙවන්නේ  නැත .


ආණ්ඩුවක වගකීම වන්නේ පුරවැසියා  හැම අතකින්ම ආරක්ෂා  කිරීමය එහෙත් නීතිඥයන් විසින් දිගින් දිගටම අධික සේවා  ගාස්තු අය  කිරීම හෙවත්  සේවා  දායකයන් හුරා  කෑම  වලක්වන්නට   කිසිදු ආණ්ඩුවක් ගත්  පියවරක් නැත .  එසේ වී  තිබෙන්නේ  ආණ්ඩුවලට ඒ සඳහා කිසිදු උවමනාවක් නොතිබීම නිසාය . පාර්ලිමේන්තුවේ සිටින  සහ සිටි  මන්ත්‍රීවරුන් සහ ඇමතිවරුන් අතරින් සැලකිය යුතු පිරිසක් නීතිඥයන් වී  තිබීමද එයට  හේතුවක් විය  හැක . මහජන සේවය සඳහා එක  පයින් සුදානම් වී  සිටින බව  කියන  මේ  නීතිඥ  මන්ත්‍රීවරු සහ  ඇමතිවරු මහජනයාට සහනයක් සලසා  තමන්ගේ සාක්කුවට  වැටෙන ලක්ෂ  ගණනින් සොච්චමක් වත්  අඩු කර ගන්නට සුදානම් නැත . ඇත්ත වශයෙන්ම  අභියාචනාධිකරණය සහ ශ්‍රේෂ්ඨාධිකරණයේ  නඩු වෙනුවෙන්  පෙනී සිටින ඉහල පෙළේ නීතිඥ  මහත්වරු එක නඩුවක් වෙනුවෙන් අයකරන  ගාස්තුව  ලක්ෂ පහකින්  ඉහළය ඔවුන් වසරකට උපයන ආදායම  ලක්ෂ  ගණනක් නොව  කෝටි  ගණනක් විය  යුතුය . 


සුගන්ධිකා ෆර්නැන්ඩෝ මහත්මිය ඉහත කාරණාව  හෙවත් නීතිඥ  නෝනා  මහත්වරු  තමන් අය  කරන සේවා  ගාස්තුව සඳහා  ලදු පතක්  නොදීම සම්බන්ධයෙන්  කළ  ප්‍රකාශය  නිසා  ඇය  කෙරෙහි බද්ධ වෛරයක් ඇති කරගෙන  තිබෙන  බව  පෙනේ .   මෙයට   පෙර  මේ  ප්‍රශ්ණය  මතු කිරීමට  කිසිදු නීතිඥයෙක් අවංක නොවීය . එබැවින් ඇගේ  එඩිතර  කම   අප සියල්ලෝම ඇයට  ණයගැතිය. 


 ( ඉහත ලිපියේ සඳහන්  කරුණු අධිකරණ ශේෂ්ත්‍රයට සම්බන්ධ   සියල්ලන්ටම අදාළ  නොවන බව කරුණාවෙන් සලකන්න )

 

Saturday, April 14, 2018

අවුරුද්ද සිංහලද ?






Image result for සිංහල අවුරුදු උත්සව


            ලිපියේ  මාතෘකාව දුටු විට පරම පවිත්‍ර අමු සිංහලයන්ට  යකා ආරුඪ වෙන බවට සැකයක් නැත .කෙසේ  වෙතත්  මගේ  ලිපියේ අරමුණ වෙන එකකි. ලිපිය කියවා අවසන් වූ විට සුද්ධ සිංහලයන්ට අසු හාරදාහට  නැග  පොලු මුගුරු , කඩු කිණිසි, පමණක් නොව ගල් කටස් ද රැගෙන  මා  හොයා  ගෙන ඒමට  ඉඩ  තිබේ. එබැවින් මේ  ලිපිය අන්තර්  ජාලයේ නොමැකෙන ලෙස  කොටා , සතියක් හමාරක් යන තුරු  ගෙදරින්  පිටවී  සිටීමට සැලසුම් කරගෙන සිටිමි .


අපේ සීයා  ඉස්සර  නොවරදවා ඈපා පංචාංග ලිත මිලදී  ගැනීමට  පුරුදුවී  සිටියේය. අපේ සීයා  පමණක් නොව  කොයි  කවුරුත් වාගේ  පංචාංග  ලිත  මිලදී  ගත්හ. එකල මිනිසුන්  එහි සඳහන් අවුරුදු  චාරිත්‍ර වාරිත්‍ර අකුරටම ඉටු  කරන බැවින් පංචාංග  ලිත  නැතිවම බැරි  විය . ඒ    කාළයේ  නැකත් දැනගැනීමට  තිබුණු එකම  මග එය විය , අද මෙන්  නැකත්  කියන්නට රුපවාහිනී නොවීය .රේඩියෝ හෙවත් ගුවන් විදුලි යන්ත්‍ර තිබුණු මුත් ඒවා  තිබුණේ  ගමකටම  හත අටකි . දිනමිණ  පත්තරය සමග වසරකට වරක් නොමිලේ  ලිතක්  ආ  නමුත් පත්තර මිලදී  ගත්තේ ඉතාමත් අතලොස්සක් පමණි. එබැවින් කාගේත් විශ්වාසය   හිමි කරගෙන තිබු පංචාංග  ලිත නැති නිවසක්  නැති තරම් විය විශේෂයෙන්ම අවුරුදු  නැකත්  බලා ගැනීමට  පංචාංග  ලිත  අත්‍යවශ්‍ය විය .


 බිත්තියේ එල්ලා  තබා   තිබෙන  පංචාංග  ලිත ජනවාරි සිට අවුරුද්ද අවසන් වනතුරු  විසි තිස් වාරයක්  බැලීම  මගේ සිරිත  විය .අප්‍රියෙල් 13 සහ 14 සිංහල සහ  හින්දු අවුරුද්ද ලෙස එය හැම වසරකම සඳහන් කළේය . එහෙත් අද  බොහෝ අය හින්දු කෑල්ල ඉවත් කොට සිංහල අවුරුද්ද  ලෙස සඳහන්  කරන්නට ඉතා  ප්‍රිය  කරති 

 එහෙත් ඊටත් පෙර අතීතයේදී අප්‍රියෙල් 13 හින්දු අවුරුද්ද  ලෙස සලකු බව පෙනේ .1941 දී සුද්දන්ගේ ආණ්ඩුව විසින් නිකුත් කළ එම වසරේ ආගමික දින ලේඛනයේ අප්‍රියෙල් 13 හින්දු අවුරුද්ද  ලෙස  සඳහන්  කර තිබේ .




Ugadi
Telugu
New
Year
Celebrat
ed in the
state of
Karnata
ka and
Andhra
pradesh

      

අවුරුද්ද අපට  පැමිණෙන්නට ඇත්තේ  ඉන්දියාවෙන්  බවට අනුමාන කිරීම සාධාරණය  ඉන්දියාවේ ඇතැම් ප්‍රදේශවල අවුරුද්ද  සමරන්නේ අප්‍රියෙල් 13 , 14, සහ 15  යන දිනවලය .පන්ජාබයේ නව වසර අවුරුද්ද  අප්‍රියෙල්  13  ද ,ඇසෑමයේ ද , තමිල්  නාඩුවේද කේරලයේද , බෙංගාලයේද අප්‍රියෙල් 13, 14 සහ 15  සමරනු ලැබේ සුර්ය කැලැන්ඩරය අනුව වසරේ  පළමු දිනය  ලෙස  ඔවුන් සලකන්නේ අප්‍රියෙල් 13 වන  දාය .


             තමිල්  නාඩු වැසියන්ට අප්‍රියෙල් 14 උදාවන  අවුරුද්ද හඳුන්වන්නේ තමිල් පුතන්ඩු ලෙසය  .(தமிழ்புத்தாண்டு))  ඔවුන් එදින  නිවෙස්  පිරිසිඳු කොට අලංකාර  කොට  පලතුරු මල් සහ සුභ වස්තුන්ගෙන් සමන්විත වට්ටියක් සකස්  කොට තබන අතර දෙවියන්ට  පහන්  පුජාවක් පවත්වා  ආගමික කටයුතු  කිරීමට  කෝවිලට  යති .අලුත් ඇඳුම් පැළද  නෑදෑයන්  බැලීමට  යන  ඔවුහු   වැඩිහිටියනට වැඳ ආශිර්වාද  ලබා  ගනිති .ඉන්පසු පවුලේ සියලු දෙනා එකතුවී මස්  මාලුවලින් තොර  භෝජනයක්  භුක්ති විඳිති . අවුරුදු දිනට පිළියෙළ කරන ආහාර සිංහල  නිවෙස්වල අවුරුද්දට  පිළියෙළ  කරන ආහාරවලට  යම් තරමකින් සමාන බව පෙනේ . පහත දැක්වෙන්නේ එම ආහාරවල  චායාරුපයකි 






                        ( චායාරුප අනුග්‍රහය WIKIPEDIA)



ගිය අවුරුද්දේ  සිංහල හින්දු අවුරුදු  දිනවල  මා සිටියේ  යාපනයේය. මගේ  දෙමල මිතුරන්  කීප දෙනෙකුගේ නිවෙස්වලට ආස්මි  පාර්සල් රැගෙන  ගියේ  ඔවුන් ආස්මි  ගැන  නොදන්නා  බව කි නිසාය . ඔවුන්ද  අප මෙන්ම අලුත් අවුරුද්ද  සමරමින් සිටියහ .  ඔවුන්ගේ ඥාතින් සහ හිත මිතුරන් තෑගි බෝග  රැගෙන  ඔවුන් හමුවීමට පැමිණියේ අප අවුරුද්දට  නෑ  මිතුරන් බැලීමට  යන  පරිදිමය .




අප්‍රියෙල්  මස  පවත්වන  අලුත් අවුරුද්දේ  නැකත් වල ඇත්ත  නැත්ත  මා  මේ  ලිපියෙන්  කතා  කරන්නට  යන්නේ  නැත . එහෙත් මෙය අපේ  රටේ බොහෝ නිවෙස්වල  පවත්වන විශාලතම  උත්සවය වෙයි . එය  අතිශයින්ම වටින්නේ රට පුරා විසිරි සිටින  පවුලේ සියලුම සාමාජිකයන්  එකතු කරන  උත්සවය  මෙන්ම  නෑදෑයන් සහ මිතුරන් සමග  සම්බන්ධකම්  අලුත් කර ගැනීමට අවස්ථාවක් උදාවන නිසාය . දවස් 365 ම වාගේ වෙහෙසෙන මිනිසුන්ට  සතුටක් විනෝදයක් සහ විවේකයක් දින  කීපයක් තිස්සේ  ලබා  ගැනීමට වසරකට වරක් ලැබෙන එකම අවස්ථව  මෙය වේ. එබැවින් මෙහි වැදගත්  කම සුළු පටු නැත .



එහෙත්  දෙමළුන් සහ සිංහලුන් සමරන මේ උත්සවය  ඔවුන් අතර සම්බන්ධතාවය , මිත්‍රත්වය සහ සහයෝගය ගොඩ නැගීමට , වැඩි දියුණු කරගැනීමට   අවස්ථාවක් බවට යොදාගැනීමට  වග කිව යුත්තන්  කල්පනා  කොට  නැත. අසමගියෙන් සිටින  ජනවර්ග දෙකක් අතර වඩාත් කිට්ටු සම්බන්ධයක්  ගොඩ  නගන්නට අවුරුදු  කාලය ඉතා  උචිත  බව මගේ අදහසයි . අප දෙගොල්ලන් විරසක වී  සිටියත්  අප සියල්ලෝම අතීතයේ දී  නෑදයන්  බව සිංහල සහ හින්දු අලුත් අවුරුද්ද සනාථ කරයි. අප දුරස්ව  ජීවත්වන  බැවින් සිංහලයන මෙන්ම  දෙමලුන්ද ඒ  බව  දන්නේ නැත .



       මේ රටේ  ජීවත්වන  මුස්ලිම්  ජනයාද අප්‍රියෙල් අවුරුද්ද සමරන්නට එකතු  ගැනිමට  හැකි නම් එය  ජාතික සමගිය දෙසට  තබන විශාල  පියවරක් වනු ඇත  යන්න  මගේ අදහසයි . සිංහලයන් සහ දෙමළුන් අතර සංස්කෘතික  වශයෙන්  සමාන  කම් බොහොමයක්   තිබුනත් ඒ දෙපාර්ශවය  සහ මුස්ලිම් ජනයා අතර සංස්කෘතික  වශයෙන් සමානකම්  නැති තරම්ය . එහෙත් ඔවුන්ගේ ආහාර වන පරාටේ , බුරියානි  , වටලප්පන්  මස්කට්  මෙන්ම   සහ  සරුවත්  , ෆලුඩා වැනි  පානයන්ද  සිංහලයන්  ප්‍රිය  කරති . වටලප්පන් දැන් සිංහල  මඟුල් ගෙවල්වල  අනිවාර්ය අතුරුපසක්  බවට  පත්වී  හමාරය . 

           

       චන්ද්‍රිකා    බණ්ඩාරනායක  මහත්මිය ජනාධිපති සමයේ සිංහල සහ මුස්ලිම් පාසල් එකතුව   අවුරුදු  උත්සව  පැවැත්වූ නමුත් ඉන්පසු  බලයට  පැමිණි අය ඒවා  අතහැර දැමුහ .යලිත් එවැනි වැඩසටහන්  මෙන්ම මුස්ලිම් ජනයා එකතු  කරගෙන අවුරුදු උත්සව සමරන්නට  කාලය  පැමිණ තිබේ . ඉකුත්දා  නුවර අවට ඇතිවූ  කලකෝලාහල මෙන්ම  ඊට  පෙර වසරවල   ඇතිවූ මුස්ලිම් සිංහල ගැටුම් ද දෙපාර්ශවයේ  සම්බන්ධකම්  පෙරට වඩා දුරස්  කර තිබේ .එබැවින්  ඔවුන්  හා සිංහලයන් අතර පලුදුවූ විශ්වාසය ගොඩ නැගීමට  අවුරුදු සමයේ එකතුව  කරන  උත්සව ද  යම් තරමකින් හෝ  ආධාර වනු ඇත .


මේ සම්බන්ධයෙන් මුස්ලිම් ජනයාද  ගැඹුරු ලෙස  කල්පනා  කිරීමට  කාලය  පැමිණ තිබේ . අලුතෙන් අරාබි  සංස්කෘතික  ලක්ෂණ  වැළඳ  ගනු වෙනුවට මේ රටේ ජීවත්වන සිංහල සහ දෙමළ  මිනිසුන්ගේ සංස්කෘතීන් සමග පෑහීමට  කටයුතු කිරීම  මේ මොහොතේ අත්‍යවශ්‍ය වී තිබේ . මුස්ලිම්  ජනයා , සිංහල  මෙන්ම දෙමල මිනිසුන් සමග සංස්කෘතික සබඳතා ගොඩ  නගා ගැනීම  ජනවර්ග අතර සමගිය  වර්ධනය  කිරීමට මෙන්ම  ලාංකික අනන්‍යතාවයක් දෙසට  ගමන් කිරීමට ලබා  දෙන වැදගත්  දායකත්වයක් වනු නිසැකය 



Saturday, April 7, 2018

මී ළඟ ජනාධිපති කවුද?



   
Image result for gotabaya rajapaksa age



        ජනාධිපති තනතුරේ ආයු කාලය 19 වන ව්‍යවස්ථා සංශෝධනය අනුව අවුරුදු  5 කි .ඒ  බව එම සංශෝධනයේ සඳහන් වන්නේ මෙලෙසය .

(2) " The President of the Republic shall be elected by the People and shall hold office for a term of five years.”.


මෛත්‍රිපාල සිරිසේන මහතා ජනාධිපති තනතුරේ වැඩ  භාර  ගනු ලැබුවේ  2015  ජනවාරි  9   වන දින  බැවින්  ඔහුට ජනාධිපති පුටුවේ  සිටිය  හැක්කේ 2020  ජනවාරි 8 වෙනදා රාත්‍රී  12 දක්වා  පමණය . එය  ශ්‍රේෂ්ඨාධිකරණයේ  තීන්දුවකින්ද තහවුරු  කර තිබේ. එබැවින්  ඉන් ඉදිරියට  ජනාධිපති සතු වගකීම සහ බලතල  ක්‍රියාත්මක කිරීම සඳහා මී  ළඟ  ජනාධිපතිවරණයෙන්  ජයගත් පුද්ගලයා  ජනධිපති පුටුවේ වාඩි විය  යුතුය .


 ඊ  ළඟ  ජනාධිපතිවරණය  ලබන වසරේ (2019 ) දෙසැම්බර්  මස අගදී  හෝ  2020  ජනවාරි  මස  මුලදී  පැවැත්වෙනු ඇත.

 

මී  ළඟ  ජනාධිපති  අපේක්ෂකයන්  කවුරුන් වෙනු ඇත්ද ?



තමා  යලිත්  ජනාධිපති  තනතුරට යලි  නොඉල්ලන  බව මෛත්‍රිපාල  සිරිසේන  මහතා  ජනාධිපති වූ අලුත කිව්  නමුත් එම අදහස  ඔහු වෙනස්  කරගෙන තිබෙන  බව පසු ගිය  කාළයේ  ඔහු  කළ කි දෑ  තහවුරු කර තිබේ .විධායක  ජනාධිපති  තනතුර අහෝසි  කිරීම ඇතුලත්  නව ආණ්ඩු  ක්‍රම ව්‍යවස්ථාවක් ගෙන ඒමට  ඔහුට  මුල් කාලයේ දැඩි උවමනාවක් තිබුණු නමුත් ඒ පිළිබඳව  දැන් ඔහු කතා  කිරීම  නවතා දමා  තිබේ. සිරස  මාධ්‍ය  ජාලය  සිරිසේන  මාධ්‍ය  ජාලයක් බවට  පත්වී  තිබෙන්නේ ඉබේ  නොවේ. අඩු මුදලකට  සිරසට සංඛායත  විකිණීම  ගැන  චෝදනාවක්ද ජනාධිපතිවරයාට  එල්ල වූ අතර සිරසේ පක්ෂපාති  හැසිරීම එය  සත්‍යයක්විය හැකි  බවට  ඒත්තු  ගන්වයි . ඒ අතර  ජනාධිපතිවරයා සහ  ගෝඨාභය අතර  විශේෂ සම්බන්ධතාවයක්  තිබෙන බවත් මී  ළඟ   ජනාධිපතිවරණයේදී ගෝටා ගේ සහය  ලබාගෙන  මෛත්‍රිපාල මහතා  යලිත් වරක්  ජනාධිපතිවරණයට  ඉදිරිපත් වීමට සැලසුම් සකස්  කරමින් සිටින  බවට ආරංචි පැතිරෙමින් පවතී .



Image result for maithripala sirisena with gotabaya


කෙසේ  වෙතත් සිරිසේන  මහතා  ගොණාට  අන්දවා අවසාන  මොහොතේදී  ජනධිපති අපේක්ෂකයෙකු ලෙස  ගෝඨාභය  මහතා  ඉදිරිපත් වීමටද  ඉඩ තිබේ.එහෙත් එයට  තිබෙන  ප්‍රධාන  බාධාව වන්නේ ඔහුගේ ඇමරිකානු පුරවැසි  භාවයයි . ඒ කෙසේ වුවත්  ඒකාබද්ධ විපක්ෂයේ ඒකමතික  සහයෝගය  ඔහුට  ලැබෙන්නේ  නම් ජනධිපති අපේක්ෂකයෙකු ලෙස  ඉදිරිපත් වීමට  ඔහු සුදානම් බව වරක් ප්‍රකාශ  කර  තිබුණි . එතෙක් ඇමරිකානු පුරවැසි භාවය අත හැරීමට  ඔහු සුදානම් නැති බව  පැහැදිලිය .



එක්සත් ජාතික  පක්ෂයේ  ජනධිපති අපේක්ෂකයා  කවුදැයි  කීමට  තවම කල් වැඩිය  .රනිල් වික්‍රමසිංහ  මහතා ඒ  සඳහා  ඉදිරිපත් විය  යුතුයැයි ඇතැම් එක්සත් ජාතික  පාක්ෂිකයන්  විශ්වාස  කරන  බව  පෙනේ. එහෙත් ඔහුට  හොඳ  තරග  කාරයෙකු වීමට  නම්  තව  යායුතු දුර  බොහෝය . තමන්ගේ  පාක්ෂිකයන් සමග වුවද ළඟ සුහතාවයක්  ඇති කර ගැනීමට  නොවෙහෙසෙන , ආරංචි වෙන වෙන ,මඟුල් ගෙවල් , මරණ ගෙවල් , බණ ගෙවල් ,  ගෙවල් වලට  යාමට වැඩි උනන්දුවක්  නැති , පන්සල් වන්දනාවේ  යාමට එතරම් ආසාවක් නැති , බොරු දරු හුරතල් පෙන්වීමට  වෙහෙස  නොවෙන ඔහුට චන්දදායකයන් අතර  ජනප්‍රිය වීමට  පහසු නැත . ලංකාවේ  මිනිසුන් වැඩි කැමැත්තක් දක්වන්නේ  එවැනි  ව්‍යාජ  නායකයන්ටය . 



Image result for sarath fonseka

 ෆීල්ඩ් මාෂල්  සරත්    ෆොන්සේකා  මහතාද   මී  ළඟ  ජනාධිපතිවරණයට ඉදිරිපත් වන බව  පසු ගිය දිනක  කියා  තිබුණි .ඔහු එක්සත්  ජාතික  පක්ෂයේ  සාමාජිකයෙකු බැවින් ඔහුට  ඒ සඳහා  පක්ෂයේ අනුමැතිය  ලැබිය  යුතුය .ඔහුට  අපේක්ෂකත්වය  ලබා  ගැනීමට  නම්  රනිල් වික්‍රමසිංහ  මහතාට වඩා  වේගයෙන් දුව ගොස්   මහජනයා අතර  ජනප්‍රිය ලබා  ගැනීමට   සිදුවේ . එවැනි හැකියාවක් ඔහුට තිබේදැයි සැක සහිතය  . රනිල්  කලබලයකින් තොරව පරිණත ලෙස  හැසිරෙන  නමුත් සරත් ෆොන්සේකා  මහතා  තවමත්  කටයුතු කරන්නේ හැඟුම්  බරවය .ඔහුගේ දිව  පාලනයකින් තොර  බැවින් තවමත්  ඔහු නැති සතුරන්  හදා  ගනී .කෙසේ වෙතත් හිතා  මතා අදහස්  ප්‍රකාශ  කිරීමට  ඔහු දැන්  පුහුණු වෙමින් සිටින  බව  පෙනේ .


Image result for anura kumara dissanayake


ජනතා විමුක්ති පෙරමුණේ  නායක අනුර  කුමාර දිසානායක  මහතා මී  ළඟ  ජනධිපතිවරණයේදී අපේක්ෂකයෙකු  ලෙස  ඉදිරපත් වෙන බවක්  කියා  නැතත් ඔහුගේ  පක්ෂය  ඔහු ජනාධිපතිවරණයට  ඉදිරිපත් කිරීමට  ඉඩ   නැතැයි කිව නොහැක .එහෙත් එවැන්නක් සිදුවිය  හැක්කේ  ඔහුගේ පක්ෂය බොහෝ දුරට සාකච්චා  කිරීමෙන්  පසුවය .කෙසේ වෙතත් අනුර  කුමාර  මහතා ජනාධිපතිවරයා වුවහොත්  රටට දැනෙන වෙනසක්  කරන  බවට සැකයක් නැත . ධනපති ක්‍රමය තුළ  මහජනයා වෙනුවෙන් කළ හැකි  උපරිමය කිරීමට  ඔහු උත්සාහ   කරනු ඇත .එහෙත් ප්‍රශ්නය වන්නේ මහජනයා අතර  ජවිපෙ  ජනප්‍රිය නොවීමය. 1987-90 සමයේ ජවිපෙ ක්‍රියා  කලාපය නිසා  මහජන ප්‍රසාදය  ලබා  ගැනීම  ඔවුන්ට  ඉතාමත් අසීරු වී  තිබේ . කෙසේ වෙතත්  ජවිපෙ අපේක්ෂයකයෙකු ඉදිරිපත් වීමෙන්  රාජපක්ෂ පවුලේ අපේක්ෂකයෙකුට  වාසියක් සිදුවීමට  ඉඩ  තිබුන හොත් ජවිපෙ  තම  පක්ෂයෙන් අපේක්ෂකයෙකු  ඉදිරිපත්  කිරීමට තිබෙන  ඉඩකඩ  ඉතා අඩුය.



Image result for champika ranawaka


ඇතැමෙකුට අනුව  පාඨලී චම්පික  රණවක  මහතාද  මී  ළඟ  ජනාධිපතිවරණයට  ඉදිරිපත්වීමට  දොළ දුකෙන්  පසු වේ. ඔහු නියෝජනය  කරන  ජාතික හෙළ උරුමය කුඩා  පක්ෂයක් වන බැවින්  ඔහුගේ සිහිනය  මස්තකප්‍රාප්ත කර  ගැනීම  පහසු නැත . එක්සත් ජාතික  පෙරමුණේ සිටියද එහි සහය  ලබාගැනීම අතිශයින් දුෂ්කරය .පොදු අපේක්ෂකයා  ලෙස  ඉදිරිපත් වීමට  ඔහු අපේක්ෂා  කරනවා වීමටද  පුළුවන.එහෙත් එය  ලෙහෙසි පහසු  සෙල්ලමක් නොවේ.පොදු අපේක්ෂක  කම  නමැති වික්‍රමය  ජය  ගත්තද දෙමල සිංහල චන්ද  ලබා  ගැනීමට  ඔහු සුදුසුකම් සපුරා  නොමැත . ඔහුගේ  මතවාදය   සිංහල  ප්‍රේමය   බැවිනි.

  

Image result for nagananda kodituwakku


අයුක්තියට එරෙහිව තනිවම සටනකට බැස සිටින  නීතිඥ නාගානන්ද  කොඩි තුවක්කු මහතා  මී  ළඟ  ජනාධිපතිවරණයට ඉදිරිපත් වෙන බව  කියා  තිබේ .ඔහුගේ අපේක්ෂාව  ජයග්‍රහණය  නොව  අයුක්තියට එරෙහිව ජනාධිපතිවරණ අපේක්ෂකත්වය  යොදාගනිමින් තම සටන වඩාත් ප්‍රබලව  ගෙන යාම විය  හැක  . 



ජනාධිපතිවරණයේදී  කවුරු ජයග්‍රහණය  කරනු ඇත්දැයි  කීමට  තවම  කල් වැඩිය. නිවැරදි  අනාවැකියක් කිව  හැක්කේ  ජනාධිපතිවරණය  පැවැත්වෙන  දිනට ආසන්නයේදී පමණි .කෙසේ වෙතත් සිංහල  චන්ද දායකයන්ගේ  චන්ද වලින් පමණක්  ජනාධිපති වීමට  කිසිවෙකුට නොහැක .එවැනි අවස්ථාවක් තිබුනේ 2010 දී පමණි . එයට හේතුව  මහින්දගේ ආණ්ඩුව  යුද්ධයෙන්  ජයගත් බැවින්  ඔහු එකල අතිශයින් ජනප්‍රිය වී  සිටින නිසාය .අනෙත් කාරණාව වුයේ  ඔහු සමග තරඟ  කළ සරත් ෆොන්සේකා මහතාගේ විස පොවන  ලද  කතා චන්ද දායකයන් තුල  ඔහු කෙරෙහි අප්‍රසාදයක් ඇති කිරීමය.


  මී  ළඟ   ජනාධිපතිවරණයෙන් ජය ගත  හැක්කේ සිංහල  ජනයා අතර මෙන්ම දෙමල සහ  මුස්ලිම් ජනයා අතරද  ජනප්‍රිය පළමු පෙලේ  අපේක්ෂකයෙකුට  පමණි එබැවින්  ගෝඨාභය රාජපක්ෂ අපේක්ෂකයෙකු ලෙස  ඉදිරිපත් වුවහොත් අපේක්ෂා  කල හැක්කේ ඔහුගේ  ජයග්‍රහණය  නොව පරාජයයි . දෙමල  ජනයා  තුළ  පමණක් නොව  මුස්ලිම් ජනයා  තුලද ගෝඨාභය රාජපක්ෂ  මහතා  කෙරෙහි ඇත්තේ  කැමැත්තක්  නොව අප්‍රසාදයකි .



තුවක්කුවට විශ්‍රාම දුන් කර්නල් රත්නප්‍රිය සහ ගෝටා

     කර්නල් රත්නප්‍රිය බන්දු  නමැති මනුස්ස  හමුදා  නිලධාරියා  කවුදැයි සොයන්නට මා වෙහෙසුනෙමි .ඔහු ගැන කිසිදු විස්තරයක්  ඉංග්‍රීසි බස...