Wednesday, July 27, 2016

පිරිමි කවුරුද වරදෙ නොබැඳෙන

      

 

 

සිරි ලංකාවේ  මිනිස්සු අනුන්  විවේචනය කරන්නට   ඉතා දක්ෂය.කැමතිය.  විශේෂයෙන්ම  ගැහැනුන්  විවේචනය  කිරීමට  පිරිමින්ද ,  තමන්ගේම  වර්ගයා විවේචනය  කරන්නට  ගැහැණුන්ද  ඉතා  කැමතිය. දඟකාර  කෙල්ලෙක්  හෝ  කාන්තාවක්  ගමක හෝ  නගරයක සිටී  නම් ගැහැනුන් ඇය  විවේචනය  කරන්නේ  " ඕකිට  මදන විසේ  ඔලුවට ගහල "   " ඕකිට  මිනිස්සු  ඉසේ  කෙස්  ගානට ." ආදී  ලෙස හෙලා  දකිමිනි.  පිරිමින්  එවැනි  තරුණියක් හෝ  කාන්තාවක් විවේචනය කරන්නේ " ඕකි සේල් බඩුවක් " යනාදී  ලෙස  පරිභව  කරමිනි.  

 

විශේෂයෙන්ම  කාන්තාවන් හෙලා දැකීම  අනාදිමත්  කාලයක    සිට  පැවතෙන හෙල සිරිතක් බව තොටගමුවේ ශ්‍රී රාහුල ස්වාමින් වහන්සේ ලිව්  කාව්‍යසේකරයේ  

"පිරිමිනිදු පතන 

අවසර  කල රහස්  තැන 

මිස  නොලැබෙන  බැවින 

ගැහැණු  කවුරුද වරදේ නොබැඳෙන."

යන පද  හතර  කියවූ විට සිතේ. උන්වහන්සේ    ගැහැනුන්ට එසේ    තඩි බෑවේ උන්වහන්සේ  පවුද්ගලිකව  ලැබූ අත් දැකීම්  නිසාද,   නැතහොත් එකල  සමාජයේ  ගැහැණු ඉඩක් , වෙලාවක් ,රහසිගත  තැනක් ලැබුණු සැනින් තවත්  පිරිමින් සමග රමණයේ යෙදීම  සුලබව  සිදු වී  නිසාදැයි මා  දන්නේ  නැත. ඇතැම් විටෙක  ලංකාවේ  පළමු  රැජිණ වූ අනුලා  බිසවගේ කෙරුවාවල්ද   එසේ  ලියන්නට උන්වහන්සේ  පෙළඹවනු ලැබුවා  විය හැක. අනුලා  තමාගේ  ස්වාමියවූ චෝර  නාග  රජුට  වස දුන්නේ මාලිගාවේ  හැඩ වැඩ මුර  භටයෙකු වූ සිව නැමැත්තෙකු සමග  නිදහසේ රමණයේ  යෙදීමට තිබු  උවමනාව  නිසාය . ඉන්පසු  රජවූ කුඩා තිස්ස අනුලා තම භාර්යාව  කර  ගත්  අතර අවුරුදු  තුනකට  පසු අනුලා  ඔහුටද  වස  දී සිංහාසනය අත්පත් කරගත්තාය . වැඩි  කල් නොයා  සිව  නම්වූ තම ද්‍රවිඩ  පෙම්වතා ද වස දී  මරා  දැමු  අනුලා, මාලිගාවේ  සේවයට  පැමිණි කඩවසම් දෙමල වඩු  කාර්මිකයෙකු වූ වටික්ක නැමැත්තා තම ස්වාමි පුරුෂයා  කර  ගත්තාය . අධික  රාගයෙන් පෙළුණු ඇය ස්වාමි  පුරුෂයන් 6 දෙනෙකු  මරා  දැමු අතර ඇගේ අවසන් ස්වාමි පුරුෂයා   වුයේ චෝල දේශයෙන් පැමිණ  සිටි තානාපති වරයෙකු වූ නීල(න් ) ය.

                                                               අනුලා  රැජිණ

රජවරුන්ගේ භාර්යාවන්ගේ නිදන  කාමරවල  හොර වැඩ සිරි ලංකාවට  පමණක් සීමා වී   නැත. තම ස්වාමි පුරුෂයා වූ  රුසියාවේ තුන්වෙනි පීටර් රජු  මරා  දමා   බලයට  පැමිණි කැතරින් බිසවටද පෙම්වතුන් බොහෝ  ගණනාවක්  සිටියේය. තුන්වන පීටර් රජු  ජීවත් සිටි  කාලයේ  පවා ඇයට පෙම්වතෙකු සිටි අතර ඔහුගෙන්   ඇයට දරුවෙක්ද ලැබිණ . එහෙත් තුන්වන පීටර් අධිරාජයා  සිතුවේ දරුවා  ඔහුගේ කියාය.  අනුලා  බිසව මාලිගාවේ මුර භටයන් නිදන  කාමරයට  ගෙන්වා ගත් නමුත්  කැතරින් අධිරාජිනියගේ  පෙම්වතුන් වුයේ ඉහල  පැලැන්තියේ  අයය. බවුද්ධ  කාන්තවක් වූ අනුලා  බිසව තම පෙම්වතුන් වස දී  මර දැම්මද අබවුද්ධ මහා කැතරින් එසේ   කළේ  නැත.   එක් පෙම්වතෙකු   ඉවත්  කොට තවත් පෙම්වතෙකු ලං කර  ගත්තේ  කලින් පෙම්වතාට   ඉහල විශ්‍රාම වැටුපක් සහ දේපොළ  ලබා  දීමෙන් පසුවය. අනිත් අතට අලුත් පෙම්වතෙකු  ඇසුරු  කිරීමට  පටන් ගත්තේ ඉන්න එකා  තවත් ගැහැනියක් සමග හොර මගුලක් පවත්වා ගෙන  යන බව  අසුවූ විටය. 

                                               මහා  කැතරින් අධිරාජනිය 

රාහුල  හිමියන් එසේ  කීවද  ඇතැමෙකුගේ  මතය  වන්නේ වැඩි වශයෙන්ම බහු  ලිංගික සම්බන්ධ  කම් පවත්වනු ලබන්නේ  පිරිමින්  යන්නය. එහෙත් එම  මතය  සත්‍ය දැයි  මා  දන්නේ  නැත.පුරුෂ පක්ෂයේ කැරැට්ටුව සොයා  බැලීමෙන් ඔබට මේ  ගැන නිගමනයකට ඒමට  සහය දීමට මා  කල්පනා  කරමි. 

 

  අරාබි නිසොල්ලාසයට අනුව  පර්සියාවේ අධිරාජයෙකු වූ ශාර්යාර් ගැහැණු ගැන  කලකිරෙන්නේ තම සොහොයුරාගේ  බිරිඳ හොර සැමියෙකු සමග නිදන අයුරු දැකීමෙනි. එය දැක  මාලිගාවට එන ඔහුට  දකින්නට  ලැබෙන්නේ  තමන්ගේ  බිරිඳද වෙනත් අයෙකු සමග රමණයේ  යෙදෙන අයුරුය. සියලුම  ගැහැනුන් එසේ  යැයි සිතන අධි රාජයා සිය  බිරිඳ  මර දමා  ඉන්පසු  සැම  රාත්‍රියක් සඳහාම  කන්‍යාවක් කැඳවා  ගෙන  ඇය  හා  රාත්‍රිය  ගත  කොට  පසුදා  උදේ  ඇය  මරා  දංගෙඩිය වෙත  යවනු  ලබයි. අරාබි නිසොල්ලාසයට  අනුව ඔහුගේ අධිරාජ්‍යයේ  සිටින  සැම කන්‍යාවක්  ඒ  අයුරෙන් මරා  දමා තිබේ.  තම බිරිඳ පහස  ලැබුවේ  වෙනත් එක් අයෙකු සමග  පමණක් වුවද මේ අධි  රාජයා දස  දහස්  ගණනින්  කන්‍යාවන්ගේ  පහස  ලැබීය.

 

  ඉතිහාසය ගැන විපරමෙන් බැලු  විට   පෙනෙන්නේ  පෙරදිග  මෙන්ම අපර දිග  රජවරුන්ද  ඈත  අතීතයේ  සිටම අන්තඃ පුර තබා ගෙන  සිටි  බවය. කිසියම් රුවැති  තරුණියක් දුටු විට ඇය  වහාම තම අන්තඃ පුරයට ගෙන්වා ගැනීම රජවරුන්ගේ  සිරිත  විය. සිය දහස්  ගණනක් තරුණියන් අන්තඃ පුරයේ  සිටි  බැවින්  ඔවුන්ට  යුතුකම් ඉටු  කිරීමට   රජවරුන්ට  හැකිවී   තිබෙන්නේ අවුරුද්දකට  හමාරකට  එක් වරක් පමණය.

උඩරට ඇතැම් රජවරුන්ට යකඩ  දෝලිය  නමින් හැඳින්වූ අනියම් භාර්යාවක් සිටි බව අයිතිහාසික  ලේඛන  තහවුරු  කරයි. කුරුණෑගල පාලනය කල දෙවන  බුවනෙකබාහු රජු , පළමු බුවනෙකබාහු රජුගේ යෝනක  යකඩ  දෝලියගේ  පුත්‍රයා  බව  කුරුණෑගල ලේඛණ වල සඳහන්  වේ. 

භාර්යාවන් රැසක් තබා ගැනීම රජවරුන්ට  පමණක් සීමා වුවක්  නොවේ. අද  මෙන්ම එදාද ධනය, බලය, ප්‍රසිද්ධිය තිබු  කාටත් පාහේ බිරින්දෑවරුන්  බොහෝ  ගණනක් සිටියහ. ඉස්ලාම් ආගමේ ආදී කර්තෘ මොහමඩ්  නබි තුමාට  වරින් වර අවම වසයෙන් භාර්යාවන් 19 දෙනෙකු  සිටි බව කියනු  ලැබේ. ඉස්ලාම් භාක්තිකයනට එක වර  භාර්යාවන් 4 දෙනෙකු  තබා ගැනීමට අවසර දී  තිබෙන්නේ අනියම් භාර්යාවන් තබා ගැනීමට පිරිමින් දක්වන රුචිය නිසා  එම දුසිරිතෙන් තම  භක්තිකයන් ගලවා ගැනීමේ අරමුණෙන් විය  හැක.

 

ඇමරිකානු  ජනාධිපති වරයෙකු වූ ජෝන් කෙනඩි විවාහ වුයේ  රූමත්  කතක් වූ ජැකොලයින්  සමගය. එහෙත් දුසිමකට වැඩි ලිංගික සහකාරියන් ඔහුට  සිටි බව පසු  ගිය  කාලයේ  එළිදරව්  විය .එක් අයෙකු වුයේ  ජනප්‍රිය  නිළියකු වූ  මැරිලින් මොන්රෝය .


                                      ජෝන් කෙනඩි සහ මැරිලින් මොන්රෝ



ප්‍රස්තුත කරුණ සම්බන්ධයෙන් ජෝන් කෙනඩිගෙන් පසු වැඩි ප්‍රසිද්ධියක් ලැබුවේ  ඇමරිකානු   ජනාධිපති වරයෙකු වූ  බිල් ක්ලින්ටන්ය. ධවල  මන්දිරයේ වැඩට  ආ සුරුපි තරුණියක් වූ මොනිකා  ලෙවින්ස්කි සමග  ක්ලින්ටන් ඇති  කර  ගත් රහසිගත සම්බන්ධය ඇමරිකානු දේශපාලනය  හරහා  හමා  ගිය කුණාටුවක් විය.  ඇතැම් දිනක රාත්‍රී  කාලයේ මොනිකා සහ ක්ලින්ටන් ධවල මන්දිරයේ වෙනත් අයට  යාමට  තහනම්වූ තැන්  වලදී  මුණ ගැහුනාහ.  බිල් ක්ලින්ටන් ඇය  සමග  පමණක් නොව වෙනත්  තරුනියන් කීප  දෙනෙකු  සමගද ඕනැවට වඩා කිට්ටු සම්බන්දකම් පවත්වාගෙන  ගිය  බව  දැන් හෙළිවෙමින්  පවතී.

                            බිල් ක්ලින්ටන් සහ මොනිකා ලෙවෙන්ස්කි

ලංකාවේ දේශපාලනඥයන් සම්බන්ධයෙන්  ගත  කළ කාන්තවන් ලං කර  ගැනීම සම්බන්ධයෙන් කප් ගසා තිබෙන බව  පෙනෙන්නේ ශ්‍රීමත් ජෝන් කොතලාවලය. ඔහු  ගැන කතන්දර අප්‍රමාණය. ඔහුගේ  නිවසේ  පැවති සාදයකදී  ඔහු සහ ඔහුගේ   මිතුරෙකු  නිවසේ  ප්‍රධාන දොර  අසල සිට උත්සවයට ආරාධනා ලැබූ කාන්තාවන්  පැමිණෙන විට එකිනෙකා පරිහරණය  කළ   කතුන් සංඛ්‍යාව ගනිමින් සිටි අතර  ජෝන්ගේ මිතුරාගේ  බිරිඳ සහ දුවණිය දොරටුවෙන් ඇතුළු වන විට මිතුරා තම   සංඛ්‍යාවට  එකක් එකතු  කළ විට ජෝන් කොතලාවල සිරිමතා ඔහුගේ එකතුවට දෙකක් එකතු  කළ බව  කියනු ලැබේ.

                                         ජෝන් කොතලාවල

 

S.W.R.D. බණ්ඩාරනායකගේ ආණ්ඩුවේ  ඇමතිනියක් වූ විමලා විජේවර්ධන ,කැලණිය පන්සලේ අධිපතියා වූ මාපිටිගම බුද්ධරක්ඛිත හිමි සමග පෙම් කෙලියේ  යෙදුනු බව ප්‍රසිද්ධ  කරුණකි.  බණ්ඩාරනායක  ඝාතනයේ  නඩු විභාගයේදී හෙළි වුයේ බුද්ධරක්ඛිත  හිමි විමලා විජේවර්ධනගේ  නිවසේ ඇතැම් දිනක  රාත්‍රිය    ගත  කළ  බවත් රාත්‍රී  ආහාරයට  පෙර විස්කි වලින් සන්තර්පනය වූ බවත්ය.

 

බණ්ඩාරනායක මහතා  මරාදැමීම කුමන්ත්‍රණය  මෙහෙයවූ   බුද්ධරක්ඛිත හිමි


 

                                                 විමලා විජේවර්දන මහත්මිය




පසු ගිය සමයේ  ලංකාවේ  ඇතැම් විනිශ්චය කරුවන්ගේ රහසිගත නිදන  කාමර සිද්ධි ඇතැම්  පුවත් පත් විසින් ප්‍රසිද්ධ  කරනු  ලැබීය. හිටපු අග විනිසුරු  සරත් නන්ද ද සිල්වා ඇඳුම් නොමැතිව කාන්තවක සමග මෝටර් රථයක් තුල සිටි ප්‍රවුර්තියක් ඇතැම් මාධ්‍යවල  පළවිය.  වසරකට හමාරකට පෙර ආබෘ නඩුකාර තුමා ගෘහ සේවිකාවට  බලහත්කාරකමක් කරන්නට  ගිය  බව එම ගෘහ සේවිකාව පොලීසියට  කියා තිබුණි. විදුහල්පති වරුන්ද  පොලීසියේ  ඉහල පෙලේ නිලධාරින්ද හෝටල් කාමර වලදී  රාජකාරී  කරන්නට යාම  ගැන පුවත්ද  වරින් වර පළවිය.

රුසියාවේ හෝ ඇමරිකාවේ  හෝ ලංකාවේ  හෝ මුළු ලොව  පුරා   හෝ  මේවා ප්‍රසිද්ධ වුයේ ඊට සම්බන්ද අය   අඩු වැඩි වශයෙන් ප්‍රසිද්ධ  අය හෝ සමාජයේ  ඉහල  ස්ථරයකට  හෝ අයත් වූ  නිසාය.  අප්‍රසිද්ධ අය ගේ රහසිගත සම්බන්දතා ගැන දන්නේ ඔවුන් ජීවත්වන ප්‍රදේශයේ අය  පමණි. ඉරිදා දිනක පොලීසියකට  ගොස් පැයක් දෙකක් ගත  කළහොත් අනියම් සම්බන්ධකම් කොපමණ රට පුර  සිදු  වන්නේ  දැයි  අනුමාන   කර  ගැනීමට  බැරි  කමක් නැත.

මේවා පිළිබඳව  මිනිසුන් විනිශ්ය  කරන්නේ ඔවුන් හැදුණු වැදුණු සංස්කෘතික පරිසරය  අනුවය. එහෙත් අනුන්ගේ මගුල් විවේචනය  කරන  අය අතරින් බහුතරය අනුන්ගේ  ලින් වලින් පිපාසාව දුරු  කර  ගැනීමට කැමති අය ලෙස  අනුමාන  කිරීම සාධාරණය. " හැමදාම පානුයි පරිප්පුයි කන්න  බැහැ .ඉඳ හිට කුකුල්  මසුත්  කන්න  ඕනේ " යැයි බොහෝ  පිරිමින්  කියනු ඔබටද ඇසී  ඇතැයි මා සිතමි. එංගලන්තය විසින් අප මත පට වන  ලද  වික්ටෝරියානු  සංස්කෘතිය මෙන්ම  ආගමික බල  පෑම් ද  නොවන්නට   ලාංකික  මිනිසුන් සහ  ගැහැනුන් අනියම් ලිංගික සම්බන්ධතා පිලිබදව වපර ඇසකින් නොබලනු ඇතැයි මගේ විශ්වාසයයි.

 

මිනිසුන්ගේ සහ  ගැහැණුන්ගේ  අනියම් සබඳතා පිළිබඳව අපක්ෂපාතව  බලන්නේ  නම් ස්ත්‍රී  පුරුෂ දෙපක්ෂයම විව්ධත්වයට රුචියක් දක්වන  බව  පිළිගත  යුතුය. ඔවුන් තම ආශාවල් පාලනය  කරගෙන  සිටින්නේ ආශාවන් ඉටු  කර ගැනීමට ඇති බාධාවන්  නිසාය.  ආගමික භක්තියෙන් යුතු   යම් කාන්තවක් හෝ  පුරුෂයෙක් ඉන් වැළකී සිටින්නේ නම්  ඒ මරණින්  මතු තම  ජීවිතය  සැපවත්   කර  ගැනීමට ඇති අපේක්ෂව  නිසා විය  හැක. "කාමයේ වරදවා හැසිරීමෙන් වලකිමි ." යන ශික්ෂා පදයක්  තිබීම ම    මිනිසුන් සහ ගැහැනුන් තුළ ඒ  ගැන  පවත්නා රුචිය  කොපමණ දැයි  තහවුරු  කරයි.

මිනිසාගේ  අපේක්ශාව වඩාත් නිදහස්  ලෝකයකි. තමන්ගේ  මුලික අවශ්‍යතාවයන්ට  බාධා කිරීම  තම  නිදහස  අහිමි  කිරීමක් ලෙස කල්  යත්ම  මිනිසුන් සශ  ගැහැනුන්  කලපනා  කරනු ඇත . එබැවින් ඒවා  බිඳ දැමීමට ඔවුන් පසු  බට  නොවනු  ඇත. විවාහය  යනු මිනිසා බැඳ  තබන යදමක් ලෙස අනාගත  මිනිසා  සහ  ගැහැණිය  දකිනු ඇත යන්න  මගේ  කල්පනාවයි. එබැවින්   රාජ්‍යය විසින්  පනවා ඇති  විවාහ  නීතිය අවලංගු  කරන  ලෙස මිනිසුන් සහ  ගැහැනුන් අනාගතයේ  දිනක අරගල  කරනු ඇත.. මේ වන විටත් ලෝකයේ  බොහෝ  මිනිසුන් සහ  ගැහැනුන් විවාහ  නොවී පවුල් පන්සල් කන  බැවින් එසේ  සිතීම අසාධාරණ  නැත . කල්  ඇවෑමෙන් මෙය   බහුලව  සිදුවෙනු  ඇත

 

.  විවාහය නමැති නීතිය මගින්  ස්වේච්චාවෙන්   තම නිදහස අහුරා   ගනු  ලැබීමට  තරම් අතීතයේ  මිනිසුන් සහ ගැහැනුන් අඳබාල  වුයේ මන්දැයි  තවත් වසර 500 කට පෙර එළඹෙන  දිනක   මිනිසුන් සහ  ගැහැනුන්  කලපනා කරනු  ඇත යන්න  මගේ  නිගමනයයි .



 

 

 

Sunday, July 17, 2016

කළු ජුලියේ ගිනි දැල් සහ යාපනයේ සිසු ගැටුම .

 

 

ඉස්සර  අධ්යාපන  අමාත්‍යංශය  තිබුනේ  කොළඹ කොම්පඥඥවීදියේය.හරියටම  කියතොත් එහි  මැලේ වීදියේය. 1983  ජුලි 25 වනදා  පාන්දරින්ම මා  නිවසින්  පිටවුණේ රස්සාව  යලි  ලැබෙන  බවට ලැබුණු ආරන්ච්චියක්  නිසාය. 1980  ජුලි මහා වැඩවර්ජනයට  මහරගම  ගුරු විදුහලේදී  නායකත්වය  දීම  හේතුවෙන් JR  ජයවර්දන  ආණ්ඩුව මා  ගෙදර  යැවූ අතර රැකියා විරහිත  කාලය  අවුරුදු  තුන  පසු  කරමින් තිබිණ . මහරගම ගුරු විදුහලේදී අපි වර්ජනය  ආරම්භ  කළේ  හරියටම අද වැනි දිනක හෙවත් 1980 ජුලි 17 වනදාය.  අවුරුදු 3  කුත් දවස්  ගණනක්  ජීවත් වුයේ ගෙදර  තිබු   කව්තුක  භාණ්ඩ ද , ගෙවත්තේ  තිබු  ගස් ද   විකිණීමෙන්  සහ ස්ථිර  නොවන රැකියාවන් දෙක  තුනක් කිරීමෙනි. මා  වැඩ  වර්ජකයෙකු වීම  නිසා  මගේ බිරිඳට  රැකියාවක්  ලැබීමද  සහනයක්  විය.  රැකියාව  දුන්නේ සමාජ විද්‍යාඥයන්ගේ සංගමයයි. එසේ  නොවී  නම්  කුමන ඉරණමක් අත්වේදැයි සිතා   ගැනීමට  නොහැක. වැඩ වර්ජකයන් 50කට  අධික සංක්‍යාවක් මේ වන  විට දිවි නසා ගෙන තිබුණේ තම දු දරුවන්  , බිරිඳ , දෙමාපියන් කුසගින්නේ  සිටීම ,ගොඩ  ගැසුණු ණය තුරුස් ගෙවා  ගැනීමට නොහැකි වීම , සමාජය විසින්  නොසලකා  හැරීම ආදී  හේතු  නිසාය.

 

අධ්‍යාපන අමාත්‍යංශයට  යන විට උදේ  දහය  පමණ  විය . නැවත සේවයේ  පිහිටුවීමට තීරණයක්  ගෙන ඇති  බවට  ආරංචියක්  ලැබුණු  බැවින් ඒ  ගැන සෙවීමට  පැමිණි  බව   නිලධාරියෙකුට    කියා  සිටියෙමි. ලැයිස්තුවක් පිරිස්සු  ඔහු , මා   නැවත සේවයේ  පිහිටුවීමට  තීරණයක් ගෙන  තිබෙන  බවත් අදාළ  ලිපිය  කළුතර ප්‍රාදේශීය අධ්‍යාපන  කාර්යාලයට යවා ඇති  බැවින්  එහි ගොස් එම  ලිපිය  ලබා  ගන්නා  ලෙසත් කියා  සිටියේය.

 

මා අධ්‍යාපන අමාත්‍යංශයෙන් පිටතට  පැමිණි  විට එහි  සිටි  මිනිසුන් ඉතා සන්සුන් ලෙස  පිටකොටුව  පැත්තේ  අහසට  නගින  කළු දුම්  රොටු දෙස  බලා  සිටියහ. පිටකොටුවේ  දෙමල මිනිසුන්ගේ  කඩවලට  ගිනි  තබන  බව  ඊළඟ  මොහොතේ  මට දැන  ගන්නට  ලැබිණ.   රටම  ගිනි  ගන්නා දෙමල විරෝධයක  ආරම්භය මේ   යැයි ඒ  මොහොතේ  කිසිවෙකු  සිතන්නට  නැත.  රජයේ සහ  පවුද්ගලික අංශයේ  කාර්යාල සේවකයෝ  සුපුරුදු  පරිදි තම සේවාස්ථානවල මේ වන තෙක්ම  සේවය  කරමින් සිටියේ  ඒ  නිසාය.   ගමට ඒමට බස්  රථයක්  අල්ලා   ගැනීමට  පිටකොටුවට දෙසට පා  ගමනින් මා  යාමට  පටන් ගත්තේ සිදුවෙමින්  පවතින්නේ  කුමක්දැයි  ඒ  අතර දැක  ගැනීමට  හැකි  නිසාය.

 

ලේක්හවුස්  වට රවුම  ආසන්නයේ   රීගල් සිනමා  හල අසලට මා  පැමිණෙන විට පොලු  අතට  ගෙන සිටි  අවුරුදු  18 , 20 වයස්  ප්‍රමාණයේ   හතර පස් දෙනෙකු  කොම්පඥඥවීඩිය දෙසට  ගමන්  ගන්නා මෝටර්  රථ  නවත්තමින් එහි  දෙමළුන්  සිටින්නේදැයි  සොයමින්  සිටියහ. එක්  වාහනයක දෙමල  මිනිසුන්  පිරිසක්  සිටි  අතර  ඔවුන් වාහනයෙන් ඇද  පහර  පිට  පහර දුන්නාහ. එක් දෙමල  ජාතිකයෙකු  ඔවුන්ගෙන්  ගැලවී  රීගල්  සිනමා  හල දෙසට  පැන දිව්වේය.  ඔහු  පසු  පස ටික දුරක් මැරයෙකු දුව  ගිය  නමුත් අල්ලා  ගත  නොහැකි විය. මේ වන විට අවට  කාර්යාලවල  විශාල  පිරිසක්  පිටතට  පැමිණ  ඒ දෙස  බලා  සිටි අතර පහර දීමට  සම්බන්ධ  වීමටවත්  පහර දීම  වලක්වන්නටවත් ඉදිරිපත් වුයේ  නැත.  එම ස්ථානයේ  සිටියේ එක් පොලිස්  නිලධාරියෙක් (ඔහු අත රිවොල්වරයද  තිබුණි.) පමණි. ඔහු මේ  මැරයන්  පන්නා  දැමීමට  හැකි සෑම උත්සාහයක්ම  ගත්  අතර එතනින් මීටර් 50 ක් පමණ ඈතට  ගිය මැරයන්  යලිත්  වාහන නවතා දෙමළුන් සෙවීම  ආරම්භ  කළහ. පොලිස්  නිලධාරියා එම ස්ථානයට  දුව  ගොස්  ඔවුන් පන්නා  දැමීමට කටයුතු  කරන විට  තවත්  මැර  පිරිසක්  කලින් මැරයන් සිටි  ස්ථානයට   පැමිණ වාහන  නැවත්වීමට  පටන් ගත්හ.පොලිස්    නිලධාරියාට සිදුවුයේ මැර  කණ්ඩායම් දෙක  අතර එහෙටත් මෙහෙටත් දුවමින් හැකි  පමණින්  සිය  රාජකාරිය  කරන්නටය. 

 

 

මේ   අතර  හමුදා  භට  කණ්ඩායම්  රැගත් ලොරියක්  දෙකක් එතන  පසු කොට  ගිය   නමුත්  අඩු වශයෙන් වාහනය  නතර  කොට  පොලිස්  නිලධාරියට සහය  දීමටවත්  ඉදීරිපත්  වුයේ  නැත. ඒ  වෙනුවට  හමුදා භටයෝ මැරයන්ට  අත් ඔසොවා ආචාර  කොට තව  තවත්  ඔවුන් ධයිර්යමත්  කළහ.

 

මේ වන විට  පිටකොටුව  එකම  ගිනි  ජාලයක්  බවට  පත් වී  තිබුණි. එබැවින් ඒ  දෙසට කිසිදු  බස්  රථයක්  ගමන්  නොකළ  අතර  සියලුම  බස්  රථ  කොළඹින්  පිටවෙමින් තිබුණි. තත්ත්වය  ඉතා බිහිසුණු වෙමින්  පවතින බව  සියලු දෙනාගේම  අදහස  විය . මගේ  බිරිඳගේ  කාර්යාලය  තිබුනේ නාරහේන්පිටය. ඇයගේ  කාර්යාලයට  ගොස් ඇයවත් රැගෙන  ගමට  යාම මේ  මොහොතේ  කළ යුතු දේ  බව  වටහා  ගත් මා  බස්  රථයකට  ගොඩ  වුයේ එහි ගමනාන්තය  ගැන වත්  සොයා  බලන්නේ නැතුවය. බස්  රථය  ගාලු  පාරට  පැමිණ  බම්බලපිටිය දෙසට එනතෙක්ම  මා   දුටුවේ  පාර  දෙපසම  ගිනි  ජාලවල් ඇවිලෙන  අයුරුය.  බිරිඳ  සොයා ගත  යුතු  බැවින් මා  බම්බලපිටියෙන් බැස්ස  විට  ආරංචි  වුයේ සියලුම  කාර්යාල වසා  නිවෙස්වලට  යන  ලෙස ආණ්ඩුව  නිවේදනය කර  ඇති බවත් සවස එකේ  සිට  ඇඳිරි නීතිය  පනවන  බවත්ය. මේ  වන විටත් වෙලාව දහවල් දොළහ  පසුවී  තිබිණ. බිරිඳගේ  කාර්යාලය  පිහිටි  නාරාහේන්පිට ට  යන  බස්  රථයක්  නොතිබුණු  බැවින්  ඒ  දෙසට  පා   ගමනින් යන අතර  තුර  මා දුටුවේ    දහස්  ගණනින්  කාර්යාල සේවකයන් පයින්ම   බම්බලපිටිය දෙසට  පැමිණෙන  අයුරුය. බිරිඳ  සොයා  ගියද කාර්යාල වසා   ඇති  බැවින් ඇයද  ආපසු  එමින් සිටිය  හැකියයි  මා   අනුමාන  කලෙමි..  ඇය  සොයා  යාම නිෂ්ඵල  ගමනක්   බැවින්  පා ගමනින් පැමිණෙන අය  අතර ඇය සිටින්නේදැයි එක්  තැනක  නැවතී බලා   සිටියෙමි. ඇතැම් විටෙක  ඇය මට   මග හැරී  ගොස්    බස්  රථයක් එනතුරු  බම්බලපිටියේ  හන්දියට වී  සිටිනවා  විය  හැකි  යැයි සිතු මා ආපසු  බම්බලපිටිය  හන්දියට පැමිණ  පැයකට  අධික  කාලයක්  ඇය එතැයි  බලා සිටියෙමි.

 

මේ  වන විට ඇඳිරි  නීතිය  පනවා  හමාරය.  තව  දුරටත්  බල සිටීම  නිෂ්පල යැයි  මා   කල්පනා  කලෙමි.ඇය   බස්  රථයක නැගී  නිවෙස  බලා  යමින් සිටිනවා   විය  හැකිය. තව  තවත්  ප්‍රමාද   වුවහොත්  ගමට යාමට බස්  රථයක්  සොයා  ගැනීමටද   මට නොහැකි වනු  ඇත. වෙනත් විකල්පයක් නොවූ හෙයින් කළුතර දෙසට  යන  කුමන බස්  රථයක් එල්ලී   හෝ  ගමට  යන්නෙමි,යි අවසානයේදී  තීරණය කළෙමි.

 

 

පැමිණෙන  සියලු බස්  රථවල සෙනග  පිරී  ඉතිරී  ගොස්  තිබිණ .සැහෙන  කාලයක්  බල සිටීමෙන්  පසු  කළුතරට යන  බස්  රථයකට  මහත් පරිශ්‍රමයක් දරා  ගොඩ වුයෙමි.  එතැන් සිට යලිත්    දැකිය  හැකි වුයේ  ගාලු පාර දෙපස   තැන  තැන  කඩ  සාප්පු  ගිනි ගෙන  දැවෙන  අයුරුය. වැල්ලවත්ත  එකම ගිනි  ජාලාවක් වී  ඇති බැවින් වැල්ලවත්ත  හරහා  ගාලු  පාරේ  බස්  රථයට  යා නොහැකි  බැව්  ආරංචි විය. බස්  රථය  අතුරු  පාරකට දැමු විටද දකින්නට  ලැබුනේ  ගෙවල්  ඉදිරිපස දැවෙන  මෝටර්  රථ, යතුරු  පැදි,  සීත කරණ,  රුපවාහිනි  යන්ත්‍ර  සහ ගෘහ භාණ්ඩය.    බම්බලපිටිය සහ  පානදුර  අතර දී  පාර දෙපස නිවෙස් ඉදිරිපස   ගිනි  තබා  විනාශ  කර  තිබු මෝටර් රථ  සහ  මෝටර් බයිසිකල්  සංඛ්‍යාව 1000  කට අධික  මිස  අඩු  නැත. 

 

මොරටුව   කතෝලික  පල්ලියක් ඉදිරිපස විසි තිස්  දෙනෙකු  රැස්වී පල්ලිය  ඇතුලට  කඩා  පැනීමට උත්සාහ  කරමින්  සිටි  අතර එහි සිටි  පොලිස්  භටයෙකු  ඔවුන් ඇතුලට  යාම වැලක්වීමට  මහත් පරිශ්‍රමයක්  දරමින් සිටිනු  දකින්නට  ලැබිණ. ජීවිත  ආරක්ශාව  පතා  පැමිණි දෙමල  මිනිසුන්  පල්ලිය  තුළ  ඇතැයි  මට සිතින. බස්  රථය  නොනවත්වා  පැමිණි  බැවින් පසුව  සිදුවුයේ  කුමක්දැයි මා දන්නේ  නැත.

 

කළුතර  නගරයෙන් බසින විට කිසිදු  කලබලයක්  එහි දකින්නට  නොතිබිණ. මා පැමිණ  විනාඩි දහයක් ගත වන  විට  ගාලු  පාරෙන් කළුතර  දුම්රිය  පොළට  හැරෙන  තැන තිබු දෙමල  කඩය ගිනි  ගන්නට  පටන් ගත්තේය. ටික වෙලාවකින්  ආරංචි වුයේ  කඩේ  අයිතිකරු  ගිනි  ගොඩට  පැන  දිවි නසා  ගත්  බවය.

 

යළි  බසයක  නැගී  මතුගමට  පැමිණි  විට එහි  සාමකාමී ස්වරුපයක් දැකිය  හැකි  විය.. ගමට  ඒමට  තවත්  බසයක් එන  තුරු  මා   බලා   සිටින  විට  දුටුවේ සිය  වෙළඳ  සැල  වසා ගෙදර  යාමට  සැරසුණු  දෙමල  ව්‍යාපාරිකයෙකුට  පහර දී  ඔහු  අත  තිබු  මුදල් පසුම්බිය   ප්‍රදේශයේ  මැරයන් දෙදෙනෙකු  පැහර  ගන්නා  අයුරුය. එය වැලක්වීමට  ඉදිරිපත්වන  ලෙස මා හඳුනන  කීප  දෙනෙකුට යෝජනා  කළ  නමුත් ඔවුහු  එය  ප්‍රතික්ෂේප  කළහ.

 

පසු  දින   ආරංචි වුයේ   පෙර  දින  රාත්‍රීයේ  මතුගම තිබු  දෙමල  කඩවලට  ගිනි  තැබූ  බවය     කා  අතරත්  ජනප්‍රියව  සිටි දෙමල  මහතෙකුට  අයත්ව  තිබු  'මොඩර්න්  ෆාමසි ' නම් බටහිර  අවුෂධ  හළ ද  මංකොල්ල  කා තිබුණි. පසුව  දැන ගන්නට  ලැබුණේ මතුගම නගරයේ  තිබු  සිංහලයෙකුට  අයත්අවුෂධ හලකට එහි  තිබු අවුෂධ  ඇද  ගත්  බවය.

 

මගේ  සිත  බලවත් ලෙස  කම්පනයට  පත් වුයේ මතුගම  නගරයේ  තිබු  නන්දා ස්ටෝර්ස්  නමැති රෙදි පිලි  හලකට  ගිනි තැබු  බව ආරංචි  වූ  විටය..   කඩයේ  තිබු එවකට  ලක්ෂ දෙක  තුනක්  වටිනා සියලු  රෙදි  පිලි  ගිනි  තබා  තිබුණි. එහි  අයිති  කරු අහිංසක දෙමළෙකි. මසකට වරක් දෙවරක් මා එම  කඩයට  යන බැවින්  ඔහු සමග සුළු  හිතවත්කමක්ද ඇතිවී  තිබුණි. දිනක් මා   ඔහුගේ  රෙදිපිලි  හලට  ගියේ බෝතලයක්  ඉල්ලා  ගැනීමටය. බෝතලය  අවශ්‍ය  වුයේ  සිංහල බෙහෙත්  කඩයකින්  දියර බෙහෙත් වර්ගයක්  මිලදී  ගැනීමට  ගිය  විට හිස්  බෝතලයක්  ගෙනෙන  ලෙස  කිව්  නිසාය. නන්දා  ස්ටෝර්ස් වෙත  ගිය මා අයිතිකරු  හමුවී මගේ  අවශ්‍යතාවය  කීවෙමි. එහි  හිස්  බෝතලයක්   නොතිබුණු  බැවින්   මීටර් 300ක්  පමණ දුරකින් වූ  ඔහුගේ  නිවසට  සේවකයෙකු  යවා මගේ  ඉල්ලීම  ඉටු  කර  දුන්නේය.

 

  වෙළඳ  හලට  ගිනි  තැබීම  නිසා  ඔහු  මුළුමනින්ම  බංකොලොත්  ගැහුවේය. ආණ්ඩුවෙන්  හරි  හමන් වන්දියක්  ලැබුනේද  නැත. මතුගම  නගරයේ  ව්‍යාපාර  කිරීමෙන්  සදහටම   සමු  ගත් ඔහු   අද  නොමැරී  ජීවත් වෙන්නේ ගෙයින් ගෙට  ගොස් රෙදි  පිලි  විකිණීමෙනි.

 

හැට  හත් දෙනෙකු  පමණක් සිටි LTTE සංවිධානයේ තුවක්කුකරුවන්ගේ  සංක්‍යාව දස දහස් ගණනකට වර්ධනයවීමට කළු ජුලිය ප්‍රධාන  වශයෙන්ම හේතුවූ බව කරුණා අම්මාන් පසු කලක කීවේය. ලක්ෂ  ගණනක් දෙමළ මිනිසුන් අනාථයන් ලෙස  ඉන්දියාවටද  තවත් දසදහස්  ගණනක්  යුරෝපයටද  ගියේ  කළු  ජූලියෙන් පසුවය. 

 

 1983  සිට ඉන්දියාව  ලංකවේ  ජනවර්ග  ප්‍රශ්නයට  මැදිහත්  වීමට බලපෑ  ප්‍රධාන  තම හේතුව  වුයේ කළු  ජුලිය විසින්  ලංකාවේ මෙන්ම  ඉන්දියානු දේශපාලනයේ  ඇති  කළ  ප්‍රබල වෙනස්  කම් නිසාය. 13  වන  ආණ්ඩු ක්‍රම ව්‍යවස්ථා  සංශෝධනය කළු  ජූලියේ  දිගුවකි..  යුරෝපයේ දෙමල  ඩයස් පෝරාවක් ඇතිවීම  කළු  ජූලියේ   තවත්  ප්‍රතිඵලයකි. . යුරෝපය ලංකාවේ  ජනවර්ග  ප්‍රශ්ණයට මේ  තරම් ප්‍රබල ලෙස  බලපෑම් කිරීමට  හේතු වී  තිබෙන්නේද  යුරෝපයට ගිය  දෙමල මිනිසුන්  යුරෝපයේ  සහ එංගලන්තයේ දේශපාලනයේ නොසලකා  හැරිය  නොහැකි  සාධකයක් වී  තිබීමත්  ,  ලාංකික දේශපාලන  අනාථයන්  ලංකාවට  ආපසු එවීමට එම  රටවලට  ඇති  උවමනාව  නිසාත්ය.

 

ලංකාවේ  විශ්ව  විධ්යාලවල මෑතදී  ඇතිවූ  සිද්ධීන් මෙන්ම  විමල් වීරවංස ගෝත්‍රය  යලි  පන  ගසා  තිබීම   යලි  කළු  ජූලියක්  නිර්මාණය  කරනු  ඇතැයි  යන බියක් මා තුළ ඇතිවී  තිබේ. පේරාදෙණියේ එළිමහන් රඟ හලේ   සිද්ධිය  මෙන්ම  යාපනයේ  විශ්ව  විද්යාලයේ   දෙමල සහ සිංහල සිසුන් අතර  ඇතිවූ ගැටුම    පෙන්නන්නේ රතු එළියක් නොව  එයටත් වඩා  බිහිසුණු රුධිර වර්ණ සඥාවකි. 1983  කළු  ජූලියේදී දෙමළුන්ට  පහර දීමට  සරසවි  සිසුන්ට  අදහසක්වත්  පහල නොවූ  නමුත් යලි  කළු  ජූලියක්  ඇති  වුවහොත්  සරසවි  සිසුන් කොටසක් එහි  නායකත්වය  ගන්නා  බවට බොහෝ  දුරට අනුමාන  කළ  හැකිය. 

 

  වත්මන් තරුණ  පරපුරෙන් සැලකිය  යුතු  පිරිසක්  දැඩි ද්‍රවිඪ  විරෝධයකින්  පසු  වන  බව ෆේස් බුක් හී පළවන ඇතැම් පෝස්ටු තහවුරු  කරයි. දෙමල තරුණයන් තුළද එවැනිම සිංහල විරෝධයක් තිබිය  හැක  . 27 අවුරුදු  යුද සමය තුළදී දෙපාර්ශයේම ජීවිත අහිමි වීම නිසාත්   යුද්ධයක්  තුල  උපන්  අය  නිසාත් සිංහළ තරුණයන් දෙමළුන් සතුරන් ලෙසත් , දෙමල තරුණයන් සිංහලුන් සතුරන් ලෙසත් පෙර නොවූ  විරු ලෙස දකිති ය  යන්න  මගේ   විශ්වාසයයි..මෙවැනි බිහිසුණු තත්වයක් මෙයට  පෙර   ලංකාවේ ඉතිහාසය  තුළ  තිබිනැයි  මා   නොසිතමි. 

 

යාපනයේ  සරසවියේ  සිංහල දෙමල  ගැටුම   හෝ  එවැනි සිංහල දෙමල  ගැටුමක් දුර  දිග  යාමට  ඉඩදුන  හොත් ඇති  විය  හැකි  කළු  ජුලිය 1983  කළු  ජුලිය  මෙන් දස  ගුණයක  භීෂණයක්  බවට පත් වනවාට  සැක නැත . එවැනි  භීෂණයකින්  දස  දහස්  ගණනින්  මිනිසුන්  මිය  යනු  ඇත. ලංකාවේ බොහෝ   නගර  අළු බවට  පත්වෙනු ඇත. ලක්ෂ  ගණනින්  දෙමල  මිනිසුන්  යලිත්  ඉන්දියාවටත්  යුරෝපයටත්  සරණාගතයන් ලෙස   යනු  ඇත    එවැන්නක ප්‍රතිඵලයක්  ලෙස   ඉන්දියාවද  ඇමරිකාවද ,යුරෝපයද  වඩාත්  ප්‍රබල  ලෙස  ලංකා  දේශපාලනයට  මැදිහත්  වනු  ඇත. . අවසාන ප්‍රතිඵලය එක්සත්  ජාතීන්ගේ  සංවිධානයේ මැදිහත්  වීමෙන්  උතුරට  සහ  නැගෙනහිරට  ෆෙඩරල්  පාලනයක් ලබා දීම හෝ එයිටත් එහා ගිය සහ සන්ධීය  පාලන ක්‍රමයක් ලබා දීම විය හැක. 

 

 

 

Monday, July 11, 2016

යහපාලනයේ හොරු ගස් බඳීව් !

 

 

 

මිනිස්සු  එක්සත්  ජාතික  පක්ෂය  නැවත  බලයට පත් කර ගත්තේ ඔවුන් බොධිසත්තයන් නිසා නොවේ. රාජපක්ෂලාගේ සහ ඔවුන්ගේ ආවතේව කරුවන්ගේ දුෂ්ට පාලනයෙන් හෙබ්බත්  උන  නිසාය.  1977-94 කාලයේ එක්සත්  ජාතික  පක්ෂ ආණ්ඩුව කළ  හරිය ඇසුවොත් බල්ලන් බත්  කන්නේ  නැත. 77 බලය  ගත්  විගස  යු එන් පි. කාරයෝ  විරුද්ධවාදීන්ගේ ගෙවල් දස  දහස්  ගණනකට  පහර දී අලාභ  හානි කළහ. 'ඕන  තරම්  ගහපියව් ' කියා  JR සතියක් දෙකක්ම ඇස්  පියාගෙන  සිටියේය. 77-80 අතර ඇතිවූ  කම්කරු විරෝධතා ව්‍යාපාර වලට පහර දීමට මැරයන් එව්වේ බයිසිකල් චේන්, යකඩ පොලු  ආදියෙන් සන්නද්ධ  කොටය. එකල ඔවුනට නායකත්වය දුන්නේ දැන් මහින්ද  සමග බුදියන  ගාමිණී ලොකුගේය. දවසක වැටුප රු.10 කින් වැඩි  කරන ලෙස ඉල්ලා  1980 වැඩ වර්ජනය  කළ රජයේ සේවකයන් 40000ක්  ගෙදර යැව්වේ JRගේ  ආණ්ඩුවය. 1983 දෙමල මිනිසුන් දහස්  ගණනක් මරා  ඔවුන්ගේ  කෝටි දහස්  ගණනක දේපොළ  ගිනි තිබ්බේද , මංකොල්ල කැවේද  unp ආණ්ඩුවේ  නායකයන් විසින් මෙහෙයවූ මැරයන්ය. යාපනයේ පුස්තකාලය  ගිනි  තිබ්බේ  UNP  නායකයන් කීප දෙනෙකුගේ  මෙහෙයවීමෙනි. කොටින්ම 1983 වන විට  60  ගණනක් පමණක් සිටි කොටි සංවිධානය දහස්  දහස්  ගණනක් බවට  පත්  කළේ JR ජයවර්ධනය.

 

ගිය අවුරුද්දේ මහා මැතිවරණයේදී එක්සත්  ජාතික  පක්ෂයට වැඩි  ආසන  ගණනක්  ලැබුනේ UNP  කාරයන් වැඩිවී ඇති  නිසා නොව මහින්ද එපා වීමත්  මෛත්‍රී කෙරෙහි මහජන විශ්වාසයක් ඇති වීමත් සහ  සිවිල්  ජනයාගේ  ව්‍යාපාර  නිසාත්ය. ආරම්භක  සමයේ සිල් ගෙන  සිටි  UNP  සිල් රෙදි ගලවා  දැන් දැන්  තම හෙළුව  ප්‍රදර්ශනය කරන්නට  පටන් ගෙන  තිබෙන බවක් පෙනේ. ( හොඳ වැඩද  කළ බව  කියන්නට  මා  පසු බාන්නේ නැත 19 ව්‍යවස්ථා සංශෝධනය සහ කොමිෂන් සභා පත් කිරීම , අධිකරණය ස්වාධීන  කිරීම  තොරතුරු දැන ගැනීමේ  පනත සම්මත  කිරීම, රාජ්‍ය  සේවක වැටුප් වැඩි  කිරීම  ආදිය ප්‍රසංශා  කටයුතුය. එහි ගවුරවය මෛත්රීටද  හිමිය.)

 

මහබැංකු බැදුම්කර සිද්ධියේදී  වංචාවක් සිදු වී ඇතැයි  පිළිගන්නට මුලදී මගේ  හිත  නොදුන්නත් දැන් නම් පෙනෙන්නේ මේ මහා වංචාව පිටුපස  UNP ලොක්කන්  සිටින  බවය. විගණකාධිපති විසින් බැඳුම් කර  ගනදෙනුවෙන්  රටට දැවැන්ත  මුදල් සම්භාරයක් අහිමි වී ඇති  බව තහවුරු  කිරීම   කිසිවෙකුට  නොසලකා හැරිය  නොහැකිය.ඔහුගේ වාර්තාවෙන් කලබලයට  පත් UNP ලොක්කන් විගනකාධිපතිට  එරෙහිව පොලු  මුගුරු අතට  ගැනීම  අපට සිහි  කරන්නේ 'පුහුල් හොරා  කරෙන් දැනේ ' යන  කුමාරෝදයේ  තිබු  කතාවය.

 

බස්නාහිර  පළාතේ  මාවත් සංවර්ධනය  කිරීම  සඳහා රු.බිලියන 3.6   කොන්ත්‍රාත්තුවක්   UNP අමාත්‍ය දයා  ගමගේ පුතාගේ   ඔලිම්පස් නැමැති කොම්පැණියකට දීම   රාජපක්ෂලාගේ  ගැහිලි වලට දෙවෙනි වන්නේ  කෙසේදැයි   UNP    කාරයන් අපිට  කියා දෙන්නේ  නම් හොඳය.

 

නොරොච්චෝලේ  විදුලි  බලාගාරයට ඉදිරි  අවුරුදු  තුන සඳහා ගල් අඟුරු සැපයීමේ කොන්ත්‍රාත්තුව  අඩු  මිල  ඉදිරිපත්  කල සමාගමට  නොදී වැඩි මිල  ඉදිරිපත්  කල සමාගමට දීම  පිටුපස  සිටින්නේ  එක්සත්  ජාතික  පක්ෂයද ශ්‍රී ලංකා  නිදහස්  පක්ෂයද  කියා  තවමත්  පැහැදිලි  නැති  බැවින් ඒ  ගැන පසුවිටෙක ලිවීමට  කල්  තබමි. ( විදුලි බල ඇමති ශ්‍රී ලංකා  කාරයෙකි.)

 

දැනට  පෙනෙන්නේ  නම් UNP  ගහන්නට  පටන්  ගත්තා  පමණකි  යන්නය.   එක්සත්  ජාතික  පක්ෂය (මහින්දගේ  පාලන සමයේ) මුදල් අතින් වැලේ වැල්  නැතිව  සිටියේය. පක්ෂයට අයත්  ඉඩමක් පවා  විකුණන්නට එජාපයට සිදුවුයේ  ඒ  නිසාය. සියලු  ජාවාරම් කාරයන් තමාගේ පරණ හාම්පුතා අමතක  කොට  මහින්ද වටා එකතුව  සිටීම  UNPය  මුදල් අතින්  බංකොලොත්  ගැහීමට  හේතු  විය. ඒ  කාලයේ  එක්සත්  ජාතික පක්ෂය නඩත්තු  කිරීමට දයා   ගමගේ  මහතා සැහෙන  මුදලක් වියදම්  කළ  බැවින්  මහින්ද ඔහුගෙන්   පලි  ගත්තේ දයා  ගමගේ විසින්  ධනය යොදවා දියුණු  කොට තිබු පැල්වත්ත සීනි සමගම ආණ්ඩුවට  පවරා  ගැනීමෙනි. බංකොලොත්  ගසා  සිටි  එක්සත් ජාතික පක්ෂයට ඉකුත් මහා  මැතිවරණයේදී  අත දිග  හැර වියදම්  කරන්නට සල්ලිය බාගය හිටි  හැටියේ  ප්රාතුර්භුතවී  තිබිණ.  සමහරු  කියන්නේ  මහ  බැංකු  බැඳුම් කර   ගනදෙනුවෙන් කොටසක් සිරිකොත භාණ්ඩාගාරයට ගිය  බවය.

 

මාක්ස්වාදය  කියන්නේ  ධනපති  ක්‍රමය වනාහි  හොරකම හැර අන්  යමක්  නොවන බවය. එහෙත්  'උනුත් හොරු ,මුනුත්  හොරු ' කියමින්  රතු  කොඩි  අරගෙන  යන අය දෙස මහජනයා  තවමත් බලන්නේ  නැත්තේ ඒ  අයගේ  පරණ කැරැට්ටුව මතක් වන විට ඔවුන්ගේ  පපුව "ඩිග් " " ඩිග් " ගා  ගැහෙන  නිසාය.

 

ඒ  නිසා  මහජනයා වන  අපට තිබෙන්නේ  කට වහගෙන  සිටීම  නොවේ. මහින්ද  යලි ගෙන්නා   ගැනීමද  නොවේ.  ආණ්ඩුවේ වැරදි වැඩ  හෙළි  කිරීමය. විවේචනය  කිරීමය .  පොරොන්දු  ඉටු කරන ලෙස  බලකිරීමය. යහපාලනය පිහිටුවීම සඳහා අවශ්‍ය  නීති රීති සම්මත  කරන ලෙසය.    හොරු අල්ලා  අවුරුදු 20  කටවත්  හිරේ    යවන  ලෙසය . ඒ සඳහා විශේෂ අධිකරණයක්  පිහිටුවා ඉක්මන් කොට  නඩු අසා ආයිත් දේශපාලනයට  එන මං අහුරන  ලෙසය. 

එහෙත් ඒ  ටික  කරයිදෝ  යන්න  සැක  සහිතය. හේතුව  නම් UNP සහ ශ්‍රී ලංකා පක්ෂ දෙකේම  ඉන්නේ  ඒකෙන් මේකටත් මේකෙන් ඒකටත්  මාරු වූ නායකයන්ය. මේ  අය  නැවතත්  මෙහෙන් එහෙටත් එහෙන් මෙහෙටත්  තමන්ගේ  සාක්කුව වෙනුවෙන්  මාරුවෙනු  ඇත. තාවකාලිකව පස මිතුරු වුවද  ඔවුන් අතර ඩීල්  තිබිය  හැක. එබැවින්  විස්වාශය තැබිය  යුත්තේ මේ  පක්ෂ දෙකේ  නායකයන්ගේ  කතන්දර  මත නොව සිවිල්  ජනයාගේ බලපෑම්   මතය. එබැවින් පුරවැසියන්ගේ  වගකීම  වන්නේ තමන්ගේ  සංවිධාන  දෙවුන්දර තුඩුවේ  සිට  පේදුරු තුඩුව  දක්වාම  ගොඩ  නගා  "දුන් පොරොන්දු ඉටුකරනු! "  කියා කෑ ගසා  කීමය.

 

සිවිල්  ජනයාගේ සංවිධාන ශක්තිමත්  කිරීම අවශ්‍ය  වන්නේ ඒ  නිසාමය .

Friday, July 8, 2016

ඉස්කෝලේ විප්ලවයට මහින්ද සමග පෙරට

 

 

තෙවරප්පෙරුම  මන්ත්‍රී තුමා එල්ලෙන්නට  යාම  නිසා  මගේ   හිත කීරි  ගැසුනේය . ඉහින් කනින් දාඩිය වැක්කුරුනේ රාවණා ඇල්ල වගේය.එමෙන්ම  හදවත  උණුවී වැක්කෙරෙනවා සේ දැනිණ .එවැනි  උත්තමයෙක් හදිසියේ අභාවප්‍රාප්ත  වුවහොත්  රටටම  හෙන  පාඩුවකි. හදිසියේ කවුරු  හරි  ලිඳකට පැන දිවිනසා  ගත්තොත්  මිනිය  ගොඩ  ගන්නේ  කවුද? පාසල්වලට  කඩා  පැන විදුහල්පති  වරුන්ගේ බෙලි සහ  හිස  පිරිමදින්නේ  කවුද?  රනිල්ට  වැනි  ලොක්කෙකු  වුවද  තඹ  පයිසෙකට ගණන්  නොගන්නා  ධීර වීර මන්ත්‍රී  වරයෙකු  කෙසේ  සොයා  ගන්නද? ආයිත්  පළමු ශ්‍රේණියේ  ළමුන්ගේ  ප්‍රස්නෙකට  ඉදීරිපත් වී   පාසලකදී බෙල්ලේ වැල දා  ගත්තොත්  මොන දෙවියනට  කියන්නද ? එබැවින් එම  උත්තමයාට  එවැනි අභාග්‍ය  සම්පන්න ඉරණමකට  ලක්වීමට ඉඩ  දී  මට  බලා සිටින්නට  පුළුවන්  කමක් නැත . එබැවින් පළමු ශ්‍රේණියට  ඇතුලත් වීම සඳහා ඉල්ලුම්  කරන  සියලු දෙනාගේම  බලාපොරොත්තු   ඉටුවෙන පරිදි අධ්‍යාපනයේ  මහත්  විප්ලවයක්  කළ  යුතුය. මේ  විප්ලවය මට  තනිවම  කළ නොහැකි  බව  ඕනෑම  මෝඩයෙකු  පිලිගන්නවා ඇත.  විප්ලවය  කරන  හැටි  මා  දන්නා  නමුත් ඒ  සඳහා  හොඳ  පොරක් සිටිය     යුතුය.

 

 තෙවරප්පෙරුම  හොඳ  පොරක් උවත්  එයා  මේ වැඩේට  හය්ය  වැඩිය. හය්ය වැඩි වූ  විට ප්‍රති විප්ලවයක් ඇතිවී විප්ලවකාරයනුත් එක්කම හැඳි ගෑවී  යන්නට  පුළුවන .අනුර  කුමාර මට මතක් විය. කල්පනා   කොරගෙන කොරගෙන  යනවිට එයත් මේකට  හරියන්නේ  නැති බව  පෙනුනි. එයා  දැන් විප්ලව   කොරන්නට කැමති  නැත. විප්ලව  කොරන්නට ගොස් 88-89  කාලයේ  වුන වින්නැහිය   එතුමාට  තවමත් අමතක  නැති  පාටය. සමහර විට තව අවුරුදු  පහක් හයක්  ගිය විට  විප්ලවයක්  කොරන්නට හිතෙන්නට  පුළුවන. එහෙත්  අධ්‍යාපනයේ  විප්ලවයක් කිරීම  එතකල් ප්‍රමාද  කළහොත් ඉස්කෝලවල   ප්‍රශ්න උග්‍ර වී  මවුවරුන් පාසල්වල බෙල්ලේ  වැලදාගන්නට   පුළුවන.

 

අකිල විරාජ්  කාරියවසම්ට  කියාද වැඩක්  නැත.එයා  පියරු  බබෙක් විතරය.කසාද  බැඳ  වැඩි දවසක්  නැති බැවින් ඔහුගේ  හාමිනේ  කියන දෙයක්  කරනවා  මිස අධ්‍යාපනයේ  විප්ලව  කරන්නට එතුමා සුදානම් නැති  බව මට ඉඳුරාම  විස්වාසය .අනික  මෙවැනි  බරපතල දෙයක් තේරුම්  ගන්නට  ඔහුට  මොලයක්  තිබේ දැයි මට  ෂුවර්  එකක්ද  නැත.

 

රනිල්ට  කියාද වැඩක් නැත. එයා  මේ දවස්වල ඉන්නේ  හිතේ  අමරුවෙන්ය. අර්ජුන් මහේන්ද්රව  මහා බැංකුවේ දිගටම  තබා ගන්නට බැරි  උන  බැවින්   රනිල්  බලා   ගත් අතේම බලා  ගෙන  සිටින  බවත් කෑම  මේසයේදී  පවා කෑම  නොකා  කල්පනා   කරමින්  ඉන්න  බවත්   රොයිටර් වාර්තා  කර   තිබේ.

 

මයිත්‍රීට  කිව්වත් වැඩක්  වෙන්නේ  නැත. ඔහු  පළමු තැන දී තිබෙන්නේ   අරක්කු  සහ සිගරට් මිල වැඩි  කරන කතා  කියන්නටත්ය..(  උදේ  සිට  හැන්දවෙන තුර වෙහෙසෙන  අපි වැනි නිර්ධන  පන්තියට  තිබෙන එකම විනෝදය කාලක් දාගෙන  සිගරට්ටුවක  ආස්වාදය විඳීම  පමණි. හාමිනෙත් දැන්  කාමරේ අගුල් දමාගෙන  නිදා ගන්නා  බැවින්  එහෙම විනොදයක්වත් අපිට නැතිය. )ඒ  මදිවාට තමන්ගේ  පක්ෂය  මංකොල්ල  කරුවන්ගෙන් බේරා ගැනීමේ යුද්ධෙක  උන්නැහේ තත්පරව  ඉන්නා  බැවින් අධ්‍යාපන විප්ලවයක් කරන්නට  එතුමාට  සිහි කල්පනාවක් නැත .

 

මේකට  ටක්කෙටම  හරි  යන්නේ  මහින්ද  රාජපක්ෂ  මහතාය. එතුමාට  පන්සල්වල  සහ  හිර ගෙවල්වල  යාම හැර වෙන වැඩක්  නැති  බැවින් අධ්‍යාපන විප්ලවය  ගැන මගේ  අදහස් එතුමාට ඉදිරිපත්  කළ විට ඔහු,   එම  යෝජනාවලට  එකඟ වන බවට  කිසිදු  සැකයක් නැත.

 

එතුමාට  ලියා  යවන මගේ යෝජනා  වල  පිටපතක් ඔබගේ  දෑන  ගැනීම  සඳහා ඔබ  වෙත  කල් ඇතුවම  ඉදිරිපත්  කරන්නේ හෙට අනිද්දා  එතුමා  අගමැති  වූ පසු මේවා  එතුමාගේ  යෝජනා  ලෙස  රටට  හඳුන්වා දී මගේ  බුද්ධිමය  දේපොළ  අයිතිය මංකොල්ල  කෑ  හැකි  යැයි මගේ  පොඩි  කොල්ලා  කිව්  නිසාය.

 

ගරු මහින්ද  රාජපක්ෂ මැති  තුමනි!

මෙන්න  මගේ  අධ්‍යාපන විප්ලවය සඳහා වන  දස  වැදෑරුම්  යෝජනා  මාලාව

1    පළමු ශ්‍රේණියට ඉල්ලුම්  කරන සියලුම ළමයින්  ගන්නට  ඕනාය. ( ඉඩකඩ  නොවරදවාම  මදි වන  බැවින් පාසැල අවට තිබෙන නිවෙස්  , ඉඩ  කඩම්  ආණ්ඩුවට පවරා  ගත   යුතුය.)

 

2   ඩේස් පුටු මදිවෙන බැවින් ඒවා   හදා  ගන්නා  තුරු  ළමයින්  පාසලට ඇතුළු  කරන  දින දෙමාපියන්  කීප දෙනෙකු  එකතුවී පැදුර  බැගින්  විදුහල්පතිට  හෝ පළමු ශ්‍රේණියේ  ගුරුවරියට/ගුරුවරයාට  භාර  දිය  යුතුය.

 

3   පන්තියක  ළමුන් 100ක්  හමාරක් වන විට එක එක  ළමයාගේ  අභ්‍යාස  බැලීමට  ගුරුවරයාට වෙලාවක්  නැති බව  අමුතුවෙන් කිව  යුතු  නැත.. එබැවින්  උසස් පෙළ  ටියුෂන්  පන්තිවල ළමුන් දාහ ,දෙදහ දමාගෙන  දේශනා  පවත්වන  අයුරින් කුඩා ළමුන්ටද දේශන  මගින්  ඉගැන්විය  යුතුය.

 

4   දේශන අසන  විට ඒවාට  අකැමති පොඩි  පැටව් රණ්ඩු  සරුවල්  කිරීමටද  පන්ති  කාමර (වැරදීමකි. දේශන ශාලා )  දෙවනත් කිරීමටද  බෙහෙවින්  ඉඩ කඩ තිබේ. එවිට  ඔවුන්ට  දඬුවම්  නොකළ  යුතුය. මන්ද එය දරුවන්ගේ  මුලික  අයිතිවාසිකමක්  කඩ  කිරීමක්  බැවිනි. ඒ  වෙනුවට  ඔවුන්ට  නින්ද  යාම සඳහා  බෙහෙත්  ලබා  දිය  යුතුය. ඒ  සඳහා  බෙහෙත්  ලබා   ගැනීමට GMOA  එක  හෙවත් ඔබ තුමාගේ කීකරු දොස්තරලගේ සංගමයේ   සහය  ලබා ගත   යුතුය. ඒ සඳහා  ගාස්තු දෙමාපියන්ගෙන් එකතු  කර ගැනීමට  යෝජනා කරමි.

5   අවුරුද්දෙන් අවුරුද්ද කල්  ගත වන විට  පාසල්වල   ඉඩ  කඩ  තව තවත්  මදි  වන  බැවින්  පාසැල අවට  තිබෙන  අනිකුත්   නිවාසද පාසල් වලට  පවරාගෙන  ඒවායේ  ඇතුලත  බිත්ති  කඩා  දමා  පන්ති ශාලා  බවට  පත්  කොට ගත  යුතුය.

 

( ළමුන් වැඩි  වන  විට ගුරුවරුන්ද  වැඩියෙන්  උවමනා යැයි  කිසිවෙකුට  හිතෙන්නේට ඉඩ  තිබේ. එසේ  වන්නේ  නැත. මන්ද  ළමුන්ට ඉගැන්වීම  කරන්නේ දේශනා  මගින්  නිසාය. ළමුන් දාහකට  වුවද දේශනා  මගින් ඉගැන්විය  හැකි  බව  ලංකාවේ  ටියුටරි  විසින් සැකයකින්  තොරව   ඔප්පු  කර  තිබේ.)

 

6    මෙහි සඳහන් අගනා  යෝජනා  ක්‍රියාත්මක  කරගෙන  යන විට ජනප්‍රිය  පාසල්  අවට  තිබෙන පාසල්  වැසී  යනු  ඇත. එය  හොඳය. මන්ද ජනප්‍රිය  නොවන  පාසල්වල ගුරුවරු ඒවාට  යන්නේ අකමැත්තෙන්ය. ඔවුන් ස්ථාන මාරු  ඉල්ලා කරදර  කරන්නේද  ඒ  නිසාය.එබැවින්  ඔවුන්  විශ්‍රාම  ගැන්වීම  හෝ ලොකු  මුදලක් සමග සේවයෙන්  ඉවත් කිරීම කළ  යුතුය.

 

7     අවට  පාසැල්   වැසුණු  පසු ඒවායේ  ඉගන ගත්  සිසුන් කොටසක් දුර  බැහැර  පාසලකට  යාමට  වත්කමක් නොමැති  බැවින්  අධ්‍යාපනය  නතර  කොට නිවසට වී  නිකරුනේ  සිටීමේ  අනතුරක්  තිබේ.  ඉගනීම  මුලික  අයිතියක් බැවින් ඔවුන්ට  රස්තියාදු වීමට  ඉඩ  නොදිය  යුතුය. වැසී  ගිය  පාසල්වල  ගොඩ  නැගිලි  භාවිතා  කරමින් එම  ළමුන්ට  වෘත්තීය  අධ්‍යාපනයක් දීමට  ගම්වල සිටින වෘත්තීය  වේදීන්ට  පැවරිය  යුතුය.තේ  දළු  කැඩීම, රබර් කිරි කැපීම,  එළුවන් කුකුලන්  හරකුන්  බලා  ගැනීම ,  මන්තර සාස්තරය  ඉගැන්වීම , කේන්දර  නැකත් බැලීමට ඉගැන්වීම, ( මෙය ඉතා  උසස්    සාස්තරයක්  බව සෑම  රුපවාහිනි  නාලිකාවකම වගේ  ඔප්පු  කොට  තිබේ.)ආරූඪ වී පේන  කීම , පොල් කැඩීම  යනාදිය ඉහල  ආදායම් ලබා   ගත හැකි වෘත්තීන්ය .පොල් කඩන අය   හිඟ බැවින් මෙය  රටට අවශ්‍යම වෘත්තියකි.දවසට  පොල් ගස් 20  ක පොල්  කැඩීමෙන් රු.2000ක  ආදායමක්  ස්ථිර වශයෙන්ම  ලබා  ගත  හැක. 

 

8    මා ඉදිරිපත්  කරන මේ  යෝජනා ක්‍රියාත්මක කොට අවුරුදු  දුසිමක්  හමාරක්   ගත  වන විට සැම  පාසලකම  සිසුන් විසි තිස්  දහසක්  සිටිනු  ඇත.එවිට  පාසැල පිහිටි  ප්‍රදේශය  එකම නගරයක්  වනු  ඇත. එහි වැසියන්ගේ  ආර්ථික ශක්තියද  පාසැල කේන්ද්‍ර  කර  ගනිමින්  ඉතා  ඉහලට  නැංවෙනු ඇත.

 

9    එසේම   සැම  ජනප්‍රිය  පාසලක්ම විශ්ව  විද්‍යාලයක්  තරමට  ලොකු මහත් වී තිබීම  ස්ථිර  බැවින්  එම  පාසල්  භූමියේම  පස්වරුවේ  සහ  රාත්‍රී  කාලයේ  විශ්ව  විද්යාලයක් ආරම්භ  කළ  යුතුය. එමගින්  පළමු ශ්‍රේණියට ඇතුළුවන  සෑම  සිසුවෙකුටම ,සිසුවියකටම එහිදීම  උපාධියක්  ලබා  පිටවීමට  අවස්ථාව  ස්ථිර ලෙස  එළඹෙනු  ඇත.

 

10   මගේ අවසාන යෝජනාව වන්නේ කිසිදු සිසුවෙකු විභාග ෆේල්වුවාට අසමත් නොකරන ලෙසය.  අසමත්  කරන්නට ගියහොත් පාසල්වල   සිසු සංඛ්‍යාව වැඩිවී  ඉඩකඩ  මදිවෙනවා  පමණක්  නොව ඔවුන් අතර  සිටින නොසන්ඩාල  කොල්ලන්  සහ  කෙල්ලන් උපවාස  කොරන්නටත් විදුහල්පති වරුන්ගේ  බෙල්ල  මිරිකන්නටත්,  විදුලි  පංකාවල  එල්ලී දිවි නසා ගන්නටත් ඉඩ  තිබේ.  

 

ඉහත සඳහන් මගේ  අධ්‍යාපන  යෝජනා  ක්‍රියාත්මක  කිරීම  මගින් සැම මවෙක්ම  පියෙක්ම   අතිශයින්  ප්‍රීතියට  පත්වන අතර ඒ  නිසා  ඔබ  තුමාට  අවසන් හුස්ම හෙලන  තුරු  අගමැතිවරයා ලෙස  හෝ ව්‍යවස්ථාව  යලි සංශෝධනය  කරගෙන ජනාධිපති  ලෙස  නැවත  නැවත  තේරී  පත්වීමට හැකිවනවා සහතිකය. 

එබැවින්  හෙට අනිද්දා  ඔබ  තුමා අගමැති වූ  වහාම ඉහත  යෝජනා  ක්‍රියාත්මක  කරන  ලෙස  උදක්ම  ඉලා සිටිමි.

අධ්‍යාපන  ඇමතිකම සඳහා තෙවරප්පෙරුම  මහතා පත්  කිරීමටද වග  බලා   ගනු  ඇතැයි සිතමි.

 

තැන්කියු සර් 

යුවර් ඔබීඩියන්ට් සර්වන්ට්

බර්ටි රණවීරගේ .

 

ප. ලි. අධ්‍යාපන ඇමති  තනතුරට මා  පත් කිරීමට  හදිසියෙවත් අදහසක්  ඔබ  තුළ  ඇති වුවහොත් එයට  මා අකමැති බැවින් එසේ  නොකරන  ලෙස  ඉල්ලා සිටිමි.  එයට හේතුව  නම් මට වෙනත්   රාජකාරි නප්පියටම  තිබෙන  නිසාය.   අමනාප  නොවන්න.

Friday, July 1, 2016

තෙවරප්පෙරුමගේ බාල සටන සහ අපේ ඉස්කෝල

  

 

 

 තෙවරප්පෙරුමගේ  ඉස්කෝල  සටන ගැන සමහරුන්ට  හරි ත්‍රිල්ය. එහෙත්  සමහරුන්ට  උරු ජුවල්ය. ත්‍රිල්  කාරයෝ අතර  වැඩියෙන් ඉන්නේ ඉගැන්විල්ල  ගැන මෙලෝ  හසරක් දන්නේ නැති  අය  බව කිව  යුතුය..අධ්‍යාපනයට  කිසිදු  සම්බන්ධකම් නැති  වෙනත් ශේෂ්ත්‍රවල    ඉන්නා    සමහර උගතුනුත්  තෙවරප්පෙරුම න්‍යාය  හරි  ලෙස  දකිති.  ටියුෂන් පන්තිවල  දහස්  ගණන් ළමුන්ට  එකවර  උගන්වන්නට  හැකි  නම් ඉස්කෝලේ  එසේ  කරන්නට  බැරි  ඇයිදැයි සමහරු  ප්‍රශ්න  කරති.පාසල්  නැති  ළමුන්ගේ  ප්‍රශ්නයට  විසඳුම  කුමක්දැයි  තවත්  සමහරු   අමනාපයෙන්  අසති. එහෙත් අධ්‍යාපනය  ගැන  දන්නා  අය  නම් තෙවරප්පෙරුම  මන්ත්‍රීවරයාගේ  සටන  ගැන   කිසිදු  සතුටක් නැත.වැඩි විස්තරයක්  උවමනා  නැත  පළමු  ශ්‍රේණියේ  පන්තියක ළමුන්  40 දෙනෙකුගේ  ඝෝෂාව  පාලනය  කිරීම පමණක්  ගතහොත් එයම  කොපමණ  දුෂ්කර  දැයි  සිතීම  ප්‍රමාණවත්ය.

 

කෙසේ  වෙතත්  තෙවරප්පෙරුම   මන්ත්‍රීවරයාගේ   වැරදි සටන  තවත්  අය  ඉදිරියේදී  අනුගමනය  කිරීමට   ඉඩ  තිබේ. පළාත්  පාලන  චන්දයක්   ලබන වසරේ පැවැත්වීමට  නියමිත  හෙයින්   ජනවාරි මාසයේ  සිට  පළාත්  පාලන  අපේක්ෂකයෝ පාසලට  ඇතුල්  නොකර  ගනු  ලබන සිසුන් වෙනුවෙන්  පන්ති  කාමර වල  , විදුහල්පති   කාර්යාලවල    පමණක්  නොව  පාසල්වල වහල  වල්  උඩද උපවාස  ඇරඹීමට  ඉඩ  තිබේ.

 

පාලිත  තෙවරප්පෙරුම මන්ත්‍රීවරයා නරක  මිනිහෙකු  ලෙස  හංවඩු  ගසන්නට  මා   කැමති  නැත . මිනිස්සු  කවුරුත්  හොඳ  සහ  නරක ගති ගුණ තිබෙන  අයය. ඔහු  අවංක මිනිහෙක් බව ඔහුගේ චර්යාවන්  දෙස  එබී බැලු  විට පෙනේ. ඔහු   මහපොළොවට අඩි  කීපයක්  යන්නෙකු  නොවේ.. සම වයසේ  කාටත්  පහේ  මචං   කියා  කතා  කරන්නේ  ඒ  නිසා  විය  යුතුයැයි  මා  අනුමාන  කරමි.  දේශපාලනයෙන්  සල්ලි කඩා  ගත්  අයෙකුද  නොවේ. ජාතිවාදයෙන්  ඔත්පල වුවෙක් නොවේ. තම ජීවිතයට වන අනතුර  ගැන නොසිතමින්   මුස්ලිම්  කාන්තාවන්  සහ දරුවන්  කීප  දෙනෙකු  ඥානසාර  මැර  කල්ලියේ  ප්‍රහාරවලින්  බේරා ගැනීමට  ඉදිරිපත්  වුයේ ඒ  නිසාය.

  එහෙත්    ඔහුට  කිසියම්  මොලයේ  අමාරුවක්  තිබෙන  බව සමහරුන්ගේ  විස්වාසයයි 

ඔහු  විස්වාස  කරන්නේ  ඔහුගේ හය්යෙන්  පමණක්  ඕනෑම  දෙයක්  කළ  හැකිය  කියාය.බැන වැදීමෙන් , රණ්ඩු  කිරීමෙන් , තරජනය  කිරීමෙන් , පහර දීමෙන් , උපවාස  කිරීමෙන් සහ  දිවි  නසා  ගැනීමට  තැත්  කිරීමෙන්   ඕනෑම  ප්‍රස්නයක්  පාහේ   විසඳිය  හැකි  යැයි ඔහු  තදින්  විස්වාස  කරන බව පෙනේ. ඔහු  බලන්නට හෝ  ඔහුගේ  උපවාසය  නතර  කිරීමට හෝ   UNP  නායකයන්   මතුගම  පැත්ත  පළාතේ  නාවෙත්  ඔවුන්ගේ  උපදෙසේ  වුවත් පාලිත  මායිම්  නොකරන  නිසා  විය  හැකිය.  

ඔහුගේ   බාල  පන්නයේ සටන් නිසා  දවසක ඔහු  අමාරුවේ  වැටෙන  බවට  නම් සැකයක්  නැත.අංක එකේ  මෝඩ  කම් වැලක්  කර  ඇති  බව  එදාටවත්  ඔහුට වැටහහේ  දැයි  සැකය.

 

කෙසේ  වෙතත්   තෙවරප්පෙරුම   අත  තිබ්බේ  දේශපාලකයන්මේ සහ තවත්  අය     ගිනි  මොලවා ඇති    ප්‍රශ්යකටය.  පළමු  ශ්‍රේණියට  ළමුන් ඇතුලත්  කිරීමේ  ප්‍රශ්නය විවිද  තැන්වල   වරින් වර විවිධාකාරයෙන්   මතුවේ. පසු  ගිය  වසර වලදී  ඒවා  එලියට ආවේ  දෙමාපියන්ගේ  පිකටිං  සහ  උපවාස හරහාය.

 

මේ  ප්‍රශ්නය  මෙතරම් උග්‍ර  කිරීමේ එක් කොටස්  කාරයෙකු  වන්නේ  හිටපු  අග්‍ර  විනිශ්චයකාර  සරත් නන්ද ද  සිල්වාය.   පළමු ශ්‍රේණියට  බඳවා ගැනීමට  අදාල  අධ්‍යාපන  අමාත්‍යංශයේ   චක්‍ර  ලේඛයක්  මගින්  ආදී  ශිෂ්‍යන්ගේ  කෝටාව  15%  කිරීමට එරෙහිව  ආදී ශිෂ්‍ය සංගමයක් කලකට  පෙර උසාවි  ගිය  විට  සරත්  නන්ද  සිල්වා කැකිල්ලේ  නඩු  තීන්දුවක් දෙමින් ආදී  ශිෂ්‍යයන්ගේ  කෝටාව  25% ක් කළ  යුතුයැයි  නියෝගයක් දුන්නේය.. මේ  තීන්දුව නිසා  පාසලට  ආසන්න  පදිංචි  කරුවන්ගේ  දරුවන්ට  ඉතිරිවූයේ  ඇබෑර්තු සංඛ්‍යාවෙන්  50%  පමණි. ඉතිරි   සියයට විසි  පහෙන් 15% ක්  සහෝදර  පදනමටද , අධ්‍යාපන අමාත්‍යංශයට  සම්බන්ධ සේවකයන්ගේ දරුවන්ට 5%ක්ද , ස්ථාන  මාරු ලබා පැමිණි  රජයේ  සේවකයන්ගේ  දරුවන්ට   4%ක්ද   විදේශ වල  පදිංචිව  සිට  පැමිණි දෙමාපියන්ගේ  දරුවන්ට ඉතිරි 1% ද  හිමි  විය . එය එදා  සිට  අද  දක්වාම ක්‍රියාත්මකය.

පළමු ශ්‍රේණියට   ළමුන් ඇතුලත්  කිරීම  සම්බන්ධයෙන්  වැඩි  උනන්දුවක් මේ  මොහොතේ  ඇති වී තිබෙන  බැවින්  වැඩි  දුරටත්  ඒ  ගැන   ලිවීමට  මා කැමතිය. එහෙත් ත්‍රිල්  කැමැත්තෝ  තම ත්‍රිල  අහෝසි  කොට දැනුමක් ලබා   ගැනීමට  අකැමති  නම් නොකියවා   සිටීම  හොඳය.

 පළමු ශ්‍රේණියේ එක් පන්තියකට  ඇතුළු කිරීමට  චක්‍ර  ලේඛ මගින්   නියම  කර  තිබෙන්නේ  සිසුන් 40ක්   පමණි. එම 40 දෙනා  තෝරා  ගන්නේ  පහත සඳහන් පරිදිය.

 

පළමු සම්මුඛ පරීක්ෂණයෙන්                                                                    30

ක්‍රියාන්විත රාජකාරි කළ/කරන හමුදා/පොලිස්  නිලධාරීන්ගේ දරුවන්           7

අභියාචනා/විරෝධතා   මගින්                                                                      3

ඇත්ත  වශයෙන්ම   පදිංචිය  මත , සහෝදර පදනම් මත  ආදී ශිෂ්‍ය  පදනම  මත සහ  අනෙකුත් පදනම් මත  එක්  පන්තියකට  ඇතුලත්  කරගන්නා  සංඛ්‍යාව  33ක්  පමණි. ඉතිරි 7 තෝරා  එවන්නේ  හමුදාවල  සහ  පොලීසිවල  ඉහල  නිලධාරින්ය.

 

පාසලක  පළමු ශ්‍රේණියේ පන්ති  කීයක්  පවත්වාගෙන  යන්නේද  යන කරුණ  තීරණය වන්නේ  අදාළ  පාසැල සතු සම්පත්  ප්‍රමාණය  මතය.පළමු ශ්‍රේණියේ  පන්ති  3 ක්  ආරමභ කළහොත් ඉන්  ඉහළ ශ්‍රේණිවලදීද එම පන්ති සංඛ්‍යාවම පවත්වාගෙන  යාමට  සිදුවේ. ඒ  සඳහා  ඉඩ කඩ ,ඩේස් පුටු ඉගැන්වීමේ  උපකරණ සහ ගුරුවරුද අවශ්‍ය වේ

 

ඇත්ත  වශයෙන්ම ලංකාවේ සියලුම  සිසුන්ට  ඉගනීමට අවශ්‍ය  පාසල් සංඛ්‍යාවක් තිබේ. ප්‍රශ්නය වී තිබෙන්නේ  ළඟ තිබෙන  පාසලට ඇතුලත්  කරනු  වෙනුවට  ජනප්‍රිය  පාසල්වලට සිසුන් ඇතුලත් කර  ගැනීමේ දෙමාපියන්ගේ සටන නිසාය.  පසු  ගියදා දොස්තර  මහත්තුරු සහ  නෝනලා  ඉසුරුපාය  ඉදිරිපිට විරෝධතා  ව්‍යාපාරයක් පැවත්තුවේද  තමන්ගේ දරුවන්ට  හොඳම  පාසල්  ඉල්ලමිනි.දීමපියන්ගේ මේ සටනේ  ප්‍රතිඵලය වන්නේ  ග්‍රාමීය  පාසල්වල එක්කෝ  මැස්සන්  ඇහිරීමය .නැතහොත් ඒවා  වැසී  යාමය.

 

මෙම  අර්බුධයට දෙමාපියන් මෙන්ම දේශපාලකයන්ද  බොහෝ  දුරට වග කිව යුතුය.  තම දරුවා  අපේක්ෂිත  පාසලට  තොර නොගත්  විට  දෙමාපියන් යන්නේ  දේශපාලකයන්  හමුවීමටය. මනාප චන්ද  එකතු  කිරීමට  පළමු තැන දෙන  දේශපාලකයා අධ්‍යාපන  බලධාරීන්ට  විවිධ  බලපෑම්  කරමින් දෙමාපියන්ගේ  ඉල්ලීම් ඉටු  කිරීමට වෙහෙසක්  දරයි. මේ  බලපෑම් නිසා  බොහෝ ජනප්‍රිය  පාසල්වල  පළමු ශ්‍රේණියේ සිට  ඉහල  පන්තිවල  සිසු සංඛ්‍යාව   50 -60  අතර  දක්වා ඉහල  ගොස්  තිබේ. පන්තියක ළමුන් සංඛ්‍යාව  වැඩි වන  තරමට  අධ්‍යාපනයේ  ගුණාත්මක භාවය   පහලට  යතත්  මන්ත්‍රීවරයාට එය  ප්‍රස්නයක්  නොවේ. ප්‍රස්නය දෙමාපියන්ද  කවදාවත් වටහා   ගන්නේ  නැත.තමන්ගේගේ  කොල්ලා   හෝ  කෙල්ල විභාගය අසමත්  වූ  විට දෙමාපියන්  බනින්නේ  ඉගැන්වූ  ගුරුවරුන්ටය.

 

කෙසේ  වෙතත්  තෙවරප්පෙරුම  මහතා  මීගහතැන්න  ප්‍රථමික  විද්‍යාලයේ එල්ලෙන්නට  යාම හොඳය. ඔඩු  දුවා ඇති  පළමු ශ්‍රේණියේ ප්‍රශ්නය සම්බන්ධයෙන්   (තෙවරප්පෙරුම ගේ  ගෝරිය  නිසා) අධ්‍යාපන  ලොක්කන් යලි  සිතන්නට පටන්  ගැනීමට ඉඩ  තිබේ. ලබන වසරේ  පලමු ශ්‍රේණියට  ඇතුලත්  කරන සංඛ්‍යාව  39 කට  සීමා  කිරීම නිසා තත්ත්වය  වඩාත්  වියවුල්  සහගත තත්වයක්  ඇති වීමටද  ඉඩ  තිබේ. එබැවින්  2017  සඳහා  නිකුත්  කර  ඇති චක්‍ර ලේඛය සංශෝධනය   කිරීම ඇඟට  ගුණය.

එහෙත්එක්  පන්තියකට  ඇතුළු  කර  ගන්නා  ශිෂ්‍ය සංඛ්‍යාව වැඩි  කිරීම  මහජනයා අතර  ජනප්‍රිය  විය  හැකි  වුවද  එය  ගුණාත්මක අධ්‍යාපනය පිරිහීමට  හේතුවන බැවින් කළ  හැකි වෙනත් දේ  තිබේ. එහෙත් ඒවා  මෙහි දැක්වීමෙන් මේ  ලිපිය කියවීම එපා  වෙන  තරමට දිගු විය  හැකි  බැවින් ඒවා ගැන මා   ලියන්නට  යන්නේ  නැත.

 

තෙවරප්පෙරුම මන්ත්‍රීවරයා  කරනවානම්  කළ  යුත්තේ   අධ්‍යාපන කාර්යාලවලට  සහ  විදුහල්පති  කාර්යාලවලට කඩා  පැනීම නොව ආදී ශිෂ්‍යන්ගේ දරුවන් වෙනුවෙන්   අයුක්ති සහගත  ලෙස  වෙන් කොට ඇති 25%  කෝටාව  අහෝසි කරන ලෙස ඉල්ලා උසාවි යාමය  .එය  ඔහු  ජය   ගත  හොත් ඔහු  කළ මෝඩ  කම් බොහෝ  දුරට සේදී  යනු  ඇත.

 

 

 

සවුදි අරාබියේ මාලිගා විප්ලවයක් -500 ක් අත් අඩංගුවට

                                              ඔටුන්න  හිමි  මොහමඩ් බින් සල්මාන්  කුමරු                        තවමත්  නවීන  ලෝකයට  ප...